رواية ضي ويامن للكاتبة مريم قنديل هي حكاية تنبض بالمشاعر وتفيض بالصراعات الداخلية والخارجية، حيث تتقاطع الأقدار وتتشابك المصائر في قصة حب مختلفة لا تخضع للمنطق أو الزمن.في رواية ضي ويامن، يعيش القارئ حالة من الانجذاب العاطفي والتوتر النفسي، وسط أحداث متسارعة تكشف أسرارًا مدفونة وقرارات مصيرية تغير كل شيء. الرواية لا تقدم حبًا مثاليًا، بل واقعيًا، مليئًا بالتحديات والتضحيات.
رواية ضي ويامن من الفصل الاول للاخير بقلم مريم قنديل
~مالك يا حبيبي بتعيط ليه ؟
( ولد صغير لبسه كويس قاعد علي الرصيف وبيعيط جامد)
اتكلم وهوا عمال يعيط _ب با بابي بابي سا سبني و مسي “مشي”
نزلت علي ركبتي قدامه وبصتله وانا بمسح دموعه من علي وشه
~سابك إزاي يعني كده في الشارع لوحدك؟
_قالي انو مبقاس “مبقاش” يحبني وإنه مس “مش” عايزيني
هنا صوت عياطه بدأ يعلي اكتر اخدته في حضني وقعدت اطبطب عليه ~خلاص يا حبيبي متزعلش حقك عليا .. طب انت اسمك ايه ؟
_آسر
اتكلمت وانا بخرجه من حضني ~الله ايه الاسم الحلو ده …اجبلك مصاصه ؟
_ماسي “ماشي”
شلته بايد واحده علي كتفي وفي الايد التانيه اكياس الطلبات ال ماما قالتلي انزل اجيبها علشان العريس الجاي لي النهارده .. روحت جبتله مصاصه وكلها .. اخدته و طلعت بيه الشقه وهوا كان خلاص نام علي كتفي من كتر العياط ياخي حسبي الله ونعم الوكيل فأي حد يوجع قلب طفل صغير
فتحت باب الشقه وحطيت الطلبات علي السفره .
=ضيّ انتي جيتي اتاخ… ينهار اسود مين ده ؟
~بس يا ماما علشان آسر ميصحاش أنا مصدقت بطل عياط
=آسر مين يا بت
~هدخل انيمه جوا طيب واجي احكيلك .
دخلت نيمته وطلعت حكيت لماما الحصل وقعدت تسب و تلعن في الراجل السابه.
“انا ضيّ 25 سنه خريجة كلية صيدله ، معنديش اخوات وبابا متوفي ، طولي متوسط وعيني خضرا وبشرتي مبين الابيض والسمار و محجبه “
=طب هنعمل ايه يا ضيّ ؟
~ولا حاجه يا ماما هيعيش معانا .
=ازاي يا ضيّ البتقوليه ده ؟ اهله لو عرفوا انك واخده ممكن يعملوا مشاكل يابنتي وانا مش حمل الكلام ده.
~اهله ايه يا ماما ها؟؟! يسيبه طفل مكملش 6 سنين لوحده ذنبه ايه في الدنيا ؟ لو مش عارفين يربوا و يتحملوا مسؤلية بيخلفوا ليه ويدمروا اطفال كل مشكلتها في الدنيا انهم اهلهم ، الاطفال من حقها تلعب و تتشقي تغلط و تتعلم تفهم و تتستعوعب من حقهم يضحكوا و يحسوا بالحنان والحب مش الكره و الزعل والخوف والرهبه من اي تصرف يعملوه .. حرام بجد .
=اهدي يا بنتي .. طب هنعمل ايه في العريس الجاي النهارده ؟
~ما يجي الاه فين المشكله يا ماما .. ولو مش عاجبه يمشي .
=ماشي يا بنتي قومي اجهزي .
قومت جهزت ولبست و ظبطت نفسي و محتطش ميكب خالص . بصيت علي آسر وهوا نايم علي سريري ببرآءة الدنيا كلها .
الساعه جت 7 معاد و صول العريس ، خبط علي الباب و ماما فتحت .
=اهلا اهلا نورتونا اتفضلي يا حاجه اتفضل يا حج اتفضل يابني .
قعدوا بعد ما سلموا ..
والد العريس:اومال فين عروستنا
=ثانيه هندها .
طلعت وانا ماسكه الصنيه قدمت لهم العصير و قعدوا يتكلموا شويه .
والد العريس:طب نسيب العرسان شويه .
مشيوا وفضلت انا وهوا .
-ازيك يا ضيّ انا يامن .
~بخير الحمدلله .
– انتي فكراني ؟
~اه طبعا .. حضرتك الكنت بتيجي تاخد علاج ولدتك من الصيدلية البشتغل فيها؟
ابتسم -ايوه بظبط .. أنا من ساعة ما شوفتك و أنا اعجبت بأخلاقك و أدبك و قررت اني اجيب اهلي واجي اتقدملك .
ابتسمت وسكت أسلوبه جميل اوي في الكلام تخليك ترتاح و انت بتكلمه اكنك عارفه من زمان، طويل و عينه تشبه القهوه شعره اسود غامق و بشرته بيضه والابتسامه مش بتفارق وشه ، كان كل اول شهر يجي بنفسه ياخد علاج ولدته الشهري من الصيدليه البشتغل فيها وكان محترم جدا في تعامله معايا .
كمل كلامه لما لاقاني سكت وبصيت في الارض -أنا مهندس وعندي مص …
قاطع كلامه دخول آسر عليهم الأوضه وهوا بيعيط .. اتجهت ضيّ ناحيته و نزلت علي ركبتها علشان تبقي في نفس مستواه و اخدته في حضنها .
اما يامن فتصدم وقال -آسر!!!
يتبع ….
↚
بصدمه- آسر!!
طلعت آسر من حضني ووقفت و بصتله بإستغراب ~ إيه ده انت تعرفه ؟
_باااابي
لقيت آسر جري عليه بفرحه علشان يحضنه ويامن نزل علي ركبته و فتحله دراعته وحضنه
~بابي ايه؟! ده ابنك!
تجاهل كلامي ووجه كلامه بتوتر ملحوظ ل آسر بعد ما خرجه من حضنه- بص يا حبيبي انا انا أوعدك اني هاجي اخدك تمام، بس في ناس هتيجي دلوقتي متقولش أي حاجه قدامهم ماشي يا حبيبي؟، انت خليك مع مع طنط ضيّ و انا هاجي بعد كده اخدك و اوديك الملاهي ماشي ؟
حرك راسه بطريقه طفوليه بمعني موافق _ حاضر يا بابي أصلاً طنط ضيّ جميله .
باسه في خده وقال- شاطر يا حبيبي.
قام وقف وبصلي فأتكلمت ~ ايه ده؟ انت..
قاطع كلامي دخول ماما وأهله
والد يامن : ها يا ولاد ايه الاخبار ؟ الله مين الولد العسول ده؟ اخوكي يا ضيّ؟
ببص ليامن لقيته بصلي باصه بيتراجني فيها اني متكلمش
~هااا
اتكلم هوا بتوتر -اه يا بابا اخوها شوفت بقي مشاء الله .. انا انا اتكلمت مع ضيّ وهيا قالت انها هتفكر و ترد عليا وكده .
والدة يامن: طب خير إن شاء الله.. نستأذن احنا بقي .
-اه يلا يلا نمشي .
قرب مني واتكلم بصوت واطي-انا اسف بجد .. خدي بالك منه .. و شكرا ليكي علي كل حاجه.
من صدمتي مكنتش عارفه أرد عليه ده انا كنت بدأت أحبه إزاي يطلع مخادع و وحش اوي كده؟ ده طلع متجوز و مخلف! طب ازاي ومراته فين ؟ وإزاي يرمي ابنه في الشارع ده شكله غني حتي ايه العذر اليغفرله غلط زي ده ؟ وازاي اهله مش عارفين ان آسر حفيدهم و أن يامن متجوز ؟ ومراته إزاي تسيب ابنها وتسيب جوزها يروح يتجوز؟
مفوقتش غير علي صوت ماما وهي بتقفل الباب و بتقول =آه يا ضيّ انا قلبي وقع في رجلي لما آسر طلع والله يامن ده بن حلال .
بصتلها بشرود~ ها؟
=ها ايه يا بنتي مالك في ايه ؟
~لا لا ولا حاجه يا ماما أنا بس تعبانه شويه هدخل اريح .. يلا يا آسر تعالي نخش جواه .
مسكت ايده و دخلنا الاوضه و قعدته علي السرير ، شربت مياه علشان اهدي شويه وبدأت اسأله
~آسور انت تعرف الراجل الحضنك برا ده ؟
اتكلم بفرحه _اه ده بابي .
~طب انت تعرف الاتنين التانين المشيوا دلوقتي معاه ؟
_لا عمري ما سوفتهم “شوفتهم”.
~امم .. طب مامي فين يا حبيبي ؟
_مامي مس “مش” موجوده بابي قالي انها عند ربنا في السما .
~طب هوا ازاي بابي سابك وهوا شكله بيحبك ؟
_بابي بيتغير .
~نعم ؟ بيتغير ازاي ؟
_يعني ساعات يجبيلي حاجات حلوه كتيررررر اوي و يفسحني و يوديني الملاهي و يلعب معايا و ساعات يضربني و يستمني “يشتمني” و و
وهنا بدأ يعيط _ ويقولي اني السبب في موت مامي.
اخدته في حضني وطبطت عليه~لا يا حبيبي انت مش سبب في حاجه انت جميل متعيطش ماشي؟
فضلت قاعده جنبه لحد ما نام ، دماغي مليانه بركان اسأله نمت من كتر التعب .
تاني يوم
صحيت صليت و لبست وفطرت آسر وروحت الصيدليه ، كنت متوقعه انه يجي يفهمني، بس مجاش! يوم ورا يوم بيعدي وماما بتزن عليا علشان تعرف ردي و انا مش عارفه اقولها ايه هي لو عرفت ان آسر بن يامن احتمال تديهولوا او تقول ل مامته وباباه ، عدا اسبوع كامل و مجاش .
وفي يوم كنت مروحه من الصيدليه وكنت ماشيه في طريقي للبيت .
-ضيّ
كان صوته كان هوا التفت و بصتله كان فاتح باب الكرسي الجنب السواق وواقف وراه ، مهتمتش ليه و رجعت مشيت في طريقي وانا بمد حقيقي مش قادره اتكلم معاه .. كرهته!!
لقيته وقف قدامي
-ضيّ اسمعيني .
~ابعد من وشي .
-لا مش هبعد .. انا عايز آسر .
~نعم ؟ ده بعينك .
-ضيّ لوسمحتي هاتي آسر وانا هفهمك كل حاجه.
~انت لسه فاكر ان ليك ابن أصلا .
– يا ضيّ علشان خطري .
~ملكش خاطر عندي .
مسح بأيده علي شعره بيحاول يهدي – ضيّ انا هفهمك كل حاجه بس عايز آسر .
اتكلمت بعصبيه ~تفهمني ايه ؟!!
اتكلم بعصبيه و صوت عالي فيه نبره غريبه- اني دايما بتعاقب علي ذنب مش ذنبي علي حاجه انا اصلا معملتهاش!
~متزعقليش .. مفيش أي حاجه في الدنيا تبرر انك تسيب ابنك في الشارع .
-مش ابني .
↚
-مش ابني .
~انت هتجنني ابنك ولا مش ابنك .
-طب تعالي نقعد في كافيه و هفهمك علشان وقفتنا في الشارع كده غلط .
ركبت العربيه معاه وروحنا كافيه قريب و قعدنا فيه.
ابتسم وبصلي – تشربي ايه؟
اتكلمت بعصبيه~مش عايزه اشرب حاجه .. ممكن تفهمني ؟
شاور للويتار علشان يجي
الويتار: اؤمر يا فندم ؟
-اتنين منجه لو سمحت .
الويتار: تحت امرك .
مشي الويتار فأتكلمت ~ انت إزاي مستفز كده … انا بكرهك!!
لقيته بصلي جامد ومال بجسمه نحية التربيزه و شبك ايده الاتنين و حطها علي التربيزه واتكلم- آسر يبقي ابن اخويا و …
قاطعته~والله! صدقتك انا كده؟ طب إزاي آسر مبيعرفش يفرق مابينكوا ؟
بصلي جامد واتكلم بتحذير -متتكلميش تاني .. انا و اخويا تؤام متشابه جدا الفرق الوحيد في الشكل هيا حسنه كبيره شويه عند اخويا “فراس” في حاجبه الشمال .
اتكلمت بفرحه ~يعني انت مش متجوز ؟
ابتسم وقال -لا .
اتكلمت براحه ~الحمد لله .
-ايه ؟
~لا ولا حاجه .. لا ثانيه انت كداب و مخادع ازاي اهلك مش عارفين حفيدهم و ازاي اصلا اخوك يسيب ابنه في الشارع .
-ده موضوع كبير .
~عايزه اسمع .
رجع بضهره لورا وبدأ يحكي – انا الناجح و المتفوق الدايماً مشرف ابوه والي اهله بيحبوه و يهتموا بيه و المدرسينه بيحلفه بشطارته والكل الناس بتحبه علشان مش بيقول لا وبيسمع الكلام ، وفراس كان عكسي تماماً مش بيحب المذاكره ولا الكتب و دايما اهله و مدرسينه و الناس كانوا بيشتكوا منه و من تمرده و انه مش بيسمع الكلام و بيقول لا و صريح جدا وتلقائي في تعامله … ده الكان الناس بتقوله علينا ، زمان واحنا صغيرين تقريباً كنا 9 سنين فراس عمل مشكله في المدرسه وصلت المديره تعمله استدعاء ولي أمر بابا جيه المدرسه والمديره هزقته و قعدت تقوله ابنك مش متربي و قليل الادب و كلام شبه كدا كتير بابا ساعتها غلط غلطه كبيره انه مدافعش عن ابنه ولو بكلمه بالعكس بابا اعتذر ليها كمان ، بابا لما روح ضرب فراس و حابسه في الاوضه .
قطع كلامه دخول الويتار بالعصير ، حط الويتار الكوبيتين ومشي.
خد تنهيده وكمل – انا بحب اخويا اصل هوا اخويا لو انا محبتهوش مين هيحبه ؟ هوا طيب وحنين جدا و ذكي و شاطر عكس ما كل الناس شايفه .
ابتسم وكمل-انتي عارفه زمان واحنا صغيرين كان عندنا قصه في العربي كنت بديله دور فيها وانا دور و نقعد نمثله هوا كان بيحب كده مش بيحب يقعد يبص في الكتاب بيحب يفهم و يستعوب مش يصم و يحفظ ، كنا بنتفق دايما الهيخلص الواجب الاول التاني هيجيبله شيبسي ، انا كنت ببقي محتاجه معايا اكتر ما هوا محتاجني ، كنت بقعد اهزر معاه في المذكره علشان ميملش كنت بحاول اخليه يذاكر بكل الطرق بس …
اختفت ابتسامته- بابا كان بيجي يهد كل ال عملته بكلمة “فاشل” ، بابا مش قادر يغفر له انه اتهان بسببه بس هوا كان طفل يعني بيغلط مش هنقتله يعني .. كنت فاكر ان المشاكل هتنتهي لحد كده بس ، كبر فراس ودخل الكليه وحب بنت اسمها نور راح لبابا وقاله انه عايز يتقدم لها بس بابا رفض علشان البنت يتيمه و ميعرفش حاجه عنها وقاله ينسها و انه هيتجوز بنت عمه ساعتها اخويا اتعصب وقاله لا انا بحب نور و هتجوزها بابا ضربه بالقلم يوميها وقاله لو اتجوزتها مش هدخلك بيتي و ولا انت ابني ولا اعرفك اخويا ساب البيت فعلا ساب واتجوزها اخويا لما يحب حد بيبقي مستعد انه يتنازل عن كل حاجه حتي لو روحه علشانه ، اديته مفتاح شقه علشان يقعد فيها هوا ونور ، كان بينزل يشتغل كل حاجه سباك قهوجي يغسل مواعين كل حاجه حرفياً علشان يجييب فلوس و يجبلها كل حاجه بتتمنها … بابا لما كان بيسألني عنه كدبت عليه وقولتله لا متجوزش وانه سافر برا يكمل حياته مكنتش عايز بابا يكره أكتر من كده وماما كانت عارفه الحقيقة وكانت بتطمن عليه من خلالي، عدا فتره علي غيابه عن البيت كنت بشوفه واتكلم معاه واهون عليه كان دايما يقولي نور ديه لو اطول اجبلها السما بنجومها هعمل كده كان بيحبها اوي ، وفي يوم من 6 سنين موبيلي رن الساعه 2 بليل ..
فلاش باك ..
-الو
•ايوه يا يامن الحقني بسرعه نور بتولد تعالي علشان نخدها المستشفى.
-انا جايلك حالا
قومت اتنفضت من علي السرير و روحتله البيت واخدتهم وروحنا المستشفى .
•اهدي يا حبيبتي هتبقي كويسه .
بصويت وعياط°مش قادره يا فراس اهههههه مش قااااادره اههههه.
دخلوها العمليات و بعد ساعتين كان في صوت طفل الدكتور خرج وهوا شايل الطفل و بيمد ايده بيه: احنا أنقذنا الطفل ، بس للأسف معرفناش ننقذ الأم البقاء لله .
اتكلم بعصبية وصوت عالي•نعم ؟؟ انت بتقول ايه ؟ نور نور فين .. انا انا مش عايزه انا عايز نور مراتي فين .
اخدت الطفل انا من ايد الدكتور كان فراس في حالة صعبه قعد يصرخ باسمها في المستشفى .
باك
-نور ماتت و موتها موت فراس بالحيا هوا بيكره آسر لأنه دايما شايف انه لو مكنش جيه كان زمان نور موجوده .. من ساعات موت نور وهوا مطفي بيصحي يعيط و ينام تاني هي كانت معوضه عن كل حاجه كانت شبهوا في أفكاره وطريقته، ويوم ما ساب آسر في الشارع كان يوم وفات نور رحلها عند قبرها و انا كنت عايز امشي من عندكوا علشان كنت خايف ليعمل في
نفسه حاجه قعدت 4 ايام بدور عليه لحد ما لقيته نايم جنب قبرها كان تعبان اوي اخدته المستشفى علشان كده معرفتش اجي وافهمك .
حسيت ساعتها وهوا بيحكي قد ايه هوا انسان جميل كنت مش عارفه ارد اقوله ايه…
قاطع افكاري صوت جرس موبيلي كانت ماما .
~الو يا ماما .
=…
بصدمه~ايهه؟؟؟!
↚
????
بعياط=الحقيني يا ضيّ آسر اتخطف.
بصدمه~ايههه؟!
بخضه- في ايه يا ضيّ … آسر جراله حاجه.
بتوتر~انتي انتي فين يا ماما دلوقتي .
*فتحت ال سبيكر علشان يامن يسمع *
=انا في حديقة **** قولت انزل اغيرله جو قعدته علي تربيزه وروحت اجبله ايس كريم رجعت ملقتهوش يا بنتي مش عارفه اعمل ايه دورت عليه في كل حته.
~طب خليكي عندك يا ماما انا جايه لك .
*قفلت الخط معاها *
-آسر ضاع؟
بتوتر~لا لا ان شاء الله هنلقيه متقلقش.
اتكلم بصوت عالي-مقلقش ايه ده انا سايب امانه معاكي لو كنتي بطلتي عند و جبتيه زي ما قولتلك مكنش كل ده حصل ،اعمل ايه انا دلوقتي اقول ل فراس ايه؟
~فراس ايه السابه في الشارع ، و بعدين مش هنقعد نقول لو لو قوم يلا ندور عليه.
بصلها و قام-لو حصله حاجه يا ضيّ عمري ما هسمحك .
خد مفاتيحه من علي التربيزه و مشي وهيا مشيت وراه ركبه العربيه وراحه لمامتها اول ما ضيّ شافت مامتها جريت عليها حضنتها .
بجديه-حضرتك سبتيه فين يا طنط؟
باستغراب=يامن؟ انت ايه الجابك.
-مش وقته يا طنط حضرتك سبتيه فين .
=سبته على نفس التربيزه ال أنا قاعده عليها دلوقتي ديه .
اتكلمت وهيا بتشاور علي محل الايس كريم = روحت جبت الايس كريم من هناك رجعت لقيته اختفي ، دورت في الالعاب وكل حته ملقتهوش .
بص يامن لماماة ضيّ بعتاب وبعدين راح سأل كل الناس عليه وضيّ قعدت تدور معاه ،قعدوا يدورا ملقوش حاجه ومفيش كميرات ، وصل يامن ضيّ ومامتها البيت بعد تدوير اكتر من تالت ساعات نزلت مامات ضيّ من العربيه وقبل ما تنزل ضيّ.
~أنا اسفه ان شاء الله هنلق..
قاطع كلامها-انزلي يا ضيّ مش عايز اسمع صوتك.
بصتله ودمعه نزلت من عيونها ونزلت، طلعت الشقه هيا و مامتها كانت اول مره تخش و متلقيش آسر يجري عليها ويحضنها .
=ضيّ هوا يامن ماله مهتم بآسر اوي كده ؟
عيطت غصب عني اول ما جابت اسم آسر .
اتكلمت وهيا بتحضنها =اهدي يا ضيّ هنلقيه ان شاء الله متقلقيش هيروح فين يعني.
~انا السبب يا ماما أنا المدتلوش آسر.
خرجتني من حضنها=هوا كان عايزه ليه ؟!
اتكلمت وانا بمسح دموعي~علشان آسر يبقي ابن اخوه .
=نعم!!! واخوه سابه في الشارع ليه ؟!
~هحكيلك ياماما.
حكيتلها كل حاجه ، حقيقي كنت محتاجه احكي لحد مكنش ينفع اشيل كل ده لوحدي .
=خلاص يا حبيبتي اهدي ان شاء الله هيرجع بالسلامه.
~بس هوا مش هيسامحني يا ماما .
=يا حبيبتي انا السبب مكنش ينفع اسيبه انا اصلا يا بنتي مكملتش دقيقتين رجعت ملقتهوش … خشي ريحي شويه بس علشان انتي تعبتي النهارده وان شاء الله خير.
~ يارب .
عند يامن كان طول الطريق بيفكر هيقول ايه لفراس وهوا اصلا فراس السبب في كل الحصل ده وكان مضايق أنه زعق لضيّ و اضيق اكتر لما شاف دمعتها نزلت ، راح بيت فراس علشان كان خرج من المستشفى بقاله يومين راح يطمن عليه .
-فراس انا جيت.
بلهفه•لقيت آسر.
بتوتر-لا بس أن شاء الله هلاقيه يعني.
بدموع•انا خايف عليه يا يامن أنا مشوفتوش بقالي اكتر من اسبوع خايف يجراله حاجه مش عايزه يروح مني .
بعصبية-مفكرتش في كل ده وانت بتسيبه ليه ها؟
•مكنتش قادر استحمل وهوا كل شويه عمال يجيب سيرة نور بيقولي كان نفسي يكون ليا ماما زي صحابي أنا أعمل ايه ، بيقولي فسحني يوم ميلادي مش قادر يفهم أن يوم ميلاده هوا يوم وفاة نور انا تعبت.
-ده طفل يا فراس طفل مش فاهم مش حل انك تسيبه في الشارع اديك خسرت كل حاجه.
•اسكت يا يامن .
-مش هسكت لأن بسببك خسرتني البنت البحبها .
باستغراب•نعم؟ وانا مالي؟
بصوت عالي -ايوه خلتني ازعقلها علشان مهتمتش بآسر .
مسكه من ياقة القميص •ايه آسر ايه ايه علاقه آسر وهوا فين انطق .
اتكلم وهوا بيبعد ايده -ابعد ايدك .. هحكيلك.
*حكله كل حاجه بالتفصيل *.
قام فراس وقف•يعني آسر كان قدامك و ضيعته؟
مسح يامن علي وشه-أنا الضيعته ؟ انت ليه بتحملني هم كل حاجه وكل مصايبك.
اتكلم بزعيق•علشان مليش غيرك .. يعني ابني خلاص كده .
-اهدي يا فراس أن شاء الله هنلاق..
قاطع كلامه صوت جرس الباب -روح افتح يا فراس .
•مين ده الهيجلنا دلوقتي.
راح فراس فتح الباب
بفرحه•آسر !!
شاله وحضنه بس نزله لما اتصدم بالشخصين الظهره وراه
يتبع ….
↚
بفرحه•آسر !!
شاله وحضنه بس نزله لما اتصدم بالشصين الظهره وراه .
جيه يامن بفرحه علي صوت فراس لما قال آسر بس اتصدم هوا كمان لما شاف الشخصين العلي الباب .
بصدمه- ماما بابا!
الأب وهوا بيوجه كلامه لفراس: إزيك يا فراس ؟
دخل فراس جوا بآسر وقعد علي الكنبه وحط آسر علي رجله وضمه ليه منغير ما يرد علي باباه .
بتوتر-ا اتفضل يا بابا خشي يا ماما وقفين علي الباب ليه .
دخلوا و قعدوا فأتكلم يامن بتوتر -انتو لقيتو آسر فين ؟
الأب بحده:آسر ده الأنت كدبت عليا وقولت أنه اخو ضيّ ؟
-هوا حضرتك عرفت ؟
الأم:أنا قولتله كل حاجه يا يامن كفايه لحد كده … وهوا بعت حد يراقب مامات ضيّ ولما نزلت بآسر الجنينه اخدوا وجابهولنا.
اتكلمت وهيا بتوجه كلامها لفراس: يلا يا فراس لم حجاتك علشان ترجع تعيش معانا .
بصلها بسخريه•انتي لسه فكراني ؟
الأم: حبيبي أنا عمري ما نسيتك أنا ب…
•أنا بس مش عايزكوا في حياتي ابعدوا عني .. أنا مش عايز اعيعش مع ناس مش قبلني ومش حبين وجودي انتوا وصلتوني لمرحله أني أكره نفسي.
الأب بحده:ولد متعليش صوتك وأتكلم بأدب .. انت العصيت امري وأتجوزت واح..
قاطعه•أتجوزت واحده بتحبني واحده قابله وجودي واحده قبلتني وأنا في أصعب وقت في حياتي واحده قبلتني لما أنت أتخليت عني واحده حبتني وعوضتني عن كل حاجه .
كمل بكسره•ومشيت و سابتني كان نفسي أفرحها .. أنت بسببك خلتني أحرمها من أني اعملها فرح زي بقيت البنات وأني أسعدها أنا كنت بتمرمط كل يوم وكان علي قلبي زي العسل علشان خاطرها .
كمل كلامه•أنت ليه بتظلمني كده .. ده يامن يوم ما قالك عايز أتجوز روحت علي طول وأنا ايه مش ابنك ؟ ليه حرمتني من أني أفرح؟
الأب: أنا محرمتكش من حاجه أنت الكنت مستهتر وقليل الأدب .
•طيب أنا كده جاي ليه؟ مش أنت قولتلي ولا أنت أبني ولا أعرفك جاي ليه؟
الأب: جاي علشان اخد حفيدي ونصلح الاتكسر.
بسخريه•حفيدك؟ حفيدك ده الأنت كنت السبب في تعاست ابوه؟
كمل بقهر• بابا .. ياه أنا وحشني أني أقولك بابا متخيل أنت حرمتني من إيه؟
الأب:أنا آسف يا بني عارف أني غلط .
بدموع•مش قادر أسامح بجد والله مش قادر أسامحك صعب عليا أوي أني أسامحك .
الأم:طب تعالي يا حبيبي معانا طيب و..
قاطعها•مش هقدر بجد .
مشي الأب والأم لما يأسوا منه .
-اهدي يا فراس …كله هيبقي كويس.
•انا بحبه بس مش قادر أسامحه يا يامن .
-طب خش ريح وكله هيبقي تمام …هات آسر أنا هدخل انيمه جوا.
تاني يوم ضيّ نزلت الشغل في الصيدليه و بعد ما خلصت وهيا خارجه من الصيدلية لقت يامن مستنيها قدام باب الصيدليه بعربيته .
-ضيّ .
بإبتسامه~يامن ..لقيت آسر؟
-اه.
~لقيته فين ؟
بتوتر-ها.
~لقيت آسر فين ؟
-بابا عرف كل حاجه وأتفق مع واحد أنه يراقب مامتك و ياخد آسر منها .
بإستغراب~إيه؟ .. طب ليه مجاش وخدوا ليه الأسلوب ده!
-مكنش عايز يعمل قلق ليكوا وكان عايز حفيده بأي شكل أول ما عرف الحقيقة.
~ أنا أعصابي باظت و كمان أنت زعقتلي .
-أنا آسف يا ضيّ والله .
~أصرفها منين آسف ديه ؟ أنت خلتني انام معيطه وأحلم بكوابيس طول الليل .
-والله ما كنت أعرف أنا آسف بجد مش هتتكرر تاني .
مشيت وسابته.
نادي عليها-يا ضيّ .
(بعد أربع سنين)
“أتجوز يامن ضيّ واتصلحوا ،و فراس بيحاول يتغير علشان آسر وأشتغل فراس مع يامن في شركته و بيحاول يسامح باباه”
في بيت يامن وضيّ وتحديداً في المطبخ صوت أغنيه “سنين ومرت زي الثواني في حبك إنت”
~ولو قدرت أحب حد تاني هحبك إنت!
قاطع اندمجها في الأغنيه دخوله- بتعملي ايه يا حبيبتي ؟
بإبتسامه ~بعمل زلابيه.
اخد تفاحه من الطبق العلي التربيزه وقطم منها حته -امم .. عارفه يا حبيبتي إحنا ممكن نجيب لبيا و نكورها ونحطها في العسل وتبقي زا لبيا هاهاهاهاها .
بصتله بقرف~ أطلع برا يا يامن إيه القلش المعفن ده .
-ايه ده معجبتكيش .
~لا .
-طب أنا نازل .
خرج وهيا قعدت تضحك .
عند بيت فراس الباب بيخبط .
• آسر افتح الباب.
_ديه بقت عيشه تقرف .
فتح الباب وكان يامن
-آسور القمور العيد ميلاده النهارده .. شوفت جبتلك ايه؟
اخده بالحضن_حبيب قلبي.
-ايه يابني أنا بحسك راجل كبير مش عيل تم عشر سنين .
خرجه من حضنه_ياسطا ده أنا أسد وبكره أبقي أطول منك ومن الراجل الجوا ده .
-طب الراجل الجوا ده فين .
اتكلم وهوا بيقفل الباب _جوا خش … بقولك ما تيجي المسرحيه بتاعتي النهارده وهات ضيّ وتيته وجدو .
-عيني يا كبير أنت تؤمر.
_بحبك قسماً بالله.
بضحك-فاكر ياض يا آسر لما كنت الدغ في الشين.
_ما خلاص يا برنس ليه السيره الزفت ديه.
-كنت بتقولي سوفت يا عمو هاهاها.
_أنا بتهان أنا ماشي خش لأخوك في اوضته.
دخل يامن علي فراس الأوضه
-فراس .. إزيك ؟
•تمام .
بصله شويه وبعد كده حضنوا .
بدموع•عشر سنين يا يامن عدا عشر سنين وانا عايش من غيرها …الذكري العاشره ليها.
-هيا في مكان أحسن صدقني .
خرجه من حضنه وأتكلم علشان يضحكه-النهارده مسرحية إبنك بقي ممثل خلاص .
كمل وهوا بيمسح دموعه وبيضحك•الواد آسر ده عفريت وربنا.
بصله يامن في عينه- مسامح؟
سكت شويه وبعدين قال•مسامح خلاص .. عارف الأيام بتعلمك تسامح و أبوك أتغير وده بان جدا وأنا مسامحه … ومش عايز يجي اليوم وأقول ياريتني كنت سامحته .. مفيش حاجه في الدنيا تستاهل الزعل والحزن كل حاجه بتتحل … علي رأي آسر “خود الأمور بسلاسة يا بابي”.
– طب بالمناسبة بقي أنا آسر قالي اخليهم يحضروا مسرحيته بتاعت المدرسة النهارده وضيّ هجبها معايا .
•ماشي يا يامن .
-طب أنا همشي بقي وأسيبك تجهز.
•تمام .
لسه جاي يخرج من الأوضه ناداه فراس
•يامن .
-ايه؟
•شكرا انك موجود .
في المسرح وعلي أول كراسي قصاده، والد ووالدة يامن وفراس و مامات ضيّ وضيّ قاعده جنب يامن وجنبه فراس الأبتسم أول ما شاف آسر طلع علي المسرح ، صقف الجميع و بدأت المسرحيه .
_أنا آسف يا بابا .
بحده^اسفك مش مقبول انت كدبت عليا ولازم تتعاقب .
_بس انا كنت خايف من حضرتك ،أنا طفل يا بابا ضعيف لسه مش فاهم و مش مستوعب أنا محتاجك جنبي تقويني علي الدنيا المليش فيها غيرك ، عايزك يا بابا لما اغلط تكون جنبي وتسامحني و تغفرلي وتعذرني أصلي مش فاهم ، أنا محتاجك أكتر من أي حد أنت مصدر قوتي و بحس بالأمان في وجودك .. متخلنيش أحس بخوف … أنا بحبك!
حضن الأب ابنه ووقف الجميع وصقفه وصفره ودموع فراس كانت علي وشه وبيحاول يدريها بإبتسامة .
اتفاجأ الجميع من نزول آسر من علي المسرح الأخد فراس وطلع بيه تاني المسرح مسك المايك وهوا بيحضن فراس وقال – أنا بحبك يا أعظم أب في الدنيا .
“طب ما السعاده حلوه اهي .. ما تخلي حياتك سعيده انت كمان يا جميل ، مفيش حاجه تستاهل حزنك مفيش حاجه تستاهل الزعل كله بيتحل عيش حياتك وانبسط بيها ما تخليش الحزن يحتل قلبك ، الحزن مش بيغير حاجه الزعل هيتعبك، اضحك واعمل كل اليسعدك ، سامح و اغفر وخلي قلبك نقي و أبيض .. خود الأمور بسلاسه يا جميل”♥
“اِبتَسّم فأبتِسَامَتكِ تُنِير الكَون”
خلصتي؟ الرواية الجاية أقوى وأحلى… تعالي وعيشيها معانا👇