رواية استثنائية في دائرة الرفض كاملة جميع الفصول

تيم طلع السلم بخطواته الثابتة، وقف قدام أوضة يونس وخبط خبطتين خفاف قبل ما يفتح الباب ويدخل، بس أول ما عينه وقعت على البنت اللي واقفة جنب سرير يونس، حس كأن الدنيا لفت بيه، كور ايده بغضب ونده بصوته كله على اخته، يونس بص لفريده بأسف وهيا بصت للي واقف على الباب ومش فاهمه ماله ولا ليه اتضايق كده، يونس حاول يتدخل بسرعة، رفع إيده بإشارة تهدية وهو بيقول

"تيم، اسمعني بس—"

تيم بصله وقاطعه بتحذير

 " خليك ساكت احسن، خليك ساكت"

سالي طلعت بسرعة، وقلبها بيدق بقوة، بمجرد ما شافها، ثبت نظراته عليها وقال بصوت حاد

" هاااااااا؟ ايه تبريرك المرادي؟!" 

سالي وقفت قدامه، رفعت راسها بشجاعة رغم إنها حاسة بتوتر شديد وقالت 

" مفيش تبرير، فريده هيا الممرضه الجديدة اللي هتكمل مع يونس"

بس كأنها زودت البنزين على النار، لأنه فجأة انفجر بغضب، ضرب الكومودينو اللي جنبه بإيده، وصوته علي أكتر وهو بيقول

" انتي ليه مصممه تخربي البيت ده؟! ايه غرضك قوليلي، عايزه ايه يا سالي هاا؟!" 

يونس حاول يتكلم تاني، لكن تيم بصله بنظرة حاسمة سكتته فورًا.

فريدة كانت لسه مش مستوعبة في ايه وايه اللي بيحصل، بصّت لسالي باستغراب كأنها بتسأل بعينيها "هو في إيه؟!"

لكن سالي كانت ثابتة في مكانها، رغم كل التوتر والغضب اللي في الجو

قال بهدوء مخيف قبل ما يتحرك 

" خلال ١٠ دقايق مش عايز اشوف ضلها في البيت " 

كانت هتتكلم بس سابها ومشي، قربت منها فريده وسألت باستغراب

 " ايه المشكله ؟ هو يقصدني ؟!" 

اتنهدت بضيق وقالتلها 

" متهتميش باللي حصل، كملي شغلك " 

جت تمشي بس فريده وقفتها 

" لاء معلش عايزه افهم، لو في غلط ارتكبته بالرغم من اني م......" 

قاطعتها سالي 

" مفيش غلط ارتكبتيه لاء، بس انا قولتلك ان تيم شخصيه صعبه شويه وخصوصا مع أي بنت يشوفها حتى لو ميعرفهاش ودي مشكله عندنا في البيت، بس لازم يتقبلوا ده، فاتفضلي شوفي شغلك " 

مشيت وسابتها محتاره تعمل ايه، هيا مش فاهمه ايه اللي حصل اصلا، قاطع شرودها صوت يونس بيناديها، لفتله وقربت منه، قالها بأسف

 " انا بجد اسف على اللي تيم قاله " 

بصتله وحاولت تبتسم 

" حصل خير " 

سالي راحت ورا تيم، دخلت اوضته مكانش موجود، سمعت صوت مايه جاي من الحمام فعرفت أنه جوه، قعدت تستناه لحد ما خرج، خرج وشافها قاعده مستنياه، قالها بتمنى 

" ياريت تقفلي الموضوع ده نهائي يا سالي، مش كل فتره تطلعيلي بموضوع جديد وتبوظي النظام بتاع البيت " 

قامت وقفت وقربت منه وقالت بتحدي 

" فريده مش هتمشي يا تيم، هتكمل مع يونس لحد ما يقدر يقوم ويمشي على رجله ومش هجيب ممرض يتابع معاه، والنظام اللي انت فاكرني ببوظه فده بسبب تفكيرك اللي اتغير ١٨٠ درجه، لكن أن بحاول اظبط النظام واخلي حياتنا حياه طبيعيه وعاديه بدل النظام اللي ماما حطته زمان وحضرتك مشيت عليه بحذافيره من ساعة ما بابا سابلك كل حاجه " 

اخد نفس طويل وحاول يداري غضبه من كلامها

 " سالي، بلاش تفتحي الموضوع ده وياريت لو تمشي على نظام البيت، النظام ده عاجب الكل ومش هيتغير " 

قالت بإصرار 

" هيتغير يا تيم، وده لانه مش عاجب الكل، فاكر زمان لما كنا مش طايقين حياتنا بسبب النظام الصارم اللي ماما حطته، دلوقتي بالنسبالك بقا حلو ؟ انت اتغيرت اوي وانا بجد مش عارفه ارجعك، وللاسف بالطريقه دي حياتك هتفضل مملوكه لماما وبس " 

تجاهل كلامها وقال بصرامه

" مشي البنت ومتتدخليش مره تانيه في نظام البيت، واللي مش عاجبه اكيد عارف يعمل ايه " 

سكتت شويه تحاول تتحكم في نفسها وبعدها قالت بتحدي 

" فريده مش هتمشي، ولو مشيت انا كمان همشي، هاخد ابني وهروح بيتي استنى جوزي هناك، قدامك حل من اتنين يا تيم، يا نمشي انا وفريده يا نفضل انا وفريده "

" بلاش الأسلوب ده عشان انتي عارفه أنه مش بينفع معايا " قالها بتحذير خفي فعلت صوتها بغضب" طب اعمل ايه انا، قولتلك حل اهو، رد على الحل يا تيم، يا نمشي يا نفضل " 

" في حل تالت، اني امشي انا، وانتي براحتك بقا اعملي اللي تعمليه" 

قال كلامه ودخل اوضة الدريسنج يلم حاجته فدخلت وراه وحاولت توقفه بس هو تجاهلها، مسكت دراعه تعطله عن اللي بيعمله وقالتله برجاء 

" متتصرفش كده عشان خاطري، بلاش تكبر الأمور بالطريقه دي، لو بجد ليا خاطر عندك هتتجاهل اللي حصل انهارده " 

سحب دراعه وقالها 

" طيب تمام، هنعمل اسكيب ليا، وماما اللي هتيجي بعد اسبوع دي هتعملي معاها ايه ؟ اكيد انتي عارفه رأيها في الموضوع ده وعارفه هتقولك ايه بالظبط" 

حاول يقلدها وقال بتريقه

 " البيت ده ليه نظامه من اكتر من ٢٠ سنه ومش هسمح لأي حد مهما كان أنه يلغي النظام ده... مهما كان " 

رجع لطبيعته وكمل 

" مستعده تواجهيها وتعملي مشكله تانيه، انا ويونس تقبلنا نظامها ومشينا عليه ويشهد عليا ربنا اني ماشي على نظامها ده بما يرضي الله، وانتي الوحيده اللي بتحاولي تغيريه ومقتنعه انك هتقدري، بابا نفسه مش قادر يعترض على كلامها ولا يفتح بوقه، هتيجي انتي تعترضي وكمان تغيريه؟!"

اتكلمت بهدوء ممزوج برجاء

 " سيبني أعمل اللي انا عايزاه ومتوقفش في وشي، ادعمني زي يونس وبس، وأنا عارفه أنك عندك مشكله زي ماما في وجود اي واحده ست قريبه من البيت أو الشركه او اي مكان عندنا، الموضوع ده عاملي عقده نفسيه ومش عارفه ايه وجه اعتراضكوا بجد، حاول تحل مشكلتك يا تيم علشان انا مش هيأس، يا تثبت انك فعلا مش بتعاني من فوبيا من المؤنثات ومعندكش تروما من تعاملهم يا اما تعترف انك مريض فعلا والمرض عمره م....." 

قاطعها بغضب

" قولتلك انا طبيعي ومعنديش اي مشكله، بس انا مش مستعد اضايق ماما في موضوع زي ده" 

ربعت ايديها وقالت

 " يبقى وريني دعمك ليا، ساعدنا نغير النظام اللي خنقنا ده " 

اتنهد بغضب بس استسلم لرغبتها وقال

" تمام يا سالي، براحتك" 

ابتسمت وحضنته وقالت بحب 

" كنت عارفه انك مش هترفضلي طلب " 

بعد عنها وقال بعتاب

" انتي عارفه اللي فيها، وبرغم كده جايه عليا جامد" 

اتنهدت بضيق

" سيب الباقي عليا، وبس كده يا تيم"

خرجت من عنده فرحانه أنه مش هيقف في وشها واول حاجه عملتها راحت ليونس، دخلت بس كان نايم

سألت فريده 

" هو مش كان صاحي ؟!" 

ردت فريده بعمليه 

" لسه واخد مسكن تقيل شويه فنام " 

هزت راسها بتفهم وجت تمشي بس فريده وقفتها بسؤالها 

" هو انا غلطت في حاجه في شغلي ؟!" 

لفتلها وقالت بنفي

 " لاء يفريده محدش قال انك غلطتي " 

سألتها 

" طب واللي حصل من شويه ده كان ايه ؟!"

بصت في ساعتها وقالت بإيجاز

 " لينا قعده مع بعض يا فريده، بس دلوقتي عايزه اكلم ياسين ابني اتطمن عليه واشوفه هيرجع امتى من النادي، بكره إن شاء الله بعد ما يونس ياخد المسكن وينام هفهمك اللي محيرك، اتفقنا ؟!" 

هزت راسها بموافقه وقالت

 " تمام " 

عدى الوقت ببطء وحست بملل قطعه رنة فونها، ابتسامتها وسعت وردت بترحيب

 " هلا باللي نزلت من غيري انهارده هلا "

سألتها

" انا اللي قولتلك عندي شغل جديد صح ؟!"

" متدخلنيش في تفاصيل دلوقتي "

ردت بابتسامه

 " ماشي يا ستي، المهم ايه اخبار وضعك الجديد؟" 

اتنهدت بملل 

" ممل بطريقه اوفر، بس اكيد مريح عن شغل المستشفى بالنسبالي"

قالت بمزاح 

" طول عمرك متعبه، هنعمل ايه بقا"

قبل ما ترد عليها لقت الباب بيخبط، قربت تفتح وبمجرد ما فتحت لقت حد مسكها من دراعها وبيشدها وراه، حاولت تستوعب ايه اللي بيحصل لحد ما لقته دخلها اوضته وقفل الباب، بصتله بعصبية وقالت بغضب 

" ايه اللي حصل ده ؟! انت شكلك مجنون رسمي فعلا " 

تجاهل كلامها وقال بصرامه وحده 

" عايزه كام ؟!" 

بصتله باستغراب وهيا مش فاهمه بيتكلم عن ايه وردت 

" افندم ؟!" 

كرر كلامه 

" عايزه كام ؟ كلامي واضح " 

سألته بعدم فهم

 " مش فاهمه؟ عايز ايه يعني ؟!" 

بص لعينيها مباشرةً وقال بتوضيح 

" انتي جايه تشتغلي هنا عشان الفلوس صح ؟! انا دلوقتي بعرض عليكي تاخدي اي مبلغ انتي محتاجاه بس تمشي من هنا، اختاري مبلغ ايا كان هو كام وزودي الأصفار اللي تحبيها بس في المقابل تمشي من هنا " 

بصتله بصدمه وحاولت تستوعب كلامه وقالت بتلعثم " انت.... انت؟" 

كمل 

" بعرض عليكي عرض عمرك ما حلمتي بيه ولا كنتي بتحلمي، بقولك اي مبلغ تحتاجيه هديهولك، وكمان من غير ما تشتغلي، مش مصدقه نفسك صح ؟!" 

غمضت عينيها بغضب وجت تخرج بس مسك دراعها وقال 

" هتفكري في العرض صح ؟ بس هو مش محتاج تفكير علفكره، يكفي تقولي موافقه بس " 

شدت دراعها وبصتله بغضب، دورت بعينيها على اي حاجه تخبطه بيها وبدون اي مقدمات مسكت ڤازه وحدفتها عليه بس هو تلاشاها، بصتله بغضب وقالت

 " مهزق " 

خرجت بسرعه وفضلت تمشي بسرعه وحست انها تايهه في البيت الكبير ده،مشيت في الرواق الكبير وهي بتلف حوالي نفسها ومش عارفة تروح فين.

المكان فعلاً ضخم وبيتهم مختلف عن أي بيت شافته قبل كده

سمعت صوت خطوات وراها، قلبها دق بسرعة، لفت بفزع… بس لقت واحدة من الشغالات مبتسمة لها وبتسألها بهدوء

"حضرتك محتاجة حاجه؟"

ردت فريده وهي بتحاول تهدي صوتها

"كنت بدور على أوضة يونس… أنا لسه مش متعودة على المكان."

الشغالة ابتسمت وقالت

"تعالي أوصلك" 

مشيت وراها ووصلتها واستأذنت بأدب 

تيم خرج من أوضته وملامحه حاده، نزل السلم بخطوات ثابته، سالي كانت واقفة بتتكلم في التليفون، ضحكتها خافتة، لكن أول ما شافته، عينيها راحت فورًا على الشنطة في إيده.

قفلت المكالمة بسرعة وقالت بقلق

"تيم؟ إيه الشنطة دي؟ رايح فين؟"

بص لها وهو بيحاول يثبت نبرته رغم الرجفة في صوته

"أنا مش قادر أكون هنا... أنا مش هقدر أواجه ماما لما تيجي وأسكت، هتحس إني خذلتها."

سالي قربت منه، صوتها بقى أهدى لكن فيه نبرة رجاء

"بس إحنا اتفقنا يا تيم، أنت وافقت خلاص... ليه بتهرب دلوقتي؟"

هز راسه ببطء وقال

"أنا متفقتش يا سالي، انا سيبتك براحتك، بس مش هقدر ادعمك في حاجه زي دي "

قال كلامه ومشي، انسحب بهدوء، وقفت مكانها، شايفاه وهو بيبعد، قلبها مقبوض، مش عارفة تمنعه ولا حتى تطمنه، بس المرادي لازم تاخد موقف وبجد

عند فريده، الباب خبط تاني، خافت يكون هو بس قربت وفتحت بتوتر، مكانش في حد بس لمحت ورقة صغيرة متعلقة على الباب، مكتوب فيها بخط واضح

" لو فكرتي تكملي هنا، هتشوفي أيام سوده، مش بس هتتعبك، هتخلي كل حاجة حواليكي ضدك، اعتبريها تحذير من حد عارف إزاي يحمّل الكلمة وزنها، البيت ده مش لعب، وأنا مش هسمح لأي حد يتمادى"

وقفت فريدة شايلة الورقة في إيدها، وعينيها بتتحرك على السطور الباردة اللي مكتوبة بخط حاد وواضح

"تهديد؟... أنا لسه داخلة البيت من كام ساعة!"

لفت الورقة بين إيديها بتوتر، مش عارفة تتجاهل ولا تواجه، تمشي؟ ولا تكمل 

قطعت الورقه ورمتها في باسكت الزباله، ده شغلها ومش تهديد زي ده يخليها تفكر اصلا، بس فجأه الباب خبط تاني.

وقف قلبها للحظة، قربت من الباب ببطء، 

فتحت…

بس مفيش حد.

ولا صوت.

ولا حتى خيال بعيد.

بصّت يمين وشمال، الرواق فاضي، والإضاءة خافتة وعاملة ضل غريب على الحيطان،

رجعت تقفل الباب… بس لفت نظرها حاجة على الأرض.

نفس الورقة اللي لسه رامياها، متنية ومرمية قدام الباب.

ركعت بسرعة تشوف الورقة… نفس الخط، نفس الكلمات.

دخلت الاوضه وقفلت الباب بسرعة، فضلت ماسكة الورقة في إيدها، عنيها ثابتة عليها، بس فجأة، أخدت نفس عميق، وقامت بسرعة.

ما ينفعش تفضل خايفة. لازم تلاقي سالي وتعرفها.

فتحت الباب بحذر، خرجت، والبيت ساكت بطريقة غريبة، كأن حتى الأنفاس اتمنعت.

نزلت السلم بخطوات سريعة، بس رجليها كانت بتتهز من التوتر.

كل خطوة بتاخدها بتحس إنها أقرب لحاجة مش مفهومة.

الأنوار خافتة أكتر من العادي…

صوت خفيف جه من وراها، كأن في همسة، بصّت بسرعة وراها…

مفيش حاجة.

سرّعت خطواتها أكتر، قلبها بيدق في ودانها.

وصلت للريسبشن… فاضي.

"سالي؟!"

نادت بصوت مهزوز، حاولت ترفعه شوية.

"سالي، أنتي هنا؟!"

الصمت كان هو الرد الوحيد.

لكن بعد لحظة… سمعت صوت باب بيترزع من بعيد، جاي من المطبخ،

لفت، وبلعت ريقها، مش قادرة تقرر تروح ناحية الصوت… ولا ترجع الاوضه وتقفل الباب

لفت بسرعة لما حست بإيد بتتحط على كتفها، شهقت بقوة، والرعب مسيطر عليها، بس صوت سالي جه يطمنها

"في إيه؟ اهدي، مالك؟"

فريدة قالت وهي بتحاول تلم نفسها

"كنت… كنت بدوّر عليكي."

سالي بصّت لها باستغراب

"ومتوترة ليه كده؟!"

فريدة ردّت بسرعة، وهي لسه قلبها بيدق بعنف

"في حاجة مش طبيعية هنا… في حاجة غريبة بتحصل."

سالي سألت بهدوء

"حاجة زي إيه؟"

فريدة مدت إيدها وادتها الورقة

"بصي الورقة دي… حد خبط فوق، ولما فتحت لقيت دي قدام الباب!"

سالي خدت الورقة منها، فتحتها وبصّت فيها شوية، وبعدين رفعت عينيها لفريدة وقالت باستغراب

"دي ورقة فاضية يا فريدة."

فريدة خدت الورقة بسرعة، وبصّت فيها، صوتها اتقطع من الصدمة

"والله… والله كان مكتوب فيها! كان فيها كلام… وتهديد كمان!"

سالي قالت بهدوء 

"وفين الكلام ده دلوقتي؟"

فريدة بصّت للورقة بحيرة، وقالت بصوت خافت

"معرفش…"

سالي قربت منها وقالت بنبرة فيها حنية

"شكلك تعبانة شوية يا فريدة، اغسلي وشك واهدي، يمكن بس متوترة شوية."

فريدة هزت راسها

"بس أنا كويسة… مش عارفة إيه اللي حصل، وكمان، كان في واحدة هنا، شغالة… وهي اللي ودتني أوضة يونس، مع إنك قلتي إنكوا مش بتشغلوا غير رجالة بس!"

سالي عقدت حواجبها وقالت

"شغالة إيه يا فريدة؟ مفيش أي شغالات ستات هنا، إحنا عندنا ٣ شغالين وكلهم رجالة."

فريدة قالت بحدة ممزوجة بالذعر

"لأ! أنا شفتها بعيني! واحدة ست، وهي اللي خدتني لاوضة يونس "

سالي حطت إيدها على كتفها وقالت بهدوء أكتر

"فريدة، شكلك تعبانة فعلاً… إيه رأيك تغسلي وشك؟ ولو حابة تمشي النهاردة روحي."

فريدة سكتت لحظة، وبعدين قالت بصوت أهدى لكنه مليان شك

"بس أنا بجد بقولك اللي شوفته… ممكن يكون أخوكي اللي بيعمل كده؟ عشان يمشيني من هنا؟"

سالي هزت راسها بالنفي وقالت

"تيم أصلاً مش في البيت، ومش هييجي لحد آخر الأسبوع، يمكن فعلًا تكوني متوترة أو مجهدة."

فريدة اتنهدت وقالت بصوت واطي

"يمكن… عن إذنك."

دخلت فريدة الحمام، والماية الباردة نزلت على وشها تحاول تصحيها من دوامة الرعب اللي حساها، لكن الإحساس بالخطر مبيختفيش…

كل حركة، كل نفس… كأن في عينين بتراقبها.

رفعت راسها وبصّت في المراية، تحاول تشوف ملامحها وتطمن نفسها…

بس فجأة، لمحت انعكاس حد واقف وراها.

حد طويل… واقف ثابت… ساكت.

شهقت، ولفت بسرعة، قلبها بيخبط في صدرها بعنف…

لكن مفيش حد.

الحمام فاضي…

الهدوء مرعب أكتر من الصوت.

بصّت وراها تاني، وبعدين رجعت تبص في المراية…

مافيش أثر لأي حد، كأن اللحظة دي محصلتش.

اتنهدت بعصبية، وتمتمت لنفسها

"أنا لازم أهدى… يمكن فعلاً متوترة…"

خرجت من الحمام بهدوء، عينها بتتحرك في كل زاوية وهي بتدور على أي علامة… أي تفسير، قعدت على الكنبة وهي ضامة نفسها، عينيها بتجري في المكان،

بس عقلها بيجري أسرع، بيراجع كل حاجه

"الورقة، الست اللي شافتها، المراية..."

رفعت عنيها وبصت حوالين الأوضة،

كل حاجة هادية، هادية زيادة عن اللزوم…

لكن الهوا في الأوضة تقيل، حضنت نفسها أكتر، وسندت راسها، لازم تفهم اللي حصل ده" 

اليوم عدى بالعافية عليها،كل لحظة عدت كانت كأنها بتسحب من روحها، أخيرًا وصلت بيتها، طلعت أوضتها بخطوات تقيلة.

البيت كان هادي جدًا، هدوء مريب، بس مختلف عن بيت سالي… هدوء أليف، رغم إن عقلها مش سايبها ترتاح.

قعدت على سريرها، سندت ضهرها، وعينيها سرحانة في السقف "هو أنا اتجننت؟ ولا اللي حصل ده كان حقيقي؟"

قطع أفكارها صوت رنة موبايلها.

بصّت على الشاشة… إسلام بيتصل

فريدة ردت بصوت هادي 

"ألو؟"

إسلام قال بلهجة فيها اهتمام واضح "رجعتي البيت؟"

اتنهدت 

" أيوه، وصلت من شوية… أخيرًا."

قال بابتسامة خفيفة باينة في صوته "حسيت إنك مرهقة، كله تمام؟"

قالت وهيا بتتاوب 

"آه الحمد لله… اليوم كان طويل شوية بس عدى."

غيرت الموضوع وقالت" هيا ماما فين، دورت عليها، مش لاقياها."

إسلام رد باهتمام

" راحت النادي… كانت بتقول هتقابل أصحابها"

ردت بهدوء"تمام…"

سألها بنبرة فضول واهتمام أخوي

"طيب قوليلي، الشغل ماشي إزاي؟ مرتاحه؟!"

كان نفسها تحكيله كل حاجة، تقوله على الورقة، والباب اللي خبط، والشغالة الغريبة، بس هيا مش عايزة تسمع جملة "يمكن تكوني متوترة".

هي مش متوترة… هي شافت اللي شافته.

قالت بإيجاز" كويس "

قالها بابتسامه "طيب لو احتجتي حاجة كلميني، خدي بالك من نفسك."

قفلت معاه، وسكتت للحظة، صوت نفسها بس هو اللي مالي الأوضة.

قامت، غيرت هدومها، ووقفت قدام المراية… عمرها ما اتهيألها اي حاجه، اشمعنا امبارح

قعدت تكتب شوية ملاحظات في النوت عندها… تفاصيل الشغالة، شكل الورقة، كلام سالي، توقيت الأصوات.

كل حاجة.

حاولت تنام بعد وقت طويل من التفكير، وأخيرًا غلبها النوم، فاقت على صوت المنبه، فتحت عينيها ببطء وهي حاسة إنها لسه مرهقة، بس قامت بسرعة تجهز نفسها للشغل، خرجت من أوضتها وندهت على مامتها

"ماما؟!"

لكن محدش رد.

خرجت واحدة من المطبخ، كانت لابسة لبس شغالة وقالت بهدوء

"مفيش حد في البيت."

فريدة هزت راسها بتفهم وسكتت، خدت شنطتها وخرجت، لقت السواق مستنيها قدام الباب، ركبِت العربية، بعد شويه وفونها رن…

كانت صاحبتها

"إيه يا يسر؟" قالتها فريدة وهي بتحاول تفوق.

يسر قالت بانفعال

"برن عليكي مش بتردي ليه؟!"

ردت فريدة

"كنت نايمة، في حاجة مهمة؟!"

يسر سألتها 

"مش هتيجي معايا؟ هنزل أشوف دريس النهارده."

فريدة اعتذرت

"طب خليها بكرة الساعة ٤ مثلًا، إنتي عارفة شغلي الجديد."

يسر قالت بنبرة فيها عتاب بسيط

"عارفة، وعشان كده كنت برن بدري شوية، أنتي عارفة كتب الكتاب يوم الخميس."

فريدة قالت

"عارفة، بس لسه في وقت، بصي، سلام دلوقتي، هكلمك بالليل لما أكون فاضية."

قفلت معاها، والعربية وقفت قدام الفيلا، نزلت فريدة وسلّمت على سالي وبعدها وطلعت على أوضة يونس.

دخلت وهي بتقول بابتسامة

"مساء الخير."

يونس رد بنفس الحماس

"مساء الفل، مش مصدق إني شوفتك تاني."

ضحكت وسألته

"ليه يعني؟!"

قال

"بصراحة… مفيش واحدة جت هنا يوم ورجعت تاني، فمستغرب شوية، خصوصًا إنك امبارح كنتي متوترة وسرحانة، لما صحيت بالليل شوفتك قاعدة سرحانة على الآخر… حب جديد ده ولا إيه؟"

فريدة ضحكت وقالت

"حب إيه بس، أنا بس كنت زهقانة."

رد وقال

"بصراحة لما لقيتك كده، كملت نوم وقلت بلاش أتطفل… أسيبك براحتك أحسن."

ابتسمت وسابته، دخلت تغير هدومها في الحمام، وهي بتبص حواليها، كل حاجة شكلها طبيعي، مفيش أي حاجة غريبة… الجو هادي، مريح… بس جواها، كانت لسه مش مرتاحة.

خرجت فريدة من الحمام، لقت يونس قاعد في الأوضة قدام التلفزيون، ماسك دراع البلاي ستيشن ومركز جدًا في اللعبة.

قربت منه وسألته بنبرة فيها فضول

"إيه سبب اللي إنت فيه ده؟!"

بصلها يونس بسرعة وقال

"حادثة."

فريدة قربت أكتر، وقالت باستغراب

"حادثة؟! إزاي يعني؟ حصل إيه؟"

يونس سكت لحظة، عيونه كانت على الشاشة وقال

" حادثه عاديه، كنت راجع البيت بالليل بالموتوسيكل وهوب فوقت لقيت نفسي زي ما انتي شايفه كده" 

فريدة قعدت جنبه وسألته باهتمام

"يعني كنت راكب موتوسيكل وقت الحادثة؟"

ابتسم يونس وقال بنبرة فيها تهكم على نفسه

"طبعًا، هو أنا بعرف أمشي من غيره؟!"

فريدة قالت

"بس انت شكلك متهور جدًا… سمعت إنك بتحب الموتسيكلات وعندك كتير."

رد وهو بيرفع حاجبه

"أيوه… دي أكتر حاجة بحبها في الدنيا، بس المرة دي كنت ماشي بالعقل، والله… بس القدر بيلعب لعبته."

فريدة بصت له وقالت بنبرة فيها مزيج من قلق واهتمام

"بس اللي حصل كان ممكن ينتهي بأسوأ من كده… ليه بتجازف بروحك؟"

قال بهدوء

"السرعة بالنسبالي حرية… بس الظاهر إن الحرية ساعات بتدفع تمنها غالي."

الباب خبط ودخلت سالي سألت باهتمام " ايه الاخبار؟!" 

يونس قالها بملل " أبو ام ده سؤال...." 

سالي ضحكت وقالت

" طب يا عم مساء الفل كده كويس؟!"

يونس رد وهو بيكمل اللعب

"لا يا شيخة، قوليلي مساء الحوادث والجبس والهموم."

فريدة ضحكت وقالت

"واضح إنك بتستمتع بالتنكيد يا يونس."

سالي قربت منهم وقالت

"هو كده من يومه، بس معلش، هتخف وترجع تجري على الموتسيكلات تاني، وتعمل حوادث تاني"

يونس قال وهو بيغمز

"أهو ده الأمل اللي عايش عشانه."

فريده قالت بزهول " حوادث؟!" 

سالي وضحت " البيه كل شويه ييجي متدغدغ، انبهه يبني ارحم نفسك بس لا حياة لمن تنادي " 

فريده قالت بسخريه " لاء شاطر"

سالي بصّت لفريدة وقالت بنبرة هادية

"لما تدي يونس المسكن، ابقي انزلي اتكلم معاكي شوية."

يونس اتنهد وهو بيعدل وضعه على السرير وقال بنبرة متضرره 

"أهو كل يوم المسكن ده… بمجرد ما بتحطّي الحقنة في الكانولا، بحس إن روحي بتطلع!"

فريدة ابتسمت له وقالت

"علشان هو مسكن قوي، ومينفعش يتاخد مع بنج، لأنه هيبطل مفعوله، معلش، كلها كام يوم وتكون أحسن."

سالي ابتسمت ليهم بلطف وخرجت من الأوضة

يونس بص لفريدة بنظرة طفولية وقال بنبرة شبه متوسلة

"تلاعبيني؟!"

فريدة ضحكت وقالت وهي بترفع حاجبها

"بلاش هغلبك."

قال بثقه

"عيب عليكي، تعالي لاعبيني بدل ما أنا حاسس إني هنفجر من الملل."

فريدة ضحكت وقالت وهي بتقرب منه

"طب ماشي، بس لو غلبتك متزعلش."

يونس ابتسم وقال

"ده لو عرفتي تغلبيني أصلاً!"

قعدت جنبه، خدت الكنترولر وبدأت اللعبة، في الأول كانت بتحاول تركز، بس واضح إنها مبتدئه، فكان يونس كل شوية يضحك وهو بيقول

"ده إنتي محتاجالك كورس تدريب قبل ما تلعبي معايا."

فريدة قالت بإصرار

"استنى بس، أنا لسه بسخن."

الجو مرح، فضلت تلعب معاه لحد ما جه وقت المسكن 

يونس أخد المسكن وسند راسه على المخدة وهو بيقول بنبرة نعسانه

"مش قادر أقاوم الحقنة دي... خمس دقايق وهكون نايم في سابع نومة."

فريدة ابتسمت وقالت بهدوء

"نام وارتاح... أنا هفضل هنا شوية."

سكتت الدنيا، والهدوء بقى تقيل في الاوضة. يونس نام فعلا، وفريدة قعدت على الكرسي، بتحاول تهدى، لكن عقلها مش ساكت.

فجأة، وهي قاعدة، لمحت في المراية الصغيرة اللي على التسريحة…

فيه انعكاس حد وراها.

شخص واقف، ساكن، مش بيتحرك.

قلبها وقع، لفّت بسرعة…

مفيش حد.

رجعت تبص في المراية…

الانعكاس اختفى.

وقبل ما تلحق تستوعب، اللمبة اللي فوقها بدأت تنور وتطفي بسرعة

"تكتكتكتك…"

الصوت عالي والإضاءة مرعبة.

فريدة وقفت بسرعة، بصت للسقف، بتهمس لنفسها

"في إيه؟! إيه اللي بيحصل؟!"

وبعدين…

صوت أنين خفيف بدأ ييجي من الدولاب.

أنين مكتوم… وكأنه في حد جوه.

فريدة بصت للدولاب، رجليها تقلّت، بس قربت، بإيد بترتعش فتحته

فتحت الدولاب، قلبها بيدق بخوف، لكن أول ما فتحته…

كل اللي شافته كان هدوم متعلقة زي ما هي، وشنطة تحت على الرف.

الأنين اختفى.

فضلت واقفة لحظة، بتتأكد بعينيها إن مفيش حاجة غريبة،

بعدها اتنفست بعمق، وسندت راسها على باب الدولاب المفتوح، رجعت قفلت الباب، ببطء، ولمحت اللمبة بدأت تثبت نورها تاني.

راحت قعدت على الكرسي ومدت إيديها على وشها، تحاول تهدى، هيا حاسه ان في حد بيحاول يلعب بأعصابها، جواها يقين إن تيم هو اللي ورا كل ده، يمكن بيحاول يخوفها علشان تمشي من نفسها، لكن مش هتستسلم، خدت القرار تنزل وتقعد مع سالي ومتديش للموضوع اكبر من حجمه 

نزلت الصالون لسالي، وهناك شافتها، سالي أول ما دخلت، ابتسمت لها ابتسامة خفيفة، وفريدة قعدت جنبها، سالي بدأت الكلام، بنبرة فيها دفا واهتمام 

"عاملة إيه دلوقتي؟"

فريدة ردت بهدوء

"الحمد لله."

سالي أخدت نفس، وبصت لها بنظرة جدية وقالت

"بصي يا فريدة… تيم شخصية هادية جدًا، بيحب النظام بشكل مبالغ فيه، ومنظم لدرجة الوسواس، فعلاً عنده وسواس قهري، وبيحب ماما أكتر حد في الكون، أي حاجة تطلبها بينفذها من غير نقاش، مهما كانت صعبة أو غريبة، وماما من زمان مانعة أي بنت تدخل البيت، أو تشتغل في الشركة، منع نهائي، أنا نفسي مش عارفة السبب، بس متأكدة إن تيم يعرفه، وعلشان كده، انتي مش أول بنت تيجي هنا، في غيرك كتير جربوا، بس محدش كمل، وأنا متأكدة إن السبب في ده هو تيم، هو اللي بيخليهم يبعدوا."

فريدة سألتها 

"البنات دول بيمشوا ليه؟!"

سالي ردت

"علشان تيم بيعرض عليهم فلوس من نفسه، من غير ما يقول لحد، أنا لما رحت المستشفى عندكم كنت بدور على ممرضة مناسبة، ودكتور سامي رشحك ليا بنفسه، وقالي إنك قد المسؤولية، وشكلك فعلاً طلعتؤ قدها… وإلا ما كنتيش لسه هنا لحد دلوقتي."

فريدة رفعت راسها، وقالت بثقة

"أنا فعلاً قدها… ومش ناوية أمشي، غير لما يونس يقوم على رجليه ويكون كويس، حتى لو اللي بيحصل حواليا كله بيقولي امشي."

سالي ابتسمت وقالت

"إنتي أثبتتي ده… بس، هل انتي مستعدة تفضلي حتى بعد ما ماما ترجع؟"

فريدة بصتلها بثبات وقالت

"مستعدة… متقلقيش، مش همشي."

من زاوية عالية في ركن الصاله، كاميرا صغيرة بالكاد تُلاحظ كانت بتسجل كل حاجة، هو كان قاعد قدام الشاشة، بيراقبهم، وصوتهم واصله بوضوح، سمع كل كلمة اتقالت، وشايف كل حاجه، لما فريدة قالت بصوت ثابت "مش همشي" شد قبضة إيده بغضب، عض على شفايفه 

هي مش ناوية تمشي بالرغم من كل اللي عمله؟!

هو حاول بكل الطرق يخوفها… يوترها… يخلّيها تسيب المكان من نفسها.

بس شكلها… عنيدة.

عنيدة أكتر مما كان متوقع.

ودي حاجه بتستفزه

لازم ياخد قرار جديد، أو يعرف حتي نقطة ضعفها 

تاني يوم، فريدة صحيت على صوت الموبايل بيرن، مدّت إيدها بتكاسل وبصت… يسر.

ردت وهي لسه صوتها نايم

"ألو؟"

يسر قالت بسرعة

"يلا يا فريدة، متنسيش هتنزلي معايا النهارده."

فريدة مسحت وشها وقالت بنبرة كسوله

"عارفة والله… أول ما اجهز هكلمك "

يسر قالت

"تمام… هستناكي أنا وياسمين."

فريد قالت بضيق

"ما بلاش تجيبيها معاكي… أنا عارفة إنها أختك، بس بلاش يا يسر، اليوم مش ناقص توتر."

يسر اتلخبطت وقالت

"هي اللي قالتلي عايزة تيجي وماما قالتلي خديها ، أعمل إيه؟"

فريدة قالت بحدة خفيفة

"انتي أدرى، بس بقولك اهو… بلاش."

يسر تنهدت وقالت

"معلش… كلها كام يوم وهمشي."

قفلت فريدة المكالمة، قامت من السرير، خدت شاور وغيرت هدومها ونزلت تحت.

أول ما دخلت الصالون، لقت مامتها قاعدة.

ابتسمت، قربت منها بسرعة وحضنتها جامد

"وحشتيني يا ماما."

مامتها بعد ما حضنتها شوية، قالت بنبرة فيها عتاب

"انتي يا جزمة! نايمة طول النهار ورايحة تشتغلي بالليل؟!"

فريدة ضحكت وقالت

"ما هو غصب عني، وبعدين انتي طول الوقت يا مش في البيت يا قافلة على نفسك في أوضتك… ليه كده؟ ليه مش معانا زي زمان؟"

أمها سكتت ثواني، كأن الكلام وجعها، وبعدين غيرت الموضوع وسألتها

 "الشغل عامل إيه؟"

فريدة قالت بابتسامة صغيرة

 "حلو… ومريح… الحمد لله."

فريدة بعد ما خلصت كلام مع مامتها شويه، خرجت من البيت، وصلت عند الكافيه اللي اتفقت تقابل يسر فيه، دخلت وهي بتبص حواليها، لقت يسر قاعدة… وياسمين جنبها طبعًا.

قربت عليهم ويسر أول ما شافتها قامت تسلم عليها

"أخيرًا يا بنتي!"

فريدة سلمت عليها وقالت بفتور وهي تبص لياسمين

"أهو جيت خلاص، عاملة إيه؟"

ياسمين ابتسمت ابتسامة متصنعة وقالت

"الحمد لله… وانتي؟"

فريدة قالت وهي بتقعد

 "الحمد لله… ماشية."

كان في شوية توتر بين فريدة وياسمين، يسر حست بيه كالعادة، فحاولت تغيّر الجو بسرعة

" ايه يا فريده، الشغل خدك خلاص "

فريدة ردت بسرعة 

"الشغل واخدني شوية… وانتي عارفة، مواعيده صعبة."

يسر بصتلها وقالت

 "بس باين إن في حاجه تانية… احكيلي."

فريدة هزت كتافها وقالت وهي بتحاول تبين إنها تمام

"كل حاجة تمام… بس في شوية حاجات بتحصل هناك مش فاهمة تفسيرها."

ياسمين قالت بنظرة فضولية

"يعني إيه؟!"

فريدة بصتلها وقالت بنبرة واضحة

"يعني حاجات مش مهمة ليكي، متقلقيش."

سكتت ياسمين، وبان الغيظ في وشها، ويسر حاولت تلطف الجو شويه

خرجوا من الكافيه واتحركوا على الأتيليه، الجو كان حر شوية، وفريدة ماشية جنب يسر وبيتكلموا، وياسمين ماشية وراهم بتبص حواليها ومفيش كلمة طالعة منها.

دخلوا الأتيليه، وفريدة قالت وهي بتبص حواليها

"حلو المكان… أهو أشيك من اللي كنا فيه قبل كده."

يسر ابتسمت وقالت بحماس

"أنا متحمسة بجد، نفسي ألاقي حاجة حلوة النهارده."

البنت اللي شغالة في الأتيليه سلمت عليهم بابتسامة وقالت ليسر

"تحبي تبدأي تشوفي الموديلات الجاهزة؟!"

يسر قالت بحماس 

" اكيد "

دخلت يسر وبدأت تقيس الفساتين، فريدة قاعدة برا على الكنبة وياسمين قاعدة جنبها مستنيين يسر

لبست يسر أول فستان وخرجت،

كان بسيط أوي، لونه باهت ومافيهوش تفاصيل كتير، سمبل جدا 

فريدة أول ما شافتها قالت

 "لاء مش حلو، مش لمناسبة زي دي "

بس ياسمين بسرعة قالت

"إيه الكلام ده؟ بالعكس، شكلك زي القمر فيه!"

يسر وقفت قدام المراية وبتبص لنفسها بحيره، رجعت ولبست فستان تاني، ده كان تحفة… قماشه ناعم ومضبوط على جسمها، ألوانه مبهجة وفعلاً حلو

فريدة أول ما شافتها قالت باندهاش

 " والله انتي اللي حلتيه"

لكن ياسمين قالت وهي بتلف وشها

"ممم… مش لايق، فيه حاجة غلط، حساه مديكي حجم أكبر شوية."

يسر بصتلها باستغراب وقالت "بجد؟ أنا حبيته… مش وحش برضو"

فريدة قالت وهي كاتمه غيظها

"متسمعيش كلامها، الفستان حلو جدًا"

ياسمين قالت بنبرة شبه باردة

 "أنا بقول رأيي بس، براحتكم طبعًا."

فريدة لاحظت إن كل ما يسر تلبس حاجة حلوة، ياسمين ترفضها، ولما تلبس حاجة مش قد كده، تمدحها… ابتسمت لنفسها وهيا عارفه أنها اكيد غيرانه 

يسر دخلت تجرّب فستان تاني، كان منفوش شوية وفيه لمعة واضحة، أول ما خرجت بيه، فريدة ضحكت وقالت

 "ده لو دخلتي بيه قاعة كتب الكتاب، الناس هتفتكر إنك رايحة تصوري إعلان!"

يسر بصّت لنفسها في المراية وقالت وهي بتضحك

 "آه فعلاً، حاساه تقيل وكأنه فستان سندريلا."

لكن ياسمين قالت

 "بالعكس، ده شيك جدًا ومميز، مخليكي باينة ومش تقليدية."

فريدة رفعت حواجبها وقالت

 "شيك إيه يا شيخة؟ ده هيوقعها وهي داخلة"

يسر ضحكت وقالت

 "مش ده خالص… خليني أجرب ده."

دخلت تاني ولبست فستان تاني ، ده كان بسيط، سادة، وفيه لمسة دانتيل على الأطراف.

خرجت بيه وقالت

"إيه رأيكم؟"

فريدة بصّت وقالت

 "ده حلو… لايق عليكي وناعم."

أما ياسمين، فرمشت بسرعة وقالت

 "ممم… مش حلو، لونه باهت ومش مديكي أي لمعة."

يسر بصّت لفريدة، وفريدة ابتسمت وقالت بهدوء

"ده ذوقك، بس أنا شايفاه شيك وبسيط، وانتي أصلاً مش محتاجة بهرجة."

جربت كمان فستان تاني، كان مجنون شوية، ألوانه خارجة عن المألوف وتصميمه غريب.

خرجت وقالت بضحكة

 "ده أنا نفسي مش فاهماني فيه!"

فريدة ضحكت وقالت

 "هو ده بقى اللي لو لبستيه، الناس هتمشي واولهم خطيبك المبجل "

ياسمين قالت في عالم موازي

 " بس جرئ... حبيته"

فريدة بصتلها وقالت بصوت واطي

"واضح إنك بتحبي كل حاجة غريبة ومش مناسبة لأختك."

ياسمين ردت ببرود

 "أنا بحب الحاجات اللي مش تقليدية، مش غلط."

فريدة مردتش، بس عينيها قالت كتير…

الغيرة كانت باينة، وياسمين مش قادرة تخبيها

البنت اللي شغالة في الأتيليه قربت منها وهي متحمسة وقالت

 "بصي، في دريس لسه واصل امبارح، جديد جدًا، جاي من بره، وفي منه نسخة واحدة بس… بصراحة حساه هيبقى تحفة عليكي، بس انتي قولتيلي عايزة حاجه سعرها معقول."

فريدة مستنتش ولا لحظة، ردت بسرعة

 "هاتيه… ملكيش دعوة بالأسعار!"

يسر اتفاجئت وقالت بنبرة اعتراض

 "بس يا فريدة إحنا قولنا…"

فريدة قطعتها وقالت بحزم

 "قلتلك ملكيش دعوة… سيبيني أنا أتصرف."

البنت راحت جابت الفستان، وكان فعلاً حاجة تانية، تحفة بكل المقاييس، قماشه ناعم، والقصّة بتاعته فخمة، وفيه لمعة بسيطة كده تدّي رُقي من غير ما تكون مبهرجة، يسر دخلت تقيسه، وبعد شوية خرجت…

التلاته انبهروا

فريدة بصّتلها وقالت بعيون بتلمع

"يا نهار أبيض! هو ده… ده الفستان اللي يخطف!"

حتى البنت اللي شغالة قالت وهي مبتسمة

"هو معمول ليكي بالظبط… يجنن عليكي."

يسر كانت فرحانة، بس بتحاول تبين إنها هادية.

أما ياسمين، فكانت واقفة، عينيها بتتحرك بسرعة من الفستان لوش أختها… هو عاجبها بس قالت ببرود

 "يعني… مش عارفة، مش حاسة إنه مميز أوي."

فريدة بصتلها من فوق لتحت وقالت

 "مش مهم تحسي، إحنا حسينا وخلاص…"

وبعدين بصّت للبنت اللي شغالة وقالت

 "احجزيه، ده اللي هايتاخد."

ياسمين لسه بتحاول تعترض وقالت

 "بس إحنا قولنا مش هنجيب حاجات غالية كده!"

فريدة ردت وهي بتزق الكلام

 "قلتلك ملكيش دعوة… انتي بس خليكِ ساكتة."

وبالفعل حجزوا الدريس وخرجوا من الاتيليه والفرحه باينه على وش يسر، فريدة بصّت في ساعتها وقالت " هخلع انا، يدوب الحق اوصل

سلموا على بعض، وفريدة وقفت تاكسي وركبت، وهي في الطريق كانت بتفكر في يسر، وسعادتها، وفي ياسمين اللي غيرتها كانت واضحة جدًا… بس دماغها سابت كل ده لما افتكرت إنها رايحة شغل، والشغل هناك مش طبيعي.

وصلت الفيلا، دخلت وهي بتحاول تهدي نفسها، حست بخنقة أول ما دخلت الفيلا، كأن الجو نفسه بيضغط على صدرها… بس قالت لنفسها إنها المرة دي مش هتسكت، لازم تفهم كل حاجة، وتواجه اللي بيحصل، خصوصًا بعد ما بدأت تشك إن تيم هو اللي ورا كل ده.

دخلت أوضة يونس، وبعد ما خد المسكن ونام، بدأت تبص حواليها… كل حاجة طبيعية، الأوضة زي ما هي، مفيش حاجة غريبة، بس الإحساس اللي جواها بيقول عكس كده.

مسكت موبايلها وشغلت قرآن بصوت واطي ، علشان لو فيه أي حاجة مش طبيعية تحصل، تبقى متأكدة إن تيم هو السبب، وده يزود يقينها إنه بيراقبها.

بدأت تفكر… هو بيعرف منين إنها لوحدها؟

إزاي كل مرة تحس بالخوف تلاقي حاجة بتحصل فجأة؟

أكيد بيراقب البيت، بس افتكرت أن سالي قالت إن تيم بيكره حد يدخل أوضته، طيب تمام… هي هتجرب تدخل أوضته، ولو حد منعها أو الخدم ظهر فجأة، يبقى فعلاً في مراقبة.

بخطوات هاديه خرجت من أوضة يونس، وبدأت تدور على أوضة تيم، فضلت تمشي في الممرات لحد ما لقتها، وقفت شوية قدام الباب، قلبها بيدق بسرعة، بس فتحت الباب ودخلت.

الأوضة كانت كبيرة جداً… منظمة لدرجة مزعجة، كأن كل حاجة محطوطة بمسطرة.

كل حاجة فيها بتقول إن الشخص اللي ساكن هنا بيكره الفوضى بجنون.

فريدة ابتسمت لنفسها وقالت

 "وماله… نقلبها فوضى."

دخلت ناحية الدريسينج، وكانت خلاص هتفتح الدولاب، لكن فجأة…

 "حضرتك محتاجة حاجة؟"

الصوت جه من وراها، هادي لكن حازم.

لفت بسرعة، وابتسمت بانتصار وهي شايفة واحد من الشغالين واقف قدامها.

قربت منه وسألته وهي رافعة حاجبها "إنت عرفت منين إن أنا هنا؟!"

اتوتر شوية وقال

 "تيم بيه قبل ما يمشي نبهني أخد بالي من أوضته."

فريدة بصّتله بتركيز وسألته

 "يعني إنت بتراقب الأوضه ٢٤ ساعة، صح؟"

قال بسرعة

 "الأوضة متوصلة بإنذار، حضرتك… لو حد دخلها بعرف على طول."

فريدة قربت خطوة تانية، وقالت وهي بتفكر بصوت عالي

 "أنا حاسة إني شوفتك قبل كده… مع إن دي أول مرة اشوفك"

 قال بابتسامة خفيفة

 "جايز تكوني شوفتيني، حضرتك بقالك ٣ أيام هنا وانا شغال هنا"

فريدة هزت راسها ببطء وقالت

"تؤ تؤ، أنا مش شوفتك أنت… أنا شوفت واحدة ست شبهك بالظبط من ٣ أيام."

اتجمد مكانه، وقال بسرعة

 "مفيش ستات هنا يا فندم."

فريدة ضيقت عينيها وقالت بهدوء مرعب

 " ما أنا عارفة، بس تفتكر ده معناه إيه؟"

سكت فقالت وهي ماسكة أعصابها بالعافية

"وريني جهاز الإنذار ده، عايزة أشوفه بعيني."

اتلخبط وبصلها بحذر

"حضرتك محتاجة إيه؟"

بصتله بحدة، لهجتها اتحولت لتهديد صريح

 "أنا مش همشي من هنا، لو قلبتوا البيت ده مقبرة مش همشي! أنا عارفة إنكم بتتعاونوا سوا علشان تعيشوني في جو الرعب ده، بس خلّي بالك… أنا مبخافش، ومفيش حاجة هتمشيني من هنا غير بمزاجي، فاهم؟!"

قالت كلامها ومشيت من قدامه بخطوات ثابتة.

وقبل ما تخرج راحت ناحية التسريحة المنظمة بعناية مبالغ فيها، مدت إيدها وقلبت البرفانات كلها على الأرض، اتكسر بعضها، والباقي وقع واتبهدل، وريحة قوية ملت المكان.

بصّتله وقالت بسخرية

"أكتر حاجة بيكرهها الفوضى… صح؟ وماله، يدوّق."

خرجت من الاوضه بخطوات واثقه وسابته واقف مكانه 

من ورا الكاميرات، تيم كان قاعد، عينيه مش بتفارق الشاشة اللي قدامه، بيراقب كل حركة فريدة عملتها، شافها وهي بتواجه العامل، شافها وهي بتقلب الأوضة وبتبهدل التسريحة.

شد قبضة إيده بعصبية، عض على شفايفه بقهر

الضيق باين على وشه، ملامحه اتغيرت، العروق في رقبته بدأت توضح، وكل حاجة فيه كانت بتغلي.

مش مصدق إن فيه واحدة لسه مصممة تكمّل، ومش بس كده، دي بتستفزه كمان!

لف الكرسي بعصبية، قام واقف، وركل الكرسي برجله بقوة، فوقع على الأرض بخبطة عالية

فريدة كانت قاعدة جنب يونس في الأوضة، بس عقلها مشغول وملهوف على فنجان قهوة يصحصحها ويفوقها شويه، قامت بهدوء وخرجت من الأوضة، نزلت ودخلت المطبخ، لقت فيه اتنين من الخدم بيشتغلوا بهدوء، رفعت صوتها شوية وقالت بابتسامة بسيطة

"مساء الخير."

بصولها وردوا بأدب

"مساء النور، حضرتك محتاجة حاجة؟"

قالت وهي بتقرب ناحية الرخامة

 "آه، كنت عايزة أعمل قهوة."

واحد رد بسرعة

"حضرتك اقعدي وإحنا نعملها لحضرتك."

لكن فريدة هزت راسها برفض واضح وقالت بنبرة فيها لطف بس حسم

"لا متشغلوش نفسكم، أنا بس عايزة أعرف فين الكوفي وأنا أتعامل."

الخدم بصوا لبعض ثواني، وبعدين واحد منهم شاور على الضلفة اللي فيها حاجات القهوة، وفريدة ابتسمت وشكرتهم، وبدأت تجهز قهوتها بنفسها

خرجت من المطبخ بخطوات ثابتة، بس وقفت فجأة وشافته

تيم كان واقف قدامها بالظبط، ملامحه متجمدة، عينيه فيها غضب واضح، وبيشد في عضلات وشه كأن بينه وبين الهدوء عداوة.

كان واقف وبيبصلها بنظرة جامدة، فيها كره واضح… كأنه بيقول من غير ما ينطق "كفاية، ولازم أحطلك حد."

فريدة رفعت حاجبها ببرود، مسكت الكوباية كويس، وفضلت ساكتة، مستنية يشيل الصمت بكلمة، أو حتى بانفجار، لكن هو فضل ساكت… وسكوتهم كان مليان تحدي.

تيم قرب من فريده بغضب وقال من بين اسنانه

"إنتي دخلتي أوضتي؟"

فريدة رفعت حاجبها وقالت ببرود

"آه، عندك مانع؟"

تيم قرب ناحيتها خطوتين بسرعة، صوته عالي وباين عليه الغضب، مفيهوش أي تهذيب

"عندك مانع؟! دي أوضتي، دي حدودي! وأنا آخر حد تقربي من خصوصيته، فاهمة؟!"

فريدة وقفت مكانها، ماسكة الفنجان، وقالت بنبرة متحدّية

"إنت اللي بتخليني أعمل كده… كل شوية ترعبني كأنك شبح في البيت ده، فـكان لازم أفهم إيه بيحصل."

تيم ضحك ضحكة قصيرة فيها غضب أكتر من السخرية، وبصوت واطي بس مرعب

"تفهمي؟! على حساب خصوصيتي؟! تخشي أوضتي؟! وتبوّظي حاجتي؟! وتقفي قدامي دلوقتي وبتتكلمي عن فهم؟"

قرب منها أكتر، وقال بصوت واطي، لكنه مليان نار

"أقسم بالله، لو لمستِ حاجة تخصني تاني، هتندمي… ندم يخليكي تتمني مكنتيش جيتي هنا من الأساس."

فريدة بصتله من فوق لتحت وقالت

"أنا أصلاً ندمانة… بس مش خايفة، لا منك ولا من تهديدك"

سكت ثانية، عينيه بتغلي، صدره بيطلع وينزل من شدة العصبية، قال بحدة 

"هتلمّي حاجتك وتخرجي من البيت ده حالًا."

فريدة شربت من القهوة براحتها، كأنها سمعاه بيقول تقرير عادي

ردت ببرود

"مش همشي."

شد فكّه، قرب خطوة كمان، صوته اتعمّق وبقى أخطر

"أنا مش باخد رأيك، أنا بقول امشي."

قالت بهدوء قاتل، وعينيها ثابته عليه

"لو آخر حاجة أعملها قبل ما أموت… إني أخرج من هنا، برضو مش هيحصل."

تيم اتحرك بسرعة، خبط بإيده على الكومود قدامه جامد، بس فريدة ما رمشتش حتى.

صرخ فيها

"إنتي بتتعمدي تستفزيني؟! عايزة توصلي لإيه؟!"

قالت بنفس النبرة الهادية، كأنها بتحكي عن فيلم

"إني أعرف أنت ليه مصر تعيشني في كابوس… وإزاي بتعرف كل مره أبقى فيها لوحدي… أنا مش همشي ، بالعكس، كل ما تغضب أكتر، هثبت أكتر."

سكت ثانية، عينيه مبتتحركش من عنيها، بيقيس كلامها.

قال بصوت واطي، بس في لُبّه تهديد 

"هتدفعي تمن ده غالي… غالي أوي."

فريدة رفعت حاجبها، ورشفت آخر بق من القهوة، وقالت

"هستنى الفاتورة… بس مش همشي برضو" 

تيم قرب منها أكتر، صوته كان حاد ومليان سيطرة

"هتفضلي تحت عيني طول ما انتي هنا… خليكي واثقة إنك علطول تحت المراقبة، ومش هتعرفي تاخدي راحتك أبدًا في البيت ده."

ضحكت بسخريه كأنها مش سامعة التهديد اللي في صوته، وبصّتله بثبات وقالت

"عادي… أنا مش بعمل حاجة غلط."

حطّت الكوباية بهدوء على الكاونتر اللي وراها وكملت

"أنا مش هتأذي، بالعكس… إنت اللي هتتأذي، راقبني براحتك وشقلب يومك بسببي، وريني قد ايه انا مضايقاك بوجودي"

نظراتها كانت فيها تحدي، فيها برود مستفز، وهو كان واقف قدامها، ناره بتغلي، ومش قادر يرد من كتر الغضب اللي مش لاقي ليه مخرج.

هي فضلت ثابته… وهو اتحرك أخيرًا، ومشي بخطوات تقيلة، كأن كل خطوة بيكتم فيها انفجار.

وسابها واقفة، مبتسمة بثقة.

الصبح، فريدة خرجت من الحمام بعد ما غيرت هدومها، لقت يونس صاحي ومتحمس

قالت وهي بتضحك

"إيه الحماس ده؟ كل ده عشان قولتلك هحاول أمرنك شوية؟"

رد وهو عامل فيه اللي مكفيه

"انتي مش عارفة أنا جضيت إزاي من أم القعدة دي! ده أنا عملت افلام رعب لوحدي في دماغي."

ضحكت وقالت وهي بتقرب منه

"معلش، خلاص بقا… إنت بتتحسن، وهكلم الممرض بتاعك يمرنك النهارده، ولما أرجع بالليل عايزة أسمع نتايج حلوة، وهكمل معاك"

قال وهو بيعمل إيده زي اللي بيدعي

"يارب، بس لو حصل ووقفت… هاخد سيلفي وأنزلك بوست شكر!"

فريدة ضحكت وقالت بتحذير

"بس بعد التدريب، أوعى... اوعى تحاول تحرك رجلك لوحدك."

قال وهو بيبص لرجله بغيظ

"هو أنا عارف أحركها أصلاً؟! أنا رسمي بقيت شبه مشلول، بلاش الأمل الزايد ده!"

قالت له بحزم بس بهزار

"بعد الشر عليك، شوية صبر بس… وكام يوم كمان هتمشي بعكاز، وبعدها هترجع تجري."

رد بسرعة وبنبرة درامية

"لاء سايبنهولكوا العكاز ده، أنا مش همشي بعكاز انا"

قالت وهي بتضحك

"تؤتؤ يا أستاذ، لازم تحافظ على رجلك، وخلي بالك على نفسك شوية، مش كل حاجة تاخدها هزار."

قال وهو بيحط إيده على قلبه بشكل درامي 

"أعدي بس الأيام دي… وبعد كده ربنا يحلها من عنده، وهاخد من هنا لباريس جوله بسميره" 

سألته 

" سميره مين ؟!" 

قالها بجديه 

" الموتوسيكله بتاعتي طبعا، دي انا مخليها لبعد الحوادث "

قالت وهي خارجة من الأوضة

"إن شاء الله يا ابو سميره، يلا باي يا يويو، هشوفك بالليل."

بص لها بصدمة مصطنعة وقال بصوت مبحوح

"يويو؟! يا نهار أبيض… دي عيلت خالص، أنا فقدت كرامتي في اللحظة دي."

ضحكت فريدة وهي بتقفل الباب وقالت

"خلاص يا يويو… اقعد هادي وفكّر في سيلفي البوست بتاع الشكر!"

وسابته قاعد بيضحك وهو بيهز رأسه ويقول

"يا ربي على المصايب اللي بتيجيلي في شكل ستات!"

فريده بعد ما قفلت باب اوضة يونس ولفت تنزل لقت تيم نازل من السلم المقابل، اتجمدت لحظة وهي شايفاه قدامها، لابس طقم رياضي أسود، تيشيرت بسيط وبنطلون رياضي، شعره مرفوع سنة بستايل عملي، وسماعات في ودنه كأنه رايح الجيم أو نازل يجري.

بصّلها لحظة، النظرة كانت سريعة بس فيها نفس التحدي اللي بقى شبه دائم بينهم، وبعدها كمل طريقه من غير ولا كلمة، كأنه شايفها مجرد هوا

فاقت من شرودها على رنة فونها، فتحته لقت السواق الخاص بيها وصل تحت ومستني فنزلت بسرعه 

فريده وصلت البيت، ولسه هتدخل بس ظهر أخوها إسلام خارج في نفس اللحظة.

ابتسمت أول ما شافته، وقالت بحفاوة

"يا صباح الفل يا سيدي، ماشي كده من غير ما أشوفك؟!"

رد وهو بيبتسم وبيفتح دراعه يحضنها

" وهو انا اقدر اعدي يومي من غير ما اشوفك، مستنيكي اصلا ولما سمعت صوت العربيه وصلت فنزلت استقبلك بنفسي"

حضنته وهي بتضحك، وسألته

"رايح فين كده؟"

قال بتأكيد 

"الشغل طبعًا، وانتي؟ هتاخدي اليوم كله نوم طبعا"

قالت

" اكيد، هو في احلى من النوم"

إسلام هز راسه وهو بيتمتم بنص صوت

"ربنا يعينك…"

سألته 

"ماما صحيت؟"

"لسه نايمة في أوضتها، بس ما تقلقيش أنا شوفتها الصبح كانت كويسة."

هزت راسها، بصلها وقال بنبرة فيها حنية

"بس انتي معرفتيش شغلك ده مستمر لحد إمتى؟ عايز أخرج معاكي بليل، البيت وحش من غيرك."

ضحكت وقالت وهي بتعدل شنطتها

"معلش هانت، غالبًا لآخر الشهر، وبعدها هظبط جدولي ونقعد مع بعض براحتنا."

هز دماغه وقال وهو بيضحك بخفة

"أنا أصلاً غلطان إني وافقت من الأول تشتغلي في شغل ياخدك مني كده!"

قالت وهي بتهزر معاه

"قصدك غلطان إنك وافقت تخليني أعتمد على نفسي؟! اندم للصبح بقا"

ضحكوا هما الاتنين، وبعدها ودّعها بسرعة

فريده طلعت أوضتها، رمت نفسها على السرير بتعب، فكرت في البيت اللي كانت فيه من شويه، تيم الشخصيه الصعبه العصبيه، ويونس المرح، ازاي دول اخوات اصلا، ليه يونس متقبلها عادي بس تيم لاء، طيب ليه اصلا، هيا عايزه تعرف السبب بأي طريقه، فضلت تفكر وتخطط، لحد ما افتكرت إنها فاضلها يومين بالكثير وتشوف مامتهم، يا ترى هتكون عامله ازاي؟، ايه اللي ممكن يحصل والقدر مخبيلها ايه؟!!

فجأه افتكرت مامتها، قامت بسرعة وراحت على أوضتها.

خبطت خبطة خفيفة، ولما دخلت، لقتها قاعدة على السرير، وبتتكلم في التليفون بصوت واطي.

فريده دخلت وقالت بنبرة خفيفة

"بتكلمي بابا؟"

مامتها اتفاجئت بوجودها وقفلت المكالمة بسرعة وقالت

"لاء... دي واحدة صاحبتي، معرِفة قديمة."

فريده قربت وقعدت على طرف السرير.

قالت وهي بتبص في الأرض

"ماما، انتي كويسة؟ حاسة إنك مش زي الأول… حتى لما ببقى في البيت مش بلاقيكي، نفسي أقعد معاكي زي زمان، نحكي ونضحك، نطبخ سوا، أو حتى نتفرج على فيلم… بس مش لاقياكي، مش حاسة بوجودك."

مامتها بصتلها بحنان، بس في لمعة غريبة في عنيها… لمعة خوف أو حزن، فريده معرفتش تحدد بالظبط 

مامتها فتحت دراعتها وفريده حضنتها جامد

بالليل، الأوضة كانت فيها هدوء غير صوت أنين يونس الخفيف كل ما فريدة تحاول تمرنه على تحريك رجله، كانت واقفه قدامه، بتحاول تمسك رجله بحذر.

قالت وهي بتحرك رجله بلُطف

"استحمل يا يونس، شوية بس… جسمك لازم يفتكر الحركة."

يونس كتم صوته بالعافية وقال وهو بيكشر من الوجع

"ده مش تدريب، ده انتقام."

فريدة ضحكت وقالت

"ده انت اللي عامل نفسك بطل، ووقت الجد بتعيط زي الأطفال."

فجأة الباب اتفتح على اخره، ودخل ياسين، طفل صغير مش أكبر من خمس سنين، بيجري بخطوات سريعة وصوته مليان براءة وهو بيقول بصوت عالى

"خالوووو!"

فريدة ويونس لفوا في نفس اللحظة، ويونس وشه نور وقال

"حبيبي! تعالى عندي يا ياسين."

ياسين جري عليه وراح طالع على السرير بصعوبة، قعد جنب خاله وباسه في خده وهو بيقول

"ماما قالت إنك لسه عيان، أنا جبتلك رسمة عملتها النهارده."

وطلع من ورا ضهره ورقة فيها رسمه وحروف ملخبطة كاتب فيها "خالو يونس بحبك".

يونس خده اتحمر من الفرحة وقال وهو بيحضنه بإيد واحدة

"إيه ده؟ دي أحلى رسمة في الدنيا يا فنان!"

فريدة كانت بتبص عليهم وابتسامتها مليانة حنية، وقالت لياسين

"يعني مجبتليش أنا كمان رسمة؟"

ياسين بصلها بعين بريئة وقال

"لاء… علشان إنتي بتوجعيه."

ضحك يونس بصوت عالي وقال

"شايفه؟ حتى الأطفال شايفين العذاب اللي أنا فيه!"

فريدة خبطته على كتفه بخفة وقالت لياسين

" علشان يخف يا حبيبي، ايه رأيك تدربه معايا"

ياسين فتح عينه بحماس وقال

"أيوه! وأنا هجيب الصفارة زي الكابتن!"

فضلوا يضحكوا، ياسين قال 

"ماما قالتلي لو خلصت مذاكرتي هقعد معاك شوية… وأنا خلصت كله!"

يونس ضحك وقال وهو بيهز راسه

"أمك دي مفتريه… أقسم بالله! تحطلك شرط عشان تشوف خالك المريض؟"

فريدة ضحكت وهي بتبص لياسين وقالت

"روحت المدرسة النهارده يا عم ياسين؟"

هز راسه بقوة وقال

"أيوه! وكان في ولد وقع من على الكرسي، وكل الفصل ضحك، بس أنا لاء… روحت ساعدته!"

يونس عمل حركة بإيده كأنه منبهر وقال

" تربيتي ده "

فريدة بصت ليونس بسخريه بس بصت لياسين وقال 

"ما شاء الله، أخدت إيه بقى النهارده؟"

قال وهو بيعد على صوابعه

"أخدت maths، و science، french… بس نسيت الpencel بتاعي عند كريم!"

كان بيحكي بحماس عن يومه وفريده متابعاه باهتمام، سابت ياسين مع يونس وقررت تنزل لسالي شويه 

فريده نزلت لسالي، ملامحها متوترة بس بتحاول تبان عادي، بعد شوية كلام هادي، قالتها بنبرة شبه معتذرة 

"أنا مش هقدر أجي الخميس، ممكن اجيب زميل ليا يومها"

سالي بصتلها بذهول وسألت بسرعة

"ليه؟ هتمشي؟!"

فريده هزت راسها بنفي سريع وقالت بحسم

"لاء طبعًا، يوم واحد بس، هرجع تاني عادي بس عندي كتب كتاب صاحبتي، كتب الكتاب ده مهم جدًا بالنسبالي، لازم أكون موجودة."

سالي ابتسمت وقالت بود

"مبروك لصاحبتك، أكيد يوم زي ده مينفعش يتفوت."

اتكلموا شوية مع بعض، الجو كان هادي، بس سالي سألتها بفضول

"اشمعنى دخلتي تمريض؟"

فريده ردت ببساطة، بس في صوتها إصرار

"مجموعي جاب الكلية دي وأنا كنت عايزه حاجه طبيه، بس دخلتها عن قناعة، كنت ممكن أختار طريق أسهل، بس حبيت أثبت لنفسي إني أقدر أحقق حاجة بمجهودي، مش بفلوس أو واسطة."

سالي ابتسمت بإعجاب وقالت

"أنا بحترم النوع ده من الناس جدًا."

 قاطعهم تيم بدخوله، وشه ملامحه متشددة، وقال لسالي بنبرة جافة

"أنا ماشي."

سالي استغربت وقالت بقلق

"ليه بقا؟!"

رد من غير ما يبص لفريده حتى

"انتي عارفة السبب."

فريده رفعت عينيها وبصتله 

سالي حاولت تهديه وقالت

"لو ماما جت، مش هتبقى مشكلتك، هتبقى مشكلتي، أنا اللي قررت مش انت، صدقني."

رد بحدة وهو بيبص بعيد عنها

"سالي، أنا بقولك إني ماشي، مش باخد رأيك."

سكتت، استسملت قدام إصراره 

تيم خرج من البيت وركب عربيته، لكن قبل ما يحركها لمح فريده واقفة قدام عربيته.

عينه جت في عينيها، لحظة صمت كأن الزمن وقف، ملامحه جامدة، وهي وقفت بثبات.

قبل ما يستوعب وجودها قدامه، لقاها بتفتح الباب اللي جنبه وتقعد بكل بساطة، بصلها بذهول وقال بحدة

"مين سمحلك تفتحي عربيتي وتدخلي تقعدي؟"

ردت بمنتهى الهدوء وهي بتبص قدامها

"محدش."

قال بغضب وهو بيفتح باب العربيه جنبها بعنف

"وركبتي ليه لما هو محدش؟ انتي عبيطة؟"

قالت وهي بتعدل قعدتها وبتقفل الباب اللي فتحه

"عايزاك توصلني مشوار وندردش شويه."

اتنهد وهو بيبصلها كأنها كارثة نزلت عليه وقال

"ليه؟ هو أنا كنت السواق بتاعك؟"

ردت بسرعة وهي باصه قدامها 

"لو كنت السواق بتاعي، كنت ركبت ورا مش قدام، إيه، مش هتتحرك؟"

قال بعند وهو لسه ماسك الدريكسيون من غير ما يحركه

"لاء طبعًا مش هتحرك، انتي تنزلي دلوقتي حالًا من عربيتي."

قالت وهي بترفع حاجبها باستفزاز بسيط

"ولو منزلتش؟"

قال وهو بيجز على أسنانه

"أنا مش عايز أتعامل معاكي بأسلوب مش كويس."

ردت بمنتهى البرود

"طيب يلا اتحرك بقا، عايزه ألحق أروح مشواري."

قال بعصبية

"أنا مالي بمشاويرك أنا؟ روحي مشاويرك بعيد عني."

قالت وهي بتبتسم لنفسها

"مالك إزاي بقا؟ أنا عايزاك معايا، محتاجة رأيك طبعًا، مش يلا؟ عايزة ألحق أرجع علشان أدي يونس المسكن."

فضل ساكت شوية، بص قدامه، مش عارف يتصرف، واضح عليه الارتباك… يعمل ايه معاها

قالت بصوت خافت بعد ما ميلت عليه شويه

"يلا، بلاش تردد."

اتنهد وقال بجمود

"وأنا مش هتحرك غير لما تنزلي… أنا مالي بيكي اصلا ؟"

قالت وهي بتبصله بهدوء لكن عينيها فيها لمعة حزن مش واضحة

"عايزة أتكلم معاك شوية… ولا دي كمان ممنوعة؟"

سكت تيم، عينيه راحت على المفتاح… وبعدين على الطريق… وبعدين عليها.

لف المفتاح، والعربية اشتغلت.

قالت فريدة وهي بتبص قدامها

"برافو… ولد مهذب"

خرج تيم من المنطقة، والصمت كان مالي العربية،

فريدة كانت قاعدة عينيها على الطريق، لكن عقلها مشغول بيه، بيه وباللي شافته من أول يوم دخلت فيه البيت ده.

قطعت الصمت بصوت هادي لكنه فيه نغمة استغراب

"إنتوا عيلة غريبة جدا بالنسبالي... يعني أول مرة أشوف عيلة زيكوا، إزاي حياتكوا كلها صنف واحد بس من البشر؟ دي حاجة غريبة جدًا بالنسبالي."

سكتت لحظة، وبعدين كملت، نبرتها بقت أهدى لكن فيها مرارة خفيفة

"والأغرب... عدائك ليا بالرغم إني معملتش حاجة ليك. يعني... أنا مش عارفاك أصلاً، ولا إنت تعرفني."

تيم كان سايق بصمت، ملامحه جامدة كأنه مش سامعها، بس ضيق عينه البسيط وطريقة ضغطه على الدريكسيون قالت كل حاجة... هو سمعها، بس فضَّل الصمت 

قالت فريدة وهي بتبص قدامها ونبرتها مش خالية من التهكم

"يعني يونس وإنت أبعد ما تكونوا عن الإخوات، مش فاهمة بيتكوا ده، ده غير إنه في آخر الدنيا حرفيًا، كل حاجه غريبه عندكوا"

رد تيم وهو بيزفر بزهق واضح

"انتي مش بتفهمي، فهُوَفّر كلامي أحسن."

فريدة رفعت حاجبها وقالت بنبرة متحدية

"بقى أنا مش بفهم؟ وهتوفّر كلامك؟ على فكرة أنا ممكن أضايقك دلوقتي وأبهدل عربيتك دي، فبلاش تتحداني"

بصلها تيم ورفع حاجبه بنظرة كلها تحدي، فقالت بسرعة وهي بتشاور بإيدها

"إنت اللي بدأت."

قال بحدة وهو مركز في السواقة

"أنا منسيتش اللي عملتيه امبارح في أوضتي."

قالت بنبرة فيها غيظ واضح

"بالرعب اللي عيشتني فيه يومين ده؟ حقي، أقل حاجة أعملها فيك."

رد بجفاف

"انتي ملكيش أي حق في بيت إنتي مش مرغوبه فيه."

رفعت صوتها سنة وقالت

"ومين اللي مش راغب وجودي؟ إنت؟!"

رد من غير ما يبص ليها

"ومش أنا لوحدي… ماما نفسها مستحيل تتقبلك، ولو أنا مش عايزك تكوني موجودة، فده حماية ليكي من ماما، هي الشخص الوحيد اللي مسيطر على البيت وكلامها اللي بيمشي، وجودك مؤقت لبعد يومين مثلا، لما ترجع هتعرفي قصدي، ده لو فضلتي أصلًا."

فريدة بصتله باستغراب وسألته

"طيب… مامتك عرفنا إنها مش عايزة أي بنات عندكم وهيا اللي حطت القوانين دي، وانت؟ إيه السبب؟ سالي بتقول إن عندك فوبيا… هل دي حقيقة؟"

رد ببرود

"سالي تقول اللي هي عايزاه… لكن أنا اللي أقرر."

سألته مباشرة

"وانت مقرّر إيه؟"

قال بجمود

"دي حاجة متخصكيش، ركّزي في شغلك وبس."

ردت وهي بتحاول تحافظ على هدوئها

"أنا عايزة أفهم… إنت ليه عايزني أمشي؟ إنت كـ تيم، ليه مش متقبلني؟ إيه السبب؟ لو قلتلي السبب الحقيقي، همشي دلوقتي ومش هرجع أبدًا."

وقف العربية على جنب، وبصلها من غير أي تردد وقال

"أنا حر… مش قابلك، عادي، لما حد يكون مش قابلك، بتسأليه عن السبب؟ عدم قبول كده بالظبط."

فريدة بصتله بثبات وقالت

"أنا متأكدة إن مش ده السبب، إنت هاجمتني قبل حتى ما تشوفني، أنا عارفة ده كويس."

تيم سكت لحظة، وبعدين غير الموضوع فجأة، كأنه بيهرب من كلامها

"إنتي رايحة فين؟"

قالت بنبرة غامضة وهي بتبص قدامها

"هتعرف لما نوصل."

رفع حاجبه، وبصلها من طرف عينه بريبة

"هو في إيه؟ رايحة فين؟"

قالت وهي بتحاول تبان عادية

"مشوار بسيط، خمس دقايق مش هطول"

رد بتهكم

" اتمنى، انا مالي ومال القرف ده"

بصتله من فوق لتحت وقالت 

" مكانش مشوار هو "

وصلوا قدام أتيليه كبير، وقف تيم العربية وبص للمكان باستغراب وقال

"ده؟!"

هزت فريدة راسها وقالت بهدوء

"آه… مش هتنزل معايا؟"

رفع حواجبه وقال بتهكم

"أنا؟! وانا مالي؟"

قالت وهي بتفتح باب العربية

"انزل وهقولك مالك دلوقتي."

رد وهو لسه قاعد مكانه

"لما أفهم الأول!"

ردت وهي بتنزل وتلف حوالين العربية

"يلا يا تيم اخلص، ولا نسيت؟ تلاقيك مش عارف ده إيه أصلاً، حياتكوا كلها بِدل أكيد، بس ده رجالي كمان علفكره؟"

نزل من العربية بضيق وقال

"بطّلي استظراف."

قالت وهي داخلة الأتيليه وبتضحك

"موعدكش"

دخل وراها، والبنت اللي شغّالة في المكان رحّبت بفريدة بابتسامة، فريده طلبت منها حاجه راحت تجيبها

تيم فضل واقف، باصص حواليه باستغراب، واضح عليه عدم الارتياح.

بصلها وقال

"وبعدين؟ عايزة إيه؟"

ردت وهي بتبصله بهدوء

"كتب كتاب صاحبتي بعد بكرة، ولسه مجبتش فستان، وكنت محتاجة رأي حد… زيك مثلًا."

عيونه وسعت بدهشة وقال

"أنا؟! انا؟!"

قالت ببساطة

"أيوه، محتاجة حد يقولي الفستان لايق ولا لاء، وقلت أستغل وجودك، اهو يبقى ليك لازمه حتى"

قال وهو بيحط إيده في جيبه

"يعني أنا بقيت بتاع فساتين على اخر الزمن؟"

ردت وهي بتمسك فستان أول ما البنت جابته

"لاء، حد رأيه مختلف… وده اللي محتاجاه."

فضل ساكت، واضح إنه مش مقتنع بس فضوله خلاه يفضل، وهيا دخلت جوه علشان تقيّس أول فستان…

فريدة دخلت غرفة القياس ومعاها فستان لونه أحمر أنيق، قماشته ناعمه وبينحني على الجسم بنعومة، تفاصيله بسيطة لكن فيها لمسة أنوثة طاغية،لبسته ووقفت قدام المراية، فكت شعرها الطويل اللي نزل على كتفها بانسيابية، وحطت روج نفس لون الفستان

خرجت بخطوات هادية وواثقة، أول ما طلعت من الباب كان تيم واقف بره، زهقان وواضح عليه الملل، إيده في جيبه، وعينه مشغولة بالسقف، لكنه أول ما لمحها، وقعت عينيه عليها.

فضل باصصلها، عينه اتحركت بتأنّي من فوق لتحت بانبهار خافي

فريدة وقفت قدامه وسألته بابتسامة بسيطة، شبه خجولة

"ها؟ إيه رأيك؟"

سكت لحظة، وبعدين قال بجفاف مصطنع

"واضح إنه... فستان."

ضحكت وقالت بسخريه

" بجد والله، مش عارفه لو مقولتش أنه فستان كنت عرفت منين، ده راي ده بالذمه؟"

رفع حاجبه وقال

"أهو حاجة بتتلبس، لونه أحمر، وغالي شكله."

قالت بضحكة خفيفة

"يعني موافق؟ عجبك"

قال بنبرة باردة مصطنعة

"انتي اللي رايحة كتب كتاب، مش أنا، اختاري اللي يريحك."

ضحكت وقالت

"بس قولت آخد رأي حد دمه ناشف."

قال وهو بيحاول يبعد عينه عنها

"شكلك… معقول."

قالت وهي بتكتم ضحكتها

"ده أحسن كومبليمنت منك؟ شكلي معقول؟ بجد والله؟!"

مردش، بس ملامحه لانت، كأنه مش عايز يعترف إنه فعلاً اتأثر، أو إن شكلها عجبه.

قالت وهي داخله تاني تغير هدومها

"طيب استناني، هجرب فستان تاني… بس متزهقش."

رد بسرعة من وراها

"اتأخري، يمكن أمشي."

قالت من جوه

" مش هتقدر، بالرغم من برودك ورخامتك بس متعملهاش"

ضحك رغماً عنه، بس بسرعة اخفى ضحكته

رجعت فريدة لجوة، الضحكه لسه مرسومة على شفايفها

بعد دقايق، الباب اتفتح تاني بهدوء… وطلعت فريدة.

المرة دي كانت لابسة فستان تاني، طويل، لونه نبيتي غامق، قماشته من حرير مطفي، وبينسدل بانسيابية على جسمها، فيه فتحة صغيرة في الكتف، ولمعة خفيفة على أطراف القماش، بتدي إيحاء بالوقار والجاذبية في وقت واحد.

شعرها لسه سايب، بس المرة دي لفته على ناحية واحدة، وسابت خصلة ناعمة تنزل على خدها، ملامحها كانت هادية، لكن في عينيها لمعة واثقه...

تيم بصلها، سكت، بس نظرته كانت بتتكلم، ثابتة، متفحصة، وفيها حاجة شبه الذهول، بس بيقاومها بعناده المعتاد.

فريدة رفعت حواجبها وقالت بنبرة خفيفه

"طب ده أحلى؟ ولا الأول؟"

اتردد لحظة، وبعدها قال بنبرة حاول يخليها عادية "اللي يريحك، الاتنين... مختلفين."

قالت وهي بتعدل طرف الفستان بإيدها

"بس رأيك انت ايه، عايزة أبقى مميزة في اليوم ده."

قال من غير ما يبصلها بصوت خافت

"هتبقي مميزة... أكيد."

سكتت لحظة، وبعدين ابتسمت ابتسامة خفيفة وقالت " هشوف التالت" 

رجعت تاني بعد شوية، بس المرة دي كانت لابسة فستان مختلف تمامًا، لونه بينك فاتح هادي، بسيط في تصميمه بس في منتهى الأناقة، الجزء العلوي من الدانتيل الناعم، بأكمام شفافة طويلة، والجزء السفلي نازل ناعم لحد الأرض، بيتموج مع كل خطوة بتخطيها

شعرها لسه مفكوك، بس لمّته كله على جنب واحد، والروج اتحول للون وردي ناعم زادها رقة، ملامحها كانت هادية، بس في عينيها نظرة منتظرة… منتظرة رد فعله.

تيم كان واقف في نفس المكان، بيقلب في موبايله، لكن أول ما سمع خطواتها ورفع عينه، سكت، فضل باصصلها، مش قادر يخفي الدهشة ولا الانبهار اللي ظهر في نظرته من غير ما يقصد.

فريدة وقفت قدامه، وقالت بنبرة أخف من الأول، فيها حاجة شبه الخجل

"ده أحلى ولا التانيين؟"

اتأخر في الرد، كأنه بيحاول يلم أفكاره، وقال بعد ثواني

"ده… شكله مختلف."

قالت وهي بتعدل خصلتين من شعرها

"يعني عاجبك؟"

قال وهو بيحول نظره بعيد عنها

"يعني… شكله لايق اكتر"

ابتسمت بخفة وقالت

"عرفت أختار برضو، ها؟"

قال بنبرة متعمدة تكون باردة، بس نبرته كانت أهدى من العادة

"مش وحش."

قالت وهي راجعة ناحيه المرايا

"لو ده وصفك لما تعجبك حاجة، فده يعتبر مدح."

فضل ساكت، مش بيرد، بس عينيه مسابتش انعكاسها في المراية، كانت كل مرة بتدخل بيها بتبهره، شكلها فعلا مميز 

دخلت تجرب الفستان الأخير، وقالتله قبل ما تدخل

"فاضل واحد، ووقتها هشوف إيه أكتر حاجة عجبتك."

اكتفى بهز راسه، مش قادر يرد بكلمة، يمكن علشان ميبانش عليه إنه منتظر يشوفها.

عدت دقايق وبعدها خرجت

ولما خرجت…

وقف مكانه، مترقب

كانت لابسة فستان أسود، بسيط بس فيه فخامة. قماشته ناعمه، مفتوح من تحت شويه، وفيه كم واحد بنص، تفاصيله تحفه، كأن كل تفصيلة فيه اتفصلت على قدها.

لامه شعرها فوق بشكل غير متكلف، فيه شياكة وفيه عفوية، ومن غير ما تقصد، شكلها كان حلو بغباء.

تيم عينيه اتعلقت عليها، كأنها لوحه مش حقيقه

فريدة رفعت حاجبها لما شافته ساكت وقالت بنعومة فيها دلال

" عجبتك؟!

بلع ريقه بصعوبة، قال من غير تفكير

"ده."

سألته

"يعني ده اللي عجبك أكتر؟"

هز راسه ببطء، وقال بصوت أخفت من العادة

"أكتر من اللي كنت متوقعه بصراحه."

ضحكت وقالت وهي بتلف قدام المراية

"يبقى كده خلاص… هو ده"

تيم بلع ريقه، وبص بعيد عنها لحظة، كأنه بيحاول يلم نفسه، وبعدين رجع يبصلها وقال بصوت فيه توتر مش ظاهر، لكنه واضح في نبرته

"لاء"

سكتت لحظة، وبعدين قالت بنفس الهدوء

"ليه لاء؟"

خد نفس قصير، وقال بسرعة

"مش لمناسبة زي دي… بلاش."

قالت بنبرة أهدى، وبصوت فيه لمعة بسيطه من التحدي

"بس هو عاجبني جدًا."

بصلها تاني، وكأنه بيقاوم تأثيرها وبيحاول يرجع لنفسه

"اللي قبله أحلى… ده ملفت أوي، بلاش."

ابتسمت وقالت " ده رايك يعني؟!" 

هز راسه فقالت " يبقي اللي قبل ده" 

فريده دخلت تغير هدومها وخرجت وهيا شايلة الفستان اللي اختارته في إيدها، قربت من الكاونتر وادته للبنت وقالت وهي بتفتح شنطتها 

"تمام كده، قوليلي الحساب كام؟"

البنت ابتسمت وقالت وهي بتبص في الشاشة

"الدفع تم خلاص… الفاتورة طلعت باسم الأستاذ."

فريدة وقفت في مكانها، لفّت ببطء ناحية تيم اللي كان واقف على جنب حاطط إيده في جيبه، وبيبص لها بنظرة ولا كأن في حاجة حصلت.

قالتله وهي مبحلقة فيه

"يعني إيه الدفع تم؟!"

رد من غير ما يرمش حتى

"يعني خلصنا… مفيش داعي للكلام."

قالت بحدة وهي واقفه قدامه

"لا، في داعي جدً، أنا اللي جايبة الفستان، يعني أنا اللي هدفع."

رد ببرود

" مستنيكي بره"

خرج وركب عربيته، اتنهدت وخرجت وراه، ركبت جنبه ومدت إيدها وطلعت الفلوس من شنطتها بسرعة، بس هو بص للفلوس كأنها ورق فاضي وقال

"حافظي عليهم… يمكن تحتاجيهم وأنتي راجعة البيت اللي في اخر الدنيا "

قالت وهي بتشد نفسها أكتر

"مش بحب حد يصرف عليا، فلو سمحت"

قال بهدوء

"وأنا مش بحب أسيب واحدة… مهما كانت، تحاسب قدامي."

اتحرك بالعربيه وهيا كانت متضايقه، بعد شويه قطعت الصمت وقالت بنبرة خفيفة

"ممكن تنزل تجيبلي مايه؟ عطشانة جدًا."

بص قدامه وهو ساكت، وبعد ثانيتين ركن على جنب قدام سوبر ماركت صغير وقال

"ماشي، استني."

نزل بهدوء، دخل السوبر ماركت، وهي في اللحظة دي فتحت التابلوه بهدوء، طلعت الفلوس اللي كانت ناوية ترجعهاله، وحطتها جوه التابلوه وقفلته تاني كأنها معملتش حاجة.

رجع بعد دقايق بسيطة، فتح الباب وركب، معاه كيس صغير فيه حاجات اداهولها

مدّت إيدها تاخد المايه، وبصت في الكيس كان في عصاير كمان قالت بزهول

"إيه ده؟! أنا طلبت مايه بس!"

بصلها وهو بيقفل الباب وقال ببساطة

"وفيها إيه؟ جبت عصير كمان… يمكن تحبي."

قالت وهي بتبصله باندهاش

"أنا قولتلك مايه… مش هموت من العطش يعني للدرجادي"

رفع حاجبه وسألها 

"وهو العصير في قانون بيمنع نشربه؟! "

ساق تيم العربية بصمت، وشغل مزيكا خفيفة في الخلفية كانت عاملة جو مريح شوية… الجو بينه وبين فريدة فيه هدوء متوتر

فريدة فضلت تبص من الشباك، وبعد لحظة قالت وهي لسه عينيها على الطريق

"هو غريب… إنك تكون شخص متحفظ أوي كده… وفى نفس الوقت، لما بتقرر تساعد، بتعمل ده من غير ما تبين أي مشاعر."

بصلها تيم بسرعة، وبعدين رجع يبص للطريق وقال بنبرة هادية

"وإنتي غريبة إنك مش بتسكتي أبدا… حتى في لحظة هدوء لازم تطلعي منها بكلام."

ضحكت وهي بتعدل شعرها

"دي طريقتي… بتعامل مع الناس بالكلام، بس إنت واضح إنك بتتعامل بالصمت."

قال بسخرية خفيفة

"الصمت أذكى كتير من الكلام أوقات."

قالت

"بس مش أدفى."

سكت فكملت

"وبعدين… مش لازم تكون كل حاجة فيها حسابات وعقل، ساعات الكلمة الطيبة بتفرق، حتى لو كانت صغيرة."

قال وهو بيهدي السرعة شوية

"أنا مش طيب… ومش بقول حاجات ملهاش لازمة."

قالت وهي بتبصله بتركيز

"بس ساعدتني أختار فستان، ودفعت الحساب، وجبت عصير، رغم إني طلبت مايه… وكل ده من غير ما تبرره بكلمة، يبقى إنت مش زي ما بتحاول تبان."

رد وهو بيوقف العربية قدام بوابة الفيلا

"دي مش طيبه، دي اساسيات عادي، أو واجب، سميها زي ما تحبي"

قالت وهي بتفك حزام الأمان وبتبتسم

" مش قادره افهمك، بس اللي متأكده منه انك مش وحش ابدا، لذيذ وتتحب "

بصلها لحظة، لكنها فتحت الباب ونزلت بسرعة، كأنها كانت عايزة تهرب قبل ما تسمع ردّه أو حتى يبصلها أكتر.

وقف لحظة مكانه… وبعدين قال بصوت واطي وهو لسه ماسك الدريكسيون

"يا ريت أعرف أهرب زيك..."

طلعت فريدة فوق بهدوء، وأول ما فتحت باب أوضة يونس، لقت نظرته متعلقة بيها، رفع حاجبه وسألها بنبرة فيها تساؤل وعتاب

"كنتي فين كل ده؟"

فريدة سكتت لحظه، فكرت ترد بإيه، بعدين قالت " كنت بجيب حاجات من الشارع نقصاني"

يونس بصلها باستغراب وهو بيعدل نفسه على السرير وقال

" كنتي بعتتي حد يجبلك اللي محتاجاه"

ردت وهي بتحضر الحقنه

"بحب اجيب حاجتي بنفسي "

خدت نفس وهي بتقربله وبتحط الحقنه في الكانيولا وقالت بنبرة خفيفة

" ارتاح شويه، شكلك مرهق وتعبان "

يونس غمض عينيه بألم واستسلم للنوم

يوم كتب الكتاب، اليوم كان هادي وبسيط، فريده مع يسر في اوضتها في البيت، كل حاجه بسيطه جدا، مفيش ميكب ارتيست مفيش حد غير يسر وفريده ومعاهم ياسمين قاعده بعيد شويه بتبرد ضوافرها كان في توتر واضح على يسر، فريدة كانت قاعدة جنب يسر، بتحاول تهديها بلُطف وهي ماسكه ايديها، يسر وشها كان مشدود، بتعض شفايفها ومش قادرة تركز في حاجة حواليها بالرغم من فرحتها بس كانت متوتره 

قالت فريدة بهدوء وهي بتبتسم

"مش معقول كده يا يسر، ده يومك، خليكي هادية شويه، ده مش امتحان."

يسر أخدت نفس عميق وحاولت تبتسم، بس عينيها فضلت تلمع من التوتر

"مش قادرة… مش مستوعبة إن النهاردة فعلاً اليوم ده، حاسة إن في مليون حاجة ممكن تبوظ."

ياسمين قالت بنبرة فيها لمحة سخرية وهي بتبصلها

"هو كتب كتاب مش حفلة ملك إنجلترا يعني، مفيش داعي للدراما دي كلها."

فريدة بصتلها بسرعة، لكنها فضلت محافظة على هدوئها، رجعت تبص ليسر وقالت بلُطف

"سيبيك من الكلام ده، كل حاجة هتمشي زي ما انتي مخططة، وكلنا معاكي."

ردت وهي بتحاول تضحك

"أنا بس خايفة يحصل حاجة تعكنن عليا، أنا متوترة من غير سبب."

ياسمين اتكلمت تاني، المرة دي بنبرة أهدى 

"انتي بس بتكبرى المواضيع، كتب كتاب عادي في البيت يعني، مش اول واحده تتجوز"

فريدة لمحت الضيق في كلام ياسمين، وقررت تغير الموضوع بسرعة، قالت وهي بتقف

"يلا نقوم نجهز شعرك، لازم تخلصي بدري علشان نلحق نصور صور حلوة قبل الزحمة."

يسر قامت ببطء، لسه في نغزة قلق جواها، وفريدة حطت إيديها على كتفها وقالت بابتسامة

"أنا معاكي، مش هسيبك لحظة."

موبايل ياسمين رن فجأة، الصوت قطع الكلام اللي كان داير في الأوضة.

يسر بصتلها وسألت ببساطة

"مين؟"

ياسمين اتوترت جدًا، نظرتها اتغيرت وقالت بسرعة وهي بتحاول تخبي ارتباكها

"واحدة صاحبتي... هخرج أرد."

خرجت من الأوضة وقفلت الباب وراها، قلبها بيخبط في صدرها، وبصت على الاسم 

ردت وقالت بصوت واطي فيه قلق

"نعم؟"

جالها صوته من الناحية التانية، صوته هادي وهو بيقول

"انتي كويسة؟"

قالت وهي بتحاول تسيطر على صوتها المرتعش

"هبقى كويسة ازاي وكتب كتابك على أختي النهاردة؟"

قال بسرعة، وكأنه بيحاول يلحق حاجة بتضيع منه

"ياسمين... أنا بحبك انتي... وانتي عارفة ده."

ضحكت ضحكة قصيرة مليانة قهر وقالت

"آه طبعًا... عشان كده اتجوزت أختي!"

قال بسرعه

"انتي عارفة إن ده غصب عني، وإن قلبي معاكي من الأول... أنا بحبك انتي، مش هي."

قالت بصوت واطي بس فيه غضب مكبوت

"وعايز إيه يعني؟ دلوقتي خلاص، انتهى الموضوع."

قال

"انتي اللي كلمتيني يوم الخطوبة، وقلتيلي انك مش قادرة تنسيني، افتكري."

سكتت لحظة، وبعدين قالت

"اليوم ده عدى خلاص، والنهاردة كتب كتابك."

رد بنبرة فيها إصرار

"وأنا مش عايز كتب الكتاب ده، عايزك انتي."

قالت بدهشة

"قصدك إيه؟"

قال ببطء، كأن كل كلمة فيها قرار

"يعني لو انتي طلبتي مني مجيش، مش هاجي. قدامك حلين، يا تيجي انتي ونهرب سوا وهتجوزك بعيد عن الكل ، يا إما هاجي كتب الكتاب، ووقتها هتضطري تحضري فرحي على أختك."

سكتت، صوت أنفاسها بس هو اللي باين، وبعدين قالت بارتباك

"مش هينفع أهرب معاك... انت بتهزر؟"

قال بنبرة أهدى بس حاسمه

"شايفة حل تاني؟ الخيار في إيدك."

قالت بصوت مهزوز

"مش عارفة..."

قال

"يبقى فهمت، سلام يا ياسمين."

قالت بسرعة وهي بتحاول توقفه

"لاء! لاء، استنى!"

قال بخبث

"إيه؟"

قالت وقلبها بيدق 

"هجيلك... خلاص، أنا كمان بحبك."

رد وهو بياخد نفس

"حلو... هستناكي، اول ما اوصل تحت البيت هديكي رنه تنزلي"

قفلت المكالمة، وفضلت واقفة ثواني، بتحاول تستوعب اللي حصل، وبعدها رجعت الأوضة.

يســر كانت قاعدة قدام المراية، إيديها بتترعش وهي بتظبط تسريحه جايباها من الانستجرام وحبت تعملها

فريدة كانت واقفة وراها، بتعدل في التفاصيل الصغيرة، وبتحاول تهديها بكلام خفيف

"متحركيش إيدك كده، هتبوّظي اللي عملناه كله… بصيلي، أنتي زي القمر، متقلقيش."

يسر خدت نفس عميق، وقالت بصوت خافت

"حاسّة إني مخنوقة… مش عارفة ليه، بس قلبي مقبوض."

فريدة لمحت توترها، فمسكت إيدها وقالت

"ده طبيعي، كل البنات بتتوتر يوم كتب كتابهم… ده خوف من التغيير، مش أكتر، بس انتي هتبقي تمام، صدقيني."

في اللحظة دي دخلت ياسمين، ملامحها متماسكة بس عينيها فيها ارتباك واضح

فريدة قالت

"أهو ياسمين جت، تعالي شغلي اغاني على زوقك وغيري الجو"

ياسمين ابتسمت ابتسامة باهتة وقالت

"أكيد…"

راحت وقعدت على طرف السرير، بتبص على يسر من بعيد، بس دماغها في حتة تانية خالص.

كانت كل كلمة قالها لسه بتلف في دماغها

"لو طلبتي مني، مش هاجي."

”أنا بحبك.”

“قدامك حلين.”

يسر بصتلها وقالت

"انتي كويسة؟ حسيت إنك اتأخرتي في المكالمة."

ياسمين بسرعة قالت وهي بتحاول تتحكم في صوتها

"آه… آه، عادي،دي واحدة صاحبتي ."

فريدة بصّت لياسمين بسرعة، لاحظت حاجة في نبرة صوتها، بس سكتت.

يسر قالت بحذر

"متحمسة ولا متوترة زينا؟"

ياسمين قالت

"أنا؟ لاء، عادي... انتي اللي هتتجوزي مش انا"

يســر هزت راسها وقالت

"صح، خايفه اقول المأذون لاء بدل موافقه"

فريده ضحكت وقالت 

" متعمليهاش لاء، وبعدين خدتي التوتر كله انهارده، سيبي شويه للفرح"

فجأة موبايل ياسمين نّور تاني، بس سحبته بسرعة وحطته على الصامت 

خلاص… هي أخدت قرار.

وبين اللحظة والتانية، كانت بتبص ليسر، وكل مرة عينها تتملى دموع ومتلحقش تنزل.

هي بتحب أختها… بس بتحبه أكتر.

والساعة بتجري.

والاتفاق اتقال.

وهو مستني.

ياسمين قامت من مكانها بهدوء، قلبها بيخبط في صدرها كأن في طبول حرب، قربت من يسر، ضمتها من ضهرها وهي قاعدة قدام المراية وقالت

"أنا بحبك قوي… عارفة كده؟"

يسر بصتلها باستغراب من المراية

"حبيبتي وأنا كمان… مالك؟"

هزت راسها وقالت بابتسامة مصطنعة

"ولا حاجة… هخرج أتنفس شوية وارجعلك."

يسر قالت

"متتأخريش… حساني لوحدي."

خرجت ياسمين بسرعة، مشيت في الطرقة وكأن رجليها بتجري لوحدها، قلبها بيصرخ، عقلها بيمنعها بس هيا خلاص خدت القرار 

وصلت للباب الخارجي، بصت حواليها، لقت العربية واقفة بعيد على جنب، وهو جوّاها.

نزل بسرعة أول ما شافها، فتح الباب وقال

" اتأخرتي ليه، فكرتك مش جايه

قالت بصوت مبحوح

"لو مفروض أكون مع حد… فهو إنت."

ركبت جنبه، قفل الباب، والعربية اتحركت.

وفي نفس اللحظة، جوه البيت…

يسر كانت بتنده على ياسمين، وفريدة بتدور حواليها،

فريدة خرجت للطُرقة تنادي

"ياسمين؟!… ياسمين؟!"

بس مفيش رد.

دخلت الأوضة تاني، وقالت 

" ملقتهاش"

يسر بصتلها وقالت

" مش تحت، قالت هتيجي علطول"

الباب خبط، وفتحت فريده بسرعه وهيا بتقول 

" جت"

فتحت بس لقت يوسف اخو يسر وقف قدام الباب، مبتسم ابتسامة خفيفة وقال بصوته الهادي

"إيه يا بنات؟ المأذون وصل."

يسر اتجمدت لحظة، وبعدين بصت لفريده، وببطء وقفت وقالت بصوت بيرتعش

"أنا متوترة أوي…"

يوسف قرب منها، وبحب كبير باس جبينها وقال

"ده طبيعي، أنهارده حياتك هتتغير."

فريده ابتسمت وهي بتبص ليهم، المشهد كله دافي ومليان مشاعر

يوسف بص في ساعته، وبعدين قال بنبرة قلق خفيف

"رني على محمد، المفروض يكون جه."

يسر رفعت حاجبها باستغراب وقالت

"هو لسه مجاش؟"

هز راسه وقال

"لاء، مجاش… رني عليه بسرعة، اكيد في الطريق"

فتحت يسر موبايلها بسرعة، قلبها بدأ يدق أسرع، ضغطت على اسمه ورنت، لكن بعد لحظات قصيرة، بصت ليوسف وقالت بصوت فيه قلق

"فونه مقفول…"

لحظة صمت قصيرة مرت، قبل ما فريده تقول بقلق

" ياسمين مش موجوده؟! وهو فونه مقفول؟!" 

يسر قالت وهيا مستغربه 

" وايه العلاقه؟" 

فريده قالت بسرعه

" رني على ياسمين" 

يسر سألتها بخوف

" في ايه يا فريده، ايه اللي تعرفيه قولي "

فريده اخدت نفس عميق وقالت

"فاكرة لما قولتلك إنّي شفتهم مع بعض؟ وجيت أقولك، بس انتي وقفتي الكلام وقتها وقلتيلي إنها أختك، وإنها مستحيل تبص لخطيبك؟"

سكتت لحظة وكملت

"أنا كنت شاكّة يا يسر... الشك قتلني، علشان الوضع اللي شفتهم فيه مكنش طبيعي، قولتلك انهم كانوا متوترين بشكل غريب، بس لما حاولت ألمّحلك قولتيلي أكيد عادي... بس هو مكنش عادي."

يوسف كان واقف، متجمد مكانه، وقال بنبرة جادة فيها توتر ظاهر

"قصدك إيه يا فريده؟ أنتي عارفة إن الكلام ده خطر؟! أنتي بتقولي إن خطيب أختي... وأختي؟! أنتي مدركة؟!"

فريده بصّتله، ملامحها فيها ألم وحيرة

"أنا مكنتش عايزه أتحط في موقف زي ده يا يوسف، صدقني، بس أنا حكيت اللي شوفته... مزودتش ولا نقصت، ويمكن أكون غلطانة، وبتمني، بس للأسف"

يسر مقدرتش تستوعب، اتسندت على أول كرسي جنبها وقعدت، عيونها تاهت في الفراغ، والدموع بدأت تلمع فيها وهي بتفتح موبايلها بتوتر.

رنت على ياسمين...

لكن الفون مقفول.

بصت لفريده، وبصوت مش مسموع تقريبًا قالت

"مقفول... فونها مقفول..."

نظرة يأس وخوف ظهرت على وشها، وكأن اللحظة اللي كانت مستنياها طول عمرها اتحولت لكابوس،

أما يوسف، فكان واقف، وإيده متشنجة، وصوته طالع من بين اسنانه بغضب

" مش حقيقي، مستحيل يكون حقيقي" 

يوسف خرج من الأوضة بسرعة، ملامحه مش واضحة، بس خطواته كانت عنيفة كأن الأرض مش شايلاه.

يسر فضلت قاعدة، عينيها متعلقة بالباب اللي خرج منه، مش مستوعبة، مش مصدقة، كل حاجة حواليها بقت ضباب.

بصّت لفريده، صوتها مكسور وكل كلمه فيها رجاء

"قولي إنك بتكدبي... علشان خاطري يا فريده، دي أختي... وهو كان هيكون جوزي كمان كام دقيقة."

فريده قربت منها بهدوء، ونزلت لمستواها، عينيها فيها حزن، وقالت بصوت ناعم

"أنا آسفه يا يسر... بس ياريت فعلاً أكون غلطانة."

يسر خدت نفس متقطع، وقالت وهي بتحاول تقنع نفسها

"أعمل إيه؟ إزاي؟... هي هتيجي دلوقتي، صدقيني... ياسمين مستحيل تعمل فيا كده... دي أختي!"

عيونها دمعت وهي بتفتكر، وقالت بصوت واطي مهزوز

"قبل ما تخرج... جت حضنتني وقالتلي إنها بتحبني..."

سكتت لحظة، كأنها بتربط الأحداث، وبعدين قالت

"لما فونها رن... كان هو، بعدها اتوترت، وكانت غريبة... أكيد ضحك عليها... هي لسه صغيرة."

فريده مدّت إيدها بهدوء، لمست إيد يسر وقالت بلطف وهي بتحاول تهديها

"اهدي يا يسر... اهدي يا حبيبتي... أنا هنا، مش هسيبك."

يسر اتكلمت بخفوت، كأنها بتحكي لنفسها

"كان ممكن أكون دلوقتي مراته... كنت هبقى مراته، ويا ربي كنت ناوية أعيش معاه العمر كله...

وهي، أختي... كانت بتبصله، كانت بتاخده مني، وأنا بحبها وعمري ما شكيت."

سندت وشها بين ايديها وقالت 

"ليه يا فريدة؟ ليه مقلتيش وقتها؟ ليه سكتي؟ ليه مقولتيش بوضوح "

فريدة حاولت توضح

" حاولت بس انتي مكنتيش مصدقه، قولتلك فقولتيلي اكيد بيتكلموا عادي" 

يسر بصتلها، والدموع نازله على خدها

" لاني واثقه فيهم، اشك في مين، دول اقرب اتنين ليا"

الباب خبط مرتين قبل ما يتفتح، ويدخل أبو يسر بصوت فيه نبرة فرحة مش عارف إنها هتتقطع في لحظة 

"إيه يا يسر يا حبي..."

بس وقف مكانه لما شافها قاعدة على الكرسي، ملامحها باهتة، بتعيط ، وشكلها باين عليه الصدمه 

وفريده قاعدة جنبها، ملامحها مشوشة ما بين القلق، والشفقة، والعجز.

امها دخلت ووقفت ورا جوزها

"في إيه؟ إنتو كويسين؟!"

أبو يسر كرر بصوت هادي

"يسر، مالك؟ بتعيطي ليه؟!"

يسر مردتش، خدت نفسها بالعافية وكأنها بتقاوم اللي بيحصل، فريده حطت إيدها على كتف يسر تحاول تهديها، بس مقالتش حاجة.

باباها قرب، سألها 

"حد يرد عليا؟! في إيه؟!"

يوسف دخل فجأة، الباب اتفتح بعنف، ووشه كان شاحب، وعينيه مليانة غضب مكسور

"مفيش كتب كتاب يا بابا."

مامتها ردت باستغراب 

"إيه؟! بتقول إيه يا يوسف؟!"

باباه قرب منه وهو بيقول 

" يعني ايه يا ابني، ما تفهموني"

يوسف عض على شفايفه، صوته طلع مبحوح

"ياسمين... ياسمين هربت... مع محمد."

لحظة صمت... كأن الزمن وقف.

الام اتسمرت مكانها، وإيدها اتحركت لا إراديًا ناحيه صدرها، الاب حس بصدمه وقال وهو مش مصدق

" يعني ايه؟ انت بتقول ايه؟!"

يسر قالت بصوت عالي نسبياً 

"يعني خانتني يا بابا... هي وهو... سابوني في اليوم اللي المفروض أكون فيه عروسة!"

باباها بدأ يرجع خطوة لورا، وشه شِحب، وابتدى يتكلم بصوت مخنوق

"مش ممكن... مش ممكن... بنتي؟!"

وفجأة، رجله خانته، وقع على الأرض.

الام صرخت بصوت عالي باسمه 

يوسف جري عليه وهو بيزعق

"بابا!!! بابا رد عليا!!"

الأب مكانش بيرد، صدره بيطلع وينزل بصعوبة، والعرق مغرق وشه.

الأم قعدت جنبه وهي بتنهار ومش عارفه تعمل ايه 

تيم رجع البيت بعد ما الراجل اللي بينضف عربيته قاله إنه لقى فلوس في التابلوه، قعد يفكر شوية، ولما ربط الأحداث، فهم إنهم من فريدة.

دخل الفيلا، وكانت سالي قاعدة في الجنينة، أول ما شافته، قامت بسرعة وقالت

"تيم، أخيرًا جيت."

رد عليها وهو ماشي ناحيتها

"جاي آخد حاجة وماشي."

قالت بنبرة فيها وجع

"برضو؟"

رد ببرود

"خلاص هانت، ماما جاية بكره الساعة ٧:٤٥ دقيقة، وأنا هجيبها من المطار بنفسي، وهعرفها إني مش قاعد في البيت."

سالي قالت وهي بتحاول تبين إنها متضايقة

"ماشي يا تيم، إنت حر... محدش قادر يفهمني منكوا اساسا"

بصّلها وقال بنبرة قاسية

"حرام عليكي تأذي غيرك يا سالي، إنتي عارفة إن ماما هتمشيها، ياريت تفكري وتبقي تشغلي عقلك شويه، ياريت بجد "

سالي ردت بثقة

"أنا عارفة أنا بعمل إيه... شكرًا على النصيحة."

سابها وطلع على أوضة يونس، خبط قبل ما يدخل، ولما فتح الباب، لقى ممرض قاعد مع يونس، دخل وقال بصدمه 

"إنت جديد هنا؟!"

يونس ضحك وقال

"إيه يا عم تيم، عاش من شافك!"

تيم قال وهو بيبتسم

"أومال أنا جاي لمين دلوقتي؟"

يونس قال بمزح

"بعد إيه بقى... ما خلاص."

تيم سأل وهو بيبص حواليه

"فريدة فين؟ مش المفروض تكون هنا دلوقتي؟"

يونس قال ببساطة

"ما هي مشيت... بس جابت بدالها محمود."

كان محمود بيحاول يتكلم، بس يونس غمزله بسرعة.

تيم قال بدهشة

"يعني مشيت؟!"

يونس أكد

"آه، عايز حاجة منها ولا إيه؟!"

تيم هز راسه وقال بنبرة هروب

"لاء... وهعوز منها إيه أنا؟ بس بسأل، كويس إنها جت منها، بس إيه السبب؟ كانت رافضة تمشي يعني."

يونس قال بنفي

"مش عارف والله."

تيم سأله بشك

"حد ضايقها يعني؟"

يونس بسرعة قال

"أبدًا، محصلش."

تيم بص على محمود وسأله

"هي شغالة في نفس المستشفى اللي إنت فيها؟"

محمود هز راسه

"آه، إحنا صحاب أصلًا."

تيم اتنهد وغير الموضوع

"وإنت عامل إيه؟"

يونس قال وهو مبتسم ابتسامة حزينة

"وحش والله من غير فريدة، تحسها هي المسكن، والله."

تيم قال بحده

"في إيه، ما تتظبط بقا."

يونس رد وهو بيبص لفوق

"يا عم البنات رقيقة... مش زي اللي بتعامل معاهم."

بص على محمود وقال

"لا مؤاخذة يا محمود."

محمود ضحك وقال

"ولا يهمك يا حبيبي."

تيم وقف وقال

"أنا ماشي... سلام."

يونس نده عليه

"هتمشي لأوضتك ولا هتمشي هتمشي؟"

تيم قال وهو بيزفر

"مش عارف... لسه."

يونس قال بمكر

"بس فريدة مشيت... ملكش حجة."

تيم وقف لحظة، وبعدين قال

" هشوف لسه قولت"

في عربية الإسعاف، صوت جهاز نبض القلب بيطّمنهم إنه لسه عايش... لكن الكل ساكت.

الأم قاعدة جنب جوزها، ماسكة إيده، ودموعها بتنزل من غير صوت، يوسف قاعد قصادهم، لا يقل وجع عنهم، بس متماسك، لازم يكون قوي. 

وصلوا المستشفى.

الدكاترة جريوا بيه على الطوارئ، وقالوا

"واضح إنه جاله جلطة حادة، ادعوله، بنعمل اللي نقدر عليه"

في صالة الانتظار، الجو خانق، يوسف واقف، بيتمشى رايح جاي.

الأم قعدت على الكرسي وهي بتردد

"يارب ما يجراله حاجة... يارب ما يجراله حاجة."

يسر كانت قاعدة بعد ما جت هيا وفريده وراهم، وشها شاحب وعينيها ثابتة على الأرض.

فريده قالت بهدوء

"يسر... اشربي العصير ده يهديكي شويه"

يسر هزت راسها برفض، وبصوت واطي جدًا قالت

"أنا السبب... أنا السبب."

يوسف سمعها وقال وهو بيقرب منها

"انتي مش السبب، متلوميش نفسك، محدش كان يتوقع اللي حصل ده."

بس صوته كان مكسور... حتى هو مش مصدق الكلام اللي بيقوله.

بعد شوية، الدكتور خرج وقال

"الحمد لله، عدّى مرحلة الخطر... بس لازم يرتاح تمامًا، ممنوع أي ضغط نفسي عليه."

يوسف قال بسرعة

"ينفع ندخله؟"

الدكتور هز راسه

"واحد بس، ويفضل يبقى في هدوء تام."

الأم دخلت، وسابوها لحظة معاه، يوسف وقف ساند على الحيطة، بيحاول يجمّع نفسه.

قال لفريده

"أنا مش عارف هعمل إيه... هقول للناس إيه؟ هقابل أختي إزاي لو شفتها؟"

فريده قالت بصوت واطي

" سيبها على ربنا، الناس فهمت أن عمو تعب، ناس كتير هتيجي تتطمن عليه دلوقتي، متبينش اني في حاجه"

يوسف قال

" اعملها ازاي، ازاي قدرت تعمل حاجه زي دي، ليه فكرت في نفسها وبس" 

تيم كان قاعد في أوضته على طرف السرير بيفكر وبيسأل نفسه

"ليه مشيت؟"

فضل يسأل نفسه السؤال ده كذا مرة، كأنه بيحاول يلاقي إجابة من الفراغ.

"هي ليه مشيت؟ أنا قلت حاجه ضايقتها؟ ولا حصلها حاجه؟"

عمال يردد نفس الكلام وفجأة افتكر إن فريدة كانت قايله قبل كده إن عندها كتب كتاب صاحبتها.

نسي خالص بالرغم من أنه جاي اصلا ومعاه فلوس الفستان اللي هيا حطتهم في التابلوه، حس نفسه غبي شويه، وشه اتبدل، حس إن يونس خدعه، قام بسرعة وخرج من أوضته وراح على أوضة يونس، كان محمود لسه بيحطله المسكن.

تيم قال بنبرة سريعة

"ثانية واحدة."

محمود بصله مستغرب، وكمان يونس رفع حاجبه كأنه بيقول "في إيه؟"

تيم دخل الأوضة، واقف قدام يونس وقال بعصبية

"إنت كدّاب يا زفت."

يونس فتح عينه من الصدمة

"كدّاب في إيه؟!"

تيم قال وهو بيقرب منه

"فريدة ممشيتش… فريدة راحت كتب كتاب صاحبتها، وبتكدب عليا"

يونس قال بارتباك وهو بيحاول يخفف التوتر

"إيه ده؟! انت عرفت إزاي؟"

تيم قال وهو بيجز على سنانه

"حاجة متخصكش… يا كداب."

يونس ضحك بخفة وقال

"يا عم بهزر معاك، متبقاش تقيل كده...بس شاغل بالك ليه؟"

تيم بصله بحدة وقال

"ومشغلهوش ليه؟ طبيعي أشغل بالي، اصلا مفيش حاجه شاغله بالي غير الموضوع ده، وخصوصا بكره"

يونس قاله 

" وانت متضايق ليه، مش انت خرجت نفسك منها، اهرب يلا كعادتك" 

سكت شويه كأنه كان هيقول حاجه

يونس سأله 

" عايز تقول ايه ؟!" 

تيم لف وشه وقال بسرعة

"ولا حاجه… أنا ماشي."

وسابه وخرج والغضب باين على وشه

في شقة مفروشة صغيرة، كانت ياسمين قاعدة على طرف السرير، عينيها سرحانة في الأرض، ملامحها جامدة، بس عقلها بيغلي، مش بتعيط، ومش بتتكلم، بس كل تفاصيل وشها كانت بتقول إنها مش مرتاحة… فيه حاجة تقيلة على قلبها.

محمد كان واقف جنب الشباك، بيبص عليها من بعيد، وبيحاول يقرا اللي جواها، قرب منها وقال بهدوء

"ياسمين، متخافيش… أنا معاكي، ومش هسيبك."

مردتش.

قرب أكتر، وقعد جنبها وقال

"أنا عارف إنك مش بتتكلمي، بس شايفك… شايف إنك مش مرتاحة."

اتنهدت، وقالت بصوت واطي

"أنا مش ندمانة، بس... بابا لما يعرف، هيعمل إيه؟ ماما، يوسف، يسر..."

صوتها اتكسر في الآخر، لكنها شدت نفسها، ورجعت لسكونها.

محمد قال بسرعة

" ملناش دعوه يا ياسمين، خلاص انسيهم، مش هينفع نرجع، مفيهاش رجوع"

ياسمين بصتله، عينيها مفيهاش دموع، بس مليانة خوف 

قال بهدوء

"انتي مش لوحدك، انا معاكي، احنا خدنا قرارنا سوا ونفذناه سوا، وهنعيش باقي حياتنا مع بعض"

ياسمين قالت 

"أنا خايفة... بس مش منهم، من نفسي، مش مصدقه اللي عملته"

محمد قرب منها وحط إيده على كتفها، وقال

"أنا معاكي، صدقيني، كل حاجة هتتصلح… حتى لو أخدت وقت."

كان واضح إنها بتحاول تصدّقه، بس جواها في حرب.

عند فريدة، كانت قاعدة مع يسر في أوضتها، الجو هادي بس كله توتر وألم.

فريدة قالت بنبرة هادية وهي بتحاول تطمنها

"أنا هفضل معاكي النهارده، كلمت إسلام وقلتله إني هكون معاكي."

يسر كانت نايمة على جنبها، ولفت الغطا حواليها، ردت بصوت واطي مليان خيبة

"مفيش داعي يا فريدة... لو عايزة تروحي، روحي."

فريدة قربت منها أكتر وقالت بصدق

"يسر، بجد أنا مش عارفة أهون عليكي إزاي... مش عارفة أصلاً إحساسك، بس أكيد اللي حصل خير، يعني... كويس إنك متجوزتهوش."

يسر اتعدلت وقعدت، عينيها فيها تساؤل وألم وقالت

"طب وياسمين يا فريدة؟ دي أختي الصغيرة... إزاي قدر يضحك عليها؟ وهي صدقته إزاي؟"

فريدة حطت إيدها على كتفها وقالت بنبرة فيها أمل

"ياسمين هترجع، أكيد، لما تعرف إنه إنسان مش كويس هترجع، صدقيني، هترجع وهتفهم غلطها... هو غلط كبير، عارفة، بس هتفهم، هي لسه صغيرة ومش فاهمة."

يسر قالت بصوت مكسور

"وبابا وماما... ويوسف؟"

فريدة اخدت نفس وقالت

"محدش هيعرف يا يسر، كتب الكتاب محصلش علشان باباكي تعب، الناس كلها عارفة كده، أما أهل خطيبك، فهما زيكوا... ابنهم هرب برضو وصغّرهم قدام الناس."

يسر قالت بإحساس عميق بالخذلان

"بس البنت غير الولد يا فريدة... بنت تهرب دي كارثة."

فريدة هزت راسها وقالت بإصرار

"الاثنين غلطوا نفس الغلط، مينفعش نقول إنها لوحدها الغلطانة أو إنها غلطت أكتر."

يسر سكتت لحظة وبعدين قالت وهي بتبص في الفراغ

"أنا بس اللي شاغل تفكيري... هو جه اتقدملـي أنا ليه؟ ما كان ييجي ليها هيا! ليه يعمل كده؟"

فريدة قربت منها أكتر، وقالت بحنية

"خلاص يا يسر... اللي حصل حصل، المهم دلوقتي ترتاحي... ومتفكريش."

ساد الصمت في المكان، بس صمت مزعج مليان جروح والم 

الصبح، كانت فريدة صاحيَة من بدري، أو يمكن منامتش أصلًا

يسر برضو كانت في حالة تانية، نايمة بعين وصاحية بعين، مش قادرة تصدق اللي حصل، لسه جواها أمل بسيط إنها تصحى تلاقي كل ده كابوس، بس الواقع كان بيشدها كل شوية ويقولها "لاء... حقيقي".

قامت من على السرير بهدوء، كانت حركتها بطيئة، كأنها مش حابة تواجه اللي ورا الباب، فريدة سألتها، صوتها كان واطي لكن قلقان

"رايحة فين؟"

يسر ردت

"هطمن على بابا."

فريدة قالت بسرعه

"استني… هاجي معاكي."

خرجوا سوا من الأوضة، مشيهم كان بطيء، كأن رجليهم تقيلة 

وصلوا قدام الاوضه، الباب كان مفتوح، فدخلوا بهدوء.

أم يسر كانت قاعدة على سجادة الصلاة، عينيها كلها دموع، وشها شاحب وبتعيط في صمت، كانت باينة مكسورة.

باباها كان نايم على السرير، ملامحه تعبانة جدًا، النوم مش مريح، والهم واضح على ملامحه.

اول ما شافتهم أم يسر، قامت بسرعة وراحت لبنتها، حضنتها حضن طويل كأنه محاولة تعويض عن وجع الليلة اللي فاتت.

يسر حست حضن أمها وكأنه بيهزّها من جوه، حضن دافي لكنه مليان وجع، وقالت بصوت مخنوق

"بابا عامل إيه؟"

أمها مسحت دموعها بسرعة وقالت

"الحمد لله… أحسن من بالليل شوية."

سكتت لحظة، وبصت لبنتها وسألتها

"وإنتي… إنتي عاملة إيه؟"

يسر عضّت شفايفها، وعنيها نزلت دمعة واحدة وهي بترد

"هكون عاملة إيه يعني يا ماما؟ حاسة إني في كابوس… ونفسي أفوق منه ومش عارفة."

أمها حضنتها تاني، وكأنها بتحاول تحوش عنها وجع الدنيا كلها، وقالت وهي بتحاول تثبت صوتها

"ربنا كبير يا يسر… اللي حصل مش سهل، بس إحنا أقوى، ربنا معانا، ربنا معانا يا بنتي"

يسر سكتت، كانت بتفكر في كل كلمة، بس عقلها لسه مش مستوعب.

بصّت على باباها، وكان نايم بعيون مقفولة وتنهيدة تقيلة طالعة منه، كأن قلبه بيتكلم من غير صوت.

قالت وهي بتقرب منه وتمسك إيده

"أنا السبب… أنا كنت شايفة حاجات ومطنشاها، كنت واثقه فيهم، بس هما خانوني"

أمها قربت منها وقعدت جنبها، قالت بهدوء

"إنتي مش السبب يا بنتي، محدش كان يتوقع اللي حصل… لا أنا، ولا أبوكي، ولا حد اتوقع ده"

فريدة كانت واقفة وراهم، بتحاول تسيطر على دموعها، بس عينيها فضحتها.

جه صوت أبو يسر، واطي بس حاد

"مش عايز أسمع اسمها في البيت ده تاني… أنا بنتي ماتت، مش عايز أسمع سيرتها."

أم يسر بصتله بدموع ووجع، وقالت بتحاول تلطف الكلام

"بس..."

قطع كلامها بنظرة مليانة كسر وتعب، وقال بصوت مبحوح من الوجع

"معنديش بنات كده، اعتبروها ماتت."

الكلمات نزلت تقيلة على الكل، بس محدش هيقدر يعترض اصلا 

فريده بعد ما سابت يسر نايمه، روحت البيت، أول ما دخلت لقت إسلام أخوها في الصالة.

بصتلُه، ولقيت نفسها بتجري عليه وتحضنه، حضن الأمان اللي كانت محتاجاه 

حضنها بقوة، وقال بهدوء

"اهدي يا حبيبتي... اهدي"

فريدة كانت بتعيط، قالت وهي بتحاول تمسك دموعها

"زعلانة أوي على يسر، مكانتش تستاهل اللي حصل… بس أنا نبهتها، نبهتها بطريقه غير مباشرة، وقلتلها تاخد بالها، وهي مصدقتش."

إسلام رد عليها وهو بيطبطب على ضهرها

"فريدة، انتي عملتي اللي عليكي، وهي كبيرة وعاقلة، واللي حصل ده… كويس إنه حصل قبل الجواز مش بعده."

فريدة هزت راسها وقالت

"قولتلها كده برضو… بس هناك، حالتهم كلهم وحشة، يسر وباباها، ويوسف، ومامتها… متخيل اللي حصل؟"

إسلام قال بهدوء

"عارف، بس الوقت هيهديهم، وكل واحد فيهم هيلاقي طريقه يتعامل بيها مع الوجع، انتي بس خليكي جنبها، وجودك بيفرق."

هزت راسها وقالت 

" اخدت مسكن علشان تعرف تنام، بتعيط طول الليل فحاولت اديها حاجه تريحها" 

على آخر النهار، وصلت فريدة بيت يونس، كانت ماشية بخطوات هادية، لكن تعبانة من جو اليوم كله، أول ما دخلت، يونس شافها وابتسم بارتياح واضح وقال

"ياااه، حمد الله على السلامة."

فريدة ردّت وهي بتخلع الشنطة من على كتفها

"متأفورش، ده هو يوم."

ضحك يونس وقال بنبرة خفيفة

"والله كأنه سنة… يوم تقيل."

فريدة رمقته بنظرة فيها نص جد ونص هزار وقالت

"وقبل ما أجي؟"

قال 

"كانت أيام تقيلة برضو."

فريدة غيرت الموضوع وسألته بنبرة هادية

"وامبارح… محمود كان كويس؟"

يونس هزّ راسه وقال

"كويس عادي، بس… انتي غير، أخدت عليكي، مرتاح معاكي."

فريدة بصّتله وقالت بخفوت

"كويس."

يونس حس إنها مش فريده اللي متعود عليها، فسألها

"مالك؟ حاسس إنك متضايقة."

فريدة ردّت بسرعة وهي بتحاول تخبي أي مشاعر

"عادي."

يونس قال وهو بيحاول يفكّ لغز الحالة اللي فيها

"المفروض إنك كنتي في كتب كتاب صاحبتك… تبقي مبسوطة."

سكتت لحظة، وبعدين قالت بنبرة هادية لكن فيها حزن مكتوم

"مكانش في كتب كتاب."

يونس استغرب وسألها

"أومال انتي كنتي فين؟"

فريدة اتنهدت وقالت بصوت فيه وجع

"أبوها تعب… وراح المستشفى."

يونس سكت، وعينيه بقت فيها لمعة تعاطف حقيقي، 

وبعدين قال بهدوء

"خير؟ هو كويس دلوقتي؟"

فريدة أومأت براسها وقالت بصوت واطي

"أه… الحمد لله أحسن"

حس أن في حاجه تانيه بس محبش يضغط عليها ويتطفل فسابها على راحتها

فريدة دخلت تغير هدومها، وبعد دقايق خرجت... أول ما خرجت شافت يونس بيحاول يحرك رجله لوحده، قربت عليه بسرعة وقالت بقلق

"انت بتعمل إيه؟!"

يونس بصلها وهو بيحاول يثبت نفسه وقال بابتسامة باهتة

"بقيت أعرف أحركها شوية."

قالت وهي بتقرب أكتر وملامحها فيها توتر

"بس كده غلط يا يونس! أنا مسمحتلكش تغير الوضعية ولا تتحرك كده من نفسك."

قال بصوت هادي لكن متألم

"مش قادر أستنى… نفسي أحس إني بتحسن، اتحرك، أرجع طبيعي."

قبل ما تكمل كلامها، الباب خبط خبطة خفيفة ودخلت سالي وهي بتقول بسرعة

"ماما في الطريق… وجاية."

"ماما في الطريق... وجاية"

يونس اتوتر فجأة وقال بصوت شبه هامس 

"استخبي! استخبي بسرعه!"

فريدة وسالي بصوله باستغراب، 

سالي قالت وهي رافعة حواجبها

"إيه الهبل ده يا يونس؟"

وبعدين كملت

"تيم كلمني وقالي إنه لسه مقالش ليها حاجه، وإنها متعرفش أي حاجه لحد دلوقتي."

فريدة بصتلها باستغراب وقالت بهدوء

"هيحصل إيه يعني لما تعرف؟ أو انتي عايزاني أتصرف ازاي؟"

يونس رد وهو بيحرك راسه بقلق

"هتطردنا كلنا بس!"

سالي قالت بنبرة فيها توتر وصدق

"هتمشيكي يا فريدة... بس أنا مش عايزة كده، هتقولك في الأول تمشي بهدوء، وبعدها... معرفش، المرحلة الجاية ممكن تكون إيه، تيم بس اللي يعرف،

زمان، كانت في واحدة شغالة هنا، بابا اللي جايبها، ورفضت تمشي، بس اختفت بعدها، معرفناش مشيت ازاي، كنا صغيرين وقتها."

فريدة سكتت لحظة، وبعدين قالت بهدوء ونظرتها فيها تسليم

"تمام، لما تيجي هنشوف، فاتحيها وشوفي رد فعلها... بس بعدها، إيه اللي هيحصل؟"

سالي قالت بخفوت

"مش عارفة."

فريدة قالت

"يبقى سيبيها على ربنا، يمكن تقولكم السبب اللي مخليها رافضة تعاملاتكم مع أي مؤنث... أو وجود أي مؤنث قريب من البيت."

يونس وضح

"إحنا مش ماشي علينا القوانين أوي... يعني هي رافضة وجود أي بنت في البيت أو الشركة أو المصنع، بس مش بتجبرنا نمنع التعامل معاهم برا، يعني طول ما إحنا بره البيت أو الشغل، تمام."

فريدة هزت راسها وقالت بنبرة تفكير

"مش هتفرق... المبدأ واحد، حتى لو في البيت بس، وانتوا مش عارفين السبب، وتيم رافض يقول، وده حقكم."

وقفت عربية سودا فخمة قدام البيت.

الباب اتفتح، ونزل تيم الأول، وقف جنب العربية، لحد ما نزلت هي.

طلّت من العربية بهدوء، لابسة اسود بسيط وأنيق وشيك، وقفت بثبات ووقار وهي بتبص حواليها، ملامحها كانت ساكنة.

نزل واحد من البودي جاردات بهدوء وفتح باب تاني للعربية... وخرج منه كرسي متحرك، عليه راجل باين عليه التعب، لكن باين كمان إن ليه مكانته.

سالي كانت واقفة على باب البيت، وأول ما شافتهم نزلت بسرعه وياسين أول ما لمح جده وجدته، سبقها وجرى بأقصى سرعته وهو بيهتف

"تييييييييييتة! جدووووووو!"

ابتسمتله ابتسامة صغيرة دافية، حضنته بحنية، وبصّت لتيم اللي واقف جنبها، وقالتله بصوتها الهادي اللي دايمًا واثق

"وحشتوني يا ولاد."

سالي حضنتها وباستها

"حمد لله على السلامة، نورتوا البيت."

ردّت وهي بتطبطب على وشها

"البيت منور بيكوا."

بصّت لتيم بعدها، وقالت بهدوء وهي بتحط إيدها على دراعه

"ساكت ليه ومش عايز تتكلم"

قال بإيجاز

" عادي، مفيش حاجه اقولها" 

قالتله 

" هنشوف "

دخلوا كلهم سوا، وسكتت لحظة وهي بتبص للبيت… بتحب بيتها حتى لو بعدت عنه ساعه بيوحشها

سألت بهدوء

"يونس عامل ايه ؟!"

سالي ردت بسرعة

"هو كويس… صاحي دلوقتي."

قالت بنبرة ثابتة

"كويس، هطلع أشوفه."

سالي اترددت شوية وقالت

"بس كنت عايزه أقولك حاجه قبل ما تشوفيه."

ردت وهي بتتحرك ناحية السلم

"لما أشوفه ابقي قولي اللي عايزه تقوليه."

قالت سالي بتوتر وهي بتحاول توقفها

"لاء قبل ما تطلعي… عايزه أقولك."

سالي بصت لتيم اللي اكتفى إنه يرفع كتفه وبعدين بصت لمامتها وقالت

"أنا جبت ممرضة تانية مع يونس."

سكتت لحظة، وبعدين بصت لسليمان " شغال في البيت" وقالت بنبرة واضحة

"طلع نصر أوضته يا سليمان."

استنت لحد ما اخده وبعدها بصّت لسالي وقالت بهدوء قاتل

"يبقى تمشي يا سالي… من برا برا، متتكررش تاني يا حبيبتي علشان منخسرش بعض."

سالي اتنفضت وقالت

"بس المرادي يا ماما مش هتمشي، أنا عايزاها في البيت، ويونس اتعلّق بيها و..."

قاطعتها بحسم

"سالي، خليني هادية... مشيها ومحدش تاني ييجي، أحسن ما تضطريني أعمل حاجات مش هتعجبك."

سالي قالت بإصرار ممزوج بدموع على طرف عنيها

"طب ليه؟ يعني إيه السبب يا ماما؟ أنا بجد زهقت، نفسي أقعد هنا بس بحس إني لوحدي، مانعه أي بنت تيجي ليه؟ بجد؟"

ردت بثبات

"دي حاجه تخصني أنا بس، ده بيتي، وأنا حرة أحط القوانين اللي تعجبني، ولو مش عاجبك… يبقى خليكي في بيتك وجيبي اللي يعجبك."

سالي قالت بانفعال

"يعني يا ماما تمنعيني من وجودي هنا في الآخر؟!"

نفت

"بيتك ومطرحك طبعًا، بس لو عايزه تبقي هنا… احترمي القوانين اللي حطاها، واللي مش عاجبه… عارف هو يعمل إيه."

بصت لتيم، وقالت

"ولا إيه يا تيم؟"

تيم قال بنبرة باردة

"أكيد يا ماما، أنا مليش دعوه، أنا عرفتك إني مش في البيت أصلاً."

سالي قالت بانكسار

"بقى كده يا تيم؟ كلكوا بقيتوا ضدي يعني؟"

تيم قال بنفي

"أنا مش ضد حد، بس هي حرة… تعمل اللي هي عايزاه."

سالي قالت بصوت بدأ يعلى

"بس أنا من حقي أعرف إيه السبب اللي مانع وجود أي بنت هنا؟ ليه مانعين من زمان؟ حتى صحابي كنت أنا اللي بروحلهم هما ميجوش، ليه يا ماما؟! هتبقي تعملي إيه مع مراتات يونس وتيم؟ ولا مش هتجوزيهم؟"

قالت بنبرة قاطعة

"لما ييجي وقت الكلام ده نبقى نشوف يا سالي، دلوقتي اسمعي الكلام، هروح آخد شاور واشوف نصر، هتكوني مشتيها، ولما أرجع… ملاقيهاش."

سالي قالت بنبرة متحدية

"ولو ممشيتش؟ هتعملي إيه؟ تخيلي كلنا وقفنا ضدك ورفضنا مبدأك… هتعملي إيه وقتها؟"

تيم اتدخل

"سالي، خدي بالك من كلامك لو سمحتي."

سالي بصتله وقالت بغضب

"انت تسكت خالص! أنت سبب كبير في اللي إحنا فيه أصلاً، دايمًا موافقها على كل كلامها حتى لو كان غلط! وأنا عايزه أعرف دلوقتي بقا، ليه مفيش بنات بتخش هنا؟ ليه القانون ده؟ من حقي أعرف!"

تيم رد بهدوء 

"مش من حقك طبعًا، ومش من حق حد يعرف، البيت ده بيتها، وتعمل اللي هي عايزاه من غير ما نسألها، حقك ده لما تمنعك، لكن هي ما منعتكيش."

سالي علت صوتها أكتر، وقالت بحزم موجوع

"لِعلمكوا بقى… أنا لو مشيت، والله ما هعتب البيت ده أبدًا، مش هتشوفوا وشي تاني، ويبقى القانون بحق وحقيقي، ومفيش أي واحدة تدخل البيت ده، حتى أنا! صدقوني، لو خرجت… مش هرجع أبدًا، انسوني… واعتبروني متّ!"

سادت لحظة صمت تقيلة، محدش نطق، بصتلها بحدة، نظرة مفيهاش اي تردد، وبهدوء مرّ قالت

"خلاص يا سالي… لو دي رغبتك، يبقى براحتك."

سالي اتفاجئت، متوقعتش كده ابدا، ليه الرفض ده لدرجة أنها تتخلي عنها، تيم بص لمامته، وبعدين بص لأخته، عايز يتكلم، يخفف، بس سالي كانت بصاله بعتاب ميتحملوش

وسط الجو المشحون ده، نزلت فريدة بخطوات هادية، هيا سمعت كل كلمه اتقالت وحست أن كده الأمور بتخرج عن السيطره فقررت تتدخل

أول ما دخلت الصالون، بصّت على الموجودين وقالت بنبرة مهذبة وواثقة

"مساء الخير."

الكل لف ناحيتها، بس فريدة… أول ما عنيها وقعت على مامت تيم، اتجمدت.

مفيش نفس… مفيش كلمة… كل اللي في وشها كان صدمة وبس

رجعت خطوتين لورا، وإيدها خبطت في ترابيزه جانبية، كل حاجة عليها وقعت واتكسرت 

سالي بصت لفريده بقلق وقالت

"فريدة؟ مالك؟"

بس فريدة مكانتش سامعة اي كلمه، كانت بتبص للست اللي قدامها بصدمه ومش مستوعبه

مامت تيم ( صابرين) بصّتلها هي كمان، ملامحها اتجمّدت.

تيم قال بصوت هادي، لكن فيه نبرة حذر

"فريدة، في حاجة؟"

فريدة ردت بصوت واطي جدًا، أشبه بهمس

"هي..."

صابرين كانت واقفة مكانها، حركت شفايفها بهمس مش واضح...

"إيناس؟"

فريدة قالت بصوت فيه رهبة ودهشة

"مش معقول..."

صابرين قربت خطوة، باصة ليها بتركيز غريب، وقالت بانفعال مكبوت

"إزاي؟! انتي... انتي؟"

سالي وتيم واقفين مش فاهمين أي حاجة،

تيم باصص لفريده وبعدين بص لمامته 

وبعدين الاتنين بصوا لبعض، ملامحهم كلها استغراب وقلق.

صابرين وقفت قدام فريدة، عنيها بتدور في ملامحها وكأنها بتفتّش عن ذكرى قديمة، وقالت بانبهار

"نفس العيون... نفس الملامح... انتي مين؟"

فريدة هزّت راسها وقالت بهدوء فيه رهبة

"أنا فريدة... بنت إيناس."

صابرين اتصدمت وتيم كمان مصدقش

صابرين قالت بصوت مبحوح

"بنتها؟!"

هزت فريدة راسها بتأكيد، وقالت بنبرة دافيه

"ماما دايمًا بتتكلم عنك، صورك معاها على طول، وبتحكيلي عنكوا... نفسها تشوفك أوي."

دمعة نزلت على خد صابرين، وراحت حاضنة فريدة بقوة، حضن دافي كأنها بتحضن اختها

سالي كانت واقفة مصدومة، مش مستوعبة اللي بيحصل، قربت خطوة وقالت

"ماما؟ انتي تعرفيها؟!"

صابرين وهي لسه حاضنة فريدة، قالت بصوت مبحوح

"دي بنت أختي... أختي اللي الظروف فرقتنا سنين، ومعرفش عنها حاجه"

تيم كان واقف، عينيه مش قادرة تتحول عن فريدة، مش مصدق إن فريده بنت خالته

صابرين قعدت فجأة على أقرب كرسي، وسحبت فريدة تقعد جنبها وقالت

"احكيلي... احكيلي عنها، عنك، عن حياتها... هي كويسة؟ اتجوزت مين؟ عندك إخوات؟ انتي الكبيرة؟ ولا الصغيرة؟

سكتت لحظة، وبصت لفريدة كأنها مش مصدقة، وقالت

" أنا فعلاً قدامي بنت إيناس؟!"

فريدة ضحكت وسط دموعها وقالت

" أيوه، بنتها... ماما اتجوزت بعدك بسنه، عندي اسلام اكبر مني ب 3 سنين"

بصّت في الأرض وقالت

"ماما دايمًا بتتكلم عنك، وتقولي إنك كنتي كل حياتها، وإنك فجأة اختفيتي، وإنهم خدّوكي منها... من يومها وهي بتدعي إن ربنا يجمعكم"

صابرين دمعت تاني، وقالت بصوت مبحوح

"وأنا كمان... كنت بدعي، كنت علطول بدعي"

بصّت لفريدة تاني وقالت

" بس وجودك دلوقتي زي حلم... أنا مش مصدقة..."

دموعها بدأت تلمع في عينيها وهي بتتمتم

" فريدة... انتي شبهها... شبهها بالظبط..."

رفعت إيديها بتردد، كأنها مش مصدقة ولمست وش فريدة بإيد بتترعش

قالت بصوت مخنوق

"إيناس... أختي اتجوزت؟!"

سكتت لحظة وكملت وهي بتحاول تبتسم وسط دموعها

"وعندها بنت؟! وولد؟!"

فريدة ابتسمت وقالت بهدوء

"عندها بنت، ودايمًا بتحكيلها عنك، كانت بتعيط وهي بتوريني صورك، وبتقولي إنها مشتاقالك من سنين..."

بصت في عينيها وكملت

"كانت نفسها تضمك ولو دقيقة."

صابرين سألتها بصوت مكسور

"إيناس فين دلوقتي؟ عايزة أشوفها، لازم أشوفها..."

فريدة هزت راسها وقالت

"هتشوفيها... هتفرح اوي لو شافتك" 

وفي اللحظة دي، قررت تروح تشوف اختها، قامت وقالت لتيم

" يلا يا تيم، لازم اروح اشوفها" 

تيم هز راسه وقال

" حاضر يا ماما، يلا"

لكن قبل ما يخرجوا، سالي فجأة قالت بقلق

"يونس؟!"

فريده بصت في ساعتها وقالت بهدوء

"يونس، معاد حقنته عدى."

صابرين بسرعة قالت

" اطلعي اديهاله بسرعه."

فريده طلعت بسرعة، وصابرين وراها، دخلت عند يونس اللي كان واضح عليه التوتر وسأل

"ايه اللي حصل؟"

صابرين دخلت تتطمن عليه، وهو مستغرب جدًا من وجود فريدة مع والدته في نفس الوقت، فريدة كانت بتحضر الحقنة، ويونس سألها بدهشة

" هو في ايه؟ فهموني، اللي انا شايفه ده ازاي ؟!"

فريدة قربت من الكانيولا، وهي بتثبت الحقنة، وقالتله بنبرة حازمة

" مش وقته دلوقتي، هتفهم كل حاجة بعدين، ممكن؟!"

صابرين قربت منه وسألته 

" انت كويس ؟!" 

قالها بتعب 

" حاسس اني ضارب حقنه اقسم بالله" 

كان تيم واقف مع سالي، وسالي قالت بذهول

"إزاي؟ يعني ماما عندها أخت وإحنا منعرفش عنها أي حاجة؟"

تيم كان ساكت، فسالي بصتلّه باستغراب وقالت

"إنت كنت عارف؟"

رد عليها فورًا

"لاء طبعًا، وهعرف منين؟"

سالي قالت بحدة

"ماما بتقولك كل حاجة، وكمان شايفاك متفاجئتش اوي يعني"

قال بهدوء

"مش دايمًا"

سالي اتنهدت وقالت بمرارة

"إنت تعرف كل حاجة هنا، أصلًا إنت الوحيد هنا اللي ليك قيمة، لكن لا أنا ولا يونس حد بيعملنا قيمة... وده آخر يوم ليا هنا، مش هعتب البيت ده تاني."

تيم قال وهو بيحاول يهدّيها

"سالي، بطلي هبل، متشخصنيش الأمور."

بصلته بوجع وقالت

"طبعًا، ما إنت مش مكاني عشان تحس بيا."

فريده وصابرين نزلوا، وخرجوا كلهم ما عدا سالي اللي رفضت تروح وركبوا العربية واتحركوا على بيت فريدة.

ولما وصلوا، نزلوا من العربية، وفريدة قالت بحماس

"ماما مش هتصدق لما تشوفك بجد... يا رب تكون في البيت، هطلع أشوفها."

استنوا تحت وهي طلعت بسرعة، فتحت الباب ودخلت بسرعه، كانت مامتها بتتكلم في التليفون.

فريدة دخلت بسرعة وقالت بلهفة

"ماما، مش هتصدقي!"

قالت باستغراب

"في إيه يا فريدة؟"

فريدة شدت إيدها وهي بتضحك ومتوترة وقالت

"قومي، انزلي معايا! عندي ليكي مفاجأة حلوة جدًا."

قالت باستغراب وهي لسه قاعدة

"مش قادرة أنزل يا فريدة، في إيه؟"

فريدة ردّت بإصرار

"يا ماما، يلا بس بسرعة!"

إيناس سابت الموبايل على السرير وقامت بتردد، قلبها بدأ يدق بسرعة وهي شايفة الحماس اللي في عيون بنتها، وقالت وهي بتمشي وراها

"فريدة، هو في إيه؟ خوفتيني."

فريدة ابتسمت وقالت وهي ماسكة إيدها

"هتعرفي دلوقتي... بس بلاش تسألي، تعالي بس."

نزلوا مع بعض، وكل خطوة كانت بتقربهم من تحت وقلب إيناس بيخبط كأنها داخلة على حاجة مش قادرة تتخيلها، نزلوا تحت وصابرين كانت واقفه منتظره بلهفه

إيناس وقفت مكانها، وسابت إيد فريدة من الصدمة، وشها اتغير، قربت خطوة وقالت بصوت مبحوح

"صـ... صابرين؟!"

صابرين ابتسمت ابتسامة مهزوزة، وقالت وهي بتخطي خطوة ناحيتها

"إيناس... إيناس أختي!"

إيناس عينيها دمعت فورًا، مش مصدقة، قربت منها وقالت

"مش معقول... دي إنتي؟ فعلاً إنتي؟"

صابرين مدت إيديها، وهم الاتنين حضنوا بعض حضن عمره سنين، سنين من البُعد، من الوجع، من الشوق، حضن فيه كل اللي مفيش كلام ممكن يوصفه.

فضلوا كده لحظات، من غير ولا كلمة، بس الدموع كانت بتتكلم بدالهم.

فريدة واقفة شايفاهم وحست بفرحه، مامتها طول عمرها بتحلم باللحظه دي، اما تيم فكان واقف بعيد وحاطط أيده في جيبه وهو بيبصلهم

صابرين وهي لسه في حضن أختها همست

"وحشتيني أوي، كنت فاكرة إني مش هشوفك تاني طول عمري."

إيناس قالت بصوت متكسر

"أنا كمان... كنت بدعي لربنا يخليني أشوفك ولو مرة واحدة بس... كنت نفسي أحضنك زي كده."

بعدوا عن بعض شوية، بس إيديهم لسه في إيدين بعض، مش عايزين يسيبوا اللحظة.

فريدة ابتسمت وعيونها بتلمع، وقالت بهدوء وهي باصة لصابرين وإيناس

"يعتبر أنا السبب في إنكموا تتجمعوا من تاني... وده أحلى سبب حصل في حياتي."

صابرين قالت بفرحه 

" بحمد ربنا من كل قلبي أنه بعتك"

صابرين بصّت حوالين المكان، وبنبرة فيها لهفة نادت

"تيم... تعالى سلّم على خالتك."

تيم كان واقف على جنب، متابع بصمت، قرب بخطوات بطيئة، وسلّم على إيناس بإيده وهو بيقول باقتضاب

"أهلاً وسهلاً."

بس قبل ما يرجع مكانه، إيناس مدت إيديها وشدّته في حضنها، حضن صادق ومليان شوق، تيم اتفاجئ، مرفعش إيديه، بس منسحبش، فضّل مكانه، ساكت

إيناس ابتسمت وقالت بتأثر واضح

"أنا فرحانة إني شوفتكوا... فرحانة أكتر مما كنت متخيّلة."

قعدت جنب اختها، الجو كان مليان مشاعر لسه بتتشكل، بين دموع فرحة وابتسامات مش مصدقة اللي بيحصل.

صوتهم هادي لكن عيونهم بتتكلم أكتر من لسانهم، حنين سنين كتير كان بيطلع في كل كلمه.

فريدة كانت واقفة على جنب، بصّت لتيم اللي واقف مكانه ساكت كعادته، وقربت منه وهي بتشده بلطافة

"تعالى معايا."

بصلها باستغراب وقال بجفاف

"فين؟"

ردت وهي بترفع حواجبها

"اقف معايا، هعملهم حاجة يشربوها."

قال ببرود

"وأنا مالي؟"

زفرت وقالت 

"إنت مش حافظ غير الكلمة دي يعني؟"

شدّته من دراعه وهي بتقول

"تعالى بدل ما انت واقف كده ملكش لازمة."

اتنحنح وقال وهو بيبصلها

"أنا مليش لازمة؟!"

ردت بسرعة وهي بتهزر

"أومال أنا؟!"

شدّته تاني، وهو في الآخر استسلم ومشي وراها من غير ما يقول كلمة تانية.

دخلوا المطبخ، وكان فيه واحدة من الخدامين بتنضف الرخامه، فريدة ابتسمت وقالت بنبرة ودودة

"مساء الفل."

الخدامة ردت بابتسامة

"مساء النور يا حبيبتي، هتعملي حاجة؟"

قالت فريدة

"آه، هعمل عصير."

ردت الخدامة بلطافة

"طيب، هسيبك براحتك."

خرجت وسابتهم لوحدهم، فريدة فتحت التلاجة، طلعت مانجا وعلبة عصير جاهز، ولفت لتيم وسألته

"أعمل عصير ولا أصب الجاهز؟"

قال من غير ما يبصلها

"وأنا مالي؟ انتي اللي هتعملي."

ردّت وهي بتزفر بإحباط

"نفسي أخد منك عقّاد نافع بجد."

رفع حاجبه وقال

"يعني إيه؟"

هزت راسها وقالت باستخفاف

"ولا حاجة."

سكتت لحظة وهي بتقشر المانجا، وبعدها بصّتله تاني وقالت بنبرة فيها تأمل

"يعني في الآخر طلعنا قرايب... شوف الصدف."

ردّ وهو بيهز كتفه

"مش مقتنع أساسًا."

قال له وهي مبتسمة بسماجه

"عنك ما اقتنعت، أنا مقتنعة تمامًا... يمكن علشان من وأنا صغيرة عارفة إن عندي خالة، وعارفة شكلها كمان، بس انها تكون مامتك ده اللي متوقعتهوش، حسيتها شريره من كلامكوا"

بصلها للحظة، لكن مردش، كأنه مسمعهاش اصلا 

فريدة بدأت تقطع المانجا وهي مركزة في اللي بتعمله، وتيم واقف جنبها ساكت، إيده في جيبه، وملامحه زي ما هي... مفيش حاجة بتتحرك غير عينه اللي بتتابعها من غير ما تحس.

قالت وهي بتحط المانجا في الخلاط

"عارف؟ طول عمري عندي أمل إن اليوم ده ييجي، بس مكنتش متخيلة إنه هييجي فعلاً."

مردش، بس فضل يبص لها.

كملت وهي بتشغّل الخلاط وعلت صوتها

"وأكتر حاجة كنت عايزاها إن ماما تقابل أختها... كانت دايمًا بتتكلم عنها وهي بتعيط... أنا كنت حافظة شكلها من صور قديمة جدًا

الخلاط خلّص، وقفلته، بدأت تصب العصير في الكوبايات.

جابت كيكه وبدأت تقطعها، قالتله

"علفكره، أنا اللي عامله الكيكه دي"

قطعتله قطعة صغيرة وحطتها قدامه

"دوقها وقول رأيك."

تيم اتردد وقال

"مش عايز، شكراً."

ابتسمت وقالتله بتهكم

"براحتك، أنت الخسران."

بعدها قسمت الكيكة في أطباق صغيرة، وحطتهم على رخامه تانيه ومسحت الرخامة اللي اشتغلت عليها بسرعة

فونها رن، طلعت التليفون من جيبها، كان إسلام على الطرف التاني.

ردت بسرعة، وعيونها مليانة حماس

"أنت فين؟! برن عليك بقالي ساعة يا أستاذ."

قال إسلام بنبرة مشغولة

"إيه يا فريدة؟ مشغول ومش قادر أرد، في حاجة مهمة؟"

قالت له بجدية

"مهمة جدًا، مش هتصدقها بجد."

سأل بقلق

"في إيه؟"

ردت عليه بحماس

"مش هتتوقع!"

قال وهو بيحاول يركز معاها

"فريدة، والله مشغول."

ردت عليه بلهفة

"يعني مش هتيجي؟ لازم تيجي دلوقتي."

قال

"قدامي ساعه مثلا"

قالت وهي مش قادرة تخفي توترها

"خلاص يبقى لما تيجي، ولو إني مش قادرة أصبر وعايزة أقولك."

قال بحسم

"طب ما تقولي، ولو مش هتقولي مضطر أقفل."

ضحكت فريدة بخفة وقالت

"لما تيجي، سلام."

وقفلت المكالمة، وحطت التليفون في جيبها وغسلت إيديها بسرعه

تيم كان واقف بيبصلها، متابعها وسأل

"ده مين؟"

فريدة بصتله وقالت بابتسامة خفيفة

"ده ابن خالتك."

تيم رفع حاجبه وقال

"ابن خالتي؟!"

فريدة ضحكت وقالت بتلاعب

"لقب جديد بس هتاخد عليه، دونت ووري."

تيم سألها

"يعني أخوكي؟ صح كده؟"

ردت بثقة

"صح كده، طول عمرك لماح ومركز."

مدت له صنية العصير وقالت

"خد، شيل معايا."

قالها 

"يعني إنتي جايباني أساعدك؟"

ردت بكل برود

"تساعدني في إيه؟ أنت عملت حاجة؟"

أخذ الصنية وهو بيقول 

"أمال ده إيه؟!"

ابتسمت وقالت بخفة

"سميها زي ما تحب."

شالت أطباق الكيكة ومشيت قدامه، وهو مشي وراها 

فريدة خرجت من المطبخ، حطت طبق الكيكة على الترابيزة، وخدت صينية العصير من تيم، حطتها جنبها وقالت بنبرة فيها شوية صدق وشوية ارتباك

"حاجة جديدة عليّا بجد... عايزة وقت أستوعب."

إيناس ابتسمت وقالت

"أومال أنا أقول إيه؟!"

صابرين بصتلهم، صوتها هادي لكن فيه وجع سنين

"أنا عشت حياتي كلها وحيدة... مكانش ليا حد، وكان نفسي أشوفك، بس مكنتش عارفة إزاي... ربنا يسامحهم اللي كانوا السبب."

فريدة لمحت تيم واقف، قالتله

"إنت واقف ليه؟ تعالِ اقعد."

رد بهدوء

"أنا مرتاح كده."

إيناس بصتله بابتسامة كلها حنين

"تعالَ يا حبيبي اقعد... تعالَ ده انت من ريحة الغالية."

هز راسه وقال بلطف

"شكرًا... أنا مرتاح كده."

بدأوا يتكلموا تاني وفريدة كانت سامعاهم وكل كلمة بتدخل قلبها، قامت وخدت طبق فيه كيك، وقفت جنبه، مدّته له وقالت بخفة

"برضو مش هتقولّي رأيك؟"

بصلها وسألها

"وإنتي عايزة رأيي في إيه؟"

قالت وهي بتحاول تخفي توترها

"عادي... بحب آخد آراء الناس."

أخد حتة صغيرة، داقها وقال بعند

"مش حلوة."

اتشدت وقالت

"بجد؟!"

قال بمراوغه

"يعني مش قد كده... في أحسن من كده."

قالت بنغمة فيها برود ظاهري

"ده رأيك يعني؟"

رد ببساطة

"إنتي اللي طلبتي."

هزّت كتفها وقالت

"عادي، مش بزعل أصلًا... كل واحد وليه رأيه."

سكتوا شويه، لحد ما كسر هو الصمت وسألها بنبرة فضولية

"حضرتي كتب كتاب صاحبتك؟"

سكتت للحظة كأنها بتفكر ترد تقول إيه، وبعدين قالت

"مكانش في كتب كتاب."

رفع حاجبه وسأل

"ليه؟ مش قولتي إن في؟"

قالت وهي بتحاول تحافظ على تماسكها

"باباها تعب."

سأل باهتمام

"اتأجل يعني؟"

قالت بصراحة 

"لاء، اتلغى."

حس إن الكلام واقف عند الحد ده، وإنها مش حابة تكمل، فسكت شوية، وبعدين قال

"لقيت في عربيتي فلوس... أكيد بتوعك؟"

قالت وهي بتبعد 

"لاء... مش بتوعي."

سألها 

"يعني مش إنتي اللي حطاهم؟"

ردت بهدوء وهيا ماشيه من قدامه

"لاء... معرفش عنهم حاجة."

تيم بص لمامته وسألها

"لسه هتقعدي؟"

صابرين بصتله وقالت

"زهقت؟ لو زهقت روح إنت، أنا لسه قاعدة."

إيناس دخلت في الكلام وقالت

"لسه مشفتوش إسلام ابني... زمانه جاي."

فريدة قالت 

"قدامه ساعة."

صابرين سألت ببساطة

"وجوزك؟"

إيناس ردت بهدوء

"مسافر... بييجي من السنة للسنة."

فريدة قامت وسابتهم، خرجت من البيت، سحبت موبايلها من جيبها، ورنت على يسر

فريدة قالت بسرعة ولهفة

"عاملة إيه دلوقتي؟"

يسر من الناحية التانية صوتها تعبان

"هكون عاملة إيه يا فريدة؟"

فريدة سألتها بهدوء

"يعني... الأوضاع إيه عندك؟"

يسر ردّت 

"زي ما سبتيها يا فريدة... مفيش جديد."

يسر سكتت شوية، وبعدين قالت

"كل ما بفتكر اللي حصل، قلبي بيتكسر أكتر... مش قادرة أصدق إن كل ده حصل"

فريدة قالت بحزن

"ولا أنا... بس خليني أقولك حاجة... اللي بيخسر إنسانة زيك، هو اللي خسران، حتى لو كنتي شايفة العكس دلوقتي."

يسر قالت بمرارة

"نفسي أصدق... بس الوجع أكبر من أي عزاء دلوقتي."

فريدة قالت بحنان

"هتعدي يا يسر، أنا عارفة إنك مش شايفة كده دلوقتي، بس كل حاجة بتحصل لحكمة... وكل حاجة صعبة بتعلمنا حاجة."

يسر سكتت شوية، وبعدين قالت

مش عايزة أتعلم حاجة، أنا تعبت خلاص."

فريدة قالت بابتسامة بسيطة بتحاول تخفف عنها

"خديها واحدة واحدة، متحاوليش تقعدي في البيت، انزلي الشغل واشغلي نفسك، حاولي تنسي، مجرد محاوله"

يسر قالت بصوت مكسور

"مش قادرة أعمل حاجة... بس شكراً يا فريدة إني لسه لما بكلمك بحس إني مش لوحدي."

فريدة قالت بلطف وهيا بتنهي المكالمه

"وأنتي عمرِك ما هتكوني لوحدِك... طيب أنا هسيبك ترتاحي شوية، ولو احتجتي أي حاجة أنا جنبك على طول، ماشي؟"

قفلت معاها، دخلت البيت تاني، بس قابلت تيم خارج

رفعت حاجبها وسألته باستغراب

"رايح فين؟!"

رد بزهق

"هستنى بره، مليت."

ضحكت وقالت 

"والله أنا كمان ملانه... بس بما إني هخرج أجيب شوية حاجات من السوبر ماركت، تعال معايا؟!"

بصلها وهو بيبص في ساعته كأنه بيحسب الزمن وقال

"معقول، قبل الساعة ١٢، عشان ده معاد نومي."

ردّت وهي بتمشي من قدامه

"ثواني هطلع أغيّر هدومي وهاجي على طول."

قال باستعجال

"طيب، متتأخريش."

ردّت بصوت خفيف 

"عيب عليك."

ابتسم ابتسامة صغيرة مش باينة، وخرج فعلاً وقف قدام البيت مستني.

أما فريدة، فطلعت بسرعة على أوضتها بحماس، فتحت فونها ورنت على سالي، اول ما ردت قالتلها 

" معتقدش أن تيم عنده جينوفوبيا زي ما قولتي" صابرين سألت ببساطة

"وجوزك؟"

إيناس ردت بهدوء

"مسافر... بييجي من السنة للسنة."

فريدة قامت وسابتهم، خرجت من البيت، سحبت موبايلها من جيبها، ورنت على يسر

فريدة قالت بسرعة ولهفة

"عاملة إيه دلوقتي؟"

يسر من الناحية التانية صوتها تعبان

"هكون عاملة إيه يا فريدة؟"

فريدة سألتها بهدوء

"يعني... الأوضاع إيه عندك؟"

يسر ردّت 

"زي ما سبتيها يا فريدة... مفيش جديد."

يسر سكتت شوية، وبعدين قالت

"كل ما بفتكر اللي حصل، قلبي بيتكسر أكتر... مش قادرة أصدق إن كل ده حصل"

فريدة قالت بحزن

"ولا أنا... بس خليني أقولك حاجة... اللي بيخسر إنسانة زيك، هو اللي خسران، حتى لو كنتي شايفة العكس دلوقتي."

يسر قالت بمرارة

"نفسي أصدق... بس الوجع أكبر من أي عزاء دلوقتي."

فريدة قالت بحنان

"هتعدي يا يسر، أنا عارفة إنك مش شايفة كده دلوقتي، بس كل حاجة بتحصل لحكمة... وكل حاجة صعبة بتعلمنا حاجة."

يسر سكتت شوية، وبعدين قالت

"مش عايزة أتعلم حاجة، أنا تعبت خلاص."

فريدة قالت بابتسامة بسيطة بتحاول تخفف عنها

"خديها واحدة واحدة، متحاوليش تقعدي في البيت، انزلي الشغل واشغلي نفسك، حاولي تنسي، مجرد محاوله"

يسر قالت بصوت مكسور

"مش قادرة أعمل حاجة... بس شكراً يا فريدة إني لسه لما بكلمك بحس إني مش لوحدي."

فريدة قالت بلطف وهيا بتنهي المكالمه

"وأنتي عمرِك ما هتكوني لوحدِك... طيب أنا هسيبك ترتاحي شوية، ولو احتجتي أي حاجة أنا جنبك على طول، ماشي؟"

قفلت معاها، دخلت البيت تاني، بس قابلت تيم خارج

رفعت حاجبها وسألته باستغراب

"رايح فين؟!"

رد بزهق

"هستنى بره، مليت."

ضحكت وقالت 

"والله أنا كمان ملانه... بس بما إني هخرج أجيب شوية حاجات من السوبر ماركت، تعال معايا؟!"

بصلها وهو بيبص في ساعته كأنه بيحسب الزمن وقال

"معقول، قبل الساعة ١٢، عشان ده معاد نومي."

ردّت وهي بتمشي من قدامه

"ثواني هطلع أغيّر هدومي وهاجي على طول."

قال باستعجال

"طيب، متتأخريش."

ردّت بصوت خفيف 

"عيب عليك."

ابتسم ابتسامة صغيرة مش باينة، وخرج فعلاً وقف قدام البيت مستني.

أما فريدة، فطلعت بسرعة على أوضتها بحماس، فتحت فونها ورنت على سالي، اول ما ردت قالتلها 

" معتقدش أن تيم عنده جينوفوبيا زي ما قولتي"

رنّ تليفون سالي، فردّت بسرعة، فسمعت صوت فريدة بيقول بحماس

"معتقدش إن تيم عنده جينوفوبيا زي ما قولتي."

سالي سكتت لحظة وقالت بنبرة فيها حيرة

"أنا كنت مفكّرة كده يا فريدة، بس عرفت مؤخرًا لما شُفته معاكي كذا مرة، تصرفاته متناقضة ومش فاهماه... ونفسي أفهمها."

فريدة ردّت وهي بتفتح الدولاب تجهّز هدومها

"أنا مش عارفة إذا كنت هفهمه ولا لاء، بس أوعدك إني هحاول... بحاول أفهم شخصيته وأعرف أصنّف مرضه... وعلاجه كمان."

سالي قالت بنبرة فيها نوع من القلق

"وابقي طمّنينى أول بأول... أنا مش هبقى موجودة في البيت خالص الفترة اللي جاية."

فريدة وقفت لحظة وقالت باعتذار

"آسفة على تدخلي، بس مامتك متقصدش يا سالي... إديها عذر، هيّا روحها فيكوا كلكوا، وممكن يكون تيم أقرب حد ليها مش أكتر، أو يمكن هو اللي بيفهمها."

سالي ردّت بجفاف واضح

"خلاص يا فريدة... اللي حصل حصل، هيّا فرضت قوانينها وأنا مش قابلاها... هيّا حرة آه... بس أنا كمان حرة."

فريدة قالت بإصرار 

"متغيبيش... دي مهما كانت مامتك."

سالي اتنهدت وقالت بهدوء

"تمام يا فريدة... شكرًا."

قفلوا المكالمة، وفريدة بسرعة غيرت هدومها ونزلت لتيم.

خرجت من البيت، لقته واقف ساند على عربيته، فاتح فونه، وباين عليه مستني.

قربت منه بابتسامة خفيفة وقالت

"يلا؟"

بصلها من فوق لتحت وقال بنبرة هادية

"ما لسه بدري."

قالت وهي بتعدل شنطتها

"متأخرتش على فكرة."

فتح باب العربيه وقال 

"طيب، يلا."

قالت وهي واقفة مكانها

"لاء... مش بالعربية، المكان قريب يعني."

بصلها لحظة، وبعدين قفل الباب وشاورلها

"اتفضلي."

ابتسمت ومشيت، وهو مشي جنبها. 

مشيوا شويه في صمت، فريدة قررت تكسر الصمت وقالت

"ساكت ليه؟!"

مردش فعلّت صوتها شويه

"تيم؟!!!"

بصلها باستفهام، فقالت وهي بترفع حاجبها

"بكلمك على فكرة."

رفع إيده وشال الإيربودز من ودنه وقال ببرود

"بتقولي إيه؟!"

بصتله بحدة وقالت

"ما تقول إنك بتسمع ميوزك؟!"

رد وهو بيحط السماعة في جيبه

"ليه؟"

قالتله بحدة

"هو إيه اللي ليه؟"

قال بجفاف

"أقولك ليه يعني؟ وانتي مالك؟"

ردّت 

"علشان بكلمك وانت مش بترد..."

قال وهو بيبص قدامه

"ده علشان انتي فصيلة بس مش أكتر"

قالت بتهكم

"والله إنك واحد... ممل."

سألها ببرود

"عايزة تقولي إيه؟"

قالت وهي بتتكلم بسخرية واضحة

"اسمع أغاني يا تيم... اسمع."

مشي تيم جنبها ساكت، وبعد فترة قال بنبرة ملل

"هو إحنا مش بنوصل ليه؟ إنتي مش قولتي قريب؟"

ردت فريدة وهي باصه قدامها

"خلاص قربنا."

قال وهو بيبص قدامه ببرود

"بعد كل ده ولسه قربنا؟"

ردت بنفَس البرود

"في إيه ما تجمد كده؟ أنا دايمًا بمشيها."

قال بنبرة فيها ضيق واضح

"بس عايز أرجع بدري... عايز أروح."

قالت وهي بترفع حاجبها

"وهتعمل إيه يعني لما تروح."

رد وهو بيبصلها 

"هنام، قولتلك معاد نومي جه."

هزّت راسها وقالت بسخرية

"ده إيه الحياة المملة دي؟ كل حاجة عندك بمواعيد!"

قال ببروده المعتاد

"طبعًا، كل حاجة وليها وقتها."

قالت بنبرة فيها هجوم ناعم

"ماعدا حاجات... في حاجات عندك إنت لاغيها أصلًا."

بصّلها باستغراب وقال

"قصدك إيه؟"

قالت وهي بتتكلم بهدوء بس نظرتها فيها تحدّي

"يعني... في حاجات أساسية موجودة في حياة أي بني آدم، بس إنت لاء، وكل ده ليه؟ معرفش."

رد وهو بيحاول ينهى الحوار

"دي حياتي وأنا حر فيها."

قالتله بجدية أكتر

"ده مرض"

رد بسرعة وعصبية مكبوتة

"مش كل حاجة تكون مش عاجباكي تشخّصيها على إنها مرض، لو كده، يبقى إنتي كمان مريضة."

قالت بثبات

"بس إنت فعلاً مريض، ولو أي حد شاف حالتك، هيفهم إنك مريض."

هنا وقف تيم فجأة، وقال بنبرة متحدية

"مالها حالتي؟ وبعدين، اللي يقول يقول... الناس دي مش أهم من مامتي."

قالت وهي بتحاول تفهم

"ومين دخل مامتك في الموضوع؟ هو مرضك ليه علاقة بيها؟"

قال بنبرة قاطعة

"قولتلك أنا مش مريض، وبعدين أنا بساند ماما في أي موضوع، ولو هي قالت مش عايزة ومش حابة، يبقى انا كمان مش حابب ومش عايز... ومن غير ليه، لو سمحتي."

قالتله بانفعال مكتوم

"يعني إنت بِعت حياتك لمامتك؟"

بصلها وقال بحِدّة

"أديكي قولتي... مامتي."

وبعدين غيّر الموضوع فجأة، كأنه بينكر كل حاجة، وقال وهو بيبص حواليه

"هو في إيه؟ إحنا مش بنوصل ليه؟"

قالت وهي بتقف مكانها وبصت قدامها

"لاء، وصلنا أهو... آخر الشارع"

وقفوا قدام باب السوبر ماركت، فريدة كانت هتدخل، لكن تيم وقف وقال

"أنا هستناكي هنا."

بصّتله باستغراب وقالت

"إزاي يعني؟! تعالَ معايا."

رد بسرعة وهو بيرجع خطوة

"لاء مش عايز، هستناكي هنا."

من غير ما تناقشه كتير، دخلت وسحبت سلة، وخرجتله بيها ومدّتهاله وهي بتقول

"علشان ننجز بس، بدل ما أأخرك."

بصلها شوية وقال

"هو يوم باين من أوله أساسًا."

دخلوا مع بعض، هي قدامه وهو وراها ماشي بهدوء وهو شايل السلة.

بدأت تعدّي على الرفوف، تاخد الحاجات اللي هيا محتاجاها، وبعدين رفعت علبة مكرونة وسألته

"بتاكل دي؟"

قال وهو بيهز راسه

"لاء."

قالت وهي بترجعها مكانها

"آه، توقعت كده، علشان الكربوهيدرات أكيد."

سكتت لحظة وبعدين سألته وهي بتاخد كيس خضار مجمد

"أومّال بتاكل إيه؟"

قال ببساطة

"سلطات... خضار وفاكهة، ولحوم، وساعات سمك."

ردّت وهي بتبصله من فوق لتحت بنظرة سريعة

"آه، حاجات صحية يعني... ما هو باين على جسمك."

ابتسم بخفة وقال

"مش من الأكل بس... الرياضة كمان مهمة."

قالتله باستنكار 

"رياضة إيه؟ أنت مكنتش قادر تمشي من البيت للسوبر ماركت!"

قال بهدوء

"بمشي عادي، أنا كل يوم بمشي ساعة إلا ربع الصبح."

ردّت وهي بترفع حاجبها

" ساعه الا ربع؟ وبتعدهم كمان، لاء نظام نظام يعني "

قال

" بمشي مسافة محددة على التراك، فعارف الوقت بالضبط."

هزّت راسها وقالت

" اممممم، نظام ووقت نظام ووقت"

رد من غير ما يبصلها

"كل حاجة ليها وقتها ونظامها."

مشيت قدامه وكملت وهو ماشي وراها بصبر

وصلوا عند الكاشير، فريدة بدأت تطلع الحاجات من السلة واحدة واحدة، وتيم واقف جنبها ساكت.

الكاشير بدأ يحاسب، وفريدة كانت بتطلع الفلوس من شنطتها لكن تيم مدّ إيده بسرعة وطلّع بطاقته.

قال بهدوء

"سيبي أنا هحاسب."

فريدة بصّتله بحدة بسيطة

"ليه يعني؟ لاء طبعا، دي حاجتي انا "

قال بإصرار وهو بيبص للكاشير

"أنا اللي هدفع خلاص."

الكاشير وقف محرج، بيبص للاتنين مش عارف ياخد من مين.

فريدة خدت نفس وقالت

"تيم... دي حاجتي انا، انا اللي جبتها، يبقى طبيعي أنا اللي ادفع "

قال بإصرار 

" مش مهم كل ده، سمعيني سكاتك "

قالت بنبرة حاسمة

"كل واحد مسؤول عن نفسه، ماشي؟!"

سكت على مضض، ولسه هيرد، لكن فريدة بسرعة دفعت للكاشير وقالت بابتسامة هادية

"خلاص، يلا "

خرجوا من السوبر ماركت، تيم مكانش بيتكلم وكان واضح عليه الضيق، ومشي بخطوات سريعة شوية، ففريدة لحقته وقالت باستغراب

"مالك؟!"

رد وهو بيبص قدامه ببرود ممزوج بنفاد صبر

"مش بحب حد يحرجني"

رفعت حاجبها وقالت

"أحرجك في إيه؟! معلش يعني، أنت مين عشان تدفعلي؟ دي حاجتي أنا، والمفروض أنا اللي أدفع!"

وقف لحظة وبصلها، صوته كان ثابت لكنه مشبع بالغضب المكبوت

"بس من الجَنتلة إني ما اسيبش واحدة ست تدفع وهي معايا، مهما كان... بجد، بندم إني جيت معاكي"

ضحكت وقالت وهي بتعدل شنطتها على كتفها

"متبقاش قفوش كده بقى!"

قال بحزم

"مش هتتكرر أساساً."

قالت بهدوء وبنبرة متحدّية شوية

"هنبقى نشوف."

رد وهو بيكمل مشيه

"نشوف."

قالتله

"هات شنطة أشيلها عنك."

رد ببرود

"لاء"

ضحكت وقالت بسخرية خفيفة

"من الجَنتلة دي كمان؟!"

قال من غير ما يبص ليها

"امشي وانتي ساكتة… خليني أخلص"

مشيت جنبه، وهيا بتكتم ضحكتها 

اتمشوا في صمت شوية، لحد ما فريدة قطعت السكوت وقالت بصوت هادي بس فيه لمحة شك وتساؤل

"يا ترى هيبقى مسموحلي أكمل شغلي، ولا برضو مش مسموح؟ أكيد انت أدرى."

تيم مبصّش ليها حتى، وقال بنبرة باردة

"مش عارف."

رفعت حاجبها بدهشة وقالت

"إزاي بقى؟! أنت عارف كل حاجة."

رد من غير ما يغير نبرة صوته

"قولت مش عارف… خلصنا."

قالت بإصرار، وهي بتحاول تسيطر على أعصابها

"وأنا بقولك عارف، وعايزة أعرف."

وقف لحظة، وبصلها بنظرة فيها نفور وقال

"أنا بتمنى إنك ما تكمليش… بس مش عارف، في حالتك دي ماما ممكن تعمل إيه."

اتشدت ملامحها وقالت بحدة

"وأنت مش عايزني أكمل ليه؟!"

بصلها بجمود، ونبرته كانت حادة وباردة 

"مبحبّش وجودك... ومش عارف انتي طلعتي منين، بس كل اللي عارفه إنك متطفلة وغلسة، وعايزك تبعدي عني وتبطلي حك... وملكيش دعوة بيا أبدًا... ولو أنا مريض زي ما بتقولي، دي حاجة تخصني.

أنتي مجرد ممرضة لأخويا وبس، وملكيش مكان أكبر من كده."

وقفت فريدة مكانها، الكلام نزل عليها زي صدمة باردة.

بس مردّتش، ملقتش كلام تقوله اصلا 

جرحها؟

آه… جرحها. جرحها بكلامه جدًا.

فضلوا ماشيين وصوت خطواتهم كان هو الوحيد اللي مسموع، لحد ما وصلوا للبيت.

تيم وقف، وعيونه بتتحاشى تبص ناحيتها، ملامحه لسه متصلبة.

فريدة مدت إيدها وخدت منه الشنط بهدوء، كانت ماسكة نفسها بصعوبة، سحبت الشنط بسرعه وانسحبت… مشيت بسرعة من قدامه من غير أي كلمه

دخلت البيت وهي بتحاول تثبت ملامحها بس ابتسمت لصابرين وهي بتقول بهدوء

"تيم مستني بره."

صابرين بصتلها بنعومة وقالت

"الوقت اتأخر، وهو أكيد عايز ينام"

صابرين بصت ناحية أختها، بصتلها بحب واضح وقالت

"أنا مشبعتش من قعدتك، ومش هبطل أجي… هاتي رقمك، هشوفك بكرة."

فريده سابتهم ودخلت المطبخ بخطوات سريعة، حطت الأكياس اللي كانت شايلها على الرخامة، وبنبرة هادية قالت للخدامة

"رصّي الحاجات دي في أماكنها"

الخدامة هزّت راسها بهدوء وبدأت تشتغل، وفريدة طلعت من المطبخ بس قبل ما تطلع اوضتها سمعت صوت صابرين بيناديها بهدوء

"فريدة…"

فريدة بصتلها، فصابرين ابتسمت وقالت بنبرة فيها دفا وصدق

"هتيجي بُكره؟!"

فريدة ردت بهزار خفيف 

"وهتدخليني؟!"

صابرين بصتلها بنظرة حنونة وقالت بصوت هادي

"انتي بنتي… زي سالي بالظبط، هستناكي."

فريدة سكتت لحظة، ابتسمت بهدوء وهزت راسها علامة الموافقة، وبعين فيها حيرة وامتنان، طلعت أوضتها.

صابرين قالت لإيناس 

" بكره هنتقابل وهقضي معاكي اليوم كله" 

ودعوا بعض مؤقتا وإيناس خرجت معاها لبره 

فريدة كانت قاعدة في اوضتها على طرف السرير، حاطة رجل على رجل وسرحانة بتفكر في اللي حصل طول اليوم، الباب خبط خبطتين خفاف، سمحت بالدخول ودخلت الخدامة وهي شايلة حاجة في إيدها.

فريدة رفعت عينيها وسألتها بنبرة هادية

"في إيه؟"

الخدامة قربت منها ومدت إيدها بفلوس وقالت

"لقيت دول، كانوا في كيس من اللي حضرتك اديتهولي أرص الحاجات اللي فيه."

فريدة خدت الفلوس وبصت فيهم باستغراب، بصتلها وقالت

"كيس إيه؟"

الخدامة ردت بهدوء

"اللي حضرتك لسه مدياني من شوية أرصه في المطبخ، كانوا محشورين بين الحاجات، يمكن وقعوا منك."

فريدة قلبت الفلوس في إيدها شوية وقالت

"تمام… شكراً إنك جبتيهم."

الخدامة ابتسمت وقالت

"العفو "

وطلعت من الأوضة وقفلت الباب وراها بهدوء.

فريدة فضلت تبص للفلوس شوية، مش فاهمه ايه دول وجم منين، عدتهم ولما عدتهم فهمت 

قالت بهمس لنفسها

"دي الفلوس اللي كنت حطاهم لتيم…!"

سندت بضهرها على السرير، وابتدت تسأل نفسها

هو رجعهم إمتى؟

إزاي حطهم في الكيس من غير ما تحس؟

ليه عمل كده أصلاً؟

راحت حطت الفلوس في درجها، وقفلته بهدوء.

تاني يوم، صحيت فريدة على صوت مامتها وهي بتفتح الباب وتقول بنعومة

"فريدة، قومي يا حبيبتي."

فريدة فتحت عينيها بتكاسل وقالت بصوت مبحوح من النوم

"في إيه يا ماما؟"

مامتها سألتها

"هروح لصابرين… مش هتيجي معايا؟"

ردت فريدة وهي بتدفن وشها في المخدة تاني

"لاء، هنام، عندي شغل بالليل."

أمها قالت بهدوء

"براحتك يا حبيبتي."

وسابتها وخرجت من الأوضة.

بعدها بدقايق، الباب خبط تاني، ودخل إسلام.

قرب منها وصحاها.

قالت بانزعاج

" في ايه؟!!"

قال وهو بيقعد جنبها على طرف السرير

"صح اللي أنا سمعته؟"

فريدة اتعدلّت وقالتله ببرود خفيف

"وانت سمعت إيه؟"

قال وهو باصصلها

"اللي كنتي عايزة تقوليه امبارح."

ابتسمت بسخرية وقالت 

"آه، بس سيادتك اتأخرت امبارح أساسًا."

قال وهو بيحاول يبرر 

"كان عندي شغل مهم بجد."

ردت بسرعة وكلامها في سخريه

"آه، والشغل المهم ده حبيبة قلبك؟"

قال وهو بيهز راسه بنفي

"لاء، كان شغل بجد."

قالت وهي مش مقتنعة

"شغل إيه ده اللي الساعة عشرة بالليل؟"

قال وهو بيحاول يغير الموضوع

"كان ميتينج مهم… فكك دلوقتي، إزاي ماما لقت أختها؟"

فريدة اتنهدت، وقالت وهي بتبعد شعرها عن وشها وبتحاول ترتب أفكارها

"هحكيلك..."

وبدأت تحكيله كل حاجة وهو بيسمعها باهتمام حقيقي.

وفي نهاية كلامها، بعد ما حكيتله كل اللي حصل، قالتله وهي بتبتسم

"وبس يا سيدي… ده كل اللي حصل."

إسلام هز راسه وقال بنبرة مستغربة

"حاجة غريبة فعلًا…"

فريدة قامت من مكانها بهدوء، وهي رايحة ناحية الحمام

"يمكن بالنسبالك… ومش عايزة أقولك عندك ولاد خالة إيه… شُفت إنت سالي؟"

إسلام ابتسم وقال

"آه… بس حاسس إنك محكيتيش كل حاجة بالتفصيل."

فريدة فتحت باب الحمام، ولفتله وهي بتضحك وقالت

"جَيالك أهو… وهقولك اللي إنت عايزه."

يونس كان قاعد على سريره، الموبايل في إيده، وصوته فيه ذهول

"يعني… فريدة بنت خالتي؟"

ردت سالي من الطرف التاني، صوتها هادي بس فيه حسم

"آه… والباقي ممكن تسأل تيم عنه، هو عنده تفاصيل أكتر."

يونس مسح وشه بإيده وقال بنبرة شبه متوسلة

"سالي تعالي، أنا بكون لوحدي… وإنتِ اللي بتونسيني."

قالت بحزم

"مش هاجي… مش عاجباني العيشة دي يا يونس."

قالها بإحباط وهو بيبص للسقف

"وهيا تعجب حد أصلًا؟ بس معلش… أنا خلاص قربت اخف."

سالي سكتت لحظة، وبعدين قالت بصوت متوتر

"لاء... مش هاجي، سيبني كده شوية أهدى… حاسة بخنقة."

قالها بحذر

"هي… فريدة هتيجي طيب؟"

ردت بهدوء

"آه، هتيجي… قالتلي إنها هتكمل عادي."

قال وهو بيتنهّد براحة

"الحمد لله… كنت شايل هم، بحب وجودها… طب وإنتِ؟ هتعملي إيه؟"

سالي قالت بصوت متوتر بس فيه نبرة تحدي

"مش هسكت على الوضع ده… هجيب بنات تانيين في البيت، ومش ههدى غير لما أعرف السبب الحقيقي لكل اللي بيحصل."

وفجأة، الباب اتفتح، وتيم دخل من غير ما يخبط.

يونس بسرعة قال

"هكلمك تاني."

وقفل المكالمة، وبص لتيم اللي دخل بنظرة استغراب

"إنت مش المفروض تكون في شغلك؟"

تيم قفل الباب ووقف قدامه وقال بهدوء بس فيه حاجة مضايقاه

"جيت أطلب منك طلب."

يونس اتعدل في قعدته وقال

"قول."

تيم بص له بعين ثابتة وقال

"عايزك تقول لماما إنك مش عايز فريدة في البيت."

تيم بص له بعين ثابتة وقال

"عايزك تقول لماما إنك مش عايز فريدة في البيت."

يونس رفع حاجبه ببطء وسأله 

"إيه؟! بتقول إيه انت؟"

تيم قال بنفس النبرة الباردة

"زي ما سمعت… قولها إنك مش مرتاح لوجودها، ومش عايزها تفضل هنا."

يونس هز راسه وهو مش مصدق

"ليه؟ فريدة عملتلك إيه؟"

تيم بصله بحدة

"أنا مش مرتاح ليها... وجودها بيضايقني، مش عايز اشوفها تاني"

يونس قال ببطء 

" بس هيا موجوده هنا علشاني أنا مش علشانك إنت."

تيم قال

"وإنت تقدر تطلب أي حد تاني... بس هي لاء."

يونس بصله بتركيز وقال

"هي مش بس ممرضة… هي بنت خالتنا، ده يخليني أتمسك بيها أكتر، مش أطردها."

تيم ضرب كفه في كفه بعصبية وقال

"حتى لو! أنا مش عايزها هنا، مش حابب اشوفها

يونس قال بجديّة

" يبقى إنت اللي عندك مشكلة، مش هي... فريده وجودها بالنسبالي مهم، ولو مش عاجبك روح قول لماما بنفسك"

تيم بصله وقال 

" يونس… اسمع الكلام وقولها انت، وهيا هتمشي هييجي غيرها"

يونس قال بنبرة شبه متحدية

"لاء، مش هقول كده، بالعكس… أنا هقولها إني عايزها معايا كل يوم، فريده حد مريح… وجودها بيهون، وانا بقيت بحبها بجد كأخت وصاحبة"

تيم اتضايق من كلامه ورفضه بس تمالك نفسه وقال بنبرة باردة مصطنعة

"خلاص، براحتك"

ولف وخرج من الأوضه بغضب 

فريدة خرجت من بيتها بدري شوية بعد ما قعدت مع إسلام وحكتله كل حاجة كان محتاج يفهمها.

وبعدها، قررت تروح ليَسر تتطمن عليها

وصلت عند بيتهم، وخبطت على الباب.

فتحت مامت يسر، وشها كان باين عليه ملامح إرهاق، فريده قالتلها بابتسامه خفيفه

"إزيك يا طنط؟"

"أهلا يا بنتي، نورتينا… اتفضلي."

سلمت فريدة عليها بحرارة، وسألتها باهتمام

"عاملة إيه؟ طمنيني عليكي."

اتنهدت وقالت بحزن

"بنحاول نتأقلم بصعوبة، بس بنحاول، البيت اتقلب، ويَسر مش بتخرج من أوضتها خالص."

سكتت لحظة، وبصّت لفريدة بعيون حزينه وقالت

"أنا مش فاهمة إزاي ياسمين تعمل فينا كده ويا ترى دلوقتي عايشه إزاي؟ بتنام إزاي؟ "

فريدة قربت منها، ومدت إيدها تطبطب على كفها

"أنا عارفة إن اللي حصل كبير، وصعب يتصدق، بس يسر قوية… وهتعدي، وهتكون أحسن من الأول، أما ياسمين فهتفهم غلطها وتصلحه"

مامت يسر قالت بنبرة متلغبطة بين الرجاء والحزن

"أنا عايزة أطمن عليها، عايزة أكلمها… شوفيلي طريقة، وصليني بيها... عايزه اتطمن"

فريدة سكتت شوية، بصّت في الأرض بتفكير، وبعدها رفعت عينيها وقالت بهدوء

"هحاول أوصلها، وهطمنك عليها، أوعدك."

فرحت الست بشكل واضح، وقالت من قلبها

"ربنا يريح قلبك زي ما بتحاولي تريحي قلوب الناس، يا بنتي."

ابتسمت فريدة بهدوء وقالت

"هطلع أشوف يَسر."

فريدة طلعت السلم بهدوء، وصلت قدام الباب، خبطت خبطة خفيفة.

مفيش رد.

خبطت تاني… وبرضو مفيش صوت.

فتحت الباب بهدوء، ودخلت.

كان في نور خفيف داخل من الشباك اللي نصه مقفول، ويَسر قاعدة على طرف السرير، لافة نفسها بشال خفيف، رفعت عينيها ببطء لما شافت فريدة… مفيش كلمة، بس الدموع في عينيها قالت كتير.

فريدة قفلت الباب وقرّبت منها، قعدت جنبها وسألت بهمس

"عاملة إيه؟"

يسر قالت بصوت باين فيه انكسار حاد

"بدأت أستوعب يا فريدة… ومش عايزة أستوعب."

سكتت لحظة، وبصت في الأرض

"أنا كنت بجهز علشان اتجوز واكون معاه، وهيا كانت معايا هنا "

دموعها نزلت تاني.

"بس هربت! في يوم كتب كتابي، مع خطيبي… اللي أنا كنت فاكرة إنه بيحبني، وكنت بصدق كل كلمة بيقولها... وأنا الغبية كنت بدافع عنه قدام الناس، حتى قدام نفسي!"

فريدة مدّت إيدها، مسكت إيد يسر وضغطت عليها بحنان

"مش غلطتك… ولا ضعف منك، الناس الوحشة بتستخبى في وشوش طيبة، لحد ما ييجي وقتهم الحقيقي... وبيبانوا"

يسر شهقت شهقة صغيرة، ومسحت دموعها بعصبية

" أنا جوّايا منهارة، أنا مش فاهمة أنا بعيط عشان خطيبي، ولا عشان أختي، ولا عشان نفسي اللي اتكسرت من اللي اتنين."

فريدة قربت أكتر، حضنتها جامد وقالت

"عيّطي براحتك، وعيشي وجعك، لأنك لازم تطلّعيه، بس بعد كده، قومي، لأن محدش يستاهل تنزلي دموعك عليه."

فضلت فريدة حاضنة يسر، وإيدها بتطبطب على ضهرها، بس قلبها بيتقطع عليها

يسر رفعت وشها بعد لحظة، وعينيها حمره، وقالت بصوت خافت

"أنا مش عايزة أعيش كده، كل حاجة حواليا سودة"

سكتت شوية، وبعدين قالت 

"حاسّة إن مفيش لازمة لوجودي."

فريده مسكت وش يسر بإيديها، وبصت في عنيها وقالت بحدة فيها خوف

"متقوليش كده تاني أبداً! إنتي مهمة، ومحبوبة، ولو إنتي مش شايفة كده دلوقتي… فده لأنك موجوعة، مش لأنك قليلة، أو ملكيش لازمة."

يسر كانت بتبصلها، بس واضح إنها مش قادره تصدق

قالت بهمس

"أنا معرفتش أكون أخت كويسة، ولا كنت خطيبة صاحية، حاسة إني فاشلة في كل دور كان المفروض أكونه."

فريدة قربت منها أكتر، بصوت حنون قالت

"اللي حصل مش دليل على فشل... ده دليل إنك كنتي بتحبي بصدق، اللي حصل غدر مش تقصير، مش ذنبك إن اللي حواليكي اختاروا يدمروكي بدل ما يحمُّوكي."

يسر سكتت، بس دموعها نزلت تاني 

فريدة كملت

"أنا مش هسيبك كده، انتي مش لوحدك، احنا كلنا حواليكي، وأنا معاكي لحد ما تقومي من الوجع ده على رجليكي تاني."

يسر قالت بصوت واطي

"أنا تعبت… تعبت أوي."

فريدة شدت البطانية وغطّتها بيها، وقعدت جنبها

"نامي دلوقتي… وريّحي، وحاولي تنسي شويه، عارفه أنه صعب بس لازم تتخطي علشان تعيشي"

في شقة محمد، بعد المغرب بشوية، النور خافت، والتلفزيون شغال بصوت واطي 

ياسمين قاعدة على الكنبة، حاضنه رجليها بإيدها، وبتبص في الأرض من غير ما تتكلم.

محمد كان واقف في المطبخ بيحاول يعمل كوباية شاي، بس عينه عليها كل شوية.

خرج بالكوباية وقعد جنبها وقال بهدوء

"مش هتشربي معايا؟"

ردّت وهي بتهز راسها بنفي

"مش قادرة… نفسي مسدودة."

سكت لحظة وبعدين قال

"حاسس إنك مش مبسوطة... ومتوتره"

قالت بسرعة، وكأنها كانت مستنياه يسألها

"مش متوترة… أنا مرعوبة يا محمد."

بصلها واستغرب

"مرعوبة؟ من إيه؟"

"من بكره...من الجواز...من اللي احنا دخلنا عليه من غير ما نكون جاهزين، إنت شايف إحنا في ظروف تسمح؟ شايف إنك تقدر تفتح بيت بالمنظر ده؟!"

محمد اتنفس بصعوبة، حط الكوباية على الترابيزة قدامه وقال

"ببص حواليّا كل يوم، بلاقي ناس ظروفها أصعب وبيكملوا... وإحنا على الأقل عندنا شغل، ومع بعض"

قالت بيأس

"أنا معاك، بس التعب مش بيخلص، والخوف بيزيد، وأنا حاسة إني ماشية في طريق غامض، مش شايفة آخره، حاسه بخوف"

قرب منها شوية ومسك إيدها وقال

"وعد… وعد من قلبي، إني هفضل جنبك، وهبذل كل اللي أقدر عليه علشان متخافيش تاني… حتى لو اضطرينا نبدأ من الصفر."

ياسمين فضلت ساكتة، لكن مسحبتش إيدها… والسكوت كان فيه قبول رغم القلق.

فريدة دخلت أوضة يونس بهدوء بعد ما خبطت على باب الاوضه، يونس كان نايم على السرير، ولما شافها ابتسم

"فريدة! حمد الله على السلامة، قلقت لما اتأخرتي."

ردت بابتسامة خفيفة باهتة

"كنت مضغوطة شوية… آسفة لو اتأخرت."

قال بفرحه

"ولا يهمك، أنا مرتاح إنك كملتِ، متعرفيش فرحان ازاي انك طلعتي بنت خالتي وكمان انك هتكملي"

ردت وهي بتحط جهاز على دراعه

"طبعًا… ما إنت توقعت إني مش هكمل، وعمرك ما تخيلت اكون قريبتك"

يونس ابتسم وقال

"بس كنت مستعد أحارب ماما علشان تفضلي موجودة."

ابتسمت ابتسامة سريعة، وسحبت ملف من جنبه على الكومود، فتحته وقالت

"إيه ده؟"

رد

"الدكتور كان عندي النهارده… ده الكشف على حالتي دلوقتي."

فريدة فتحت الملف وبصت فيه بدقة، وبصوت مهني قالت

"كويس… في تحسّن، ياريت لو تسمع كلام الدكاترة والممرضين بتوعك، هتتحسّن أكتر، وتاخد بالك من نفسك كويس، ماشي؟"

قبل ما يرد، الباب خبط خبطتين خفاف، واتفتح.

تيم دخل، عينيه أول ما دخل راحت عليها، وقف عند الباب، صوته هادي لكن مشاعره مكبوتة

"كنت جاي أشوفك… محتاج حاجة؟"

يونس رفع عينه لتيم وقال بنبرة فيها مغزى

"أنا كويس… فريدة لسه جاية، هتتابع معايا زي ما كنا."

تيم بص لفريدة، مستني أي حاجة… كلمة، لمحة، حتى نظرة.

لكن فريدة كانت واقفة ثابتة، عينيها لسه على الملف، ملامحها زي ما هي، متحركتش، مبصتلوش، ولا كأن في حد دخل.

تيم فضل واقف، أما هي...فمكملة في شغلها، بنبرة عملية قالت

"ضغطك تمام… بس لازم ترتاح النهارده ومتتعبش نفسك بأي تفكير."

يونس حاول يكسر التوتر وقال لتيم

" تيم؟ عايز تقول حاجه؟!"

تيم مردش، وبعد ثواني تقيلة، لف وساب الأوضة، وقفل الباب وراه بهدوء.

فريدة لسه مركزه في اللي بتعمله ، ويونس كان شايف اللي حصل كله.

كان بيراقبها، ومن وقت للتاني بيبص لباب الأوضة اللي تيم خرج منه

قال بهدوء

"زعلانة منه؟"

فريدة رفعت عينيها ليه بسرعة وقالت

"أنا؟ لاء... هزعل ليه يعني؟"

يونس ابتسم ابتسامة صغيرة وقال

"إنتي مش بتعرفي تمثّلي."

سكتت، بس ملامحها اتشدت شوية.

يونس كمل بنبرة أخف

"ومش بتعرفي تكدبي"

فريدة قالت بصوت فيه نبرة دفاعية

"يونس… من فضلك، خلينا في شغلي وصحتك"

يونس اتفاجئ من حدتها وفريده اخدت بالها انها علت صوتها فقالت بنبرة واضحة لكن ناعمة

"يونس… أنا هنا علشان شغلي… ومش عايزة أي حاجة تتفهم غلط."

هز راسه باحترام وقال

"أنا آسف لو كلامي اتفهم بشكل تاني… أنا فعلًا مقدّر تعبك ووقفتك معايا."

فريدة نزلت عينيها وقالت بلطف

"وأنا مش قصدي أحرجك… بس لازم كل حاجة تفضل واضحة."

يونس ابتسم ابتسامة هادية وقال

"واضحة يا فريدة… ووعد إنك مش هتلاقي مني غير التقدير."

ردت 

"شكرًا يا يونس… ده هيريّحني جدًا."

بدأت تكمل شغلها وعدى شوية صمت

سألته 

 "أنا هنزل أعمل قهوة، تحب أعملك معايا؟"

يونس ابتسم وقال بحماس

 "ياريت! وبعدين تعالي احكيلي اللي حصل امبارح بقا."

ضحكت فريدة بخفة وهي بتلف تخرج

 "مكتوب عليا أحكي بس!"

رد بسرعة وهو بيعدل نفسه في السرير

"ليه، حكيتي لمين تاني يعني؟"

ردت وهي واقفه على الباب

"لإسلام."

ابتسم يونس وقال 

"آه، يبقى أنا وإسلام عادي، بما إنهم في البيت بيعاملوني على إني لسه صغير… أكمني أصغر واحد فيهم يعني!"

فريدة رفعت حاجبها بمرح وسألته

"بس سالي قالتلي إنك أصلاً مش بتقعد في البيت، دايمًا بره؟"

رد بضحكة قصيرة فيها نبرة سخرية خفيفة

"وده بيت يتقعد فيه! لولا اللي أنا فيه، مكنش حد شاف وشي والله."

ضحكت وهي بتهز راسها وقالت له

"هانت خلاص… على آخر الشهر هتبدأ تمشي بعكاز، لحد ما تتحسن على الآخر."

وقبل ما يكمل كلامه، سبقته وقالت بسرعة

"أو براحتك يعني… علشان انت لمض وهتقوللي عكاز إيه بس!"

ضحك يونس بصوت واضح وقال

"برافو عليكي، سبقتيني في الرد!"

قالت وهي خارجة من الأوضة

"هروح أعمل القهوة بقى."

بعد مرور أسبوع…

كل حاجة على وضعها، يمكن مفيش جديد، فريده احترمت رغبة تيم ومش بتقرب منه ابدا ولو شافته صدفه بتلف وترجع مطرح ما كانت، وهو جواه صراع، مش عارف هو عايز ايه بالظبط، وهل كده هو مرتاح ولا لاء

فريده بعد ما يونس نام والساعه عدت ١٢ نزلت المطبخ بهدوء، النور كان مطفي والدنيا هاديه

دخلت وفتحت النور

بس اتفاجئت لما لقت تيم واقف جوه لوحده قدّام الحوض، ضهره ليها، مخدش باله إنها دخلت.

بس لما فتحت النور هو لف بسرعه، نظراتهم اتقابلت، بس وشه كان باين عليه الإجهاد.

فريدة اتجمدت في مكانها، يمكن لأنها متوقعتش انها تشوفه دلوقتي.

لفت وكانت هتنسحب بهدوء بس تيم قال بصوت جاف

"مش لازم تهربي كده كل مرة تشوفيني."

فريدة ردت 

 "أنا مش بهرب، إنت اللي مش عايزني أكون موجوده في مكان انت موجود فيه"

سكت لحظة...وبعدين بص بعيد، كأنه مش قادر يواجهها

"أنا مش عايز أشوفك… علشان لما بشوفك،

ببقى مش عارف أتحكم في نفسي، بكون مش أنا"

كلامه دخل قلبها زي السهم، بس عقلها رفض يصدق 

فضلت ساكتة، لكنه كمل بصوت أهدى كأنه اعترف غصب عنه وهو بيميل شويه

"كل مرة تبقي قريبة... بحس إن كل حاجة حواليا متلغبطه وانك بتغيري كل حاجه"

بصّتله وقالت وهيا مش فاهماه

"بس أنا مش قريبة، ومش بقرب منك زي ما طلبت،

أنا هنا بقوم بشغلي اللي خلاص قرب يخلص،

وساعتها؟

مش هتشوف وشي تاني... أبدًا."

كان هيميل أكتر، وكأنه هيفقد توازنه.

فريده اتحركت ناحيته بسرعة مسكته من دراعه وقالت بقلق

"تيم! إنت كويس؟!"

" تيم، انت كويس ؟!" 

حاول يبعد إيده، بس كان ضعيف، وهيا ما سابتهوش

"وشك شاحب، إنت كنت واقف هنا لوحدك من امتى؟!"

مردش علطول، شكله كان تعبان، تايه، ضايع.

قال بصوت واطي

"معرفتش أنام، نزلت أشرب مية بس."

قالت بنبرة أهدى، وهي لسه ماسكة دراعه

"اقعد طيب، هجيبلك مايه"

جابتله كوباية مايه وادتهاله، اخدها بس ايديه كانت بتترعش، شرب بق واحد بس وسابها على الترابيزه قدامه، فريدة فضلت واقفة جنبه، حاسة بكل نفس بياخده بالعافية.

كان بيحاول يتماسك، بس عينيه بتقفل غصب عنه

قالت بنبرة فيها حزم وقلق

"شكلك سخن، اخدت برد؟"

مردش، بس كان بيتنفس بصعوبه،

حطت إيدها على جبينه بدون تفكير، كان سخن فعلًا.

سحبت إيدها بسرعة، كأنها اتلسعت بس مش من حرارته، من اللحظة نفسها.

قالت وهي بتكتم اضطرابها

"إنت سخن فعلًا، ازاي محدش خد باله، تعالي اطلعك اوضتك"

قال بصوت مبحوح

" هعرف امشي لوحدي."

قالت برفض قاطع 

"لاء، مش هتمشي لوحدك، كفاية عناد، تعالي"

مدتله إيدها...

اتردد، وبعدين مسكها...

إيده كانت سقعة جدا وكانت بترتجف

طلعوا السلم سوا، خطوة بخطوة وهو كان بيترنح 

وصلوا أوضته، فتحت الباب، دخلته، وساعدته يقعد.

"ارتاح... هجيبلك دوا ولمون سخن"

قال بنبرة صوتها مبحوح من التعب

"أنا مش محتاج لكل ده"

بصتله وهي بتفتح الدولاب تدور على بطانية

"ممكن متكونش محتاجني انا... بس مش هقدر اسيبك في الحاله دي"

ساعدته يتسطح وغطته، وبعدين نزلت تجيبله اللي محتاجه

رجعت بصنية فيها كوباية لمون سخنة، ودوا خافض حرارة.

وهو نايم على ضهره، مغمض عينه بتعب

مدتله الكوباية

"اشرب"

"أنا مش قادر…"

"ماشي، ثواني"

ساعدته يتعدل وقربت الكوباية من شفايفه، وساعدته يشرب، وبعدها ساعدته يرجع ينام تاني

وقفت وهي بتبصله لحظة، كان نايم على السرير، عرقه غرق المخده، نفسه مش منتظم، ووشه شاحب جدًا.

همست وهي بتغطيه أكتر

"معلش، بس مش هقدر أسيبك كده، حتى لو كنت مش عايزني حواليك"

بهدوء خرجت من الأوضة، مشيت بسرعة في الطُرقه بقلق، وصلت عند أوضة صابرين، خبطت بهدوء وهي بتحاول تتحكم في صوتها، لكن كان واضح عليها التوتر.

صوت صابرين جه من جوه

"مين؟"

ردت فريدة

"أنا...فريدة."

فتحت الباب بسرعة، كانت لابسة روب خفيف وعلى وشها آثار قلق أول ما شافتها.

"في إيه يا فريدة؟ في حاجة؟"

قالت فريدة وهي بتحاول تحافظ على هدوئها

"تيم تعبان جدًا...حرارته عالية، وبيهلوس...شكله واخد دور برد شديد"

صابرين حست بقلق فعلا وقالت وهيا بتخرج من الاوضه

"يعني إيه؟! إزاي؟! كان كويس النهاردة..."

فريده قالت

"لقيته في المطبخ كان شكله باين تعبان... أنا نيمته وغطّيته، بس لازم دكتور يشوفه فورًا."

مشيوا بسرعة سوا وصابرين باين عليها قلق، دخلت بسرعه الأوضه وقربت منه، كان نايم على السرير، ملامحه شاحبة ووشه محمّر من الحرارة، نفسه متقطع وبيتكلم بكلام مش مفهوم، فريدة واقفة بعيد عينيها عليه، وصابرين قعدت جنبه ومسكت أيده برعب واضح

"تيم… تيم، رد عليا يا حبيبي"

لكن هو كان بيهذي بكلام مش مفهوم، جسمه بيتحرّك بخفة من السخونية، وعينه مغمضة ومش مستجيب.

فريدة قالت وهي بتخرج الفون من جيبها

"فيه دكتور أنا بشتغل معاه في الطوارئ، هكلمه دلوقتي وييجي يشوفه"

صابرين هزت راسها وفريده خرجت تكلمه وبعد كده دخلت وقالت 

"جاي في الطريق... بس لازم نجهزله حاجات لحد ما يوصل، سخونية زي دي ممكن تعمل مضاعفات."

صابرين بصتلها بقلق

"قوليلي أعمل إيه؟"

" انا اللي هعمل، خليكي انتي جنبه"

صابرين هزت راسها، وفريده نزلت تجيب فوطة وميه ورجعت.

دخلت الأوضة وهي شايلة كل حاجة، حطّت الصينية، وبدأت بهدوء واحتراف تعمل الكمادات، وكل شوية كانت بتلمس جبينه تتابع الحرارة.

"لازم نخلّي حرارته تنزل شويه، عاليه جدا"

صابرين كانت قاعدة جنبها، بتساعدها وهي بتحاول تتمالك أعصابها، بس واضح إنها خايفه 

مرت حوالي تلت ساعة... تيم بدأ يفتح عنيه بصعوبة.

قال بصوت متكسر وهو بيكح

" مش قا..در"

ردت فريدة بهدوء

"عارفة... هو دور برد تقيل، بس خليك معانا، متنامش تاني."

فضلت تتابع حالته لحد ما وصل الدكتور، دخل بسرعة، فرد أدواته، وبدأ يكشف عليه.

حط السماعة، قاس الحرارة، قاس الضغط، شاف صدره، سأل أسئلة لصابرين عن الأعراض

"من إمتى بدأت الحرارة؟"

قالت

"أنا لسه عارفه من شوية...فريدة هي اللي لحقته وشافته كده، قالتلي إنه كان بيهلوس ووقع تقريبًا."

بص الدكتور لفريدة، قال بهدوء

"هو كان بيعرّق كتير؟ جسمه بيترعش؟"

قالت

"أيوه، وكان بيقول كلام مش مترتب... ووشه كان مرهق جدًا."

الدكتور خرج حقنة من شنطته، وبدأ يجهزها

"واضح إنه واخد دور برد شديد جدًا، مع إجهاد نفسي، الحرارة وصلت ٤٠، ودي مرحلة خطيرة، لازم نبدأ في خفض الحرارة فورًا"

صابرين قالت بخوف

"هنوديه مستشفى؟"

رد بهدوء

"لسه مفيش داعي، ندي الحقنة دي، ونبدأ كمادات، ولازم يفضل على السوائل والراحة التامة، لو الحرارة ما نزلتش خلال ساعات، هنتحرك فورًا."

اداله الحقنه وفريدة قامت جابت فوطة مبلولة وبدأت تمسح وشه بهدوء.

الدكتور قال وهو بيقف

"هعدي عليه الصبح أطمن، بس لو في أي تغير سلبي، كلموني فورًا."

فريده قالت

"أنا هفضل معاه... هتابع الحرارة وأديه العلاج أول بأول."

الدكتور بصّلها بتقدير

" هيبقى افضل يا فريده، انا عارف تأثيرك على المرضي كويس"

بصتله بامتنان وابتسمت

صابرين قالت وهي بتشكره

"شكرًا...متشكرة جدًا."

الدكتور خرج وهيا خرجت معاه 

بعد شويه صابرين رجعت، فريده قالتلها

"لو حابة تروحي ترتاحي شوية، أنا هكمل معاه."

قالت برفض

"لا...أنا هفضل معاه، مش هسيبه في الحالة دي، اتطمن أنه بقى كويس الأول" 

كملت

"هبعت سليمان يجيب الأدويه اللي في الرشته"

خرجت بسرعة من الأوضة، وفريدة فضلت قاعدة جنب السرير، بتحط الكمادات بهدوء، لمست إيده اللي كانت سخنة جدًا.

تيم مكانش واعي، بس ملامحه بدأت تهدى شوية.

عدى اربع ايام، فريده بين يونس وتيم، بس المعظم مع تيم اللي طول الوقت نايم وتعبان 

حرارته بدأت تنزل، بس جسمه مرهق جدًا ولسه مش قادر يقوم لوحده.

صابرين بتدخل تطمن عليه كل شوية، فريده رسميه جدًا، وبتتصرف كأنها مجرد ممرضة وبس

فريدة كانت مع يونس، كانت مستنيه معاد علاج تيم ييجي، ولما الوقت جه قامت فورًا تدخل أوضة تيم تطمن عليه وتديله العلاج كالعادة.

لكن أول ما دخلت، اتفاجئت إن السرير فاضي وهو مش موجود

بصّت حوالين الأوضة بقلق ونادت

"تيم؟"

مفيش رد.

نادت تاني، صوتها أعلى شوية

"تيم؟! إنت فين؟"

سمعت صوت مايه شغالة من جوا الحمام.

وقفت مكانها لحظة، خدت نفس طويل

قربت من الباب بهدوء، خبطت على الباب بسرعة، وقالت بقلق

"تيم! إنت كويس؟! "

مفيش رد

خبطت تاني، أقوى

"تيم، لو مفتحتش هضطر أنده لحد!"

لحظة وسمعت صوته جاي من جوه، مرهق جدًا، مخنوق شوية

"أنا... كويس..."

قالت بحزم

"لو كنت فعلاً كويس، اطلع فورًا وخليني أتطمن، أنت حتى مش قادر تمشي، إزاي تاخد شاور لوحدك؟!"

سمعت صوت المايه بيخف تدريجيا، وبعدها سمعت صوته بيقول بخفوت

"كنت محتاج أفوق... بس الدنيا بتلف، مش شايف كويس."

فريده فورًا قالت بقلق

"افتح الباب، دلوقتي."

فتح الباب بهدوء، كان واقف بالعافيه، ساند على الحيطة، وشه مبلول، شعره مبلول، ووشه باين عليه التعب بوضوح.

فريده دخلت بسرعة، سندته لحد السرير، ساعدته يقعد.

قال بصوت واطي وهو بيحاول يثبت صوته

"أنا خلاص بقيت كويس."

ردّت بدون ما تبصله

"الحمد لله إنك اتحسنت، بس مش معنى كده انك تهمل في نفسك."

قال بنفس النبرة 

"أنا مش بهمل في نفسي."

ردت بنبرة عملية

"حاول ترتاح لحد ما تخف كليا، إنت كنت تعبان جدًا الأيام اللي فاتت، وما صدّقت إنك بقيت أحسن، لو احتاجت حاجة… قولي." 

سكت، بدأت تديله العلاج، وقفت مكانها لحظة، بتراقب المؤشر الرقمي لحرارته وقالت 

" الحمد لله نزل عن الأول كتير"

بعدين بصت عليه، كان مغمض عينه، بس نفسه مش منتظم.

قالت بهدوء

"هحطلك كمادة تانية، لسه جسمك محتاج تبريد بسيط."

مستنتش رد منه، ولا هو حاول يقول حاجة.

جابت الفوطة، بلّتها، وبدأت تحطها على جبهته بلطف.

فتح عنيه ببطء، عينه وقعت عليها، لكنها مبصّتش له، كانت مركزة في شغلها وبس

قال بنبرة باردة 

"أنا ممكن أعمل ده لوحدي."

ردّت ببساطة

"وأنا موجودة علشان اعمله انا"

سادت لحظة صمت، رجّع عينه للسقف، وهي فضلت تحط الكمادة لحد ما خلصت 

رنّ تليفون فريدة، لمّحت الاسم على الشاشة

"إسلام"

بص لتيم بسرعة وقالت بنبرة سريعة بس هادية

" الف سلامه، خد بالك من نفسك."

وسابت الأوضة بهدوء.

خرجت، وردّت بسرعة وهي ماشية في الطُرقة

"ألو؟"

إسلام قال بهدوء

" عامله ايه؟! والكل عندك عامل ايه ؟! تيم بقا كويس؟!" 

ردّت وهي بتحاول توازن بين التعب اللي في صوتها والهدوء المعتاد

"آه، الحمد لله احسن"

سكتت لحظة وبعدين قالت

" عرفت حاجه عن ياسمين، كل ما أروح ليسر، طنط بتسألني عنها."

إسلام ردّ بهدوء

"أيوه... وصلتلها، خلاص."

قالت بدهشة مفاجئة

"بجد؟!"

رد

"آه... كتبوا الكتاب خلاص، وعايشين في بيت صغير بعيد عن الأنظار."

فريدة سكتت لحظة، كانت بتحاول تستوعب الكلام، وبعدين قالت بصوت واطي

" انت متاكد يا اسلام ؟!"

قال 

"هو ده اللي حصل، خليني أحكيلك بالتفصيل بعدين، بس حبيت أعرفك دلوقتي باختصار يعني"

سكتت وبعدين قالت بهدوء

"تمام... باي" 

تاني يوم…

فريدة كانت واقفة قدام باب بيت يسر، خبطت بلطف، وبعد لحظات الباب اتفتح.

يسر فتحت، كانت عينيها فيها إرهاق بس بتحاول تبان طبيعية.

ابتسمت فريدة ابتسامة بسيطة وقالت

"صباح الخير."

يسر رجّعت خطوة لورا وهي بتفتح الباب أكتر

"صباح النور، ادخلي."

دخلت فريدة وسلّمت عليها وقعدت على الكنبة.

سادت لحظة صمت خفيفة، فريدة قطعتها بهدوء

" عامله ايه ؟!"

يسر قعدت قصادها وقالت بصوت هادي، باين عليه التعب

"أنا كويسة... يعني، بحاول أكون كويسة."

فريدة بصتلها لحظة وقالت برقة خفيفة

"عارفة... وخدتي خطوة كبيرة لما نزلتي الشغل تاني، ده لوحده حاجة محترمة."

يسر حاولت تبتسم، لكن التعب كان ظاهر أكتر

"الشغل هو الحاجة الوحيدة اللي بتشغلني عن التفكير، بس أول ما برجع البيت كل حاجة بتفتكرني باللي حصل."

فريدة بصتلها بحزن، لكن قالت بنبرة ثابتة

" بس خليكي فاكره انك مش لوحدك وان كلنا معاكي"

يسر نزلت عينيها وقالت بصوت واطي

"هو مفيش أي خبر؟ متعرفيش عنهم حاجة؟"

اترددت فريدة ثواني، بس قالت بحذر وهي بتبص في الأرض

" اكيد معرفش، وانتي متحاوليش تعرفي، فكك منهم "

يسر هزّت راسها، وقالت وهي بتحاول تتحكم في صوتها

" عايزه، بس مش عارفه، الحوار صعب اوي "

فريدة مالت ناحيتها شوية وقالت بلطف

" وانتي اخدتي وقتك وزعلتي، دلوقتي حاولي تتعايشي، لسه الحياه قدامك، ولسه هتتعلمي، ولازم تكوني قويه"

قبل ما يسر ترد، مامتها جت، وشها باين عليه التعب.

ابتسمت وهي بتقرب

"إزيك يا فريدة يا حبيبتي، منورة."

فريدة قامت بسرعة وسلّمت عليها

"إزي حضرتك يا طنط؟ عامله ايه؟!"

الست بصّت على يسر وقالت

"قومي يا يسر شوفي باباكي، كان عايز يشرب شاي وطلب مني اقولك ."

يسر ردّت

"حاضر يا ماما"

وقامت وها بتقول لفريده

" اعملك شاي ؟! ولا عايزه حاجه تانيه؟!" 

فريده قالت بلطف 

" شاي ماشي"

مشيت واول ما اختفت من قدامهم، الست قعدت جنب فريدة وقالت بصوت واطي فيه رجفه

"مفيش أي خبر؟"

فريدة خدت نفس، بصّت في الأرض، وقالت بهدوء حريص

"يعني... اسلام عرف يوصل لاخبارهم الأخيره"

الست اتشدت قدامها وقالت

"طب قوليلي بسرعه هيا راحت فين؟! عايشة إزاي؟! محمد خدها فين؟!"

فريدة قالت بسرعة تحاول تهديها

"طنط...واحدة واحدة بس... مش عايزاكي تتخضي، أنا جيالك مخصوص علشان أقولك اللي عرفته."

الست همست

"قوليلي... بالله عليكي."

فريدة بصّت في عينيها وقالت بنبرة بطيئة واضحة

"همّا اتجوزوا، كتبوا الكتاب خلاص، وساكنين في بيت صغير، بعيد عن هنا"

الست جحظت عينيها، ضربت بإيدها على صدرها، كأن نفسها اتكتم 

"اتجوزوا؟!"

فريدة أومأت

"أه... بس انا معرفش مكانهم فين بالظبط"

الست حطت إيديها على وشها، وبدأت دموعها تنزل، بدون صوت.

فريدة قربت، مسكت إيديها، وقالت بهدوء

"أنا عارفة إن الخبر صعب، وأنا آسفة… بس قولت لازم حضرتك تعرفي، ويسر مش لازم تعرف اي حاجة" 

الست بصّتلها، الدموع في عينيها، وقالت بصوت مكسور

"أنا مش قادرة أصدق... بنتي تعمل كده؟! تسيب البيت وتروح تتجوز في السر؟! وخطيب اختها؟!"

فريدة شدّت على إيدها بلطف

" انا اسفه مكنتش حابه اقولك بس اكيد مش هتبطلي تسألي عنها، المهم دلوقتي محدش يعرف علشان ميحصلش مشاكل"

الست مسحت دموعها بسرعة لما سمعت صوت يسر جاية، وفريدة رجعت تقعد في مكانها كأن محصلش حاجة.

دخلت يسر بابتسامة بسيطه

"بابا بيقولك كلميه عايزك"

ردّت وهي بتحاول تخفي ارتباكها

"جايه يا حبيبتي."

خرجت، وفريدة فضلت قاعدة مكانها، قلبها تقيل من اللي حصل وبيحصل

رجعت فريدة البيت آخر اليوم، مجهَدة ومشوشة،

دخلت بهدوء، طلعت على أوضتها الأول، وبعدها راحت ناحية أوضة مامتها تطمن عليها.

خبطت خبطتين خفيفين وقالت بهمس

"ماما؟"

مفيش رد.

فتحت الباب بحذر، دخلت...الأوضة كانت فاضية، لكن صوت المياه كان شغال من الحمام.

فهمت إنها جوه، فقررت تستناها لحد ما تخرج.

قعدت على طرف السرير، لما طولت كانت ناوية تقوم تخرج، لكن صوت رنة موبايل فجأة شدّها.

بصّت حوالين الأوضة، لقت الفون على التسريحة بيرِن.

قربت تلقائيًا تبص، بصّت للموبايل... مكانش عليه اسم، بس بعدها على طول وصلت رسالة.

الشاشة نورت، وبشكل لا إرادي، عنيها وقعت على الكلمات

"كان يوم طويل، وكل لحظة فيه كنت بفكر فيكي،

مشتاق أتكلم معاكي براحتنا، من غير خوف ولا حسابات، بكرة الساعة 7، نفس المكان؟"

فريدة اتسمرت مكانها، صوت الميّه في الحمام كان شغال، وكل حاجة حواليها بقت مش واضحة.

قعدت على الكرسي، حطت إيدها على بقها، مش مصدقة...

حسّت إن الأرض بتتهز تحتها.

"ماما؟!"

الست اللي طول عمرها شايفاها ملاك؟...

دقيقة، اتنين...والمياه اتقفلت.

قامت بسرعة، خدت نفسها بالعافية، خرجت من الأوضة، وهي حاسه انها مش قادره تتنفس كويس 

دخلت فريدة أوضتها وهي بتحاول تمسك أعصابها، قلبها بيدق بسرعة، وكل خطوة بتحسسها إنها ماشية على نار.

قعدت على السرير، وشها بين إيديها، بتسأل نفسها بصوت واطي

"يعني إيه؟... ممكن أكون فاهمة غلط؟ يمكن الرسالة مش ليها أصلاً؟"

لكن صوت جواها بيرد بقسوه

"بس ده فونها...والرسالة جاية حالًا..."

قامت وقعدت قدام اللابتوب بتاعها، وهي مش متأكدة هي بتعمل إيه أصلًا، بس عقلها مش راضي يسكت.

فاكرة إن زمان كانت مامتها دايمًا بتطلب منها تبص على إعدادات الجهاز أو تبعت حاجة من حساب فيسبوك كان مفتوح، أو واتساب ويب.

فكرة خبيثة لمعت في دماغها...

"ممكن تكون حساباتها لسه محفوظة؟"

فتحت المتصفح...

فتحت فيسبوك...

وضغطت على الحسابات المحفوظة.

قلبها كان بيخبط وحاسه بتوتر

لحظة صمت، بعدها ضغطت علي الحساب

فتح بدون كلمة مرور.

عينيها لمعت بدموع، مش عارفة إذا كانت عايزة تكمّل ولا لاء.

فتحت الرسايل...

دورت شوية أو كتير وايديها بترتجف

لحد ما قدرت تلاقي كلام بين مامتها وشخص مجهول، كلام عن اشتياق، عن لقاءات، عن أيام فاتت.

فيهم نبرة حب مش ممكن تتفهم غلط.

قفلت اللاب بسرعة مقدرتش تكمل، وقامت من مكانها، وشها شاحب...

مش قادرة تصدق اللي شافته.

ولا حتى قادره تقتنع

حست انها في كابوس 

ازاي مامتها الست اللي دايما قدوتها تخون باباها.

تاني يوم، فريدة راحت ليونس 

كان الجو هادي 

دخلت، لقت يونس قاعد على الكنبة في اوضته، رجله ممدودة قدامه، والعكاز جنبه، بس ملامحه كانت مختلفة... باين عليه إنه بيتحسن فعلًا.

ابتسم أول ما شافها وقال

" بجد كل مره تدخلي فيها بحس أن انا كويس"

قعدت قدامه، حاولت تخفي التوتر اللي جوّاها، بس عينيها كانت فيها أثر سهرة منامتش فيها كويس.

يونس لاحظ، قال بنبرة فيها نوع من المزاح الخفيف

"إيه؟ مالك كده؟!"

ردّت بسرعة

"أنا كويسة... بس ضغط شغل."

سكت لحظة، وبعدين قال بهدوء أكتر

"لو في حاجة مضايقاكي، ممكن تقولي."

فريدة بصتله وقالت

" مفيش حاجه اكيد"

ابتسم يونس وقال 

" لو حبيتي غيري رأيك انا موجود" 

ابتسمت ابتسامه متخطتش شفايفها.

يونس حاول يخفف التوتر اللي في الجو وكان بيحكي عن التمارين الجديدة اللي بدأ يعملها، بس لاحظ إنها مش بترد، ولا حتى بتعلّق بكلمة أو ابتسامة.

سكت شوية، وبعدين قال

"فريدة؟"

رفعت عينيها عليه فجأة، كأنها كانت في حتة تانية خالص.

"ها؟"

قال 

"إنتي مش مركزة خالص، في حاجة؟"

هزّت راسها بسرعة، وقالت بصوت واطي 

"لا، لا... معلش، بس مرهقة شوية."

رد عليها بهدوء

" شكل الموضوع اكبر من مجرد إرهاق"

هيا معلّقتش، بس ملامحها اتشدت أكتر.

قال بلطف وهو بيحاول يغير الجو

"طب تعالي نشرب حاجة طيب، ايه رأيك تنادي حد من اللي تحت يعمل ايس كوفي "

ابتسمت ابتسامة باهتة، وقالت

" طيب هنزل اعملك" 

قال 

" خلاص خليكي شكلك مش عايزه اصلا"

فريدة رفعت راسها ليه بسرعة، كأنها كانت سرحانة في عالم تاني، وبعدين قالت بسرعة

"لا لا عادي طبعًا، أعملهالك حالًا."

قامت من مكانها، وخرجت من الأوضة باتجاه المطبخ. خطواتها كانت بطيئة، مرهقة، وملامحها شاحبه

تيم كان قاعد في الريسيبشن مع صاحبه، الترابيزة قدامه عليها أوراق وتقارير محطوطه بنظام، واللابتوب مفتوح، وعينيه بتتحرك بسرعه بين السطور، صاحبه قاعد جنبه وقاله وهو بيشاور على جزء معين في ورقه

"بص، الجزء ده محتاج يتراجع، الأرقام هنا مش متطابقة مع التقرير اللي طلع."

تيم أخد الورقه، بص فيها لحظة وقال بنبرة متوترة شويّة

 "علشان كده قلتلك مستحيل أسلّم حاجة من غير ما أراجعها بنفسي، غيابي الأيام اللي فاتت عمل لخبطة كبيرة."

كان بيكلمه ومستني رده، لكن فجأة لاحظ إنه سرح، عينه مش عليه، باصص في اتجاه السلم، لف وشه بشك، وبص على نفس الاتجاه… لقاه مركز معاها، نازلة بسرعة من على السلم، ماشية بخطوات سريعة كأنها مستعجلة، ودخلت المطبخ من غير ما تاخد بالها إن في حد اصلا

بصله بحدة وقال بضيق واضح

"حسام، ركز معايا هنا، أنا بكلمك."

حسام فاق من شروده، رمش كذا مرة وقال وهو بيحاول يضحك

"هي مين دي؟ أول مرة أشوفها هنا."

قال بنبرة حادة فيها غيرة محبش يعترف بيها حتى لنفسه

"إنت جاي تشتغل ولا تبص على أهل البيت؟"

حسام لسه بيفتح بُقه علشان يرد، لكن فجأة سمعوا صوت خبط جامد جاي من المطبخ

تيم قام فورًا من مكانه، جري ناحية المطبخ من غير ما حتى يبص لحسام.

دخل بسرعة، لقا فريدة على الأرض، الإزاز مكسور حواليها، بتلمه بسرعه بايديها اللي اتعورت

وشها شاحب، وعنيها مش مركزة غير في الازاز اللي بتلمه بسرعه

قال بقلق واضح

"فريدة!"

قرب بسرعة، ركع جنبها، مسك إيدها بلطف لكنه كان متوتر جدًا، عينيه سابت الإزاز وركزت على كفها اللي اتعور

"إيه اللي حصل؟! إنتي كويسة؟!"

قالها بنبرة فيها خوف مش متعود عليها،

هي كانت بتحاول تتكلم، بس صوتها كان واطي ومبحوح

"الكوبايه وقعت اتكسرت، غصب عني معر..."

قاطعها بحدة

" مش مهم فداكي مش مشكله"

وقف ووقفها ونادي 

" محمد، تعالي نضف الأرض بسرعه "

محمد دخل بسرعة وتيم بص له بنبرة حاسمة

"شيل كل ده بسرعة، خلِّي بالك وإنت بتنضف."

بعدين رجع عينيه على فريدة، كانت واقفة بصعوبة، باين عليها إنها مش قادرة تركز.

بصلها وبنبرة هادية بس مليانة اهتمام قال

"تعالي، إقعدي شويه في الجنينة... شكلك مش تمام."

مستناش موافقتها، وخرج بيها من المطبخ ناحية الجنينة.

قعدها على كرسي، وقعد جنبها، إيده لسه ماسكة طرف إيدها التانية.

طلع منديل من جيبه ومسح ايديها براحه وسألها، وصوته كان واطي 

"إيه اللي مضايقك؟"

هزت راسها بنفي، وسكتت.

قال بنبرة هادية لكنها ثابتة

"مفيش حاجة تستاهل زعلك ده"

بصلها لحظة، شاف في ملامحها حاجة مش طبيعية... تعب، شرود، كأنها مش هنا.

قال وهو بيعدل قعدته قدامها

"واضح إنك مش تمام."

سكت ثواني، وبعدين كمل 

" بس اكيد مش هضغط عليكي"

كانت فريدة باصه له، بس مش عارفة تقول حاجة.

شال عينه عنها، وقال بجملة مختصرة وهو بيقف

"هجيبلك مايه، إقعدي مكانك."

ومشي

رجع من جوا البيت ومعاه إزازة مايّه، بس قبل ما يخرج لقاها قدامه

مشيت ناحيته بخطوات أهدى من أول، وقفوا قصاد بعض لحظة.

قالت بصوت هادي، فيه نبرة امتنان مكبوتة

"أنا كويسة، شكراً على اهتمامك."

سكت ثانية، بصلها من غير ما يرد فورًا، وبعدين قال بنبرة فيها برود

"مش اهتمام... بس ماينفعش أشوفك كده وأسكت."

عدى جنبها بهدوء، ومدّ لها الإزازة

وقال بهدوء

"اشربي."

وسابها وكمل طريقه، كأن ما حصلش حاجة...

فريدة دخلت المطبخ، طلبت من واحد من اللي جوه يحضر طلب يونس.

وقفت لحظات تتابع تحضيره، وبعد ما خلص، شكرته وأخدت الصينية وخرجت.

في الوقت ده، كان تيم رجع لقعدة الشغل.

قعد على الكرسي من غير ما يتكلم، حاول يركز في الورق قدامه.

حسام بصله وسأله

"إيه اللي حصل؟"

رد تيم وهو بيقلب في ورقة قدامه، من غير ما يرفع عينه

" مفيش حاجه مهمه"

سكت حسام لحظة، وبعدين قال وهو موطي صوته

"هي مين دي؟ أول مرّة أشوف واحدة ست هنا أصلاً."

تيم بصله بسرعة، وبنبرة قصيرة قال

"ممرضة يونس... ماما اللي جابتها."

حسام رفع حواجبه باستغراب واضح

"مامتك جابت بنت؟ تدخل البيت؟ مش غريبة دي؟"

تيم ساب الورقة اللي في إيده وقال ببرود

"مش مهم، نركّز في الشغل؟!"

وبص تاني على اللابتوب قدامه، كأن الحوار انتهى تمامًا.

فريدة كانت طالعة، شايلة صينية فيها الآيس كوفي، وشكلها أهدى شوية من قبل كده، بس ما زال عليها أثر التعب.

تيم رفع عينه ليها لحظة، بس بسرعة رجّع نظره على اللابتوب

حسام قال بصوت وطي فيه هزار

"هاي ميس نيرس."

تيم رفع نظره لحسام، نبرته كانت واطية لكنها قاطعة

" ركز يا حسام في شغلك مش هقولك تاني " 

حسام قال بضحكة خفيفة

"ما تعرفني عليها؟ البت حلوة."

تيم بصله بنظرة جامدة، ملامحه مبتتحركش.

نبرة صوته طالعة رخيمة، فيها غيظ مكتوم

"ركز في شغلك، ملكش دعوه بيها"

حسام ضحك وقال بنص جد

"يا عم إهدى، بهزر."

تيم قال ببرود

"وأنا مبهزرش"

فريده دخلت أوضة يونس وهي شايله صنية الايس كوفي، حطتها على الكومود بلُطف.

يونس كان قاعد على الكنبه فارد رجله 

قال بهزار

"يا سلام! تسلم ايدك"

فريدة ابتسمت بخفوت 

"بالهنا"

فريدة قعدت على الكرسي اللي جنبه، ملامحها كانت هادية بس فيها لمحة شرود خفيف.

يونس لاحظ، وبصلها شوية، وبعدين قال بنبرة أخوية فيها دفء

"أخبارك إيه بقى؟ شكلك مش على بعضك."

فريدة قالت بهروب

"أنا؟ لا عادي... اليوم طويل بس."

يونس قال بهدوء

"طيب بجد لو متضايقه وعايزه تحكي، فأنا هكون مستمع جيد"

فريدة ابتسمت ابتسامة باهتة، وقالت

"مفيش حكايات، يعني مضغوطه اليومين دول شويه"

بونس قال بمزح

"هو أنا اللي مضغوط مش إنتي، بس واضح إني محتاج أتعالج جسديا وانتي محتاجة أجازة."

ضحكت خفيفة خرجت منها غصب عنها، وقالت بنبرة أهدى

"إحنا الاتنين هنحتفل لما نخرج من هنا متقلقش"

يونس قال بابتسامة خفيفة وهو بيبصلها

"يعني انتي بجد هتمشي؟"

فريدة قال بهدوء وابتسامة

"الحمد لله انت بقيت أحسن."

يونس بص قدامه وقال بنبرة شبه تمثيلية

"لا تصدقي... حاسس إني مش قادر أحرّك رجلي... لسه محتاجه شويه وقت"

فريدة ضحكت

"هبقى أجي متقلقش، ده احنا ولاد خاله يعني"

يونس رجع يبصلها

"بس مش هتيجي كل يوم زي دلوقتي"

فريدة سألته

"يعني انت بعد ما تكون احسن هتقعد في بيتكوا بعد الحبسه دي كلها يعني؟!" 

يونس قال بضحكة خفيفة

"أكيد لاء... سميرة وحشتني!"

في اللحظة دي موبايل فريدة رن، طلعته وبصت على الاسم، كان مامتها 

فضلت تبص عليه كام ثانية، وبعدها قفلت الصوت من غير ما ترد.

يونس لمح اللي حصل، لكنه معلقش.

بعد شوية...

باب أوضة يونس خبط خبطتين خفاف، وبعدها دخل تيم

تيم بص على يونس وسأله بنبرته العملية المعتادة

"عامل إيه؟ محتاج حاجة؟"

يونس هز رأسه بابتسامة بسيطة

"كله تمام"

تيم بص بسرعة ناحية فريدة، كانت قاعدة في نفس الوضع، ملامحها لسه هادية.

عينه فضلت عليها لحظة، وبعدين قال بنبرة أهدى من المعتاد

"بقيتي أحسن؟"

فريدة رفعت عينيها له، وقالت بهدوء

"آه، الحمدلله."

تيم اكتفى بإيماءة

بعدين وجّه كلامه ليونس تاني

" ده دوا بدل اللي قرب يخلص، لسه واصل دلوقتي "

يونس قال

"تمام، شكراً."

تيم كان هيخرج بعد ما حط الكيس، لكن بص على فريدة مرة أخيرة، ومن غير ما يتكلم، وبعدها خرج وقفل الباب وراه

فريدة خرجت من أوضة يونس، وقفت شوية في الطرقة، خدت نفسها، وبعدين طلعت موبايلها وكلمت إسلام

"إسلام...ممكن تيجي تاخدني؟"

صوته كان باين عليه القلق

"حصل حاجة؟"

"لاء، بس... مش قادرة أكمل، تعبت شوية "

"خلاص، جاي حالًا."

قفلت وهي بتحاول تتماسك

دخلت قعدت جنب يونس، ساكتة.

يونس كان بيهرّج كعادته، بيحاول يضحّكها، بس لما سكتت فجأة، وبصّتله من غير ولا كلمة، فهم انها مش في المود 

بصلها شوية، وبعدين قال بهدوء

"مالك؟"

هزت راسها وقالت بصوت واطي، وهي بتحاول متبانش متضايقة

"مش هقدر أكمل اليوم... عايزه امشي."

سكت، بصّلها لحظة، وبعدين ابتسم ابتسامة خفيفة وقال

"تمام، مفيش مشكلة... واضح إنك محتاجة ترتاحي."

بصتله وهي بتحاول ترد الضحكة اللي اختفت منها من بدري، بس طلعت ابتسامة خفيفة جدًا.

بعد شويه فونها رن وكان اسلام، قالها أنه خلاص قرب، قفلت معاه وضحكت ضحكة صغيرة ليونس وقالتله

"هشوفك بكره...لو احتجت حاجة، كلمني."

هز راسه، وبص للسقف وهو بيقول

"خلي بالك على نفسك."

ابتمست وخرجت من الأوضة بخطوات هادية.

نزلت تحت واستنت، دقيقة وظهر إسلام، أول ما شافته، جريت عليه، حضنته بقوة كأنها بتدور على أمانها، هو حاوطها من غير كلام، ووشه باين عليه إنه حاسس إنها مكسورة.

قال بهدوء وهو بيطبطب عليه

"مالِك يا فريدة؟"

"مفيش بس كنت محتاجة الحضن ده."

وفي اللحظة دي، تيم كان واقف في أوضته، جنب الشباك، وعينه فضلت متعلقة بيهم... متأكد انها مش كويسه بس ملهوش أنه يتدخل

بعد ثواني، سمعها بتقول بصوت مبحوح مخنوق

" اسلام...أنا مش قادرة... مش قادرة أكتم أكتر من كده."

سحبها من حضنه وهو ماسك كتفها بإيده، وبص في عينيها بتوتر

"فريدة! مالك؟ في إيه؟!"

هزت راسها ببطء، وعنيها كانت مليانة دموع محبوسة وقالت بصوت واطي

"مش قادرة."

"طيب... اركبي، تعالي نروح أي مكان هادي"

ركبوا العربيه، وهو فضل يبصلها كل شوية، كانت ساكتة ووشها متغير.

بس محبش يضغط عليها.

بعد حوالي تلت ساعة، وصلوا عند مكان هادي.

ركن العربية، وفتح الباب، وخرج...استناها تخرج، وهي فعلاً فتحت الباب وخرجت ووقفت جنبه، ساكتة.

بصلها وقال

"تعالي نقعد هنا، وقوليلي ايه مضايقك اوي كده"

دخلوا قعدوا جوا، سكتت شويه وهو محبش يضغط عليها، سألها براحتها، بس مستناش اكتر وسألها ووشه مليان قلق 

"فريدة، قوليلي في إيه؟ مالك؟ شكلك مش طبيعي خالص."

نزلت عينيها، كانت بتشد في كمها بتوتر، بتدوّر على أي صيغة تهوّن بيها الكلام، بس لقت نفسها بتنهار من جوه أكتر.

قالت بصوت مهزوز

"مش عارفة أبدأ منين... مش عارفة حتى أقولك إزاي."

قالها بتشجيع 

"متخافيش، قولي اللي جواكي وطلعيه، يمكن ترتاحي."

بصّتله، وفي عنيها نظرة مخلوطة بين الخوف والحزن والكسرة

"الموضوع كبير... وأنا مش عارفه أستوعبه حتى، ومش عايزه أكون غلطانة... بس..."

سكتت، خدت نفس طويل، وكملت بصوت مكسور "بس أنا شفت حاجه… حاجه كسرتني…"

قالها بقلق 

"فريدة ركزي معايا، قوليلي إيه اللي حصل من غير مقدمات"

دمعة نزلت على خدها، بصّت في الأرض وقالت بنبرة مكسورة

"ماما…"

لفت وشها بسرعة وهو بصلها باستغراب

"ماما؟! مالها؟"

"ماما بتخون بابا يا إسلام...."

"ماما بتخون بابا يا إسلام...." 

إسلام فضّل ساكت لحظة بعد كلامها، ملامحه ما بين التوتر والحزن، سكوته خنقها فبصّتله وقالت بصوت متوتر

"إنت مش مصدقني، صح؟"

بصّلها بسرعة، وقال بهدوء 

"مصدقك يا فريدة، مصدقك طبعًا... بس كويس إنك فتحتي الموضوع."

فريدة وشها اتشد، ملامحها اتغيرت، وبصّتله بذهول

"إنت... إنت كنت عارف؟!"

إسلام أخد نفس عميق وقال بهدوء

"فريدة، اهدي... أنا عايز أشرحلك الموضوع من أوله، وأفهمك كل حاجه، بس الأول... قوليلي، إنتي شايفة الموضوع ازاي؟ فهمتي إيه؟"

فريدة صوتها كان بيترعش وهي بتتكلم، حركت راسها ببطء وقالت

"شايفه إيه؟ فهمت إيه؟... أنا شفت بعيني... شفت رسايل مش قادرة أنساها، مقدرتش أكمل اصلا، كنت مصدومة، وقلبي... قلبي كان مقهور، إزاي تعمل كده؟ طب بابا ذنبه إيه؟ ليه؟ دي كانت أكبر قدوة ليا، إزاي مفكّرتش فيا وفيك؟ فينا كلنا؟"

إسلام كان باصصلها بهدوء وقال بصوت فيه حنية

"فريدة... إنتي حكمتي باللي شُفتيه، بالظاهر... بس في حاجات كتير إنتي مش عارفاها، مش كل حاجة بنشوفها بتكون حقيقية، عايزك تهدي وتسمعي، تحاولي تفهمي وتعذريها."

فريدة بصتله بصدمه وقالت بصوت مبحوح

"إنت بتهزر، صح؟ أكيد بتهزر... إنت إزاي أصلاً متقبل حاجة زي دي؟"

إسلام سكت لحظة، وبعدين قال جملة واحدة كانت كفيلة تهز كيانها

"علشان اللي إنتي عرفتيه مش صدمة... الصدمة الحقيقية إن بابا متجوز على ماما... ومخلف كمان."

كأن الزمن اتشق نصين.

الهوا اتسحب من المكان، والصوت كله اتكتم، حتى نبضها وقف لحظة.

مش مستوعبة اللي سمعته... وشها اتجمد، وكأن الروح انسحبت منه.

شفايفها مفتوحة بصمت، بتدور على النفس... على كلمة... على أي حاجة تتقال.

بس مفيش.

كأن قلبها وقع على الأرض واتكسر، اتفتت لقطع

إيديها اترعشت ودموعها نزلت بصمت

قالها بصوت هادي بس حاسس بصدمتها

"فريده... أنا كنت مستني اقولك بس مش قادر،

كان لازم تعرفي، بس مكنتش حابب اوجعك واصدمك، بس غصب عني، كده كده كنتي هتعرفي"

فضلت ساكتة، صوتها مبحوح، وصدمتها لسه ماسكة في ملامحها، مش قادرة ترد

كمل

"عارفه قد إيه ماما استحملت؟

عارفه إن من سنين، وهي عارفه إنه متجوز؟

بس مطلبتش الطلاق علشاننا، علشان البيت، علشان إحنا نفضل سوا."

بص في الأرض، بيحاول يلم أعصابه

"بس أنا مش هسكت، هقولها كفايه لحد كده، لازم تشوف حياتها، لازم تفكر في نفسها شويه، مش هي اللي غلطانه، واللي حصل معاها غصب عنها...

وعلي بنفسه كلمني، وعرفني أنه عايز يتجوزها، وفهمني قد ايه هيا مضغوطه بس مش حابه تبين ده "

فريده أخيرًا نطقت، وبصوت مهزوز قالت وهيا بتحاول تبرر

"بابا...يمكن... يمكن كان لوحده، محتاج حد معاه، ويمكن... هو أصلًا مش مهم اوي بالنسبالي، أنا مش...."

قاطعها بسرعة، بصوت عالي شوية

"لا! ده مش مبرر يا فريده!

هو اللي اختار يبعد، كان ممكن يشتغل هنا، يعيش هنا، جنب ولاده...

بس هو اختار نفسه، اختار حياته الجديدة، وسابنا احنا."

سكت لحظة، وبعدين قال بهدوء

"انتي شوفتيه كام مرة في حياتك؟

كلمك كام مره؟

حسسك يوم إنه سند؟ إنه موجود؟"

الدموع نزلت من عنيها، بسبب حجم الحقيقة اللي ادركتها 

قالها بنبرة فيها حنية

"أنا عاذرك، عارف إنها صدمة كبيرة...

بس كنت حابب تفضلي فاكراه نضيف، كنت خايف تتصدمي فيه بس ده اللي حصل، فريده الحياه مش دايما وردي، ولسه فيها صدمات، مش كل حاجه هتتمنيها هتتحقق، لازم طول ما انتي عايشه تاخدي صدمات وتتعلمي "

دموعها نزلت وقالت بصوت مكسور

"هو لسه في صدمات تانيه؟

أنا في شهر واحد اكتشفت إن عندي ولاد خاله، واخوات، ومرات أب... وجوز أم مستقبلي

لسه في حاجه تاني معرفتهاش؟ عايزه اعرفهم كلهم مره واحده علشان الحق استوعب"

سكتت ثواني ومسحت دموعها بسرعة وبصتله بنظرة موجوعة

"وانت هتتجوز...

وماما هتتجوز بعد ما تتطلق...

وفي ثواني بقينا من عيله صغيرة فيها أب وأم وولد وبنت... لعيله متفرقه وكل واحد في حته."

قرب منها، حط إيده على كتفها بلطف، وقال بصوت هادي

"بس أنا معاكي، وهفضل معاكي يا فريده، مهما حصل..."

هزت راسها برفض، وقالت بنبرة فيها وجع

"بس أنا مش هكون معاك... انت هتتجوز، وهتبقى في بيت تاني، وحياتك مع حد تاني، وأنا... هبقى لوحدي."

قالها بحسم

"مش هسيبك...احنا هنفضل مع بعض، في بيتنا، أنا وانتي وماما، زي ما احنا، بس لازم تفهمي، ماما تعبت كتير، وشالت كتير، وكانت لوحدها، بابا؟ كل اللي بيعمله إنه يبعت فلوس كل أول شهر وخلاص...

بس هو مش معانا، مبيشاركناش أي حاجة،

وهي اللي شايله، بتتوجع وبتسكت، وبتضحك، وكل ده علشاننا."

فضلت ساكته، بتحاول تهضم كل كلمه، وهو كمل

"وانتي عارفه إن الجواز ده مش بإيدها من الأول...

هي مختارتش تتجوزه أصلاً، اتجبرت تعيش معاه، واتجبرت تفضل معاه، بس عمرها ما خلتنا نحس، عمرها ما اشتكت...دلوقتي بس قررت تشوف نفسها، هي تعبانة نفسياً، بس بتخبي علشانا "

فريده كانت ساكتة، عينيها بتلمع بدموع، بس وشها كان باين عليه الإصرار، وصوتها طلع في نبرة وجع وغضب مكبوت 

"معلش يا إسلام...

أنا مقدرش أبلّع اللي بتقوله ده...

تعبت؟ طب ما كلنا تعبنا! وبنتعب

بس ده يديها الحق تعمل كده؟

أنا مش ضد إنها تعيش وتفرح، بس متخونش!

هي عارفة إنه لسه جوزها...

طب مطلبتش الطلاق ليه؟ لو مش هتطلب الطلاق يبقى متخونش، لأنها هتفضل خيانه"

سكتت لحظة، وبصّت بعيد كأنها مش قادرة تبص في عينه

"أنا كنت شايفاها قدوه...

بس دلوقتي؟

مش قادرة أشوفها زي الأول، مش قادرة أصدق إن دي نفس الست اللي ربتنا على الصح، بتعمل الغلط بنفسها 

دلوقتي أنا اللي مش فاهمة؟

لاء... هي اللي غلطانة، ومهما بررت... غلطانة."

إسلام سكت، خد نفس عميق وهو باصصلها، حس إنها مصمّمة على موقفها، وإن أي كلمة منه دلوقتي مش هتوصل لقلبها ولا لعقلها.

قال بهدوء فيه لمحة تعب

"قومي نروح... واضح إنك مش هتقتنعي،

ولا أنا هعرف أشرح أكتر من كده."

مستناش رد، قام بهدوء وخرج، وفريده مشيت وراه من غير ما تنطق، خطواتها تقيلة، وعنيها في الأرض.

ركبوا العربية، وقعدوا في صمت تام، مفيش صوت غير صوت الماتور، وكل واحد فيهم غرقان في أفكاره.

رجعوا البيت، أول ما دخلوا لقوا إيناس قاعدة في الريسيبشن، أول ما شافتهم دخلوا، قامت فورًا وقالت بلهفة

"كنتوا فين؟ برن عليكوا من بدري مش بتردوا ليه؟!"

فريدة مردتش، عدّت جنبها من غير ما تبصلها، وطلعت السلالم بسرعة وهي بتقول بصوت واطي

"تعبانة... طالعة أوضتي."

لكن إسلام وقفها قبل ما تكمل طريقها وقال بنبرة فيها إصرار

"لاء.. إحنا لازم نتكلم دلوقتي... كلنا."

فريدة وقفت وبصّتله، بس قبل ما تعترض قال برجاء 

" لو سمحتي يا فريده، لازم نتكلم" 

أخدت نفس عميق وقالت

"خلاص... ماشي."

رجعت ونزلت، قعدت على الكنبة، وإيناس واقفة مش فاهمة بس قلبها مقبوض.

إسلام بصلهم الاتنين وبدأ يتكلم بهدوء

"أنا عارف كل حاجة...عارف بعلاقتك بعلي، وعارف إنك بتحاولي تخبي علينا... بس إحنا كبرنا كفاية، ومينفعش يبقى في حاجه زي دي من ورانا."

إيناس بصتله بصدمة، جسمها اتشد، وقالت بصوت عالي

"إسلام! انت بتقول إيه؟!"

قال بهدوء وهو بيبصلها

"أنا مش بتهمك، أنا فاهمك كويس، بس عايزك تتكلمي مع فريده"

سكتوا كلهم لحظة، فريدة قاعدة ووشها محايد، بس عينيها كانت بتقول كل حاجة...صدمة، جرح، وعدم تصديق.

إيناس قربت منها، وقعدت جنبها على الكنبة، وقالت بنبرة فيها رجاء

"بصي يا فريدة...

أنا مش عارفة أبدأ منين، بس هقولك الحقيقة...

علي كان بيجي معايا ندوة كل فترة، وكان دايمًا بيسألني في حاجات تخص شغله، وكنا بنتكلم، كل مرة كلامنا يزيد، وكل فتره يكلمني يتطمن عليّا."

سكتت لحظة ومسحت على إيد فريدة اللي متحركتش، وقالت

"أنا كنت لوحدي، أبوك بعيد عني من سنين، بقى مجرد اسم، ولا عمره سأل فيا، ولا حسيت إن في حد شايفني، بس علي اهتم، وفضل يسأل، وحسيت إني موجودة فعلا واني متشافه، حاولت أبعد كتير، بس كنت كل مرة برجعلُه من غير ما أحس..."

بصّت لفريدة والدموع في عنيها

"مكنتش عايزة أخد خطوة غلط... بس ضعفت، وكل مرة كنت أقول خلاص، بس مقدرتش."

فريدة فضلت قاعدة مكانها، باصة قدامها من غير أي تعبير.

إسلام خد نفس طويل، وبص لإيناس بنظرة فيها هدوء وقال

"بصي يا ماما، أنا مش بلومك، ولا هقدر، انتي ستّ ضحيتي كتير، ومن حقك تعيشي وتفرحي."

إيناس كانت باصه له بتوتر وقالت وعينيها مليانه دموع 

" انتوا اهم حاجه في حياتي"

بصت لفريده وكملت 

"أنتوا روحي يا فريدة... أنا عمري ما كنت أقدر أسيبكوا، ولا أفكر أسيبكوا، ده أنتو حياتي كلها."

إسلام قال بهدوء 

"احنا عارفين إن بابا متجوز..."

إيناس اتجمدت، وبصت لهم بنظرة مصدومة

"عرفتوا...؟ عرفتوا منين؟"

إسلام هز راسه وقال

"مش مهم عرفنا منين، المهم انتي كنتي عارفة وساكتة ليه؟"

ردت بنبرة مهزوزة، بس فيها صدق

"علشانكوا… علشان انتوا عندي بالدنيا.

مكنتش عايزة أكبر الحكاية... مكنتش عايزة أحطكوا في موقف إنكوا تبقوا أولاد عيلة منفصلة رسميًا، حتى لو احنا كنا منفصلين فعليًا بقالنا سنين."

سكتت لحظة ومسحت دموعها وكملت

"هو ميعرفش اني عارفة... وأنا بحاول أتعامل معاه عادي زي زمان، رغم إنه بيتحجج دايمًا بالشغل ومبيجيش كتير، بس كنت بقول مش مهم... المهم انتوا."

بصّت لفريدة، صوتها بقى مكسور أكتر

"أنا مش وحشة يا فريدة، غصب عني والله، مكنش في راجل يفهمني ولا يحس بيا، كنت دايمًا شايلة همّي لوحدي، وأول ما حسيت إن حد بيسأل، بيتطمن، مهتم بيا... اتشديت... غصب عني، بعدت مره واتنين، بس هو كان دايمًا بيرجعلي، وكنت بضعف."

مسكت إيد فريدة وهي بتعيط 

"أنا مقدرتش أفكر في نفسي أبدًا، بس لقيت نفسي فجأة مخنوقة، وبتخنق أكتر كل يوم،

وفجأة... لقيت نفسي بعمل حاجة عمري ما تخيلت أعملها."

وشها كان باين عليه الانهيار وهي بتبص لفريدة نظرة كلها رجاء ووجع.

فريدة قالت وهي باين عليها الزعل

"بس انتي دايمًا كنتي معايا... وبعدتي.

أنا بقيت مشغولة اه، بس كل ما أجي أقولك ارجعي زي زمان... مش بتوافقي."

إيناس ردت بنبرة فيها وجع

"مش بإيدي... كنت حاسه ان الدنيا ضلمت مرة واحدة

أوعدك، أوعدك يا فريدة، مش هكلمه تاني...

مش مهم انا، المهم انتي عندي."

إسلام قال

"بس يا ماما انتي من حقك تعيشي زي ما هو عايش،

اتطلقي، وخليكي مع اللي يقدرك، وملكيش دعوه بينا."

إيناس ردت بحسم

"لاء يا حبيبي، انتوا أهم، مش هتطلق علشانكوا... علشان لما تتقدم لعروستك ميقولوش إن أمك وأبوك متطلقين."

قرب منها وقال بنبرة حنونة وواثقة

"ميهمنيش حد، اللي يهمني سعادتك وراحتك.

و على فكرة، هو كلمني، كلمني وقالي إنه عايز يتقدملك، عارف إنك متعرفيش، بس أنا بنفسي هطلقك من بابا وهجوزك، كفاية لحد كده"

قالت وهي عينيها مليانة دموع

"لاء يا إسلام، مقدرش أسيبكوا."

قالها وهو بيبتسم بحنان

"ومين قالك إنك هتسيبينا؟

إحنا هنفضل زي ما إحنا."

بص لفريدة وسألها

"ولا إيه يا فريدة؟"

فريدة وقفت وقالت بهدوء

"عن إذنكوا"

مشيت من قدامهم وطلعت اوضتها بسرعه

إسلام بص لأمه وقال بهدوء

"هي لسه مش مستوعبة، بس هتستوعب... اديلها وقتها."

إيناس هزت راسها وقالت

"أنا مش هقدر أعمل حاجة تزعلكوا يا إسلام... أنا مليش غيركوا."

قالها بحنية وهو ماسك إيدها

"ومش هتفضلي طول عمرك عايشة كده...من حقك تعيشي حياتك.

هييجي يوم ونتجوز، وقتها انتي هتكوني لوحدك يعني ؟ وبعدين هو شخص محترم... يبقى ليه لاء؟"

سكتت لحظة وقالت وهي بتقوم

"هطلع لفريدة أتكلم معاها... ومتفتحش الموضوع ده تاني يا إسلام."

عند تيم 

كان قاعد على طرف السرير، سرحان وبيفكر

الباب اتفتح بهدوء، ودخلت صابرين، بصتله شوية وسألته بقلق

"لسه صاحي؟ الوقت اتأخر يا تيم، مش عوايدك تسهر لدلوقتي"

بصلها بسرعة وقال بتوتر

"مفيش...كنت بس بفكر شوية في الشغل... انتي عارفه اني منزلتش بقالي اسبوع"

قربت منه شوية، وقعدت على الكرسي اللي جنب السرير وقالت بهدوء وهي مركزه في ملامحه

"تيم... أنا أمك، وفاهماك كويس، أنت مش بتفكر في الشغل، في حاجة مضايقاك، مش كده؟"

سكت لحظة، وبعدها قال 

"أنا كويس يا ماما بجد، متقلقيش."

صابرين فضلت ساكتة لحظة وهي بتراقبه بس محبتش تضغط عليه، قالت أخيرًا وهي بتقوم

"لو احتجت تتكلم، أنا هنا يا تيم، تصبح على خير."

قبل ما تخرج من الاوضه، صوته جه فجأة من وراها، هادي لكن فيه تردد

"ماما؟"

لفّت ناحيته، حاجبها مرفوع، ونظرتها فيها قلق ناعم

"نعم يا حبيبي؟"

سكت لحظة، عينيه مكانتش فيها الجرأة المعتادة، وبص بعيد عنها شوية، وبصوت خافت سأل

"لو في يوم... حبيت واحدة... هتسمحيلي؟"

" لو في يوم... حبيت واحده... هتسمحيلي؟"

صابرين وقفت مكانها، بصتله بتركيز، لكن ملامحها كانت مشوشة بلحظة صمت طويلة، كأن السؤال خبط في قلبها.

مقالتش حاجة، بص ناحيتها بسرعة، كأنه خاف من سكوتها، وكمل وهو بيحاول يرميها بنبرة عادية

"يعني، مجرد سؤال... مش أكتر."

سابت الباب، ومشيت خطوات بسيطة ناحيته، وقالت وهي بتقرب، نبرة صوتها ما بين الحنية والوجع

"وأنت هتسمح لنفسك الأول يا تيم؟"

سابت السؤال يترن في ودنه وخرجت من الأوضة.

إيناس طلعت بهدوء على أوضة فريدة، خبطت خبطتين خفاف، وفتحت الباب، دخلت لقتها قاعدة على السرير، ضامة رجليها ليها، وباصّة في الأرض، ملامحها مقفولة.

إيناس قربت وقعدت جنبها، وقالت بلطف

"أنا عارفة إنك مش مرتاحة، وعارفة إنك زعلانة، بس حبيت أقولك إني بحبك، إنتي وإسلام أهم حاجة في حياتي."

فريدة بصتلها من غير كلام، وعينيها فيها عتاب، قالت بصوت واطي بس واضح فيه الغيرة والحزن

"مش عايزة حد يشاركني فيكي، مش عايزة حد يقاسمك معايا، أنا بحبك أكتر من أي حد، أكتر من بابا كمان، ومش عايزاكي تتجوزي، مش عايزاكي تسيبيني، وكمان مش عايزاكي تعملي حاجه غلط"

إيناس سكتت، قلبها بيتشد، بس كانت بتحاول تثبت، مش باين عليها، بس من جواها وجع كبير، عينها غصب عنها نزلت منها دمعة وهي بتحاول تخبيها.

فريده كملت

"أنا مش عايزة غيرك... أنا حتى مش عايزة أتجوز، أنا عايزاكي معايا على طول، زي زمان، زي ما كنتي ليا أنا بس."

إيناس خدت نفس عميق، وبصتلها، وقالت بصوت فيه غصة

"أنا عمري ما كنت هسيبك... ولا هخلي حد يشاركك فيا، متخافيش، أنا مش هتجوز حد، ومش هكلمه تاني، ولا حتى هروح النادي تاني لو ده هيريحك."

فريدة رفعت وشها بسرعة وقالت

"بجد؟"

ردت إيناس بابتسامة صغيرة فيها وجع

"طبعًا... معنديش أغلى منك إنتي وإسلام."

فريدة قربت منها وحضنتها، حضن طويل وهيا فرحانه، هيا عايزه مامتها ليها هيا وبس 

تاني يوم الصبح، كانت فريدة في أوضتها، بتجهز شنطتها وبتظبط شكلها في المراية، وشها متغير، شكله هادي بس مش مرتاح.

خرجت من أوضتها وراحت ناحية الباب، لقِت إسلام واقف في وشّها، وملامحه باينه فيها عتاب مكتوم.

قال بنبرة حادة وهو بيبصلها

"يعني انتي ناوية تمشي كده عادي؟"

فريدة ردت ببرود وهي بتحاول تمشي

"رايحة شغلي، في حاجه؟"

وقف قدامها ومنعها تمشي

"في حاجه؟ آه في... أنانيتك دي مش طبيعية يا فريدة."

وقفت مكانها، رفعت حاجبها باستغراب

"أنا أنانية؟ عشان عايزة أمي تبقى معايا؟ عشان بمنعها من الغلط"

رد بعصبية

"لاء، علشان شايفة نفسك بس! شايفة إن وجود مامتك جنبك أهم من إنها تعيش، تحب، تتحب! هي تستاهل فرصة، تستاهل تبقى مرتاحة! وبعدين انتي اصلا عندك شغل، واخد كل وقتك، وكذلك انا مشغول، فايه المانع تشوف حياتها، تعيش حياتها وتصلح غلطها"

قالت ببرود أكتر

"هي مرتاحة معانا، وأنا مش هقبل النوع ده من الشغل تاني، كده كده كلها يومين وهسيب يونس، وهرجع لشغلي في المستشفى، وهقضي وقت أكتر معاها."

هز راسه وقال

"يعني هتفضلي أنانية، حرمتِ أمك من حب حقيقي، وافتكري كلمتي، في يوم هتقعي في الحب وهتتحرمي منه بنفس الطريقة."

ضحكت بسخرية وهي بتلف وشها الناحية التانية

"أنا؟ أحب؟ وأتجوز؟ مستحيل، أنا مش محتاجة الكلام ده، كفاية عليا أمي، ولو حتي حصل فأنا مش متجوزه"

بصلها بصدمة وسكت لحظة، وقال بنبرة أهدى

"انتي مش شايفة غير نفسك، بس الزمن هيخليكي تشوفي..."

فريده ضحكت وقالت بسخريه

" لسه الزمن هيخليني اشوف؟ اسلام انت بتقول ايه ولا بتبرر ايه؟ ماما غلطت وهتفضل غلطانه ولما تقولي اني انانيه أو تحاول تفهمني اني غلطانه مش هقتنع، انا كبيره كفايه وعارفه الصح من الغلط، ولك أن تتخيل مين اللي علمني الصح من الغلط، ماما اللي علمتني، اه وقعت في الغلط بس دورنا نبدل الأدوار ونفهمها انها غلط، مش نشجعها تكمل فيه" 

قال بصوت عالي 

" وطبيعي تغلط، بس غلطها سهل يتصلح، وناتج عن وحده، أو ضعف أو أيا كان، وبعدين الكل بيغلط، وهيا ده غلطها، لو كل واحد اترفع عنه الستر محدش هيبص في وش التاني، لو ده غلطها الوحيد يبقى انا قابله عادي، طالما هيتصلح، ولعلمك هخليها تتطلق، حتى لو متجوزتش، كفايه لحد كده"

فريدة سابته ومشيت، وإن كانت الكلمات فضلِت بتزنّ في دماغها... بس مكابرتها كانت أقوى من أي صوت تاني جواها.

بعد يومين...

فريده وصلت بيت يونس، دخلت الريسيبشن، لقت صابرين قاعدة بتتفرج على التلفزيون ويونس قاعد جنبها، رجله ممدودة شوية، بس واضح إنه بيتحسن، وبيتحرك براحة.

أول ما شافها، ابتسم وقال

"ديدا، ممرضتي الجميله اللي بحبها"

ضحكت فريدة وقالت وهي بتقعد قدامه

"أنا ضيفه النهاردة... مش ممرضة، جاية أودّعك."

يونس هز دماغه وقال بنبرة فيها حزن خفيف

"ما توقعتش اليوم ده ييجي بسرعة كده... كنت فاكر هتفضلي لحد ما أجري ماراثون."

ضحكت صابرين وقالت

"وداع ايه بس يا فريده، البيت بيتك تيجي في اي وقت، مفيش وداع"

فريدة ابتسمت وقالت

" وداع كممرضه، مش هنشوف بعض زي الأول"

يونس قال بسرعة

" يعني نرجع تاني للفيتامينات والمسكنات والتمارين؟"

ضحكت وقالت

"لا لا، كفاية عليك كده، اكيد هشوفك برضو، بس بعيدا عن التعب وكده"

ضحكت صابرين، وقالت

"طب خدو صورة سوا بالمرة."

فريدة قالت 

" فكره حلوه والله" 

يونس طلع فونه وهيا قربت منه، خدوا صوره سيلفي لذيذه قبل ما تمشي.

خرجت للجنينة، الجو كان هادي، وتيم واقف بعيد، ضهره ليها، باصص على الزرع وسرحان.

قربت بخطوات هادية، وقالت وهي واقفة وراه

"أنا خلاص همشي..."

لف ناحيتها بهدوء، ملامحه جامدة وقال

"عارف."

سكتت لحظة وقالت

"يعني مبقاش في داعي تتضايق من وجودي... مش هتشوفني تاني."

حس بغُصة حاول يخفيها وهو بيقول

"ربنا يوفقك."

ابتسمت بسمة باهتة وقالت

"مش هتحتفل إنك هتتخلص مني؟ يعني كنت مش متقبل وجودي من الأساس."

قال بنبرة واضحة

"أه، مكنتش قابله... ومازلت، بس ده ميخلنيش أكرهلك التوفيق."

بصتله لحظة وقالت

"ممكن اتوقع منك أي حاجه فعلاً."

سكت شويه وبعدين قال 

" عموما شكرا" 

قالت باستغراب 

" على ايه ؟!" 

قالها 

" على اهتمامك بيا لما كنت تعبان، اول مره حد يهتم بيا ويخاف عليا غير ماما" 

بصتله شويه وبعدين قالت ببرود مزيف

" انا بقوم بشغلي وبس، انا مجرد ممرضه" 

بصلها بصدمه شويه، يمكن متوقعش ردها بس هيا بسرعه قالت بابتسامة خفيفه

" بهزر، حاولت اتعامل معاك بطريقتك، عموما بعض الديون لا ترد" 

مردش، بس نظرته كانت فيها حاجة مختلفة، كأنه نفسه يقول حاجه، بس ساكت.

قالت بهدوء

"خلي بالك على نفسك."

هز راسه من غير ما يقول حاجة، وبص بعيد تاني كأنه بيهرب.

فريدة وقفت ثواني، كأنها مش عايزة تمشي فعلًا... كأن في حاجة رابطاها....

وبخطوات هادية، بدأت تمشي بعيد، وهو فضل واقف في مكانه، عينيه بتلاحقها من بعيد

قبل ما تخرج من البوابه، قابلت حسام داخل في وشها، قبل ما تكمل طريقها قال 

"استني لحظه... أنتي فريدة صح؟"

بصّتله بدهشة وقالت

"أيوه... حضرتك تعرفني؟"

مد إيده وقال بابتسامة لذيذة

"أنا حسام، صاحب تيم، شوفتك كذا مره بس معرفناش بعض، الحقيقة أنا كنت عايز أقولك من زمان إن شكلك... يعني... جذاب جدًا."

ضحكت بخجل وقالت

"شكرًا، ده من زوقك حضرتك."

قال بمزاح

"سيبيكِ من حضرتك دي..."

قالت وهي بتضحك

"طب يا حسام... اتشرفت بمعرفتك"

كانت هتمشي بس وقفها بسرعة

" ثواني مستعجله ليه؟!" 

قالت 

" اتفضل عايز تقول ايه؟!" 

رد بسرعه

"بصراحة... أنا عندي شركة، وكنا بندوّر على حد بالشخصية دي واللباقة دي، فـلو تسمحي، تحبي أبعَتلك التفاصيل ؟"

قالتله بهدوء

"أنا آسفة، مش هقدر أقبل حاجة دلوقتي... عندي ظروف خاصة."

قال وهو بيهز دماغه

"طبعًا، مقدّر ده جدًا... بس فكري، العرض قائم الي ما لا نهايه، مش هضغط عليكي "

قالت بابتسامه

" موعدكش، بس حاضر"

ابتسم وقال

"تمام يا فريده، فرصه سعيده"

قالت بود

" انا اسعد، عن اذنك"

ومشيت، وهو واقف بيبصلها وهي بتبعد.

دخل لتيم اللي كان واقف من بعيد، شايف كل حاجة، ملامحه متغيرة، ضيقه واضح في وشه، وبيشد في طرف التيشيرت من العصبية.

حسام دخل عليه وقال وهو بيضحك

"إيه يا عم، عامل ايه؟"

تيم مردش، باصصله بس.

حسام قال وهو بيضحك

" شوفت فريده دلوقتي، أنا عرفتها بيا يعني، بصراحه... البنت دي عاجباني جدًا، مش عارف ليه بس مش راضيه تخرج من دماغي من ساعة ما شوفتها... بسبوسه"

تيم شد نَفَسه، عينيه فيها نار، بس كاتم كل حاجه جواه

بعد ما فريدة خرجت من بيت تيم، راحت تقابل سالي زي ما كانوا متفقين.

سلموا على بعض، وقعدوا في كافيه هادي، على ترابيزة في الركن.

فريدة ابتسمت وقالت وهي بتشرب عصيرها

"أنا مشوفتش أعند منك والله."

سالي ردت وهي رافعة حواجبها بشوية حِدّة لذيذة

"مش عند، بس أنا مش هرتاح غير لما أفهم، أنا فرد من العيلة، ولازم أفهم اللي بيحصل حواليا، خصوصا لو كنت فضوليه"

فريدة أخدت نفس وقالت

"بس دي حريتها الشخصية، يعني انتي ليكي حياتك، وهي ليها حياتها، مجبرتش حد يعمل حاجه مش عايزها، وبعدين أنا متأكدة إن مامتك عمرها ما هتوافق إن أي واحدة تدخل البيت غير اللي هي تسمح بيها، لأنها غالبا شايفاهم ممكن يهددوا استقرار البيت"

سالي استغربت، قطبت حواجبها وقالت

"ليه يعني؟ ليه أي بنت ممكن تأثر على استقرار البيت؟ يعني أنا لو جبت شغالة في البيت، أو حتى ميس لياسين، هتأثر على الاستقرار؟ ده اللي هو ازاي يعني؟"

فريدة قالت بهدوء وهي بتفكر بصوت عالي

"من وجهة نظرها... أيوه، بصي، أنا مش بفهم أوي في الحاجات دي، بس أنا وصفت لصاحبتي اللي هي دكتورة نفسية حالة مامتك وتيم بالظبط، من غير ما أقول أسامي ولا أوضح أوي، وهي قدرت تفهم وتوصفلي حالتهم"

سالي قربت بفضول وسألت

" طب قولي قالت ايه؟!" 

فريدة بصّت قدامها كأنها بتفتكر كلام صاحبتها وقالت بهدوء

"بصي، صاحبتي قالتلي إن مامتك غالبًا عندها PTSD، حاجة شبه اضطراب ما بعد الصدمة بس مش بالطريقة اللي بنشوفها في الأفلام... يعني هي عندها خوف مفرط من أي عنصر خارجي ممكن يهدد استقرار بيتها أو حياتها، وده ناتج من تجربة قديمة أو ضغط نفسي كبير، غالبًا بسبب اللي حصل بينها وبين أهلها زمان أو حاجه حصلت في حياتها بعدها خلاها كده، خصوصا انها مش ضعيفه"

سالي كانت مركزة جدًا، ففريدة كملت

"وقالتلي كمان إن الناس اللي بيمروا بتجارب فقد أو تخلّي أو عيشة فيها قمع، ساعات بيبنوا حوالين نفسهم جدران... بيبقوا عندهم وساوس حامية، يعني دايمًا متوقعين الأسوأ، فبيرفضوا أي حاجة جديدة أو مختلفة، وليه البنات؟... لإن البنات بالنسبالها خطر مش لأنهم بنات، لكن عشان ممكن يغيّروا شكل البيت أو يأثروا على ولادها اللي هما مركز حياتها، أو لأن في حاجه حصلت قديمه عقلها هيئ لها أنهم السبب"

سالي سألت

"طب وتيم؟"

فريدة قالت بتنهيدة

"تيم حالة تانية خالص... هي قالتلي إن اللي أنا وصفته عنه يشبه نوع من أنواع الرهاب الاجتماعي المرتبط بالتجارب المؤلمة من الجنس الآخر، غالبًا تيم مرّ بحاجة خلت علاقته بأي بنت تكون مربوطة بالتوتر، وده بيخليه يبان عدواني أو بارد... بس الحقيقة إن دي طريقة دفاع، صاحبتي قالتلي إنه محتاج مساحة آمنة عشان يقدر يثق، بس هو مش بيدي فرصة لحد، وعشان كده مش بيخف."

سالي فضلت ساكتة شوية، ملامحها بقت أهدى، كأن الصورة بدأت توضح.

فريده أخدت نفس خفيف وكملت كلامها وهي بتحاول توضح أكتر

"أنا لما وصفت حالة تيم، وصفتها بالظبط، يعني ردود فعله، طريقته مع الناس، تصرفاته اللي مش مفهومة ساعات... هي قالتلي إن ده غالبًا نتيجة صدمة نفسية قوية، وخصوصًا لو الصدمة دي مرتبطة بحد قريب منه جدًا... وده تقريبا حصل معاه، بس اكيد انا معرفش اي حصل بالظبط."

سالي كانت مركزة معاها، وقالت باستغراب

"بس هو بيبان جامد من بره، وبيزعق وبيتحكم وبيطرد أي بنت، يعني شكله مش ضعيف خالص."

فريده ابتسمت ابتسامة باهتة وقالت

"ده المظهر بس، لكن الحقيقة إن شخصيته مهزوزة جدًا من جوه، هو مش واثق في حد، ومش واثق في نفسه كمان."

سالي اتشدت أكتر وقالت

"طب ليه؟ يعني ايه وصله لكده؟!"

فريده بصت لها نظرة فيها ثقل وقالت بصوت واطي

" يمكن مثلا ارتباطه بمامته، بيعملها حساب وحاطط لنفسه قيود، مش علشان هو مش عايز، علشان هو مجبر، هو قدم حياته لمامته وبس، مش عايش حياته زي ما هو عايز، وبعدين ربنا وحده يعلم هو يعرف ايه عن البنات، أو ايه الصوره اللي مامته وصلتهاله في يوم من الايام"

سالي اتنهدت وقالت

"طب ده يخوف... بس هو مش المفروض يتعالج؟"

فريده هزت راسها وقالت

"هو مش شايف إنه مريض... هو شايف إن تصرفاته طبيعية، هو بيحاول يسيطر على أي حاجة حواليه علشان مفيش حاجة تخرج عن إيده... ولما أي بنت تدخل البيت، بيحس إن في حد هيخربله نظامه، أو هتشكل تهديد، وده ناتج عنه احتمالين، يا اما بيخاف منهم أو بيخاف عليهم"

سالي قالت

"يعني دي حاجه نفسيه معقده؟"

فريده ردت

"جداً، والدكتورة قالتلي إنه غالبًا مصاب بحاجة شبه اضطراب ما بعد الصدمة، بس متطور معاه على شكل اضطراب في الشخصية، زي اضطراب الشخصية المرتابة أو الحدية، لأنه بيبالغ احيانا في ردود فعله."

سالي كانت مذهولة وقالت

"معقول كل ده جواه؟! "

فريده كملت

"وبصراحة... تيم مش بارد، هو مفيهوش برود بجد، هو مكبوت... يعني مش بيعرف يعبّر عن اللي جواه، يمكن عشان عمره ما اتعلّم إنه يعبّر، أو يمكن محدّش شافه وهو بيقع فساعده، في حاجة في عينيه دايمًا بتقول إنه بيكتم حاجات، كتير، بس عمره ما بيطلّع ده على هيئة ضعف... بيطلّعه على هيئة تحكم، أو جفاء، أو عصبية زيادة."

سالي حركت شعرها بعصبية وقالت

"طب وانا أعمل ايه يعني؟ أنا عايزة أعرف، نفسي أفهم، مش هرتاح غير لما أفهم أوي... مش طبيعي اللي بيحصل في البيت، ومش طبيعي تصرفاتهم، وأنا بجد تعبت من كتر ما بفكر."

فريدة بصّتلها بهدوء وقالت

"بصي... لو بجد عايزة تعرفي، يبقى لازم تقربي من تيم... تقربي من غير ما تبيني إنك بتحاولي تعرفي حاجة، يعني تحسسيه إنك جنبه، وتحاولي تجسي نبضه، يمكن وقتها يفتحلك قلبه، أو يلمّح بحاجة، أو حتى يسيبلك طرف خيط."

سالي قالت بتنهيدة

"تيم؟! ده مبيبصش في وش حد أصلاً، بيكلم الناس كأنهم موظفين عنده، حتى أنا! ابن أمه في كل حاجه."

فريدة قالت بابتسامة باهتة

"ما هو ده تيم... كل حاجه فيه مقفولة، بس انتي قلتي إن مامتك مش بتخبي عنه حاجة، صح؟ سرها معاه، وبيشاركها في حاجات حتى انتي مش عارفاها... يعني بنسبة كبيرة هو عارف كل حاجه، أو على الأقل شايف أكتر مننا بكتير."

سالي سألتها بقلق

"ده شايف وموافق كمان "

فريدة هزّت راسها

"معتقدش، بس هو متربي على كده، متربي على السكات، على السيطرة، على إن مش كل حاجه تتقال... بس في حاجه حصلت له أكيد، حاجه خلته يبقى بالشكل ده، شخصيته مش طبيعية، فيها عقدة خوف، فيها كبت... تيم أصلاً لازم يتعالج، أنا متأكدة إنه لو راح لدكتور نفسي محترم هيفهم نفسه، ويفك اللي جواه شويه."

سالي سكتت، وفضلت تبص لفريدة بتفكير، واضح إنها بتفكر في الكلام ده لأول مرة بجدية

فريدة كملت وهي بتبص لها بتركيز

"لو عرفتي توصلي لنقطة ضعف تيم، انتي هتوصلي للي انتي عايزاه... تيم المفتاح يا سالي."

سالي قالت بنبرة فيها رجاء واضح

"يبقى انتي يا فريدة اللي لازم تقربي منه... لازم تكوني معاه" 

" يبقي انتي يا فريده اللي لازم تقربي منه... تكوني معاه... مش أنا... انتي فاهماه أكتر، وعرفتي شخصيته بالتحديد، وأنا حاولت كتير جدًا وفشلت، لكن انتي... لو حاولتي، هتقدري توصلي لأي حاجة."

فريدة بصتلها باستغراب وقالت بنبرة هادية

"بس أنا خلاص خلصت شغلي... يعني لو شُفته مش هيكون زي الأول، مجرد زيارات كده كل فترة، وبعدين انتي ناسية؟ هو أصلاً دايمًا كان بيتهرب مني، مش عايزني في البيت... أكيد أنا الشخص الغلط."

سالي هزت راسها بسرعة وقالت بإصرار

"بالعكس! انتي أكتر شخص صح يا فريدة، يمكن هو بيتهرب علشان خايف، أو يمكن علشان شايف فيكي حاجه بيحاول يهرب منها... بس اللي أنا متأكدة منه، إنك أكتر واحدة ممكن توصليله، ومتقلقيش، أنا هتصرف، وهخليكي تقربي منه، بس علشان خاطري يا فريدة، خليكي معايا للآخر، أنا مش هرتاح غير لما أفهم السبب."

فريدة خدت نفس وقالت بنبرة فيها تفهم

"تمام، بس دلوقتي ارجعي البيت... واسمعي كلام مامتك، بلاش تعاندي أكتر، خلي الدنيا تهدى شوية."

"هرجع... ومؤقتًا هحاول أسمع الكلام."

يوم جديد

قاعدة هادية جمعت صابرين بإيناس، لكن صابرين بسرعة لاحظت إن في حاجة مش مظبوطة، إيناس مش على بعضها، بتسرح وتضطرب، وتتنهد كل شوية.

صابرين قالت بقلق 

"إيناس، في إيه؟ مالك؟"

إيناس اتوترت، وبصت في الأرض، وقالت وهي بتلف في الكلام

"مش عارفة... مش متأكدة لو المفروض أقولك ولا لاء..."

صابرين قربت منها، مسكت إيدها وقالت بحزم ودفا

"يا بنتي قولي، إحنا خوات، وسرك في بير زي ما بيقولوا، متخبيش عني."

سكتت إيناس لحظة، وبعدين بدأت تحكي، الكلام طلع من قلبها كأنه انفجار مشاعر مكبوتة، حكت عن جوزها، وإنه اتجوز عليها من وراها، وحكت كمان عن "علي"، زميلها، اللي بدأت تتعلق بيه، ورد فعل اسلام وفريده 

صابرين شهقت

"إيييييييييييه؟! اتجوز عليكي؟! وانتي ازاي سكتيله؟! ازاي سمحتي لواحدة تفرق ما بينكوا كده؟!"

إيناس بحزن

"والله ما كنت أعرف، هو خبى عليا، وانا عرفت بالصدفة، مكانش بإيدي أعمل حاجة..."

صابرين زادت عصبيتها وهي مصدومة أكتر

"يعني مش بس سكتيله، لا، ده فوق كل ده كمان روحتي تتعرفي على راجل تاني؟! بدل ما تحاولي ترجعي جوزك؟!"

إيناس بسرعة حاولت توضح، دموعها في عينيها

"كان زميلي في النادي، وهو اللي بدأ الأول، أنا عارفة إني غلطت، بس غصب عني، لقيت اهتمام، أنا عمري ما سمعت كلمة حلوة، عمري! ولما لقيت حد يسمعني ويهتم، حبيته... بس بعدت، والله بعدت، حاولت كتير أقاوم، بس قوليلي أعمل إيه؟"

صابرين هزت راسها، مش مصدقة اللي بتسمعه، وقالت بانفعال

"تعملي إيه؟! كنتي تقدري تعملي كتير جدا، كنتي تهزأي جوزك ده، ده خاين! اتجوز عليكي من ورا ضهرك! كنتي لازم توقفيه عند حده، ترجعيه بالعقل، بالذوق أو بالعافيه، أو لو انتي مش عايزاه، كنتي تتطلقي وتشوفي حياتك... وتخليه هو اللي يندم!

لكن عايشالي دور المنكسره! انتي بتستهبلي؟! وكمان سمحتي لراجل يدخل حياتك وانتي لسه على ذمة راجل؟

لو ليكي حق فانتي ضيعتيه بغبائك، فريدة معاها حق في كل اللي قالته، بس إسلام... مش عارفه اقولك عليه ايه بصراحه بأفكاره دي... مش قادرة أفهمك، ولا أفهم انتي إزاي عايشة كده أصلاً..."

إيناس نزلت راسها، مش قادرة تبص في عنيها.

صابرين كملت، وهي بتحاول تمسك أعصابها

"كنتي تقدر تعملي كتير يا إيناس... بدل ما تسيبي نفسك للضعف كده، يوم ما عرفتي إنه اتجوز عليكي، كنتي قادرة توقفي وتواجهي، كنتي تقدري ترفعي عليه قضية طلاق للضرر... تقدري تخلي أهله يقفوا معاكي... تقدري تشتغلي وتنجحي، بس بقلب صاحي، مش بقلب تايه... بس لاء، روحتي لزميلك، فتحتيله قلبك، وادي النتيجة."

إيناس بصوت مخنوق

"مكنتش اقدر أعمل حاجة يا صابرين، كنت لوحدي، كنت وحيده، مكانش حد معايا، قررت اعيش عشان اسلام وفريده وبس، لحد ما علي دخل حياتي" 

صابرين قربت منها، مسكت إيديها وقالت بهدوء

"الوحدة فعلاً صعبة، بس مش مبرر... الوحدة بتخلينا نضعف، لكن ما تبررش إننا نغلط"

كملت باصرار

"كنتي تقدري ترفعي نفسك، تكسريه بنجاحك، بحب ولادك ليكي، باحترامك لنفسك، كنت ماشيه كويس في الاول، بس في الاول وفي الاخر سمحتي لحد يدخل قلبك وانتي لسه على ذمة راجل... حتى لو بينكم جفاف، كنتي ترجعيه ليكي ولولادك مش تستسلمي وتديه لواحده غيرك"

ربتت على ايديها وقالت 

"قومي، اقفلي الصفحة دي، واعملي الصح... مش علشان هو يستاهل، لاء... علشان انتي تستاهلي تكوني أحسن."

عند فريده

دخلت المستشفى بهدوء، لبسها بسيط، شعرها مربوط بسرعة، البادج اللي عليه اسمها 

وصلت عند كاونتر التمريض في قسم الطوارئ، ولسه متكلمتش، صاحبتها داليا لمحتها وابتسمت

" فريده؟!"

فريدة ابتسمت وقالت

" دودو، وحشتيني وحشتيني"

داليا فتحت دراعها بحماس وحضنتها جامد"

"أخيرًا رجعتي! كنت فاكرة إنك هتطولي أكتر من كده."

فريدة ضحكت وهي بتفك الحضن

"أنا كمان افتكرت كده... وحشتوني كلكوا."

داليا قالت بفرحه 

" تعالي يلا، لسه الباقيين مجوش، انا هنا من بالليل انا ومروه"

فريده دخلت معاها وكانت مروه جوه، رحبت بيها بحراره، مروه قالت بهزار 

" حد يرجع للمرمطه دي تاني ، كان عندك شغل مريح ومرتب زي الفل."

ضحكت فريدة وقالت

"يعني فكرتكوا دي مبالغ فيها شوية، بس فعلاً كان هادي... مفيش دوشة، ولا عياط أهالي، ولا مريض بيشخط."

داليا قالت وهي بتهزر

"يعني تقصدي إننا هنا بنتهزّأ؟ لاء يا أختي، إحنا هنا بنتمرن على الصبر."

فريده قالت 

" احنا بنتمرن لما يجيلنا الضغط نتعامل ازاي "

وقبل ما يكملوا كلام، دخلت واحده وقالت وهيا بتبص ناحيتهم

"اللي فاضية فيكم تدخل تشوف الحالة اللي في سرير 4... محتاجين متابعة ضغط وسكر حالًا."

فريدة قامت من مكانها وقالت "أنا رايحة... بما انكوا هنا من امبارح"

بالليل، كانت فريدة قاعدة في أوضتها، النور خافت، والهدوء مالي المكان.

رغم تعب الشغل، كانت لسه صاحيه عقلها بيلف، مش قادرة تهرب من فكرة واحدة بتزنّ في دماغها

هل مامتها فعلاً قطعت علاقتها بعلي؟

ولا كانت مجرد كلام وخلاص؟

مدت إيدها وسحبت اللابتوب من على الكومود، فتحته ببطء، وحركت الماوس بإيد شبه مترددة وقلبها بيدق 

قعدت تدور وتتأكد لو لسه في كلام بينهم ولا لاء بس كل حاجه بتأكدلها أن فعلا مامتها عملت بلوك

قعدت لحظة تبص في الشاشة، وبعدين اتنهدت بارتياح

قفلت اللابتوب وهي بتقول لنفسها بصوت واطي

"كويس... كده أنا اتطمنت"

وقبل ما ترجع اللابتوب مكانه، موبايلها رن وكانت سالي

فريدة ردت بنبرة عادية

"ألو؟"

سالي قالت بضحكة خفيفة

"عاملة إيه ؟ حسيت انك زهقانه قولت اكلمك"

فريدة اتنهدت وقالت

"وهو في غير كده؟ يوم طويل شوية بس ماشي... انتي عاملة إيه؟"

سالي ردت

"أنا تمام، بس حبيت أطمن عليكي..."

فريده قالت 

" بس كده؟!" 

سالي ضحكت وقالت 

" انا تحت يا فريده "

فريدة استغربت وقالت بسرعة

"تحت؟! قصدك في البيت؟!"

سالي ردت بنبرة عفوية

"أيوه، أنا وماما... وتيم كمان معانا."

سكتت فريدة لحظة، قلبها دق بسرعه، واتشدت ملامحها من المفاجأة

"تيم؟!"

قالت الكلمة كأنها مش مستوعبة، وبصّت لنفسها بسرعة، لبسها كان بيتي بزيادة، وشعرها مفكوك ومبهدل، قامت من على السرير في لحظة، وهي بتتكلم بسرعة

"طيب... انا هنزل اهو"

فريدة قفلت المكالمه، وبعدين فتحت الدولاب بسرعة، بدأت تختار حاجة بسيطة ولفت شعرها بسرعه 

فريدة نزلت من فوق، ملامحها فيها توتر خفيف متعرفش سببه، دخلت الريسيبشن، لقت صابرين قاعده جنب إيناس وسالي على الكنبه اللي قدامهم، وتيم قاعد جنبها، باين عليه الملل

فريدة قالت بصوت واطي نسبيا

" مساء الخير"

صابرين ابتسمت وقالت

" صباح النور يا حبيبتي"

فريدة قربت، سلّمت عليهم، وقعدت جنب مامتها.

عينها راحت بسرعة لتيم اللي رفع عينه بصّلها ثواني، وبعدين رجع يبص في فونه كأنه مشافهاش.

فريدة بصّت لسالي، وشاورتلها بإيدها من غير ما حد ياخد باله، بنظرة مستغربة اللي هو 

" ماله ده وجه ازاي اصلا؟!"

سالي هزت أكتافها 

فريدة بلعت ريقها، ورجعت تبص قدامها...

قامت فجأة وهي بتقول

"أنا هدخل أعمل حاجة تتشرب، عايزين ايه؟"

سالي قالت

"أنا عايزة نسكافيه... وماما بتحب الشاي بالنعناع، وتيم أكيد قهوه سادة، صح؟"

تيم قال من غير ما يبص

" مش عايز "

فريدة قالت بابتسامة خفيفة

" مش عايز قهوه، ولا مش عايز عموما" 

بصلها وسكت شويه وبعدين قال 

" مش عايز عموما"

قالت ببرود 

" براحتك" 

وانسحبت على المطبخ 

عدي دقيقتين وسالي وقفت وقالت لتيم 

"تيم، روح ساعد فريدة شوية لحد ما أرجع، هرد ع الفون"

ومشيت بسرعة من غير ما تديه فرصة يرفض، حس بملل بس قام ودخل لقاها واقفة مركزة في اللي بتعمله.

وقف على الباب ثواني، ساكت، بيبصلها وهي مش واخدة بالها، ولما حست بيه رفعت عينيها فجأة وقالت بنبرة فيها اندهاش خفيف

" انت هنا من امتى؟" 

رد وهو بيقرب خطوه 

" لسه جاي"

قالتله 

"متوقعتش أشوفك بالسرعة دي، بصراحة."

رد ببرود

"ولا أنا... بس اتجبرت."

رفعت حاجبها وهي بتقول

"ومين ممكن يجبرك يعني؟ أنت مش بتعمل حاجة غير بمزاجك."

رد وهو بيبص بعيد

"ده الظاهر."

كلمته كانت بسيطة، بس تقيلة... فريدة حست بيها، بس كتمت فضولها، قررت تمشيها بهدوء.

مدتله كوباية قهوة وقالت بابتسامة بسيطة

"مدام كده كده اتجبرت، خد اشرب قهوه بالإجبار كمان"

خد الكوباية، وبص فيها، وسكت، وهي قررت تسيب المساحة مفتوحة... علشان لو قرر يتكلم، يحس إن المكان آمن

بعد لحظة صمت قالت

"لو طلبت منك نكون صحاب... هتوافق؟"

تيم سكت... ثواني تقيلة عدت كأن الزمن وقف، ساب الكوباية على الرخامة، بص ناحيتها ببطء، بعد كده قال بهدوء

"صحاب؟"

فريدة ابتسمت ابتسامة خفيفة وهيا بتخبي ارتباكها

"يعني... اه، نكون صحاب"

تيم رجع يبص بعيد، خبط صوابعه بخفة على الرخامة وقال

"أنا مش من النوع اللي بيعرف يكون صاحب حد."

فريدة بصتله بصمت، مش هتضغط عليه، مستنية يكمل.

تيم كمل وهو لسه باصص بعيد

" علشان الصحوبية معناها إنك تفتحي قلبك... وأنا قلبي معمول عليه 100 قفل."

سكت لحظة، وبعدين ضحك ضحكة باهتة وقال

"أنا مش بس مقفول... أنا حتى بنسى المفاتيح فين."

فريدة بصتله بثبات وعينيها فيها لمعة تحدي خفيف

"ولو أنا اللي عايزة أفتح قلبي؟ مش أنت؟"

بصلها، استغرب من الرد... مش متوقعها ترد كده

سكت شوية، وبعدين قال بنبرة فيها مزيج بين الاندهاش 

" يعني انتي مش عندك صحاب بتفتحيلهم قلبك؟!" 

فريدة رفعت حواجبها بخفة وقالت

" تؤ، مش كلهم اقدر افتحلهم قلبي، بس انت شايل كتير في قلبك، معاك اسرار كتير مش بتطلعها"

ضحكة صغيرة خرجت من تيم، أول مرة تبان على وشه، لكنها اختفت بسرعة، ورجع للهدوء اللي متعود عليه، وقال بصوت واطي

"يعني... لو قررت تفتحي قلبك، اكيد مش هقفلك الباب، بس انا بحسك بتشكلي خطر عليا، من ساعة ما عرفتك وانا مش انا"

فريدة بصتله، قلبها بيدق بس ملامحها هادية وقالت

"ولو...، اصلا محدش هيقدر يقفل باب أنا ناوية أعدي منه."

تيم سكت، عينيه ثابتة عليها، كأن بينه وبين نفسه في صراع.

فريده بصتله لحظة، وبعدين رجعت تبص للصينية وكملت تحط الكوبايات.

قالت بنبرة هادية وهي بتحاول تكسر الصمت

"مش لازم تجاوب دلوقتي... بس فكر فيها، يمكن تلاقي نفسك محتاج تقول حاجه في يوم، وقتها هكون بسمعك."

تيم اتحرك خطوة بسيطة ناحيتها، قال بصوت واطي جدًا، كأنه بيكلم نفسه

"أنا عمري ما هفتح قلبي لأي حد مهما كان هو مين، حطي تحت الكلام ده 100 خط أحمر"

فريدة وقفت، وبصتله بهدوء، وقالت بنبرة أهدى 

"أنا مش أي حد يا تيم... وجربني لما تحب، مش لما تضطر."

لحظة صمت عدت بينهم، فيها ألف كلمة متقالتش، بس اتفهمت.

قاطعهم صوت خطوات سالي وهي داخلة المطبخ بسرعة

"أنا آسفة اتأخرت، الموبايل كان بيرن ولازم ارد"

بصّت لتيم وقالت بنبرة مرحة

" ساعدتها ولا كنت واقف تتفرج؟"

تيم قال بهدوء وهو بيعدّل من وقفته

" لو هيا محتاجه مساعده كانت قالت اصلا"

سالي ضحكت، وفريدة شالت الصينية وقالت

"يلا بينا قبل ما الحاجه تبرد."

وخرجوا من المطبخ، بس نظرة تيم الأخيرة لفريدة كانت مختلفة... فيها تساؤل، يمكن أول لمحة من الفضول أو الرغبة إنه يجرّب يسمع، حتى لو جزء صغير...

فريدة بصّت بسرعة لسالي وسألت بنبرة فضول خفيف

"يونس مجاش ليه هو كمان؟!"

سالي ردت بسخريه

"يونس؟ ده بقاله يومين مش بيبات في البيت اصلا."

فريدة ابتسمت نص ابتسامة، وهزت راسها بتفهم، وقالت بهدوء

" توقعت "

إيناس كانت قاعدة على الكنبة، عينيها فيها لمعة حزن، وصابرين قصادها، بتبص عليها بنظرة فيها مزيج بين العتاب والخوف عليها.

صابرين سألتها بنبره مهتمه

"قررتي إيه؟"

إيناس اتنهدت وقالت بنبرة مستسلمة

"مقررتش حاجة... كل حاجة زي ما كانت، هعيش لولادي وبس."

صابرين رفعت حاجبها وقالت باستنكار

"بس ده مش صح يا إيناس، يا تتطلقي وتشوفي حياتك، يا توصلي مع جوزك لحل، لكن الوضع ده مش نافع."

إيناس بصّت بعيد وقالت بحسم

"بس أنا مش هتطلق، ومش هتجوز تاني، خلاص، سيبيني زي ما أنا عايزه..."

صابرين بصتلها، مش قادرة تستوعب

"بس دي مش حياة! إنتي لسه صغيرة، عندك فرصة تبدأي من جديد."

إيناس ردت بسرعة بنبرة فيها حسم

"لاء... أنا مش صغيرة، عندي بنت وولد على وش جواز"

صابرين بصتلها بنظرة فيها لوم وقالت

"ومفكرتيش فيهم ليه لما كنتي بتكلمي علي؟"

إيناس خدت نفس طويل وقالت بصوت مبحوح

"علي كان غلطة... لحظة ضعف، وانتهت، فوقت وفهمت غلطي، وقررت أعيش في سلام، من غير أي راجل في حياتي، ده قراري وخلاص."

صابرين هزت راسها، ولسه هترد، بس قاطعها دخول فريده وسالي وتيم

دخلت فريدة وهي شايلة صينية عليها الكوبايات، وراها سالي، وتيم دخل بعدهم بخطوات هادية، ملامحه شبه محايدة.

فريدة وزعت الكوبايات عليهم، وبعدين راحت وقعدت جنب سالي.

سالي قربت من فريدة وهمست بصوت واطي

"اتكلمتي معاه؟"

فريدة هزت راسها بخفة، وقالت 

"حاولت... جسيت نبضه شوية، بس عارفة؟ تيم علشان يتكلم مع حد، ده شئ شبه مستحيل، لازم يكون بيثق فيه ثقة عمياء."

سالي سألت باستغراب وهمس

"يعني؟"

فريدة ردت بنبرة فيها حزن بسيط وتفهم

"يعني مش أنا الشخص المناسب اللي ممكن تيم يثق فيه."

سالي عضت شفايفها وقالت بتفكير

"بس أنا مش حاسة كده... جربي، مش هتخسري."

فريدة هزت كتفها وقالت بنبرة هادية لكن محبطة شوية

"صعب جدًا يا سالي، بجد الحوار صعب... شخصية تيم من النوع المستحيل اللي ممكن يقول حاجه زي دي... هل هيتكلم مستقبلًا؟ الله أعلم."

سالي قالت بتشجيع

"ولو حاولتي؟ يمكن يجيب معاكي نتيجة إيجابية..."

فريدة سكتت لحظة، وبعدين سألت باستغراب خفيف

"هو إزاي جه أصلاً؟ يعني متوقعتش ييجي."

سالي ردت ببساطة وهي بتعدل قعدتها

"ماما اللي قالتله... وهو بصراحة معترضش."

فريدة بصت لها باستغراب أكبر وقالت

"معرفش ليه استغربت."

سالي ابتسمت وقالت بنبرة خفيفة

"يمكن علشان الساعة عدت 12؟ بس تيم نومه مبقاش متظبط خالص، مش عارف يظبطه، حتى بقى يصحى يادوب على معاد الشغل... يعني أنا كمان مستغربة، لأنه كان منظم جدًا... خصوصًا في مواعيده."

فريدة رفعت عينها ناحيته تلقائي، لاقته باصصلها...

لكن أول ما شافها بصّتله، بسرعة بص بعيد عنها... 

صابرين كانت بتتكلم عن حاجة وسكتت فجأة لما سمعت صوت الباب الخارجي بيتفتح وقالت باستغراب

"هو في حد جاي؟"

ايناس ردّت بسرعه

"لاء خالص... مفيش حد وإسلام في أوضته."

سالي بصّت ناحية الباب من بعيد وقالت

"طب مين اللي فتح الباب؟!"

الكل سكت، نظراتهم رايحة ناحية المدخل، الخطوات رجولية، تقيلة وواثقة.

دخل راجل في الخمسينات، طويل، أنيق جدًا، لابس بدلة كلاسيك غامقة، ريحته فخمة، ونظرة عينه قوية وواضحة، وقف في أول الريسيبشن.

الراجل مقالش ولا كلمة، عينيه راحت على إيناس، اللي كانت قاعده مكانها واتسمرت.

إيناس شهقت بهدوء، ووشها اتغير تمامًا ومقدرتش تقول أي كلمه

فريدة وقفت ببطء، وكل جسمها اتشد، وبصّتله بذهول وهي بتقول بصوت مهزوز

"بابا؟!"

فريده وقفت ببطء، وكل جسمها اتشد، وبصتله بذهول وهيا بتقول بصوت مهزوز

" بابا؟!" 

بصلها وابتسم

"إزيك يا فريدة؟"

إيناس بصت للأرض، ملامحها جامدة، كأن قلبها بيتشد ما بين وجع قديم وهدوء مصطنع.

صابرين لمّا استوعبت الموقف، قامت فورًا، وخدت خطوة ورا، بصت لإيناس وسألتها بصوت واطي

"ده جوزك؟!"

إيناس أومأت من غير ما ترفع عينيها.

صابرين بصّت لتيم وسالي وقالت

"يلا بينا يا ولاد نسيبهم دلوقتي... أكيد محتاجين يقعدوا سوا."

سالي وتيم قاموا وصابرين قالت لايناس 

"هكلمك، ماشي؟"

ايناس هزت راسها وصابرين مشيت ورا سالي وتيم اللي سبقوا

ابو فريده (هاني) ابتسم لفريده، وبهدوء مد إيده يسلم عليها،

"إزيك يا حبيبتي؟ وحشتيني."

فريده حضنته بسرعة، وهي لسه مش مصدقة إنه واقف قدامها.

لكن إيناس كانت ساكتة، ملامحها جامدة، مش قادرة تبصله.

فريدة كانت ملامحها متوترة، وعينيها رايحة جاية ما بين باباها ومامتها

الجو تقيل، كله ترقب وصمت مشحون… زي الهدنة اللي قبل العاصفة.

إيناس بصوت هادي لكن واضح فيه حيرة قالت

"رجعت ليه؟"

هاني خلع الجاكيت بهدوء، وحطه على طرف الكنبة، وقعد كأنه لسه صاحب المكان

"جيت علشان أسمع، مش أتكلم... إسلام قالي إنك عايزة تتطلقي."

فريده همست بصدمة

"إسلام؟!"

وفجأة، خطوات تقيلة نازلة من السلم، إسلام ظهر،

وقف جنب أمه، وصوته كان هادي، لكن واضح فيه الإصرار

"أنا اللي كلمته... علشان ماما محتاجة تاخد قرار،

ومينفعش القرار ده يتاخد وإنت مش موجود."

هاني بص لإيناس، نبرته ما بين التحدي والاستنكار

"يعني بعد السنين دي، قررتي فجأة إنك عايزة تتطلقي؟"

إيناس اتجمدت، الدهشة مغطية وشها

"أتطلق؟! انت اللي قولت كده؟"

إسلام رد وهو بيبص لأبوه بثبات

"أه... لأنك لازم تعيشي حياتك زيه، هو اختار حياته وانتي لازم تعملي زيه "

إيناس قالت بسرعة وبصوت فيه قهر

"إسلام، أنا قولتلك متفتحش الموضوع ده تاني."

إسلام قال وهو بيكتم غضبه

"بس حرام تفضلي عايشة كده."

هاني قام وقف، عينيه فيها نار، وبص لابنه وقال بحدة

"وانت ازاي تتدخل في حاجة زي دي؟ من إمتى الصغيرين بيتدخلوا في أمور الكبار؟"

إسلام رد بنبرة قوية

"لما أشوف الوضع ده قدامي، يبقى لازم أتدخل...

انت سيبتنا ومشيت، كمل جميلك وطلّقها وامشي!"

إيناس قالت بصوت عالي وهي بتبص لإسلام بدموع في عنيها

"إسلام، كفاية... كفايه، أنا مطلبتش منك تتدخل وتتكلم بدالي، أنا اللي عايشه... وأنا اللي هقرر، مش إنت، أنا اللي هتحمل النتيجة لوحدي."

إسلام حاول يفتح بُقه يرد، لكن قبل ما الكلمة تطلع،

إيناس قاطعته بنبرة حازمة وصوتها بدأ يعلى أكتر

"ولا كلمة! لو سمحت."

سادت لحظة صمت تقيلة...

هاني كان واقف، وشه مش باين عليه أي تأثر، لكن صوته جه حاد وواضح

"لازم نتكلم يا إيناس."

إيناس وقفت بثبات، وعينيها فيها تحدي 

"مفيش كلام بينا، معنديش كلام أقوله ليك،

إحنا معادش بينا لا كلام... ولا حياة، اللي بيربط بينا ولادك وبس، غير كده انسى إن ليك زوجة وحَتى لو مطلقتنيش رسمي، أنا بعتبر نفسي مطلقه اصلا ومش فارقه معايا، وياريت ترجع مكان ما جيت،عشان ملكش مكان هنا."

هاني لف ناحيّة فريدة، ونبرته أخدت لهجة شبه آمرة

"فريدة، معلش يا بابا... ممكن تسيبينا لوحدنا، إنتي وأخوكي؟"

لكن قبل ما فريدة تتحرك، إيناس رفعت إيدها وقالت بحسم أكتر

"لو في حاجة هتتقال، يبقى قدامهم... قولتلك مفيش بينا كلام."

هاني عضّ على شفايفه، لفّ بعينه ناحيّة فريدة تاني، وقال بنبرة هادية بس ضاغطة

"يلا يا بابا..."

فريدة بصّت لمامتها لحظة، وبعدين هزت راسها بخفة، وشدّت إيد إسلام اللي كان واقف زي التمثال، رافض يسيب أمه لوحدها.

"يلا يا إسلام…"

قالتها بهمس وهي بتسحبه براحه

إسلام بصّ لأمه، وبعدين لأبوه…

بس في الآخر مشي معاها.

هاني وقف في نص الصالة، عينيه عليها، لكن ملامحه جامده وقال بهدوء 

"أنا عارف إنك موجوعة... ويمكن شايفة إنك بتنتقمي لما ترفضي حتى تسمعيني، بس اللي بينا عمره ما كان بسيط، ومينفعش ينتهي بصمتك ده."

إيناس ردت بنبرة باردة

"اللي بينا انتهى من زمان، من أول ما قررت تكون لحد تاني، وسبتني أواجه الدنيا لوحدي."

هاني قال وهو بيقرب خطوة

"أنا مكنتش ناوي أبعد، كنت بس... بدور على فرصة، على استقرار، على أمان."

ضحكت إيناس ضحكة قصيرة وموجوعة

"فرصة؟

سفرك ده كان فرصة؟

وجوازك من غيري كان أمان؟

ياريت تسكت احسن، كلامك بيجيب مشاكل اكتر"

سكت... بس ملامحه اتشدت، كملت بوجع اكتر

" معرفش اي اللي جابك اصلا وبعد ايه، كنت مستنياك بس ده من زمان، دلوقتي خلاص انت اتنسيت"

هاني رفع عينه، ونبرة صوته اتبدلت

"أنا غلطت عارف بس أنا جيت أرمم، مش أهد."

إيناس ردت بنبرة حاسمة"

"أنا اللي اتهديت،

سنين وأنا بسأل نفسي...

أنا ناقصة إيه؟

كنت مراتك، وأم ولادك، وسندك...

وفي الآخر اخترت تبعد،

تبني بيت تاني بعيد عننا."

سكتت لحظة، وختمت

"البيت ده اتكسر... وأنا رممته لوحدي.

فـمتجيش دلوقتي تقولي برمم، لو فاكر اني لسه البنت الضعيفه اللي كانت مبتقدرش تبعد عنك تبقى غلطان، انا اتعلمت دروس كتير قوي وبقيت اعيش من غيرك خلاص"

هاني قرب خطوة، بس صوتها وقفه

"خطوة كمان وهتفقد آخر ذرة احترام فضلتلك جوايا"

سكت، معندوش حاجه يقولها، أو لو اتكلم هيزود الطين بَله 

إيناس وقفت في وشه، كلامها كان ثابت

قالتله بصوت واضح وقاطع

"ياريت ترجع مطرح ما كنت... علشان مبقاش ليك مكان هنا، لو طلقتني، تكون شاكر، ولو مش ناوي، يبقى اتفضل، وأنا قولتلك قبل كده...أنا اعتبرت نفسي مطلقة من زمان."

لف وشه لحظة، حاول يخبي مشاعره، رجع يبصلها وهو بيقول بنبرة واطيه بس فيها وجع

"يعني خلاص؟

كل اللي بينا انتهى كده؟"

إيناس ردت بقوه

"انتهى من يوم ما قررت تختار غيري، بعد ما قولتلك مش مهم تسافر وخليك معانا وانا كنت حاسه انك مش هترجعلي تاني، وده اللي حصل فعلا، قولتلك أيامها انا بستقوى بوجودك بس قولتلي الشغل، روح لشغلك يلا وكمل حياتك زي ما كنت، أنا عشت كل لحظة فاتت لوحدي، واقدر اعيش اللي جاي كمان لوحدي، اتمني تكون دي اخر مره اشوفك فيها"

قالت كلامها وانسحبت من قدامه، كانت ماشيه بخطوات سريعة، وهي طالعة السلم، لمحت فريدة وإسلام واقفين على الجنب، سامعين كل كلمة، ملامحهم مصدومه، بس ساكتين

بصتلهم لحظة، وكملت لأوضتها، ولما وصلت لباب أوضتها… فتحته بسرعة، ورزعته وراها بكل القوة اللي جواها

فريدة راحت وراها وفتحِت الباب بحذر ودخلت بهدوء، لقتها قاعدة على طرف السرير، ضهرها ليها، وكتفها بيتهز من عياطها.

فريدة قربت، قعدت جنبها من غير كلام، بس بهدوء 

مدت إيدها بهدوء ولمست كفها، وقالت بنبرة دافية

"ماما"

إيناس مسحت دموعها بسرعة، كأنها مش عايزة تتشاف ضعيفة، وقالت بصوت مبحوح

"أنا كويسة يا فريدة... روحي انتي."

فريدة شدت على إيدها وقالت وهي بتحاول تبص في عينيها

"لا مش هسيبك...مش وإنتي كده، أنا مش صغيرة يا ماما...أنا شايفة وسامعة، وبفهم، بس طول عمري سايبة ليكي القرار، علشان عارفة إنك بتستحملي أكتر من اللي يستحمله أي حد."

إيناس بصتلها أخيرًا، بعين فيها ألم سنين، وقالت بصوت مهزوز

"هو كسرني يا فريدة، أنا استنيته سنين، مش شهور،

كنت بقول هيرجع، هيفهم، هيفتكرنا، بس رجع بإيده فاضية وقلب مش لينا."

فريدة حطت راسها على ركبتها، وقالت بصوت واطي

"وانتي تستاهلي قلبك يتحب مش يتكسر، بس صدقيني، إحنا معاكي، أنا وإسلام، وإنتي أقوى من كده بكتير."

لحظة صمت عدت، وإيناس مسكت إيد بنتها بقوة، كأنها بتاخد منها أمان كانت محتاجاه من زمان، وهمست

"أنا خلصت اللي جوايا من ناحيته، ومش ناوية أرجع، حتى لو فضل اسمي على اسمه."

فريده سكتت لحظه وبعدين قالت

" اطلبي منه يطلقك لو ده هيريحك، واحنا معاكي، معاكي في أي حاجه"

إيناس ضمت فريدة ليها، حضن طويل، دافي، مليان كسر ووجع وحب.

كانت بتعيط، بس عياط هادي وقالت بصوت مبحوح 

"أنا تعبت يا فريدة، أنا تعبت أوي."

فريدة قالت بصوت ثابت

"وأنا معاكي يا ماما، مش هسيبك لوحدك أبدا."

تحت في الصالون

هاني كان واقف، بيبص قدامه بشرود، بس من جواه كان بركان.

إسلام نزل من فوق، خطواته سريعة، ومفيهاش أي احترام.

وقف قدامه وقال بنبرة فيها احتقار واضح

"مش شايف إنك خلصت دورك هنا؟

مش شايف إنك جيت في وقت محدش عايزك فيه؟"

هاني بصله بحدة، لكنه سكت، مستني يسمع اللي في قلبه، بس إسلام مسكتش، كمل بنبرة تقيلة

"أنا شفت أمي بتتكسر حرفيًا قدامي...كل يوم بسببك."

قرب خطوة وكمل بتهكم واضح

"سنين طويلة واحنا بنتلمّ ونتفرّق، وهي مستنياك،

وانت؟

جيت دلوقتي، بعد ما بنيتلك حياة تانية، وافتكرت إنك ممكن تدخل هنا كأنك لسه الراجل اللي ليه احترامه."

هاني قال بنبرة جافة

"أنا أبوك، وده بيتي."

إسلام رد بسرعة وسخريه

"أبويا؟ لاء طبعا، أبويا الحقيقي مات أول ما قرر يسيب أمي ويتجوز غيرها، واللي يسيب مراته وولاده ويمشي، ميستحقش يكون اسمه أب."

هاني بصله بحدة وقال

"كبرت ونسيت نفسك، إنت بتكلمني أنا كده؟"

إسلام ضحك بسخرية وكمل

"أنا فاكر نفسي كويس جدًا، فاكرني وأنا صغير بسأل على أب مش موجود، فاكر أمي وهي بتخبّي دموعها علشان تضحكلنا، فاكرك... بس وأنت مش هنا."

قرب منه أكتر وقال بصوت ثابت

"فلو عندك شوية دم، طلقها وارجع لحياتك،

وافتكر إنك عمرك ما كنت جزء من حياتنا."

سابه وطلع من غير ما يستنى رد.

وهاني فضل واقف مكانه، متجمد، مكنش متوقع الهجوم ده، بس مش هييأس، هيحاول مره اخيره

عند سالي

كانت قاعدة جنب تيم، بتتكلم وهي باينة عليها القلق

"فريدة حالتها مش أحسن الأيام دي، أنا ملاحظة من فترة إنها متضايقة بس مش بتبين... يمكن يكون في مشكله بين مامتها و باباها"

تيم بصّلها بس مردش، سالي كملت وهي بتقوله

"رصيدي خلص، ممكن اكلمها من فونك؟!"

تيم بصّلها لحظة، وبعدين اداها الموبايل من غير ما يقول أي كلمه 

سالي بسرعة كتبت رقم فريدة واتصلت، فضلت ترن، بس فريدة مردتش.

ادته الفون وهيا بتقول

"مردتش... شكلها مشغولة، خلاص هبقى أكلمها بعدين"

فضل تيم ماسك الموبايل، عينه ثابتة على الرقم اللي ظاهر قدامه، متشتت، بيفكر، هل يمسح الرقم، ولا يسيبه؟

حس إنه مش قادر يمسحه، لقى نفسه بيسجل الرقم عنده، بص للاسم بعد ما اتحفظ، وقفل الموبايل بسرعة.

عند ايناس

فريده خرجت بعد ما ايناس طلبت منها تسيبها لوحدها شويه، وبعد شويه رن موبايل إيناس، كان اسم صابرين ظاهر على الشاشة، اترددت لحظة قبل ما ترد، صوتها كان باين فيه التعب وهي بتقول

"ألو؟"

صابرين كان صوتها قلقان وقالت

"إيناس، إيه اللي حصل؟ إنتي كويسة؟"

إيناس سكتت ثواني، وبصت قدامها بشرود قبل ما تقول بصوت هادي

"معرفش... معرفش أنا جبت القوة دي منين، لقيت نفسي بتكلم وبتكلم، مش قادرة أسكت، مش قادرة أتحمل أكتر."

صابرين قالت بهدوء

"دي مش قوة جديدة، دي كانت جواكي من زمان، بس إنتي كنتي خايفة تظهريها علشان فريده واسلام" 

إيناس قالت بصوت متقطع

"أنا حتى مش عارفة قلت إيه ولا إزاي... كل اللي كنت حاسة بيه خرج مني، لقيت نفسي بقول إني خلاص، مش عايزة أعيش معاه ابدا"

صابرين قالت

"عملتي الصح، محدش يستاهل يعيش مكسور يا إيناس، حتى لو علشان العيال، هما محتاجين يشوفوكي واقفة، مش ضعيفة."

إيناس قالت وهي بتاخد نفس عميق

"بس خايفة يا صابرين... خايفة أكون بضيّع استقرارهم لو طلقني"

صابرين ردت بسرعة

"انتي مش بتضيعي استقرارهم، انتي بتحمي نفسك وبتحميهم من حياة كلها كسر وقهر... اللي عملتيه ده قوة مش ضعف."

إيناس فضلت ساكتة لحظة وقالت

"أنا مش هرجع في كلامي خلاص... حتى لو النتيجة إيه."

صابرين قالت بنبرة داعمة

"وأنا معاكي، لو احتجتي أي حاجة، أنا معاكي."

إيناس قفلت المكالمة، وقعدت على طرف السرير، عينيها فيها دموع لكنها حست وكأن حِمل تقيل كان على قلبها واتشال.

تاني يوم، فريدة خرجت من اوضتها، بصّت على باب أوضة مامتها، اترددت تخبط عليها، لكن اتراجعت، وقالت لنفسها بصوت واطي "خليها ترتاح..."

نزلت بخطوات هادية، عينيها مجهدة من قلة النوم، ولما نزلت شافت هاني قاعد، كان ماسك فنجان قهوة، وبصلها أول ما شافها.

قال بصوت هادي

"صباح الخير يا فريدة."

ردت وهي واقفة

"صباح الخير."

شاور على الكرسي اللي قدامه

"تعالي اقعدي معايا شوية."

اترددت لحظة، وبعدين مشيت وقعدت قدامه، ملامحها جادة.

هاني شرب من القهوة وقال

"إيه الأخبار هنا؟... عاملين إيه؟"

ردت فريدة بنبرة جافة بس فيها احترام

"تمام... كله ماشي."

هاني بصّلها شوية وقال

"مامتك... عاملة إيه؟"

اتشدت ملامحها شوية، وقالت وهي بتبص ناحية الأرض

"كويسة... او بتحاول"

فضل ساكت لحظه وبعدين قال

"وإسلام؟"

ردت وهي بتتنهد

"كلنا بخير وعايشين عادي"

هاني حرك راسه ببطء، وقال بنبرة فيها محاولة للتقرب

"فريدة... أنا عارف إني قصّرت كتير... وعارف إن وجودي مش سهل عليكم."

رفعت عينيها وبصتله وقالت بهدوء

"إحنا اتعودنا يا بابا... وبنتعامل."

كلمة "بابا" خرجت منها بصعوبة، لكنها قالتها، وبان في عينيها لمعة سريعة.

هاني ابتسم ابتسامة باهتة

"أنا مقدّر اللي مامتك شالته طول السنين دي... ومقدّر إنكوا كبرتوا لوحدكوا."

فريدة سكتت، مش عارفة ترد، لكنها اكتفت بهزة راس بسيطة.

قال بعد لحظة

"أنا... مش جاي أزعلكم، ولا أعكّر عليكم حياتكم... أنا بس جيت..."

قاطعت كلامه بسرعة "عارفة."

سكتت لحظة، وبصتله وقالت بنبرة فيها حنية ضعيفة وسط الجفاء

"بس ياريت متوجعهاش تاني... بلاش... كفايه"

بصّلها وهو بيحاول يبتسم وقال

"هحاول يا فريدة... هحاول"

فضل يبصلها، شايف قد إيه كبرت واتغيرت.

عدل قعدته، بص لفنجان القهوة اللي في إيده، وقال بنبرة هادية

"زمان... كنتِ لما بشوفك بعد السفر، بتجري عليّا... دلوقتي حتى الكلام بينا بقا قليل"

فريدة بصتله، ملامحها ثابتة، بس في لمعة حزن في عينيها

"كبرنا."

ابتسم ابتسامة صغيرة باهتة

"آه... كبرتوا فعلاً."

سكت لحظة وقال 

"بس أنا مهما حصل... أبوكوا."

فريدة قالت بصوت واطي

"عارفة."

رجع يبصلها وقال

"إنتِ شايفة إيه يا فريدة؟ شايفة الوضع إزاي؟"

سكتت شوية، وكأنها بتختار كلامها، وقالت بهدوء 

"إحنا... اتعودنا نعيش من غيرك... اتعودنا إن كل واحد فينا يشيل نفسه... وماما دايما معانا وساندانا"

سألها

"وأنا؟"

ردت بعد تردد

"إنت... كنت بعيد... وأوقات البُعد بيكون أريح من القرب... حتى لو القرب ده من أغلى الناس."

اتشدت ملامحه وقال

"أريح؟"

هزت راسها بهدوء

"أيوه... أريح."

فضل ساكت شوية، ففريدة قالت بنبرة فيها حنية لكنها حازمه

"بصراحة يا بابا... ماما كانت قوية جدًا علشان تكمّل... يمكن لو في راحة ليها دلوقتي... تكون إن كل واحد يعرف مكانه الحقيقي في حياتها."

قال بحدة خافتة

"تقصدي إيه يا فريدة؟"

ردت وهي بتحاول تخلي صوتها ثابت 

"مفيش قصد... بس أوقات الحل بيكون في البُعد... حتى لو البُعد ده صعب، بس انا عارفه أنه مش صعب ابدا عليك"

اتنهد هاني ومرر إيده على وشه وقال

"يعني شايفة إن الانسحاب أحسن؟"

فريدة بصتله وقالت

"لو الحل ده هيريّح الكل... يبقى أيوه."

فضل باصص لها لحظة، وشاف في عينيها خوف وحب وحزن وقال "متغيرتيش... لسه قلبك طيب."

قالت بسرعة

"أنا مش عايزة أشوف ماما موجوعة تاني."

فضل ساكت، بصلها، وقال بهدوء 

"أنا همشي، بس هحاول محاوله اخيره"

فريدة سكتت شويه وبعدين بصتله وسألت بنبرة هادية فيها تردد

"هتطلقها؟"

هاني رفع عينه ليها وقال

"انتي شايفة إيه يا فريدة؟"

سكتت فريدة شويه، وبصت ناحية الأرض، وأفكارها بتلف بسرعة في دماغها...

لو مامتها اتطلقت، ساعتها هيكون في فرصه تتجوز علي، لكن لو مامتها لسه على ذمة باباها، محدش هيقدر يفتح الموضوع، وهيكون كده اتقفل نهائيا، خاصة أن باباها لو مشي مش هيرجع تاني.

رفعت عينيها بعد تردد، وقالت بنبرة هادية، بس جواها صوت بيحارب

"شايفة... إنك متطلقهاش."

هاني بصّلها، مستني تكمل، فقالت

"على الأقل... طول عمرنا قدام الناس... بنقول إنك مسافر شغل، وإنك سايبنا علشان ظروف السفر وشغلك... مش إنك سايبنا عدم تحمل مسؤوليه... كده بيكون شكلنا وشكلك أحسن قدام الناس، وقدام نفسنا."

سكتت لحظة وكملت

"وكده... على الأقل ماما هتفضل معانا، ومحدش هيتدخل في حياتها."

هاني بصلها بصه طويلة، وقال بهدوء

"يعني شايفة إن وجودي كزوج، حتى لو بعيد... أحسن."

هزت فريدة راسها وقالت

"أيوه... أريح للكل."

رجع يبص لفنجانه، وحس إن اللي بينه وبينهم انتهى، حتى لو اسمه هيفضل في البطاقة... بس هو خلاص بقي ضيف في حياتهم، ومش هياخد مكانه أكبر من كده.

على اخر النهار فريده كانت في شغلها، بتراجع ملف في أيديها، رنّ تليفون الاستقبال الداخلي، ردّت فريدة بسرعة وهي مركزه في الورق اللي قدامها

"أيوه، فريدة معاك."

صوت موظف الاستقبال جه واضح

"فريدة، في حالة هنا، محتاجينك تيجي فورًا."

فريدة قالت بسرعة وهي مشغولة

"معلش، أنا مشغولة دلوقتي، هبعت أي حد من زمايلي."

سكت لحظة وقال

"مش هينفع... الشخص اللي مستني قال إنه مش هيكشف غير معاكي، طالبك بالاسم."

رفعت فريدة وشها ببطء، عينيها لمعت باستغراب، وقلبها دق بسرعة، سابت الورق من إيدها، وقامت بخطوات ثابتة وهي بتسأل نفسها

" مين اللي ممكن يطلبها بالاسم؟ وليه؟"

خرجت من القسم، ودخلت الاوضه اللي الشخص ده فيها وشافته

فريده خرجت من القسم، ودخلت الاوضه اللي الشخص ده فيها وشافته، كان حسام صاحب تيم 

اتفاجأت بس بسرعة ابتسمت وقالت

"حسام؟! إيه المفاجأة دي!"

ابتسم وقال 

"إيه رأيك؟"

رفعت حاجبها وقالت وهي بتدخل وتقفل الباب وراها

"عرفت إزاي إني بشتغل هنا؟! و... طالبني بالاسم كمان؟"

قال وهو بيعدل قعدته

"بالصدفة... أنا كل فترة باجي أقيس ضغط وسكر ونسبته في الدم، أتطمن على صحتي يعني."

راحت ناحية الأجهزة وهي بتقول بخفة

"آه... وبعدين؟"

قال وهو بيبصلها

"بصراحة لما عرفت بالصدفة إنك بتشتغلي هنا... قلت لنفسي، ليه لاء؟ طلبتك بالاسم، بس كده."

رفعت عينيها ليه وقالت وهي بتشغل الجهاز

"بس كده؟ يعني أنت على طول بتيجي هنا؟"

ابتسم وقال وهو بيحك دماغه

"يعني... كذا مره مش كتير بصراحه، علشان مكونش كداب."

خلصت أول قراءة، رفعت عينيها وقالت بنبرة عملية

"تمام، ماشاء الله... مظبوط."

رد بسرعة وهو بيضحك

"علشان شوفتك... اتظبط"

كشرت وقالت بسرعة

"نعم؟!"

اتلغبط وقال بسرعة

"قصدي... يعني برتاح نفسيًا لما..."

معرفش يقول ايه فقال

" هو أنا دايمًا مظبوط كده"

ضحكت بخفة وهي بترجع الجهاز مكانه وقالت

"ألف سلامة، نكمل؟!" 

قال بسرعه 

" اه طبعا طبعا، اتفضلي"

بدأت تكمل شغلها بتركيز، سألها وهو بيبصلها

"إنتي بتشتغلي هنا بقالك كتير؟"

ردت ببساطة وهي مركزه 

"آه، من ساعة ما اتخرجت."

ابتسم وهو بيقول

"طب... فكرتي في عرضي؟"

بصتله وقالت بجدية هادية

"امممم....فكرت، وزي ما قولتلك... مش مستعدة دلوقتي أشتغل بره المستشفى نهائي، بس لو محتاج حد، ممكن أقول لحد من صحابي، وهيرحب جدًا."

اتغيرت ملامحه بسرعة وقال بجدية

"لاء طبعًا... العرض ليكي إنتي بس، يعني أنا قولتلك إنتي وبثق فيكي إنتي."

رفعت حاجبها وقالت بابتسامة خفيفة

"حسام، أنا دي تاني مرة أشوفك فيها... بتثق فيا إزاي بقى؟"

ضحك بخفة وقال وهو بيبصلها 

"أنا بعرف الناس دايمًا، وقلبي قالي إنك إنسانة يتوثق فيها."

سكتت وكملت وبعد ما خلصت قالتله 

" ماشاء الله كله تمام، الف سلامه" 

ابتسم وقال

" الله يسلمك، تسلم ايدك"

فتح فونه ومده ليها وقال

"ممكن رقمك؟"

بصتله باستغراب، فابتسم وقال

"هرنلك... عشان رقمي يبقى معاكي لو احتجتي حاجة، أو أنا ممكن أحتاجك في يوم."

خدت الفون، كتبت رقمها بسرعة، ورنت على نفسها، رجّعتله الفون وقالت بهدوء

"تمام."

ابتسم وقال وهو بيقف

"فرصة سعيدة يا فريدة."

قالت بابتسامه

"أنا الأسعد"

ومشي من قدامها، وهيا مش فاهمه في ايه ولا ليه جه، وهل فعلا زي ما قال ولا بيحور، بس مفكرتش كتير وخرجت من الاوضه تكمل باقي شغلها 

عند تيم 

بعد ما رجع البيت من شغله، قعد في الجنينة، كان قاعد على الكرسي باصص للزرع قدامه، وسرحان، ملامحه كانت هادية بس باين عليها التعب، إيده كانت بتلعب في ساعته من غير ما ياخد باله.

مامته خرجت وهي ماسكة كوباية شاي بالنعناع، وقفت قدامه وقالت بصوت هادي

"مالك يا تيم؟"

رفع عينه ليها بسرعة وقال

"أنا كويس... مفيش حاجة."

هزت راسها وقالت وهي بتقعد على الكرسي اللي جنبه 

"أنت عمرك ما خبيت حاجة عني."

قال وهو بيبص بعيد

"بس أنا مش مخبي حاجة."

قالت وهي بتبصله بتركيز

"وإيه اللي واكل عقلك للدرجة دي؟"

سكت لحظة وقال بنبرة مبحوحه

"بفكر شوية في الشغل... عادي يعني."

سابت الشاي على الترابيزة الصغيرة اللي قدامها وقالت بهدوء 

"بقالك فترة مش على بعضك... أنت مش تيم اللي أنا أعرفه... مبقتش تهتم بنفسك زي الأول حتي"

كان بيلعب في الساعة وهو ساكت، وبعدين قال 

"مش عارف... من ساعة ما تعبت وحياتي باظت شوية... بس هظبطها إن شاء الله."

سكتت شويه تدرس مدى صدق كلامه وبعدين قالت

 "أنا هسيبك براحتك، متتكلمش لو مش عايز... بس أنت عارف لما تحب تتكلم، تتكلم مع مين."

بصلها بسرعة، عينه فيها لمعة امتنان 

قالت وهي بتبتسم بحنان

"أنا موجودة، وطول ما أنا عايشة، متتكلمش مع غيري."

سكت، بصلها وحرك راسه بهدوء، وهي قامت بهدوء وسابته، وهو رجع يبص للزرع تاني وسرح تاني

عند ايناس 

كانت قاعدة في أوضتها، القعدة بقت طويلة، من ساعة ما عرفت إن هاني لسه موجود تحت وهي مش قادرة تفتح الباب وتخرج، كانت قاعدة على طرف السرير، حاسه بملل وكبت بس عامله زي المحبوسه، مش قادره تعمل حاجه، وهيا قاعده فونها رن، بصّت للشاشة، كان رقم غريب، قلبها دق بسرعة، اترددت ترد ولا لاء، بس في الآخر ردت

حطت الفون على ودنها وقالت بصوت واطي

 "ألو؟"

جالها صوته، صوته اللي بيدخل لقلبها من غير ما تستأذن

"إيناس..."

غمضت عينيها بقوة، وحست بكهربا بتعدي في جسمها، مردتش، بس هو كمل، صوته كان فيه عتاب واشتياق

"ليه بتبعدي؟ ليه مش عايزة تديني فرصة أكون معاكي...؟ إيناس، أنا بجد بحبك، وعايز أتجوزك، وعايزك في حياتي... أنا صادق ومش هسيبك."

دمعة نزلت من عينيها غصب عنها، مسحتها بسرعة، وحاولت ترد، بس الكلام طلع بصعوبة

 "علي... بلاش... لو سمحت..."

قال بصوت مكسور لكنه مصمم

"لو سمحت إيه؟ إيناس أنا مش عيل، وأنا واخد قراري، أنا مش قادر أنساكي، ومش قادر أتجاهل اللي بينا، انتي ليكي مكان جوة قلبي مش هيتشال، حتى لو حاولتي تبعدي، هفضل وراكي، انا شاري"

غيرت مكانها وإيديها بترتعش وهي ماسكة الفون، قالت بصوت مبحوح

"علي... الموضوع مش سهل... مش بالبساطة دي..."

رد بسرعه

"أنا عارف إنه مش سهل... بس ده مش معناه إنه مستحيل، أنا مش هسيبك، ومش هبطل أحبك، حتى لو هتفضلي تقفلي كل حاجه في وشي، كل حاجه وليها حل"

حست إن قلبها بينقبض، والدنيا بتلف حواليها، حاولت تاخد نفس، وقالت بصوت شبه هامس

 "كفاية يا علي... بلاش الكلام ده دلوقتي... أنا... مش قادرة."

سكت لحظة وقال 

"هستناكي، مهما طال الوقت، هستناكي، هفضل مستني لحد ما أموت"

مردتش، قفلت المكالمة بسرعة، ورمت التليفون بعيد عنها على السرير، وحطت وشها في إيديها، والدموع نزلت من غير ما تقدر توقفها، قلبها كان بينادي عليه، بس عقلها بيرفض، قلبها رايد بس كل حاجه متقفله في وشها

عند فريده

خرجت هيا ويسر من المستشفى، وقفوا تاكسي 

فريدة بصّت ليسر وقالت

"يلا يا قلبي روحي، ابقي كلميني لما تروحي."

يسر سألتها

"طب وانتي؟"

ردت فريدة

"إسلام جاي ياخدني، هستناه هنا."

حضنتها يسر بسرعة وقالت

"خلي بالك من نفسك يا فريدة."

ردت فريدة

"وانتي كمان، يلا باي"

" باي"

ركبت ومشيت وفريدة وقفت مكانها تستنى، وهيا واقفه فونها رن، بصّت عليه ولما شافت الاسم ابتسامة خفيفة ظهرت على وشها، ردت بسرعة

 "والله؟ لسه جاي تفتكر يعني يا زفت؟! أنا مش رانه عليك من بدري."

ضحك يونس على الطرف التاني وقال

"غصب عني يا مزه، آسف، كنت على الريس مش سامع، ودوشة موت، أول ما فتحت فوني رنيت."

فريدة ضحكت وقالت

"يا ابني مبتحرمش، ارحم شوية، مش ناقصين."

قال يونس وهو بيضحك

 "لاء بالله ما تدخليش على شغل سالي بقى، كفاية عليا واحدة!"

ضحكت وقالت

"بنخاف عليك يبني، انت متهور ومش فارق معاك نفسك، معرفش بتعمل في نفسك كده ليه؟!"

رد يونس بسرعة

 " بس مغامرة تستاهل، ادمااان"

قبل ما ترد عليه، لمحت عربية إسلام وقفت قدامها، وزمر لها كلاكس خفيف، فابتسمت وقالت بسرعة 

"ربنا يهديك، سلام دلوقتي، انا في الشارع وكده، هبقي اكلمك ورد عليا."

رد بسرعة

"عنينا للمزه، عندنا كام ديدا يعني"

ضحكت وقالت

"يلا باي"

قفلت المكالمة، وخدت نفس عميق قبل ما تروح ناحية العربية، وركبت جنب إسلام، اتحرك بالعربية وهو باين عليه متضايق، سايق بسرعة هادية بس إيده مش ثابتة على الدريكسيون.

بصّتله وقالت بهدوء 

"مالك؟ في إيه؟"

رد عليها بسخرية وهو باصص قدامه

"منا زي الفل اهو."

سكتت لحظة وقالت وهي بتبص من الشباك

"هو بابا لسه في البيت؟!"

رد وهو بيزفر بضيق

"ياريت يكون مشي... بس بعد ما يطلق."

بصّت له بسرعة وقالت

"وانت عايزها تتطلق ليه؟ علشان تتجوز علي؟!"

قال وهو لسه سايق وعينيه في الطريق

"حتى لو متجوزتش، مينفعش تبقى على ذمته أصلًا... بس بجد بتمنى تتجوز علي، راجل محترم وشاريها، وكلمني كذا مرة إنه هيفضل معاها للآخر وعمره ما هيسيبها، أنا عن نفسي بحترمه"

اتضايقت فريدة، لهجتها بقت هادية بس فيها عتاب

"وليه تتجوز أصلًا؟ ما احنا كنا حلوين وهي معانا من غير حد، طول عمرنا كده... فيها إيه لو كملنا كده كمان؟"

إسلام شد نفسه، وقال بانفعال وهو بيبص قدامه

"كفاية أنانية بقا! لقت حد يحبها ويحترمها ويقدرها... يبقى ليه لاء؟! إنتي بتفكري في نفسك وبس يا فريدة، فكري فيها زي ما هي بتفكر فينا!"

سكتت فريدة، وبصّت قدامها، عينيها لمعت بدموع وهيا بتفكر في كلامه بس مردتش 

وصلوا قدام البيت، إسلام ركن العربية بعصبية، وفضل ساكت لحظة قبل ما يفتح الباب وينزل بسرعة.

فريدة نزلت وراه، كان ماشي بسرعه وفريده وراه 

فتح الباب ودخل بسرعة، لقا هاني قاعد في الصالون.

هاني أول ما شاف إسلام داخل كده، قال بحدة

"مالك داخل زي العاصفة كده؟!"

إسلام بصله، وقال بصوت عالي

"إنت لسه هنا؟! مش كنت ماشي؟!"

هاني وقف، وملامحه بقت قاسيه

"إسلام، خلي بالك من أسلوبك معايا."

إسلام ضحك بسخرية

"أسلوبي؟! من إمتى بتهتم بأسلوب حد فينا أصلا؟!"

هاني زعق

"إسلام!"

إسلام قرب منه خطوة، صوته علي

"إنت جيت هنا ليه؟! عايز إيه تاني؟! مش كفاية اللي عملته؟!"

هاني قال بعصبيه

"احترم نفسك، انا ابوك"

إسلام قال بحدة

"أبوك؟! أبويا اللي سبنا ومشي وساب أمي تشيل لوحدها؟! أبويا اللي فكر في نفسه بس؟! انت عبيط ولا بتستعبط؟!"

هاني صرخ

 "كفاية! انت مش متربي"

إسلام رد بسرعة

"لاء، مش كفاية! إنت عايز إيه دلوقتي؟! عايز ترجعلنا أب مثالي فجأة بعد العمر ده؟! إحنا مش محتاجينك!"

فريدة حاولت تدخل بينهم

"إسلام، خلاص! كفاية بقى!"

بس إسلام كان منفعل جدًا، كمل

"إنت لو عندك دم، كنت طلّقتها من زمان وسبتها تعيش حياتها، لكن حتى ده مش قادر تعمله!"

هاني قرب منه، وصوته بقا واطي بس مليان غضب

"لو مكنتش ابني، كان زماني..."

إسلام قطع كلامه وهو بيبصله بحدة

"كان زمانك عملت إيه؟! انا متشرفش اكون ابنك اصلا، فاللي عايز تعمله اعمله، يلا؟! اتفضل! وريني "

سادت لحظة صمت تقيله جدًا، فريدة كانت واقفة، عينيها مليانة دموع وهي بتبص بين أبوها وأخوها، هاني كان بيحاول يسيطر على نفسه، بس وشه احمر من الغضب، وقال بصوت عالي

 "أنا هفضل أبوكوا غصب عن أي حد، وأنا اللي بصرف عليكم!"

إسلام ضحك بسخرية، ضحكة قصيرة تقيلة، وقال وهو باصصله باستهزاء

"ومين ضحك عليك وقالك كده؟"

هاني بصله بحدة، لكن إسلام كمل

"أي حاجة بتبعتها محدش بيمد إيده عليها أصلاً ولا كأنها جت، فريده معتمدة على نفسها وبتصرف على نفسها من شغلها، وأنا عندي شغل كويس جدًا يخليني افتح ١٠٠ بيت، بس انا احتراما لمراتي اللي هتجوزها هفتح بيت واحد بس، لأنها متستاهلش اني اعمل فيها كده واحسسها انها ملهاش لازمه لما ابص لغيرها، ومش محتاجين منك حاجة، وماما شغالة وبتصرف على نفسها، وكانت من كام سنه بتصرف علينا ولوحدها"

هاني حاول يتكلم بس إسلام رفع إيده وقال

"لو فاكر إن ليك لازمة في حياتنا، تبقى غلطان، إنت ملكش أي لازمة، ولا بتأثر على حياتنا أصلاً."

هاني صرخ

"إسلام!"

إسلام بصله بنظرة كلها وجع وغضب وقال

"إنت كأنك ميت بالظبط... إحنا عايشين من غيرك من زمان."

هاني مكنش مصدق الكلام ولا متوقع أنه ممكن يسمعه فيوم، عياله اللي كانوا صغيرين كبروا، كبروا وبقوا فاهمين كل حاجه، كان واقف مصدوم، وإسلام كمل بصوت عالي

"أنا لما كلمتك كلمتك علشان تيجي تطلق ماما وتمشي، لكن بلاش دور المصلح والضحية ده علشان خلاص، إحنا زهقنا!"

إسلام اخد نَفَسه وقال بحدة وهو بيشاور بأيده

"وكلنا هنا... بنكرهك!"

ايناس كانت واقفة على السلم، سامعة كل كلمة إسلام بيقولها، قلبها كان بيدق، نفسها تتكلم وتصرخ، بس نزلت بخطوات بطيئة، لحد ما وقفت قدام هاني، عينيها كانت مليانة دموع، بس ملامحها ثابتة، وكل اللي قالته بصوت واطي لكنه واضح

"طلّقني."

هاني بصّلها، وشه كان متشدّد، سكت لحظة وعينيه بتتحرك بين وش ايناس ووش إسلام، وبعدين قال بصوت مليان غضب

"مش هطلّق يا ايناس... طلاق؟ مش هطلّق، وهسيبك كده زي البيت الواقف... وفعلاً كنت غلطان إني مشيت من الأول."

بصّ على إسلام بنظرة كلها غضب وقال

"كان لازم أربيك."

إسلام ضحك بسخرية، ضحكة قصيرة تقيلة، وقال بثبات وهو باصص في عينه

"أنا متربي من ست بميت راجل، تربيتها أحسن من تربية عشرة زيك."

هاني عضّ على شفايفه بغضب، قرب منه ومسكه من قميصه بغيظ وقال وهو بيرفع صوته

"إنت فاكر نفسك مين عشان تكلمني كده؟! مين اداك الحق انك تتكلم كده اصلا؟!"

إسلام زقه بإيده بعيد وهو بيقول بحدة

" بلاش نجيب سيرة الحق، علشان لو كملت هتستحقر نفسك اكتر من كده، ولو مش هتطلقها قبل ما تمشي، أنا اللي هقف في وشك، وهرفع عليك قضية، وهنشوف هتعمل إيه في الآخر."

هاني ضحك ضحكة كلها سخرية وقال

"أعلى ما في خيلك اركبه، فاكرني هخاف منك يعني؟!"

إسلام زعق فيه، صوته عالي 

"أنا بس بفهمك وبعرفك... أن اللي ما قدرتش تعمله طول عمرك، أنا هعمله!"

فريده كانت واقفة بعيد، عينيها بتدمع وهي شايفة الدنيا بتولع قدامها، إيديها كانت بتترعش، قلبها كان بيدق بسرعة، مش قادرة تتحمل الكلام اللي بيتقال، بصّالهم بصدمة، دموعها نزلت من غير ما تاخد بالها، خرجت بسرعة من البيت، دموعها بتنزل غصب عنها، إيدها بتترعش وهي بتحاول تمسح دموعها بسرعة.

ايناس ندهت عليها بصوت مهزوز

"فريدة! استني...!"

لكن فريدة كملت، كأنها مش سامعة، إسلام بص لمامته بسرعة، شاف ملامحها اللي مكسورة وندمانة، وبعدين جري ورا فريده، خرج بسرعة من البيت وهو بينادي

"فريدة! استني! فريدة!"

فريدة كانت ماشية بسرعة، خرجت للشارع بسرعه وهيا بتجري، نفسها بيتقطع، الدموع مغرقاها ومش قادرة تشوف قدامها كويس، كانت بتحاول تلم نفسها لكنها فشلت، فضلت بتجري واسلام بيجري وراها، صوته وراها كان بيتكرر

"فريدة! استني! بالله عليكي استني!"

لكن هي مش سامعة، أو يمكن مش عايزة تسمع، كل اللي كانت حاسة بيه إنها عايزة تهرب... تهرب من البيت، من الذكريات، من وجع مامتها، من انهيارها، من كلام أبوها... من كل حاجة.

وهي بتجري، كانت بتعدي الشارع بسرعة، دموعها مغيمة عنيها، سمعت صوت فرامل شديد... وصوت كلاكس بيعلى...

لفت بسرعة، عينيها قفلت وهي شايفه نور العربية جاي عليها، وقفت مكانها، رجليها تقيلة، معرفتش تتحرك...

اللحظة دي كانت بطيئة جدًا... صوت الفرامل... صوت قلبها وهو بيصرخ جواها... عينيها الواسعة اللي دموعها نازلة منها... وإيديها اللي اترفعت قدامها لا إرادي.

وفي ثانية، سمعت صوت خبطة عنيف، جسمها اتحدف لقدام، مكانتش حاسه بأي حاجه وكأن جسمها نمِّل...

إسلام شافها بتتخبط... قدامه.

صوت الخبطة دوّى في ودانه، وكأن الدنيا وقفت، وقف فجأة، رجليه اتجمّدت، قلبه وقع مكانه.

فريده قدّامه...مرمية على الأرض.

صرخ بصوت عالي وهو مش مستوعب

"فريدة!!!"

جري ناحيتها، قلبه بينهار وهو شايفها مرمية، الناس حواليها دم كتير... جسمها مبيتحركش... إيدها مفكوكه ومرخيه، وقع على الأرض جنبها، صوته بيترعش وهو بينادي

"فريدة... فريدة لا... بالله عليكي لا..."

إيده كانت بتتهز وهو بيشيل راسها بإيده، بس الدم كان ملى إيده وهدومه، بص حواليه، الناس واقفين، حد بيكلم الإسعاف، الراجل اللي خبطها قرب وهو مرتبك، وقال بصوت متوتر

"أنا كلمت الإسعاف... في الطريق!"

إسلام بصله بعيون مولعة

"مش هستنى الإسعاف أنا!! أختي بتموت!!"

الراجل قرب وقال

"خلاص، تعال نشيلها بسرعة على عربيتي، نوصلها أقرب مستشفى."

إسلام حاول يشيلها، بس إيده كانت بتتهز، وحس إنه مش قادر يشيلها، كان خايف.

الناس حواليهم قالوا

"إحنا هنشيلها احنا" 

شالوها بالراحه وإسلام كان صوته بيترعش، ودموعه نازلة وهو بيقول 

"بالراحة... بالله عليكم، متوجعوهاش اكتر... بالله عليكم..."

شالوها بالراحه حطوها في العربيه وبسرعه وصلوا لأقرب مستشفى

نزل المسعفين بسرعة،إسلام رفع عينه فيهم وبيصرخ

"الحقوها! بتنزف كتير، بسرعه"

حطوها على الترولي، والدم بينزل من دراعها وراسها،

وهو بيجري جنبهم، إيده ماسكة إيدها رغم محاولاتهم يبعدوه

قال بقهر

"أنا معاها! مش هسيبها! افتحي عينيكي يا فريدة... افتحي عينيكي بس!!"

وصلوا لغرفة العمليات ودخلوها وهما بيمنعوا اسلام بالعافيه، لقا الممرض بيقفل الباب في وشه، مد إيده بسرعة قبل ما الباب يتقفل

"لو سمحت... بالله عليك... طمني... بالله عليك!"

الممرض بصله 

" الحاله حرجه، ادعيلها"

الباب اتقفل وهو رجع خطوتين، حاسس أنه هيتجنن، كان واقف قدام الباب بيتنفس بسرعة، قرب منه راجل كبير في السن وست باين عليهم الخضة ومتوترين، والست ماسكة إيد الراجل بقوة وعينيها باين فيها الندم والخوف.

الراجل قال 

" يبني، انا مكنتش قاصد... انا لقيتها في وشي مره واحده وحاولت اوقف بس العربية فلتت مني... احنا مستعدين نتحمل أي حاجه "

إسلام رفع عينه للراجل، نظرته كلها وجع وانكسار، ملامحه مكسوره، نفسه سريع وعينيه حمره

بصله بنظرة مطفية وقال

"أنا... أنا مش عايز منك حاجة... لو حصلها حاجة... لو حصلها حاجة أنا... أنا..."

صوته اختفى، الدموع غرقت وشه، إيده كانت بتترعش، مش عارف يعمل إيه، حاسس بالعجز

الست قربت خطوة، صوتها كان بيترعش

"والله ما كنا قاصدين... والله ما كنا قاصدين..."

لف حواليه زي التايه، عنيه بتدور على أي حد، عايز يتطمن، نفسه مش قادر ياخده، صدره بيتحشرج، كأنه بيتخانق مع الهوا علشان يتنفسه

الراجل قال بصوت مكسور

"احنا هنا... مش هنمشي... هنفضل هنا لحد ما نطمن عليها، ومستعدين نتحمل أي حاجة."

الست قربت خطوة تانية، مدّت إيدها تلمس دراع إسلام وبتقول

"حقك عليا يا ابني... ان شاء الله هتكون بخير "

رجع يبص للباب تاني، وبيتحرك لقدام ولورا، زي اللي مش عارف يقعد ولا يقف، صوت الصفارات جوة بيكسر قلبه أكتر،

الراجل والست قعدوا على كرسي بعيد، الست بتستغفر، والراجل حاطط وشه في إيده وبيدعي تكون بخير 

عند ايناس

كانت قاعدة على الكنبة في حالة هدوء غريب، عينيها ثابتة على الباب اللي اتقفل بعد ما هاني خرج اخيرا وقرر يمشي بدون رجعه، قلبها كان مقبوض، فريده خرجت وبعدها اسلام ولسه مرجهوش، كانت بتسأل نفسها هما فين، اخدت فونها ورنت على اسلام، رن كتير، وإسلام رد أخيرًا، صوته كان مبحوح ومخنوق

"أيوه يا ماما..."

قالها بهدوء وهو بيحاول يبان طبيعي

"إسلام... إنتو فين؟ فريدة راحت فين؟ إنتو مجيتوش ليه لدلوقتي؟"

سكت، نفسه بس اللي مسموع في السماعة، مش عارف يبدأ منين، مش عايز يقولها، بس مش هينفع يخبي عنها

قال بصوت هادي على قد ما يقدر

"ماما... اسمعيني... مش عايزك تقلقي"

صوته خلاها تقف من مكانها فجأة وهيا بتقول بقلق 

"في إيه يا إسلام؟ في إيه؟!!"

قال بسرعة

"ماما بالله عليكي... اهدى... فريدة... فريدة ، عملت حادثه بس هتكون كويسه"

ايناس حست الأرض بتتهز تحت رجليها، قالت بصدمه

"حادثه؟! يعني إيه حادثه؟! فريدة فين يا إسلام؟!! فريدة فين؟!! بنتي حصلها ايه رد عليا؟!!"

صوته كان بيرتعش وهو بيتكلم

"انا مستني حد يطلع يطمني عليها، إحنا في المستشفى اللي قريبه من البيت، انتي بالله عليكي اهدي... فريدة هتكون بخير إن شاء الله..."

قفلت مع إسلام بسرعه، وخرجت بسرعه من البيت وهي بتدعي أن فريده تكون بخير

وقفت اول تاكسي قابلها بسرعه وركبت وهيا حاسه ان قلبها هيطلع من مكانه، قربت توصل، الموبايل في إيديها، اتصلت بإسلام وهي في التاكسي، صوتها كان مبحوح

"إسلام... فين بالظبط يا إسلام؟!"

رد عليها بسرعة 

"عند باب الطوارئ يا ماما..."

قالت 

" انا خلاص وصلت، خليك عندك"

قفلت بسرعة وهي بتحاول تاخد نفسها، التاكسي وقف قدام المستشفى، نزلت بسرعة وهي مش شايفة قدامها من الدموع، جريت ناحية باب الطوارئ، شافت إسلام واقف قدام الباب، هدومه كلها دم...

وقفت مكانها ثانية، شهقة خرجت منها غصب عنها، وبعدين جريت عليه وهي بتقول بصوت عالي

"إسلام!!!"

بص لها إسلام بعينين حمرا من كتر الدموع، مش قادر يتكلم، شفايفه بتتهز.

مسكته من دراعه

"فين فريدة يا إسلام؟!! ده دمها... دمها ده؟!! رد عليا يا إسلام!!!"

إسلام حاول يهديها وهو بيترعش

"ماما... بالله عليكي... اهدى... فريدة جوة في العمليات... بيحاولوا... بس... بس هتكون بخير إن شاء الله... هتكون بخير يا ماما..."

صرخت بصوت عالي

"عايزة أشوفها... عايزة أشوفها دلوقتي!!!"

قال وهو بيحاول يمسك إيديها اللي بتترعش

"مش هينفع دلوقتي... الدكتور قال الحالة حرجة... ادعيلها بس يا ماما... بالله عليكي... ادعيلها..."

إيناس انهارت، دموعها نازلة، مسكت وشها بإيديها وهي بتدعي ربنا بقهر

قعدت على الكرسي اللي جنب الباب، باصه للباب، كل ثانية بتمر كانت نار، وكل اللي في قلبها دعاء

الدقايق كانت بتمر ببطء، كل شوية عينهم تتحرك للباب، وكل ما الباب يفتح يقفوا بسرعة وبعدين يكتشفوا انها ممرضه او ممرض خارجين عادي

إيناس كانت قاعدة على الكرسي، ماسكة إيد إسلام وهيا بتدعي، وبعد شويه الباب اتفتح وخرج الدكتور، وشه باين عليه الإرهاق والجدية.

إيناس وقفت بسرعة، عينيها مليانة دموع، قالت بسرعه

"بنتي عاملة إيه؟! طمني بالله عليك!!"

إسلام كان واقف جمبها، عينيه مركزة في الدكتور مستنيه يتكلم وقلبه بيدق جامد

الراجل والست اللي خبطوا فريدة قربوا يسمعوا الدكتور، كانوا واقفين بحرج، باين عليهم التوتر

الدكتور بصلهم بهدوء وقال

"الحالة حرجة جدًا... النزيف كان شديد جدًا... حاولنا نوقف النزيف وفعلاً وقفناه، بس..."

إيناس قالت برعب

"بس إيه؟!!!"

الدكتور أخد نفس وقال

"فقدت كمية دم كبيرة جدًا... محتاجين دم بشكل عاجل، ودمنا هنا مش كافي، عندنا كيس واحد بس، ومش هيكفي."

إسلام مسك شعره بعصبية

"طيب نجيب دم منين؟!! قول نعمل إيه؟!! اروح اجيب منين طيب"

الدكتور قال

"لو في حد من العيلة نفس الفصيلة، محتاجينه يتبرع فورًا... ضروري جدًا وبسرعه"

إيناس قالت بسرعه

"أنا... أنا نفس فصيلتها... خدوا مني... خدوا مني الدم كله لو عايزين... المهم بنتي تعيش... خدوا مني بالله عليكم!!"

الست قربت وقالت

"إحنا ممكن نساعد بأي حاجة... هنتبرع"

الدكتور رفع عينه وقال

"جزاكم الله خير، بس لازم نعرف فصيلة دمكم علشان لو مطابقة نسحب"

الراجل قال بسرعة

"فصيلتي O+، وهيا كمان O+."

الدكتور هز راسه وقال بأسف 

"للأسف مش متطابقة "

ايناس قالت بلهفه

" انا متطابقة يا دكتور"

الدكتور حاول يهدّيها

"هنسحب منك يا مدام، بس مش هنقدر نسحب كميات كبيرة."

إيناس بصت له بترجّي

"مفيش حاجة أهم من فريدة... خد مني اللي تقدر عليه"

الممرضة جت بسرعة، خدت إيناس علشان تدخل غرفة التبرع.

إيناس كانت قاعدة على الكرسي، إيديها بتترعش، والممرضة بتحاول تهديها وهي بتربط الدراع علشان تسحب الدم.

الممرضة قالت بهدوء

"مدام حاولى تهدي، ان شاء الله هتكون كويسه"

الممرضة بدأت تسحب، ولما خلصت، الممرضة ساعدتها تقف، أدّتلها عصير وقالتلها

"اتفضلي اشربي، محتاجه تعوضي دم"

خرجت إيناس من غرفة التبرع، راحت ناحية غرفة العمليات، اسلام راحلها وقال بصوت متوتر 

"انتي كويسة يا ماما؟!"

إيناس هزت راسها 

"أنا كويسة... كويسه المهم فريده"

خرج الدكتور من باب العمليات، رفع نظره ناحية إيناس وإسلام وقال بصوت جدي

"إحنا محتاجين ٦ أكياس دم ومفيش دلوقتي غير ٢، لازم نجيب ٤ كمان ضروري"

إيناس قربت بسرعة وقالت 

"طب ما أنا اتبرعت، خدوا مني تاني، خدوا مني لحد ما تبقى كويسة."

الدكتور هز راسه وقال بصوت هادي

"مينفعش يا مدام، إحنا أخدنا منك كيس، مينفعش ناخد أكتر، ده خطر على صحتك."

سكت لحظة وقال

"لازم تجيبوا ٤ أشخاص بنفس فصيلتها بسرعة علشان نتدارك الوضع، قدامكم ساعة بالكتير، لازم نلحقها."

مشي الدكتور وسابهم واقفين، ايناس قلبها وقع في رجلها، هل ممكن بنتها تروح منها علشان شوية دم؟!

إسلام قرب منها بسرعة، كان صوته متوتر لكنه حاول يثبت نفسه 

"ماما، أنا هكلم كل صحابي، اكيد هلاقي حد نفس الفصيلة، بالله عليكي اهدي."

إيناس مسحت دموعها بسرعة وقالت وهي بتحاول تلم نفسها

"وأنا هكلم صابرين... أكيد حد من ولادها نفس الفصيلة..."

اخدت نفس طويل ورفعت الموبايل، دورت على رقم صابرين بسرعة ورنت 

لحظات وصابرين ردت

"ألو... إيناس؟"

إيناس صوتها كان بيترعش

"صابرين... فريدة... فريدة عملت حادثة... حالتها حرجة... في العمليات دلوقتي... محتاجه دم بسرعه، اكيد حد عندك نفس الفصيله بتاعتها اكيد"

صابرين اتصدمت وقامت وقفت وقالت

"إيه؟! إنتوا فين دلوقتي يا إيناس؟!"

إيناس خدت نفس وقالت بسرعة

"إحنا في المستشفى اللي جنب البيت عندنا... بس... بس يا صابرين، فريدة محتاجة نقل دم ضروري... بسرعة..."

صابرين قالت بسرعة

"طب فصيلة دمها إيه يا إيناس؟!"

إيناس بلعت ريقها وقالتلها فصيلتها

صابرين ردت بسرعة

"تيم ويونس نفس الفصيلة!"

إيناس قالت براحه "الحمد لله... الحمد لله..."

صابرين قالت بحسم

"هجيب تيم وهكلم يونس، وهنيجي حالًا، مسافة الطريق يا إيناس... اثبتي... اثبتي فريدة هتعدي منها بإذن الله."

إيناس قالت

"مستنياكي يا صابرين... بالله عليكي بسرعة..."

صابرين بسرعه رنت على يونس وهي بتاخد نفس عميق كل شوية علشان تقدر تتكلم.

يونس رد في الآخر 

"ألو... أيوة يا ماما؟"

صابرين صوتها خرج متلغبط وهي بتحاول تسيطر على نفسها

"يونس... يونس يا حبيبي... فريدة... فريدة عملت حادثة..."

يونس قال بسرعه

 "إيه؟! حادثة إيه يا ماما؟! إنتي بتقولي إيه؟! انا لسه مكلمها من شويه "

صابرين قالت بسرعة

"عملت حادثة وحالتها حرجة... هيا في المستشفى دلوقتي..."

يونس قال بصوت متوتر

"فين؟! فين يا ماما؟! إنتي معاهم؟!"

صابرين قالت 

"لا... لسه، إيناس مكلماني، في المستشفى اللي جنب بيتهم... والدكتور بيقول محتاجة دم ضروري."

يونس قال بسرعة

"طب فصيلتها إيه؟! محتاجة دم قد إيه؟!"

صابرين قالت

" زيك انت وتيم، نفس الفصيله "

يونس أخد نفس وقال

"طب خلاص، أنا هروح المستشفى على طول... وإنتي قولي لتيم وخلّيه يروح، إحنا هنلحقها بإذن الله."

صابرين قالت بسرعة

"أنا هقوله حالًا... متتأخرش يا يونس بالله عليك."

يونس قال

 "خلاص يا ماما، مسافة الطريق."

صابرين خرجت بسرعة من أوضتها بعد ما قفلت مع يونس، قلبها كان بيدق بعنف، خطواتها كانت سريعه وهي رايحه ناحية أوضة مكتب تيم اللي كان قاعد على مكتبه، عينيه مجهدة، بيحاول يركز على قد ما يقدر.

فتحت الباب بسرعة، وهو رفع عينه ليها باستغراب، قال ببرود 

"خير؟ في إيه يا ماما؟"

قالت بسرعه

"تيم... فريدة... فريدة عملت حادثة يا تيم..."

سكت، كأنه مسمعهاش، الورقة اللي في إيده وقعت، ايده بقت بتترعش وهو مش مستوعب، رفع وشه، نفسُه اتسحب بقوة، صوت قلبه بقى مسموع جوا ودانه، وقف بسرعة، الكرسي وقع وراه وهو بيقول بصدمه

"إيه... إيه اللي بتقوليه ده؟ حادثة إيه؟! ازاي؟!"

صابرين قربت منه وقالت 

" فريدة في المستشفى، حالتها حرجة... محتاجة دم... والدكتور قال لازم حد يتبرع بسرعة... إنت ويونس نفس فصيلتها يا تيم..."

تيم اتجمد مكانه لحظة، وكان حاسس بإحساس عمره ما حسه قبل كده، اتحرك بسرعة رهيبة، فتح درج مكتبه بسرعة وطلع مفاتيح عربيته، وقع المفتاح من إيده، أخده تاني بسرعه وخرج بسرعة بدون ما يغير هدومه حتى، صابرين خرجت وراه بسرعه تحاول تلحقه، ركبت جنبه بسرعة قبل ما يتحرك

داس بنزين بأقصى سرعة، صابرين مسكت طرف الكرسي بخوف وهي بتقول

"تيم، في ايه للسرعه دي اهدى شويه "

تيم كان سايق بأقصى سرعة فعلا، العربية بتطير على الطريق، صوت الموتور عالي، وصابرين ماسكه طرف الكرسي بقوة، بتحاول تمسك أعصابها، كل شوية تبصله، بس هو باصص قدامه، نفسه بيطلع وينزل بسرعة، إيده ماسكة الدريكسيون بقوة لدرجة أن عروقه كانت بارزه.

وصلوا قدام المستشفى، لسه العربية موقفتش كويس، تيم نزل منها بسرعة رهيبة، الباب خبط في الرصيف وهو بيفتحه بعنف، وصابرين نزلت وراه وهي بتناديله، دخل المستشفى بسرعه، عينيه بتدور في المكان لحد ما شاف إسلام واقف بعيد، قرب بسرعة وهو بيقول بصوت عالي، صوته فيه حدة ولهفة

"فريدة فين؟! هي فين؟! هيا كويسه"

إسلام رفع عينه حاول يرد

"لسه... لسه في العمليات... الدكتور قال محتاجين دم... المفروض ناقص ٤ أكياس، انت كيس ويونس كيس واتنين من صحابي جايين بعد شويه"

تيم بص حواليه، وقال بصوت خشن

"فين... فين المكان اللي هتبرع فيه؟!"

إسلام نده للممرضة، تيم راح وراها بخطوات سريعة، شمر دراعه وهو بيبص للأرض، مفيش ذرة تردد. 

الممرضة جهزت الإبرة، وهو شمر دراعه ومده ليها بعنف

"يلا... بسرعة."

بدأت تسحب، بصت للعداد وقالت

"مش هنقدر نسحب أكتر من كده."

تيم رفع عينه بسرعة، صوته عالي ووشه متعصب

" مفيش حاجه اسمها مش هتقدري، اسحبي لحد ما تكفي الدم اللي هيا محتاجاه"

الممرضة قالت بصوت حازم

"كده غلط عليك! مش علشان ننقذ حد نخسر حد تاني!"

اتشنج، نفسه بقى عالي، وقال بغضب

"ملكيش دعوة... اسحبي وخلاص!"

باب الاوضه اتفتح بسرعة، يونس دخل وهو بينهج، عيونه مليانة خوف ووشه متوتر، قال بصوت عالي

"أنا هنا! أنا هتبرع..."

الممرضة بصتله بسرعة وقالت

"اسمك إيه وفصيلتك؟"

يونس قال وهو بيحاول يلم نفسه

"يونس... فصيلتي نفس فصيلتها..."

الممرضة قالت

"لازم تحليل سريع قبل السحب."

يونس مد دراعه بسرعة وقال

"يلا... بس بسرعة بالله عليكي..."

جهزت الإبرة وخدت منه العينة بسرعة، واتحركت بسرعة ناحية الجهاز، وقفت لحظات، صوت الجهاز بيطلع وهي بتبص للنتيجة، وشها اتغير، بصت ليونس وقالت بصوت واطي بس حازم

"مينفعش نسحب منك دلوقتي."

يونس اتجمد وقال بصوت متقطع

"إيه؟! ليه؟!"

الممرضة قالت وهي بتتنهد

"في نسبة كحول عالية في جسمك، مينفعش نسحب منك دم، هيكون خطر عليها"

يونس فتح عينه بذهول، رجع خطوة لورا

قال بصوت مبحوح

" طب اتصرفي، لو هينفع اي حاجه حتى"

الممرضة هزت راسها وقالت

"مش بإيدي، مينفعش، دي حياة بني آدم."

يونس بص لتيم، لقا تيم بيبصله بنظرة كلها لوم، قال بصوت واطي، صوته جامد بس مهزوز

"جدع... جدع اوي..."

تيم رجع راسه لورا وهو قاعد على الكرسي، يونس خرج من الاوضه وهو حاسس بندم

تيم بص للممرضه وقال 

" اسحبي مني، انا هكمل الباقي"

رفضت وقالت

"مقدرش! سحبنا كفايه، أكتر من كده خطر عليك."

تيم بصلها بنظرة كلها تهديد، صوته كان جامد وهو بيقول ببطء

"قولتلك... اسحبي... انا مش فارق معايا."

الممرضة اتوترت وقالت

"مش هقدر، والله مش بإيدي..."

تيم قام من على الكرسي، ضرب الكرسي برجله بعيد وقال بصوت عالي

" وانا بقولك اسحبي، انتي مالك انتي "

الممرضة اتوترت، خرجت بسرعه ندهت بصوت عالي 

"دكتور! دكتور لو سمحت!"

الدكتور دخل بسرعة، قال بصوت هادي

" في ايه؟!"

الممرضة قالت بسرعة

"هو مصمم نسحب منه تاني... ومش راضي يفهم أن ده خطر!"

تيم بص للدكتور، عينيه كلها إصرار وقال بصوت خشن

" انا حر، محدش ليه دعوه"

الدكتور قرب خطوه، قال بهدوء

"لو ده قرارك، لازم تمضي إقرار إنك المسؤول لو حصل أي حاجة... المستشفى مش مسؤولة."

تيم قال بسرعه 

" موافق، همضي"

الدكتور بص للممرضة، وهي جابت ورقة بسرعة، إيد تيم كانت بتترعش وهو بيمضي اسمه بخط مهزوز

الدكتور أخد الورقة وقال للممرضة

" تمام"

تيم رجع قعد على الكرسي وهو بيتنفس بسرعة، الممرضة بدأت تسحب الدم ، تيم حس الدنيا بتلف بيه، الرؤية بتتهز قدامه، بس كان مسك طرف الكرسي بقوة.

سحبت لحد ما الجهاز بيّن إن جسمه بدأ ينهار، جابتله عصير بسرعة

"اشرب... اشرب حالًا"

تيم أخد العصير بإيده اللي كانت بتتهز، بص للعلبه لحظة وهو بيتنفس بسرعة، شرب كميه صغيره ،كان باين عليه الدوخة وهو بيرجع ضهره للكرسي.

الممرضة قالت بهدوء

"هتحتاج تقعد شوية هنا لحد ما جسمك يستقر، متقومش دلوقتي."

تيم بصلها بنظرة ثابتة وقال بصوت واطي 

"كفاية كده؟... كده الدم هيكفي؟"

الممرضة أخدت نفس وقالت 

"إن شاء الله، خلاص، دي الكمية اللي نقدر نسحبها، متقلقش هتكفي"

تيم قعد ساكت، بيحاول ينظم نفسه، حس برجليه تقيلة وراسه اتقل، عضلاته كانت مرخية.

بعد شويه قام وقف ببطء، الممرضة قالت بسرعة 

"استنى... إنت مش مستقر، لازم تقعد أكتر وتشرب العصير كله."

تيم قال بصوت هادي

"عايز اتطمن عليها"

قالتله بلطف

" لسه شويه، لو حصل حاجه هقولك

اتنهد، شرب باقي العصير، وشه كان باين عليه التعب، عينه مغمضة وهو بيحاول يتنفس.

الممرضة بصتله وقالت 

"استنى 10 دقايق، بعد كده تقدر تخرج"

تيم مردش، بس اكتفى بهزة خفيفة.

فضل قاعد مكانه، مغمض عينه، بيحاول يسيطر على الدوخه اللي حاسس بيها

يونس خرج من أوضة التبرع، لقا صابرين واقفة مستنيه جنب ايناس، عينيها مليانة قلق ولهفة، قربت منه بسرعة وقالت بصوت متوتر

"يونس؟! طمني... اتبرعت؟!"

يونس وقف مكانه لحظة، بص بعيد وهو بياخد نفس، وقال بصوت واطي

"مخدوش مني..."

صابرين بصتله بصدمة، سألته

"ليه؟!"

يونس عض شفايفه وقال وهو بيحرك إيده بعصبية 

"في كحول...قالوا مينفعش... لو اتسحب مني ممكن يضرها..."

صابرين بصتله لحظة، وقالت وهي بتحاول تتمالك نفسها

"يا يونس... يا يونس..."

يونس قال بسرعة، صوته مبحوح

"ماما... والله ما كنت أعرف... كنت فاكركوا مش هتحتاجوني... والله ما كان قصدي اكيد... اعرف منين انا..."

صابرين مدت إيدها ولمست دراعه بلطف وقالت 

"خلاص يا حبيبي... مش وقته دلوقتي... المهم نلاقي حد غيرك"

خرج تيم، خطواته كانت تقيلة، عينيه شايفة الناس بس مش شايفاهم بوضوح، الرؤية مهزوزة، شد نفسه، وقف في مكانه بياخد نفس عميق، حس إنه مش قادر يملى صدره بالهوا كويس، إيده كانت بتترعش وهو بيحطها في جيبه، عايز يخبي أي علامة تعب على وشه.

مشى ببطء ناحية الكراسي اللي قدام العمليات، محدش واخد باله إنه مش ماشي ثابت.

قرب منهم، صابرين أول ما شافته بصتله وقالت 

"اتبرعت؟"

هز راسه بهدوء وهو بيحاول يثبت نفسه، قال بصوت مبحوح

"آه... خلصت."

مد إيده وسند نفسه على الحيطة من غير ما حد يلاحظ، حس برجليه بتضعف تحته، بس رفض يقعد، حاسس لو قعد مش هيقدر يقوم تاني.

نبضه كان عالي وبيخبط في ودانه، حاسس أن الدنيا بتلف حواليه، والأصوات بقت بعيدة شوية، حاول يركز نظره على الأرض علشان ميزغللش.

إسلام قرب منه وقال 

" شكرا يا تيم... والله ما عارف أقولك إيه."

تيم ابتسم ابتسامة باهتة، مردش، بس رفع إيده، وقال بصوت واطي

"المهم تبقى كويسة..."

دخلوا اتنين من صحاب إسلام بسرعة، كان باين عليهم القلق، اسلام قرب منهم بلهفه وهما كانوا مستعدين يتبرعوا، اسلام نده للمرضه.

الممرضة بصتلهم وقالت بهدوء

"مفيش داعي خلاص... مش محتاجين تبرعات تانية."

كلهم بصوا لبعض باستغراب، صاحب اسلام قال 

"إزاي يعني؟! ما أنتوا كنتوا محتاجين دم ضروري!"

إسلام قرب منها وقال وهو متوتر 

"ليه؟! مش كنتوا بتقولوا محتاجين أربع أكياس؟!"

الممرضة بصت لتيم بسرعة، وبعدين رجعت تبص لإسلام وقالت

"الأستاذ اتبرع بالكميّة كلها."

الكلام وقع في المكان زي الصدمة، صابرين اتجمدت مكانها، بصت لتيم بذهول، قالت بسرعه 

"تيم... إيه؟! إنت عملت ايه؟"

إسلام بص لتيم، وشه اتشد وقال

"إنت اتبرعت... لوحدك؟! إنت مجنون؟!"

تيم كان واقف ناحية الحيطة، نفسه سريع، راسه بقت تقيلة، وكل جسمه بيترعش، حاول يرد بصوت واطي

"مكانش في وقت... كان لازم."

رجليه بدأت تضعف، حط إيده على الحيطة علشان يسند نفسه، بس حس إن الحيطة بتتحرك قدامه، العرق كان سايح على وشه، عينه بقت تغمض وتفتح، وكل الأصوات حواليه بقت متقطعة.

حاول ياخد نفس عميق، بس النفس اتحبس في صدره، رفع عينه يبص لصابرين، شاف ملامحها اللي مليانة قلق، بس صوته طلع واطي جدًا

"م... ما تقلقيش... انا كويس"

حس إن رجليه خلاص مش شايلاه، وقع على ركبته، حاول يقوم بس معرفش

إسلام جري عليه بسرعة وهو بيقول

"تيم! تيم فوق! حد يجيب دكتور بسرعة!"

بس تيم كان فقد وعيه تماما....

إسلام قرب منه، هز كتفه يحاول يفوقه، صابرين كانت حاسه انها هتتجنن

الممرضة دخلت بسرعة ومعاها جهاز قياس الضغط، قاست ضغطه بسرعة وكان واطي جدًا، بصتلهم وقالت

"هو فقد وعيه بسبب انخفاض الضغط... محتاج محلول فورًا."

جابوا ترولي بسرعة، شالوه عليه، وصلّوا المحلول في إيده، اتنقل لغرفة الملاحظة، كان نايم ووشه شاحب جدًا، إيده متعلقة فيها المحلول، وبيتنفس ببطء.

صابرين قربت من الباب تبص عليه، قلبها واجعها وهي شايفاه بالمنظر ده، بس الممرضة طمّنتهم 

"هيفوق بعد ما ضغطه يتحسن بإذن الله، هو بس محتاج وقت وسوائل تعويض، الكميه اللي اتبرع بيها كانت كبيره "

صابرين فضلت واقفه قدام باب أوضة الملاحظة، عينيها مليانة قلق وهي بتبص على تيم، شافته وهو نايم ووشه شاحب جدًا، المحلول متعلق في إيده، وكان بيتهز بخفة مع نفسه البطيء.

إيناس قربت منها، لمست دراعها بخفة وقالت بصوت هادي

"هيبقى كويس إن شاء الله... محدش بيعمل اللي عمله ده غير وهو قلبه كبير."

صابرين أخدت نفس طويل، وحاولت تمنع دموعها تنزل، وقالت بصوت مبحوح

" ربنا يستر "

بعد ساعة، تيم كان فاق، المحلول خلص، والدكتور دخل يطمن عليه، بص للمؤشرات وقال

"تمام كده، الضغط رجع طبيعي، بس بلاش تقوم بسرعة أحسن ليك"

تيم اكتفى بهزة راس بسيطة.

خرج الدكتور من غرفة الملاحظة، شاف صابرين واقفة قدام الباب، قربت منه بسرعة، صوتها كله قلق ولهفة

"دكتور... طمني، تيم عامل إيه؟!"

الدكتور ابتسم ابتسامة بسيطة وقال بهدوء

"اطمني يا مدام، هو كويس الحمد لله، الضغط رجع طبيعي، لو عايزة تدخليله اتفضلي."

صابرين قالت بسرعة

"شكرًا يا دكتور."

دخلت الأوضة بسرعة، لقت تيم قاعد على السرير، المحلول خلاص اتفصل، شكله تعبان شوية، أول ما شافها حاول يظبط قعدته وقال بهدوء

"ماما..."

صابرين وقفت قدامه، بصتله بحدة وقالت بصوت مخنوق

"إيه اللي عملته في نفسك ده يا تيم؟! ليه كده؟!"

تيم حول نظره بعيد عنها وقال بنبرة هادية وهو بيحاول يقفل الكلام

"مفيش يا ماما، الموضوع خلص... حد محتاج وأنا كنت أقدر أساعد، خلاص."

صابرين قربت خطوة وقالت

" بس ده غلط عليك، كان ممكن تحصل مضاعفات اكتر من كده"

تيم رجع يبصلها وقال بنبرة ثابتة

"بس محصلش، وأنا كويس أهو... سيبي الموضوع يعدي."

حاول يقوم من على السرير، هي مدت إيدها تمنعه وهيا بتقول

"استنى يا تيم، الدكتور قال خليك شويه"

رفع عينه ليها وقال بهدوء

"أنا كويس يا ماما، خلاص... عايز أخرج."

مشي على مهله ناحية الباب، فتح الباب وخرج، أخد نفس عميق وهو بيبص للممر، مشي بخطوات ثابتة ناحيتهم، أول ما شافوه واقف، كلهّم وقفوا بسرعة، ايناس قربت وقالت

"إنت كويس يا حبيبي؟"

اسلام قرب وقال بصوت هادي

"عامل إيه دلوقتي؟ كويس؟"

تيم وقف مكانه، نظرهم كلهم عليه، هو مش بيحب يكون محور اهتمام أو شفقة، عدل وقفته وقال بنبرة جافة، صوته هادي بس قاطع

"أنا بخير... مفيش داعي لكل ده."

بص على إسلام وهو بيكمل بنفس النبرة

"ركز في أختك، هي اللي محتاجة الاهتمام دلوقتي."

قاطعهم خروج الدكتور من غرفة العمليات، إيناس قربت بسرعة وقالت 

"دكتور... طمني... فريدة؟"

الدكتور أخد نفس وقال

"الوضع استقر الحمد لله، وقفنا النزيف، وهي عدت مرحلة الخطر."

إيناس دموعها نزلت بسرعة، قالت

"الحمد لله... الحمد لله يا رب."

إسلام قرب خطوة وقال

"ممكن نشوفها؟"

الدكتور هز رأسه وقال بنبرة هادية

"لسه مش دلوقتي، هي تحت تأثير البنج ومش هتفوق دلوقتي، خلوها ترتاح، وأول ما تصحى هندخلكم واحدة واحدة، إحنا دلوقتي هننقلها اوضه عاديه "

فريـدة اتنقلت أوضة عادية.

لحظة ما خرجت من العمليات، تيم شافها، عينه ثبتت عليها، قلبه رق بطريقة غريبة وهو شايفها على السرير، وشها كان شاحب، وأنفاسها هادية، شاف الدم اللي على ضمادتها، واتنقل جواه إحساس غريب معرفش يشرحه.

إيناس جريت عليها بسرعة، كانت عايزة تمسك إيدها، بس الممرضين منعوها، قالتلهم بصوت متوسل

"ثواني بس... عايزة أطمن عليها."

بس الممرض قال

"مينفعش دلوقتي."

اتنقلت الأوضة، والدكتور قال إنها ممكن تفوق على الصبح

تيم كان واقف باصص من الشباك عليها، مش قادر يبعد عينه عنها، عايزها تفتح عينيها وتكون بخير

إسلام كان واقف بعيد بيراقبه، ومش فاهم ليه تيم قلقان عليها بالشكل ده، بس قرر إنه ميشغلش باله دلوقتي، كل اللي يهمه دلوقتي إن أخته تبقى بخير.

جه الصبح أخيرا، لسه الوضع زي ما هو باستثناء صحاب فريده اللي جم اول ما عرفوا، وحسام اللي عرف وقرر يكون موجود، وسالي

الكُل كان موجود.

إيناس قاعدة على الكرسي قدام باب الاوضه، شكلها مرهق جدًا وصابرين قاعده جنبها.

إسلام قاعد على الأرض جنبهم وتيم كان واقف بعيد ويونس واقف جنبه ومعاهم حسام

سالي كانت قاعدة جنب إيناس وصابرين

أصحاب فريدة كانوا واقفين بعيد والكل مستني والجو مشحون

خرج الدكتور وقال بصوت ثابت

"مفيش داعي للزحمة دي، خلّوا عيلتها بس تفضل، الباقي ممكن ييجوا في وقت تاني على مدار اليوم"

صحاب فريدة بصوا لبعض، كانت نظراتهم كلها قلق، بس فهموا وسابوا المكان بهدوء، يسر كانت واقفة مترددة، باصة لفريدة من بعيد، مش عايزة تمشي.

إسلام قرب منها وقال بصوت هادي

"مفيش داعي يا يسر... لما تفوق إن شاء الله هكلمك على طول."

يسـر بصتله شوية بس هزت رسها ومشيت مع الباقي.

صابرين بصت لتيم ويونس وقالت 

"خدوا سالي وامشوا، انتوا هنا من بالليل"

تيم رفع عينه بسرعة وقال بحدة

"لاء"

صابرين بصتله باستغراب بس سكتت، قالت ليونس بصوت واضح

"امشي انتي يا يونس مع سالي."

يونس قال 

" لما تفوق يا ماما حتى، نتطمن عليها وبعد كده نمشي"

أما حسام، فكان واقف، مش عارف يتصرف، كان عايز يفضل، لكن إسلام قرب منه وقال

"مفيش داعي لوجودك، شكراً إنك جيت، هبقى اطمن الكل لما تفوق"

حسام هز راسه ومشي مضطر

تيم واقف لسه عند الشباك، يونس قرب منه وقال

" بقالك كتير واقف، متعبتش؟!"

تيم قاله بإيجاز

" لاء"

يونس قاله باستغراب

" وواقف ليه اصلا؟ ايه اللي جابرك؟!" 

تيم بصله وقال بحده

" لما تفوق ابقي وقتها اقعد، بطل رغي بقا"

يونس زفر وقال

"ومن إمتى يهمك يعني؟ ده إنت حتى مش بتحبها ولا بتقبل وجودها."

تيم رفع عينه ليونس وقال بنبرة هادية

"مش وقته الكلام ده."

يونس سابه ورجع يقعد، أما تيم فضل واقف، وكل ما حد يقوله يقعد، كان بيرد بنفس الإجابه 

" انا كده مرتاح"

مرت لحظات من الصمت، فريدة حركت إيدها ببطء على السرير، روموشها اتحركت وعينيها فتحت شوية، غمضتهم وفتحتهم تاني وهي بتاخد نفس بسيط كأنها بتحاول تستوعب المكان.

تيم شافها بتفوق، قلبه دق بسرعه وقال بصوت واضح

"فاقت."

الكل رفع راسه بسرعة، ايناس قامت بلهفه، إسلام قرب للباب، بيحاول يشوفها كويس من ورا الإزاز، وقال بصوت هادي

"الحمد لله يا رب."

الممرضة عدت جنبهم وقالت

"ممكن تدخلوا تشوفوها، بس ٥ دقايق بس"

إيناس دخلت الأول بسرعه، كانت خطواتها سريعة، قربت من السرير، إيدها لمست إيد فريدة بهدوء، وقالت بصوت ناعم

"حمد لله على السلامة يا قلبي."

فريدة بصتلها بنظرة مرهقة، صوتها كان واطي جدًا وهي بتقول

"ماما..."

إيناس ابتسمت ابتسامة فيها راحة، حركت إيدها على شعر فريدة بحنان.

إسلام دخل وراها، قرب منها وقال

" وقعتي قلبي عليكي، كنت حاسس اني هموت"

فريدة ابتسمت بخفة، غمضت عينيها تاني وهي بتحاول تريح نفسها

يونس قرب منها، وقف عند طرف السرير وقال بخفة وهو بيرفع حاجبه

"ايه يا ديدا، عملتي حادثة علشان نجيلك زيارة جماعية ولا إيه؟"

فريدة ابتسمت بخفة، وقالت بصوت واطي وهي بتحاول تضحك

"عشان أعرف مين بيحبني فعلاً."

سالي وقفت جنب إيناس، قالت بابتسامة

"حمد لله على السلامة يا فريدة."

صابرين قربت شوية وقالت

"ربنا يحميكي يا بنتي ويقومك بألف سلامة."

تيم كان واقف بره، إيده في جيبه، باصص عليهم من الشباك، ملامحه عادية، بس عينه كانت ثابتة عليها، دخل بهدوء بس وقف عند الباب، ساند ضهره على الحيطه وايده في جيبه، عينيه ثابته عليها، كان بيراقبها وهي بتتكلم مع الكل، وهي كانت مركزة معاهم ومش واخدة بالها إنه موجود أصلًا.

إسلام كان واقف جنبها، سألها بهدوء 

" في حاجه بتوجعك؟!!حاسه بتعب؟!!"

فريدة حركت راسها بنفي وقالت

"أنا كويسة... متقلقوش."

وسط الكلام والضحك الخفيف، فريدة لفت عينيها في الأوضة، نظراتها وقعت على تيم اللي كان واقف في آخر الأوضة، ساند نفسه على الحيطة وعينيه عليها.

لما شافته، ابتسمت بخفة، ابتسامة هادية جدًا

تيم حس إنها أخيرًا شافته، اتحرك من مكانه خطوة صغيرة، حمحم بخفة وقال بصوته الهادي 

"حمد لله على سلامتك."

وبعدين لف وخرج من الأوضة بهدوء، وقفل الباب وراه.

فريدة فضلت باصة ناحية الباب اللي خرج منه لحظة، ابتسامتها لسه موجودة على وشها، بس كانت ابتسامة خفيفة، رجعت تبص للي حواليها بسرعة علشان محدش ياخد باله، بس قلبها دق جامد للحظة، مش قادرة تنكر إنها كانت مستنية تشوفه وأنها كانت بتدور عليه بعينيها

وهي مركزة مع كلام إسلام ويونس حواليها، رجعت تبص ناحية الباب تاني يمكن يدخل

رجعت تنفخ بهدوء، وركزت مع باقي الموجودين.

لما تيم خرج من الأوضة، وقف شوية في الكوريدور، أخد نفس عميق، وحس إنه مش فاهم نفسه.

مرر إيده في شعره بتوتر، وهو حاسس بقلبه بيدق بسرعة غريبة، محصلتش معاه قبل كده.

حاول يقنع نفسه إنه طبيعي، بس في الحقيقة، كان جواه صراع ملهوش ملامح واضحة، حاجة مش عارف يفسرها ولا يسميها.

مشاعر متلغبطة، مش عايز يعترف إنها موجودة أصلًا.

حس إنه محتاج يهرب من المكان ده شوية، خرج من الكوريدور، راح عند الكافيتريا، طلب قهوة وهو مش مركز يمكن تفوقه شويه

عند فريده 

الدكتور دخل الأوضة بعد شوية، بص عليهم وهم حوالين السرير وقال بنبرة هادية لكن حاسمة

"كفاية كده يا جماعة... هيا محتاجة ترتاح دلوقتي، ممكن ترجعولها بالليل، بس لازم دلوقتي تسيبوها ترتاح."

إيناس قالت بسرعة

"حاضر يا دكتور."

إسلام قرب من فريدة وقال بابتسامة

"هجيلك بالليل إن شاء الله، خلي بالك من نفسك يا دودو."

فريدة ابتسمت وقالت بصوت واطي

"حاضر."

سالي قربت منها وقالت

"هجيلك بكرة."

فريده هزت راسها وايناس باستها قبل ما يخرجوا من الأوضة، صابرين كانت بتدور على تيم بس مش موجود، طلعت موبايلها بسرعة ورنت عليه

رد بصوته الهادي

"أيوه يا ماما."

قالت

" إنت فين يا تيم؟!"

قال بهدوء

"أنا بره، قدام الاستقبال."

قالت

"تمام، استنى عندك هننزل دلوقتي."

يونس وسالي سابقوا، صابرين ودعت إيناس وقالت

" هاجي بالليل" 

ايناس هزت راسها وقالت

" انا هكون موجوده"

صابرين مشيت واسلام خد ايناس وروحوا 

صابرين نزلت كانوا تيم ويونس وسالي واقفين قدام عربية تيم مستنيينها

يونس قال وهو بيتحرك ناحية موتسيكله

" انا هسبق انا، هاجي بسميره"

صابرين قالت بابتسامه بسيطه

"ماشي يا حبيبي، خلي بالك بلاش تهور"

سالي قالت وهيا بتبص لصابرين

"أنا هرجع مع عمو سليمان، هتيجي معايا ولا مع تيم؟!"

صابرين قالت وهيا بتحط ايديها على كتف سالي 

"روحي انتي، انا هروح مع تيم"

سالي هزت راسها وقالت

" تمام"

ركبت صابرين جنب تيم في العربية، قفلت الباب وهو كان بيشغل العربية، سكتوا لحظة، صوت المكيف هو اللي مالي العربية، كانوا ساكتين، الطريق هادي وتيم سايق وعينيه قدام، بس عقله في مكان تاني.

صابرين بصت عليه، شافت إيده اللي بتشد وترخي على الدريكسيون، وصدره اللي بيتحرك بسرعة وهو بيحاول يتحكم في نفسه، أخدت نفس، قررت تفتح الكلام، بصوت هادي جدًا قالت

"تيم..."

رد وهو مركز قدامه

"هممم"

سكتت لحظه، وبعدين قالت

"أنا عارفه... عارفه إنك بتحب فريدة"

إيده اتجمدت على الدركسيون، قلبه دق بسرعه جدا، حس بجفاف في حلقه، حاول يرد، بس مفيش كلمة طلعت،

هو نفسه مش فاهم إيه اللي بيحسه كل ما يشوفها، كل ما تكون قريبه منه او حتى سيرتها تيجي

صابرين كملت بصوت هادي

"أنت مش عارف تقول إيه دلوقتي... صح؟ مش عارف حتى اللي جواك ده إيه... بس أنا عارفاه."

كان ماسك الدريكسيون بإيد جامدة، قال بصوت واطي وهو بيحاول ينكر

"مفيش حاجة يا ماما."

صابرين بصت من الشباك وقالت بثبات 

"تيم"

سكتت شويه وبعدين قالت

" كل دي مشاعر حب، إنت بتحبها فعلا يا تيم."

كان بيتنفس ببطء، وشه مفيهوش أي تعبير، قال بجمود

"مش... مش قصدي."

ردت بسرعة

"أنا عارفة... بس ده بيحصل غصب عنك، علشان كده لازم توقفه قبل ما يكبر أكتر، مينفعش يا تيم... مينفعش تدّخل أي واحدة حياتك، إنت عارف السبب، وإنت مش من حقك تحب... ومش من حقك تدي حد أمل أو حتى تدي نفسك أمل، وجود أي واحده في حياتك ده خطر، خطر على الكل وأولهم عليا انا"

تيم حس إن الكلام بيدخل في قلبه زي المسمار البارد، هو عارف... وعارف السبب، بس مش قادر، ليه بيحس إنه محتاج يشوفها كل يوم؟ ليه كل الأحاسيس الغريبه دي، ضغط برجله جامد على البنزين غصب عنه، العربية زودت سرعتها ثواني وبعدين هدى تاني، قال بصوت مبحوح وهو لسه باصص قدامه

"عارف..."

صابرين قالت بحزم

"لو كنت أعرف إنك هتتعلق بيها كده، أو هتحبه مكنتش سمحتلها تدخل البيت أصلا... فريدة مينفعش تبقى في حياتك يا تيم... مهما كان."

بلع ريقه بصعوبة وقال رغما عنه

"مش هشوفها تاني."

كلمه قالها ومش عارف تأثيرها ممكن يكون إيه عليه، هل هو فعلا مش هيشوفها تاني؟ هل هيقدر يرجع يعيش حياته تاني؟ 

بس دلوقتي... كان لازم يختفي.

كان لازم يبعد.

عند فريده 

الممرضه عندها بتتطمن عليها قبل ما تديها مسكناتها

الممرضة سألتها فجأة

"انتي متجوزة؟"

فريدة هزت راسها وقالت بصوت واطي

"لاء"

الممرضة سألتها تاني

" طب مخطوبة؟"

فريدة استغربت وسألتها

"لاء...ليه؟"

الممرضة قالتلها

"أصل في واحد اتبرعلك بلترين دم، قولت اكيد انتي مراته مثلا عشان التضحيه دي"

فريدة رفعت راسها بسرعة وقالت بزهول

"إزاي لترين؟ دي كمية كبيرة جدًا، انتي أكيد غلطانة."

بصتلها وقالت ببساطة

"اتبرع بأربع أكياس دم ليكي لوحدك ولوحده، شكله بيحبك أوي."

فريدة اتصدمت وقالت بتفكير

"إسلام... أخويا؟"

سكتت لحظة، وبعدين همست

"بس إسلام مش نفس فصيلتي..."

بصت للممرضة وقالت

"اسمه يونس؟"

الممرضة هزت راسها وقالت

"لاء، يونس معرفش يتبرع... اللي اتبرع اسمه تيم... أو تميم باين "

فريده اتسمرت، وبصت للسقف وهي مش قادرة تستوعب، تيم اتبرع عشانها بلترين دم؟ ليه؟ ليه يعمل كده؟ ده ممكن يعرضه للخطر

الممرضة قالتلها 

"كان كل شوية يسأل عليكي، وأصر نسحب منه علشان نلحقك بالرغم من تحذير الدكاتره ليه"

فريدة فضلت ساكتة، عقلها مليان أسئلة، ليه تيم يعمل كده؟ ازاي اصلا؟

قاطع شرودها خبط الباب بهدوء، دخل حسام وهو شايل بوكيه ورد، ملامحه باين عليها التوتر وقال بصوت واطي

"ينفع أدخل؟"

فريدة رفعت عينيها ليه، ابتسمت ابتسامة خفيفة وقالت

"طبعا"

دخل بخطوات هادية، كان ماسك بوكيه ورد صغير، قرب شوية وقال بابتسامة وهو بيديهولها

"حمد الله على السلامة."

ردت وهي بتاخده بابتسامه

"شكرا."

وقف لحظه وبعدين قال بحرج

"لما عرفت إنك عملتي حادثة جيت على طول... بس قالولنا نمشي، فاستنيت بصراحة برة لحد ما كلهم مشيوا... وجيت أهو، مكنتش هقدر أمشي قبل ما أتطمن عليكي.... بصراحه يعني"

بصتله لحظة وقالت 

"بجد؟!... شكرا يا حسام."

هز راسه بخفة، عينيه اتحركت ناحية الأرض وبعدين رفعها ليها وسألها

"إنتي عاملة إيه دلوقتي يعني؟"

قالت بابتسامة هادية

"الحمد لله... أحسن."

سكتوا شوية، اللحظة كانت هادية وفيها لمحة ارتباك، حسام عدل وقفته وقال

"طيب... حمد الله على سلامتك مرة كمان، لو احتاجتي أي حاجة... معاكي رقمي، أي حاجة تحتاجيها، كلميني هكون عندك."

ابتسمت فريدة وهزت راسها بخفة وقال

"إن شاء الله."

ابتسم هو كمان، وبعد لحظة صمت قصيرة، رجع خطوتين لورا وقال

"سلام"

هزت راسها تاني، وهو طلع من الأوضة بهدوء، والجو رجع لسكونه.

اليوم كان مليان زيارات لفريدة، كتير جم يتطمنوا عليها ويشوفوها.

بالليل

كانت إيناس قاعدة جنب فريدة في الأوضة، النور خافت وفريده نايمه، موبايل إيناس رن برقم غريب، بصتله وفصلته بسرعة بس الموبايل رن تاني، فصلته فرن تالت... نفس الرقم.

إيناس أخدت نفس، بصت لفريدة وخرجت بهدوء

ردت وهي متحفزة

"ألو؟"

سمعت صوته اللي عارفاه وحافظاه كويس، صوته كان هادي وفيه تردد

"إيناس... أنا في المستشفى"

إيناس اتشدت، ووشها اتغير وقالت

"إيه اللي جابك هنا يا علي؟!"

علي قال بصوت هادي، كأنه بيحاول يهديها

"جيت أتطمن على فريدة"

إيناس عضت شفايفها، بصت بعيد وقالت بحدة وهي بتحاول تسيطر على صوتها

"علي، مش هينفع فريدة تشوفك دلوقتي، مش وقت زيارتك دي."

علي سكت لحظة، وبعدين قال بصوت متردد

"إديها فرصة تعرفني... يمكن تتقبل علاقتنا، يمكن يكون ده الوقت المناسب."

إيناس بصت في الأرض، سكتت شويه بس رفعت راسها وقالت بحسم

"مش وقته... لو سمحت يا علي، امشي دلوقتي، أرجوك."

علي حاول يرد، لكن صوت إيناس كان قاطع، فيه رجاء 

"امشي بجد يا علي، مش دلوقتي."

فضل ساكت لحظة، وبعدين قال بصوت واطي

"ماشي، هسمع كلامك دلوقتي بس"

قفل المكالمه وإيناس فضلت واقفة مكانها تاخد نفس قبل ما ترجع تفتح باب الأوضة وتدخل لفريدة تاني.

عدّت الأيام بسرعة، فريده خرجت من المستشفى، رجعت البيت، كانت بتتحسن يوم عن يوم، أما تيم فاختفى تماما، مظهرش ابدا من اخر مره، وكأنه انسحب من حياتها بهدوء، بس سايبها في حالة تساؤل مش قادرة تهرب منها.

كانت سالي قاعدة مع فريده

الجو كان هادي، بس سالي كسرت الهدوء وقالت وهي بتبصلها

"فريدة... عايزه اقول حاجه بس متردده" 

فريده قالت بعد ما اتعدلت

" قولي، في ايه؟!"

سالي قالت 

" تيم؟ تفتكري ليه عمل كده؟!"

فريدة قالت باستغراب

"عمل إيه؟"

سالي زفرت وقالت بهدوء

"اتبرع ليكي بالدم واتوتر جدا وكان عاوز يطمن عليكي بأي طريقه... انتي فاكرة ان ده عادي؟"

فريده سكتت لحظه، هيا نفسها عايزه تعرف إجابة الاسئلة اللي في دماغها، اصلا مش بتفكر غير في كده، بس غيابه الايام اللي فاتت برضو مخليها مستغربه، مش قادره تفهمه بالظبط بس حركت راسها وقالت 

"متهيألي كان بيساعد... يعني أي حد مكانه كان عمل كده..."

سالي ابتسمت ابتسامة صغيرة وقالت

"لاء يا فريدة... تيم لو كان عايز يساعد كان ممكن يتبرع مثلا بكيس، مش ب ٤ ويعرض حياته للخطر"

فريده قالت 

" قصدك ايه يعني؟!"

سالي قالت بخبث

" قصدي أن تيم، احتمال كبير يكون حبك"

"قصدي أن تيم، احتمال كبير يكون حبك"

الكلمه وقعت على قلب فريده بشكل غريب، خلت أنفاسها تهرب للحظة، وبصت ناحية الأرض وقالت بسرعه، بعفويه وهيا رافعه إيديها بتوتر

"أنا؟! إنتي بتقولي إيه يا سالي؟! أنا أصلًا... لا، إنتي فاهمه غلط، لاء طبعا، معرفش حتى ايه اللي خلاكي تقولي كده"

سالي ردت بسرعه وهي رافعه حواجبها

" كتير، كتير اوي يا فريده، يمكن انتي مش هتفهمي ايه اللي مخليني أقول كده بس انا عارفه تيم، هو بيهرب، انتي مش شايفه إنه دايمًا بيهرب من أي حاجه ممكن تهدد استقراره، تيم مش بيعرف يعبر عن اللي جواه، بس أنا شوفت بعيني، شوفت خوفه عليكي، شوفت نظرته ليكي، شوفت حاجات اول مره يعملها"

فريدة فضلت ساكته، بس قلبها دق بسرعه غصب عنها، وقالت بصوت واطي

"ومعنى كده إيه يعني؟ مش شرط حب زي ما انتي فاكره "

سالي قربت منها وقالت

" حتى لو اعجاب، هيتحول لحب، وقتها هتقدري تقربي منه اكتر وتفهمي ليه ماما مانعه اي بنت تدخل البيت، بس هو مش هيتكلم، لو استنتيه، مش هييجي، لازم انتي اللي تقربي"

فريدة رفعت عينها ليها، وقالت بنبره متردده

"أنا مش بشوفه أصلًا... و... مش عارفه، وبعدين أنا مشوفتهوش خالص كل الأيام اللي فاتت دي، انتي غلطانه يا سالي، يمكن انتي عايزه تشوفي كده " 

سالي قالت وهيا بتحاول تقنعها

" قولتلك بيهرب، انتي بجد مشوفتيش لهفته عليكي كانت عامله ازاي يوم الحادثه، ده كان خايف عليكي اكتر مننا كلنا ومش ببالغ صدقيني" 

فريده سكتت شويه وبعدين قالت

" والمفروض اعمل ايه يعني؟" 

سالي ابتسمت وقالت

" كده الفرصه بقت اكبر علشان تقدري تقربي منه" 

فريده سكتت لحظه وقالت بتردد

" احتمال كبير تيم ميتكلمش أبدا اصلا، ده اولا، ثانيا أنا اصلا هحس بالذنب اكتر لو قربت منه عشان استدرجه واستغل حاجه زي دي لو كلامك صح"

قاطعتها سالي وقالت

"فريده... احنا محتاجين نعرف الحقيقه، انتي قولتي في الأول خالص انك مستعده تساعديني للآخر، فبلاش تتراجعي، دلوقتي، في فرصه تقدري تقربي بيها من تيم، يبقى ليه لاء؟!" 

فريدة رفعت عينيها وقالت

"أنا حتى مش بشوفه... يبقى إزاي يعني؟!"

سالي زفرت وقالت بابتسامه

"هديكي رقمه، وكلميه... حتى لو برساله، قولي أي حاجة بسيطة، حاولي تشوفيه وتفهميه أكتر"

سالي فتحت فونها وأدت فريده الرقم وقالت وهي بتقوم

"لو مش عاوزه، متكلمهوش حاليا حتى، بس خلي الرقم معاكي... وحطي الموضوع في دماغك "

سالي ودعتها وخرجت، وسابت فريده قاعده، مش عارفه تاخد الخطوه، ومش قادره تنسحب، هيا فعلا عايزه تكلمه بأي حجه حتى

قاطع شرودها دخول إسلام، دخل الأوضه وهو بيبتسم، بص عليها وهي قاعده على السرير باصه في فونها، قال بصوت دافي

"إيه الأخبار يا ديدا"

رفعت عينيها ليه وابتسمت بخفه

"الحمد لله، أحسن."

قرب وقعد على الكرسي اللي جنب السرير، سكت لحظه وبعدين قال

"كنت عايز أطمن عليكي قبل ما أخرج"

هزت راسها وقالت بهدوء

"أنا كويسه"

مر لحظة صمت، كانت فريدة بتفكر، وبعدين رفعت عينيها وقالت بتردد

"إسلام... هو... انت فعلاً رفعت قضيه على بابا؟"

وش إسلام شد شويه، بص بعيد، وبعدين رجع يبصلها وقال بهدوء

"آه... رفعت، كان لازم أعمل كده يا فريده ومن زمان"

سكتت، ملامحها اتغيرت، اتضايقت، بس مقالتش حاجة، بعد لحظة بلعت ريقها وحركت راسها بخفه

 "ماشي... اللي تشوفوه اكيد صح"

إسلام غيّر الموضوع بسرعه، وقال بابتسامه صغيره

 "هترجعي شغلك إمتى؟"

ردت وهي بتحاول ترجع لهدوئها

"هبدأ من بكره إن شاء الله."

قال بسرعه وهو بيحذرها بنبره أخويه

"خلي بالك من نفسك يا فريده"

كان هيقوم يمشي، بس ندهت عليه

"إسلام..."

لف وبصلها باستغراب

"نعم؟"

قالت بخجل وتردد

"كنت... بفكر أجيب عربيه خلاص"

ابتسم وقال

"أخيرًا! خلاص جمعتي تمنها؟"

هزت راسها بخفه وقالت

"آه..."

قال بحماس

"طب خلاص، هاجي معاكي، إمتى هتروحي؟"

ردت بتوتر، عينيها بعدت عنه

"هو... أنا لسه مقررتش إمتى، بس... أنا هروح مع حد تاني."

اتغيرت ملامحه وقال بنبرة مستغربه

"حد تاني؟ مين يعني؟"

قالت بسرعه وهي بتحاول تنهي الحوار

"هبقى أقولك بعدين... ممكن؟"

اتنهد وقال

"المهم تقولي يا فريدة... أي حاجة تحتاجيها، قوليلي."

خرج من الأوضة، فريدة فضلت قاعدة مكانها، ماسكةفونها، عينيها على الرقم وقررت ترن، إيدها كانت بتتهز وهي متردده ترن ولا لاء، قلبها كان بيدق بسرعة، كان في حاجة جواها بتشدها، وحاجة تانية بتشدها للعكس.

فضلت لحظة، بتاخد نفس عميق، عينيها ثابتة على الرقم، إيديها قربت تضغط على اتصال

ضغطت، بدأ يدي جرس، حست انها ممكن تقفل لو رد من كتر التوتر

تيم كان قاعد في مكتبه، ملفات كتير قدامه، وإيده بتقلب في الملفات من غير تركيز، عينيه كل شوية تروح على الساعه وفجأه فونه رن

بص عليه بسرعة، عينه وقعت على الاسم

"فريده"

استغرب جدًا، رفع حاجبه، بص للرقم فترة، متردد، يفصل؟ يرد؟ ليه بتتصل أصلا؟

بعد لحظة تردد، ضغط على رد، وحاول يحافظ على نبرته البارده

"ألو؟ مين؟"

جه صوتها الخافت في السماعه

"أنا... فريده"

اتجمد لحظة بالرغم من أنه عارف ان هيا، بس مسح أي ملامح من وشه بسرعة، وقال بنبرة عملية

"عايزة إيه؟"

صوت تنفسها كان واضح، وبعدين قالت بسخريه

"أنا كويسة الحمد لله، انت عامل إيه؟"

ابتسامة خفيفة ظهرت على شفايفه للحظة، بسرعة أخفاها وقال بجفاف

"في حاجة يا فريدة؟ بترني ليه؟"

قالت بتوتر

"مبتسألش... قولت أسأل أنا... فينك كده؟"

رجع بضهره على الكرسي وقال بصوت حاد 

"وإنتي مالك؟ حاجة متخصكيش."

سكتت لحظة، كان سامع صوت انفاسها، بعدين صوتها جه واطي

"شكلي غلطانة إني كلمتك... وانت الشخص الغلط اللي هطلب منه طلب محتاجاه"

كان هيتكلم، بس هي كملت بسرعة

"لما قولت قبل كده إنك مش بتتقبلني، شكله كان من قلبك بجد... بس بجد كنت فاكرة دي طبيعتك مع الكل..."

سند على مكتبه، صوته مكتوم وهو بيحاول يرد، بس هيا كملت قبل ما يقدر يتكلم

"عموما يا سيدي أنا آسفة، ومش هكلمك تاني زي ما انت حابب... بما إنك فعلا مش عايز تتكلم."

وفي لحظة، قبل ما يرد حتى، كانت قفلت الخط.

شال الفون من على ودنه، وبص للشاشة اللي رجعت للقفل، سأل نفسه

هي كانت عايزة إيه؟

ليه اتصلت أصلا؟

وأي الطلب اللي كانت هتطلبه؟

هو بيحاول يبعد عنها... ليه هي بترجعه تاني لنفس الدوامة؟

اتحركت إيده لا إراديًا ناحية التليفون، كان هيرن عليها، لكن في اللحظة دي، خبط حد على الباب، ودخل واحد من الشغل بملف في إيده، وطلب منه يوقع أوراق

عند فريده 

كانت متضايقة بعد المكالمة، حاولت تلهي نفسها في أي حاجة، لكن في الاخر نامت وهي لسه حاسة بوجع صغير جوه قلبها مش عارفة سببه.

في نص الليل، صحيت على صوت فونها بيرن، فتحت عينيها ببطء، بصت على الشاشة باستغراب، لقا اسم تيم منور قدامها.

خدت نفس، اترددت لحظة، وبعدين ردت بصوت ناعس

"ألو…"

صوته جه هادي، مفيهوش أي مقدمات

"صحيتك؟"

قالت وهي بتحاول تصحصح

"لا لا، كنت هصحى أساسًا… في إيه؟"

سكت لحظة وبعدين قال

"كنتي عايزة إيه؟ انتي قولتي كنتي هتطلبي حاجة مني الصبح"

اتنهدت بخفة وقالت

"إنت لسه فاكر؟!… خلاص مش مهم، شكراً، مش عايزة حاجة… مش هقدر أزعجك."

رد بهدوء، نبرته أقل حدة 

"مكانش قصدي أتكلم ببرود... كنت مضغوط شوية... قولي، كنتي عايزة إيه؟"

سكتت لحظة، وبعدين قالت

"خلاص، غيرت رأيي... إنت مستحيل توافق أصلاً"

قال بنفس الثبات

"اعرف الأول، وبعدها أقرر إذا كنت هوافق ولا لاء"

بلعت ريقها وقالت بصراحة وهي بتجمع شجاعتها

"كنت... كنت بصراحة عايزة أشتري عربية، وكنت بدور على حد أروح معاه... قولت أكلمك وأسألك لو ممكن تيجي معايا... مش إحنا صحاب؟"

سكت لحظة، هي سمعت أنفاسه في التليفون، وبعدين قال بصراح

"لاء، إحنا مش صحاب عامةً"

اتشد قلبها للحظة، بس قبل ما تقول حاجة، كمل بنفس هدوءه

"بس لو طلبتي حاجة زي دي ومش معاكي حد تروحي معاه، أكيد مش هقولك لاء"

ابتسامة صغيرة ظهرت على شفايفها وقالت

"بجد؟ يعني انت موافق؟"

قال بهدوء

"آه، أكيد موافق"

اتنفست بارتياح وقالت

"تمام، اتفقنا… هبقى أكلمك وأقولك إمتى"

رد قبل ما يقفل

"تمام."

قفل الخط، وهي فضلت ماسكة الفون لحظة، بتبص عليه وهي مش عارفة إذا كانت فرحانة إنه وافق... ولا خايفة من اللي ممكن يحصل بعد كده، خاصة أنها حاسه انه مخطط لحاجه

لسه كانت هتحط الفون على الكومود، لقته بيرن تاني، بصت بسرعة، بس المرة دي كان حسام

اترددت لحظة، وبعدين ردت بصوت هادي

"ألو"

صوته جه دافي كعادته

"إزيك يا فريدة؟ حبيت أطمن عليكي قبل ما أنام... أخبارك إيه دلوقتي؟"

ابتسمت بخفة وقالت

"الحمد لله، أنا أحسن كتير… شكراً على سؤالك"

قال بعد لحظة صمت

"كنت بفكر، لو حابة نخرج نتعشى أو نشرب حاجة بكره، تغيير جو يعني، إيه رأيك؟"

سكتت لحظة وبعدين قالت بلطف

"والله يا حسام أنا اسفه جدا، بس بجد أنا محتاجة أخلص كام حاجه ورايا، ومش هقدر أخرج الفترة دي"

قال بنبرة هادية متقبله

"ولا يهمك... أهم حاجة تكوني بخير، ولو احتاجتي أي حاجة أنا موجود"

قالت بابتسامه خفيفه

"شكراً يا حسام، ربنا يخليك."

قال بهدوء

"تصبحي على خير."

ردت بهدوء

"وأنت من أهله."

قفلت معاه، سابت الفون على الكومود أخيراً، أخدت نفس عميق، فكرت ولسه مش عارفة، ليه تيم وافق يروح معاها… وبيخطط لإيه بما إنه وافق

تاني يوم

فريدة كانت في المستشفى، في استراحة صغيرة، رنت على تيم تعرفه امتى هيروحوا، كان بيرن بس مفيش رد، رنت تاني بس نفس النتيجه، زفرت نفس طويل وهي حاسه إن اللي حصل امبارح كانت مجرد لحظة اندفاع منه، وإنه رجع في كلامه، رجعت تكمل شغلها، بس عقلها بيفكر في أسئله ملهاش إجابات

على آخر النهار

فريدة خلصت شغلها وكانت بتجهز نفسها تمشي وفونها رن، بصت للشاشة، قلبها دق غصب عنها لما لقته تيم

ردت بسرعة وهي بتحاول تخلي صوتها عادي

"ألو؟"

صوته جه هادي، بس فيه نبرة رسميه

" رنيتي عليا الصبح... معرفتش أرد، كنت في ميعاد وكان الموبايل سايلنت"

قالت بسرعة وهي بتحاول تخفي ارتباكها

"مفيش مشكلة"

اتكلم تاني

"حددتي معاد؟"

اترددت ثانية وقالت

"اه... كنت هقولك، ممكن بكرة الساعة سته؟"

سكت لحظة وبعدين قال

"تمام… هكون موجود الساعة ستة عند بيتك بكره"

قالت بخفه

"أوكي، اتفقنا"

قال ببرود

" تمام"

وقفل السكه على طول، من غير أي كلمه زياده.

فريدة فضلت ماسكه الفون لحظه، بتبص للشاشة اللي رجعت تاني لسكونها، وهي لسه بتفكر في رد للأسئله اللي في دماغها

تاني يوم

فريدة كانت بتجهز نفسها قدام المرايه، كان لسه قدامها شويه وتجهز، فونها رن 

بصت للشاشه كان تيم 

ردت بسرعه

"ألو؟"

سمعت صوته، كان واضح إنه مستعجل

"إنتي فين؟!"

اتلغبطت لحظه وقالت وهي بتبص من الشباك

"ثواني... قدامي شويه"

قال بغضب

"وليه التأخير يعني؟ مش قولتلك الساعة ٦"

بصت في الساعة، كانت ٦ بالظبط، قالتله

"ماهو مفيش حد بصراحة دقيق كده في المواعيد، هو ٦ يعني ٦ بالظبط؟! عموماً... ثواني"

قال بنبره شبه غاضبه

"ثواني ولا دقايق؟"

ضحكت وقالت

"نازله يا تيم... ثواني دي تعبير مجازي يعني."

قفلت معاه، خدت نفس، حاولت تنجز بسرعه وأخدت شنطتها ونزلت، خرجت شافته واقف قدام العربية، واقف وحاطط ايده في جيبه، وعينيه عليها وهي خارجه، قربت منه وقالت بابتسامه خفيفه

"إزيك."

بص في ساعته وقال بنبرة ثابته

"تأخير ربع ساعه"

رفعت حاجبها وقالت

"إنت اللي جيت بدري، أنا بقول سته يعني نمشي سبعه... معروفة يعني"

رد بفتور

"إزاي يعني؟! لازم كل حاجة تكون في وقتها"

ضحكت بخفه وقالت

"أوووه، نسيت إنك منظم جدًا، بس معرفش إن الدقه ممكن توصل للمواعيد كمان."

قال وهو بيمد إيده ناحيتها

"اتفضلي يلا"

قالت وهي بتبص حواليها

"هنروح بأي أوبر، مش هنروح بعربيتك أكيد"

رفع حاجبه وقال

"اشمعنا؟"

ردت وهي بتعدل شنطتها

"لأني رايحة أجيب عربية، وهنرجع بيها"

قال بهدوء

"طيب"

مشيت بخطوات هاديه وهو مشي جنبها، ساكتين، صمت وبس 

وصلوا المعرض، فريدة نزلت من العربية وهي بتبص حواليها، كان المعرض كبير ومنظم، مليان عربيات شيك مصفوفة بترتيب يخلي أي حد يحتار اصلا من اولها، تيم مشي جنبها ودخلوا جوه، استقبلهم واحد في أوائل الأربعينات، شيك وأنيق، ابتسم لتيم وهو بيسلم عليه بحراره

"إزيك يا باشمهندس منور "

تيم ابتسم ابتسامة صغيرة ومد إيده

"إزيك يا سامر، عامل إيه؟

بص لسامر وقال

"دي فريدة، بنت خالتي"

سامر ابتسم وقال

"أهلا وسهلا، شرفتينا يا فريدة"

هزت راسها بخجل وقالت

"شكرًا"

دخلوا مكتب سامر، قعدوا بهدوء وهو فتح التلاجة، طلع كان وفتحها وقدم واحدة لتيم والتانية لفريدة وهو بيبتسم بخفه ورجع يقعد بعد ما فتحله هو كمان واحده ورفعها بخفه وقال

"إيه سبب الزياره الحلوة دي؟"

تيم قال بهدوء

"فريدة محتاجة عربيه كويسه، وقولت مفيش حد أفضل منك يساعدها تختار"

سامر بص لفريده وسألها بلطف

"طيب حابه عربية شكلها يكون إيه؟ استخدامك إيه أكتر؟ المشاوير يومية ولا سفر؟"

فريدة ردت

" يعني مشاوير يومية، حاجة عملية"

سامر ابتسم وقال

" تمام، هتنزل دلوقتي وشوفي اللي يعجبك"

خرجوا معاه، ونزلوا سوا ناحية العربيات، سامر كان بيتكلم عن كل عربية ومميزاتها، وتيم كان ساكت أغلب الوقت، إيده في جيبه وعينه بتتابع فريدة وهي بتبص للعربيات بفرحه

فريدة قربت منه وهم ماشيين بين العربيات وقالت بصوت واطي

"أنا عايزة عربية عادية.... مش واو يعني"

تيم بصلها للحظة وقال بهدوء

"ماشي يا فريدة، اختاري اللي يعجبك"

رفعت عينيها ليه وقالت

"كلهم حلوين، ممكن تختار معايا؟"

قال ببساطة

"طبعًا"

مشيوا سوا وسط العربيات، فريدة كانت معجبه بأكتر من واحده، ألوانهم حلوه وتصاميمها أنيقه، تيم وقف عند عربية معينة وقال

"دي حلوة"

بصت عليها وقالت بابتسامة هادية

"فعلاً.... حلوه جدا"

كانت عربية لونها أسود لامع، شكلها شيك وعملي في نفس الوقت، قربت منها ولمست الباب بخفه وهي بتبص لتيم وقالت بابتسامة واسعة

"دي حلوة جدًا... وأنا مقتنعة بيها فعلًا"

ابتسم وهيا قررت هتاخدها 

سامر وقف جمبهم وقال وهو بيقفل كشف الأسعار

"تمام يا فريدة، مبروك مقدما."

كانت متحمسة، وخاصة لما سمعت سعرها، بصت لتيم بدهشة وقالت

"ده سعرها؟! أنا كنت متوقعة سعر أكبر من كده بكتير!"

تيم رفع كتفه بخفة وقال وهو بيبص بعيد

"عمل حساب ليا فباعها بالسعر ده، متشغليش بالك."

وبعدين غير الموضوع بسرعة وهو بيحط إيده في جيبه

"إنتي بتعرفي تسوق أصلًا؟"

رفعت حواجبها وقالت وهي بتضحك

"هو يعني علشان مكانش معايا عربية أبقى ما بعرفش أسوق؟ انا بعرف اسوق كويس جدا"

تيم ابتسم بخفة وقال

" كويس"

ركبت فريدة العربية وهي فرحانة، ريحة العربية الجديدة خلت قلبها يرف، كانت ماسكة الدريكسيون بحماس، وتيم ركب جنبها وهو ساكت، بصتله وقالت بخفة

"جاهز؟"

قال بنبرة هادية

"يلا."

حركت العربية بهدوء وخرجت بيها من المعرض، كانت مبتسمة طول الطريق، مبسوطة بخطوتها الجديدة، بتسوق بثقة وسعادة، الهوا داخل من الشباك وهي مبسوطة بالإحساس ده، وهو كان ساكت أغلب الطريق، بيبصلها أوقات وهي مبتسمة، وحس بقلبه بيتقبض برضو، فرحتها كانت بتفرحه، بس في نفس الوقت، كان في قلبه حاجة تقيله، لإنه عارف إنه نازل معاها النهاردة علشان يساعدها، وفي نفس الوقت علشان يبعدها عنه... للأبد.

فريدة فضلت تتحرك بالعربية في الشوارع، كانت مبسوطة جدًا وهي بتجرب سرعتها وهدوءها في السواقه، كل شوية تبص لتيم وتبتسم، بس كان بيرد بابتسامة باهتة أو كان ساكت خالص، قررت تقف في مكان هادي على جنب، بصتله وقالت بابتسامة خفيفة

"مش شايف إنها نعمة إن الواحد يكون عنده عربية أخيرًا؟"

رد وهو بيبص قدامه بنبرة هادية

"آه... نعمه"

حاولت تفتح معاه كلام تاني، سألت بخفه

"إنت بتحب اللون الأسود في العربيات؟"

رد وهو لسه باصص بعيد

"عادي"

ابتسمت بخفة رغم البرود وقالت

"أنا حبيته بصراحة، حسيت إنه شيك."

مردش، اكتفى إنه حرك راسه بخفة، كان واضح إنها بتحاول تقرب، وهو كان فاهم الغرض ده، لكن كل ما تحاول تبادر بسؤال أو كلمة، كان يا يرد بجملة قصيرة، يا إما يسكت تمامًا، حست انها مش عارفه تفتح أي كلام ومش زي ما سالي قالت، يمكن هو شخصيته مساعده مش اكتر لكن مش محب

بدأت تحس بالإحراج، ضحكت ضحكة صغيرة وهي بتبص لقدام وقالت

"واضح إن الكلام مش هيطلع منك النهارده..."

لما لقت الصمت ممتد، ابتسمت ابتسامة باهته، ورجعت تدور العربية، واتحركت بيها في الطريق وهي ساكتة، لحد ما وصلت قدام البيت.

وقفت العربية، نزلوا منها وهو كان بيقفل الباب، لفت ناحيته وقالت بخفوت

"شكرًا"

بصلها بجمود وقال بجفاء

"عفوًا، بس متاخديش على كده، دي آخر مره"

فريدة بصتله بدهشه وقالت بصوت واطي

"ولو، برضو شكرًا"

بص بعيد وهو بيشد نفسه علشان ميتهزش قدامها وقال

"ياريت فعلاً تكون آخر مرة، وياريت كمان تمسحي رقمي من عندك، لأني مش ناوي أرد تاني، سبق وقولتلك، أنا مش بحب وجودك، وانتي مصممة تقربي، بس أنا بجد مش بحب وجودك أبدًا"

الكلام وقع عليها زي الصدمه، حست إن قلبها انقبض، وكلامه كان دبش، بس بلعت ريقها بسرعه، عينيها لمعت بالدموع، بس حاولت تسيطر عليها.

وهو كان بيبص بعيد، حس بوجع في قلبه هو كمان، بس كان مضطر، كان لازم يقولها كده، لازم يبعدها بأي شكل، فكمّل بنبرة باردة رغم الوجع

"أنا أي حد بيطلب مني مساعدة، مبترددش لحظه، واظن كذا مرة تطلبي وبنفذلك اللي انتي عايزاه علشان ما بحبش أقول لحد لاء، انتي بالنسبالي مثلاً صاحبة أختي، مش حتى بنت خالتي... لأني مش معترف بيكي أصلًا، ياريت تكون وصلت"

نهى كلامه بسرعه وركب عربيته واتحرك فورًا من غير ما يبص وراه، مش مستعد يشوف صدمتها أو دمعتها، مش مستعد يوجعها، لكن غصب عنه، كان لازم يبعدها... بأي تمن

أما هي، فبعد ما اتحرك بعربيته، وقفت مكانها لحظه، دمعه نزلت غصب عنها، حست إن الأرض بتلف حواليها، وإنه فعلاً كان بيخطط... بس بيخطط يوجعها، يوريها حجمها الحقيقي بالنسباله، مسحت دموعها بسرعه بضهر إيديها، خدت نفس متقطع قبل ما تدخل البيت، طلعت على أوضتها بسرعه، وقلبها بيدق جامد... وفي عينيها دموع، وفي صدرها وجع... مش قادره حتى تلومه، ولا قادرة تلوم نفسها، بس اللي متأكده منه دلوقتي... إنها ندمانه...ندمانه انها قربت منه وبادرت تكلمه، فضلت قاعدة على سريرها شويه وهي ماسكه موبايلها، دموعها نازله غصب عنها وهي مش قادره تهدي قلبها اللي كان بيوجعها وكلامه لسه بيرن في ودانها، خدت نفس عميق وقررت تكلم سالي، رنت عليها وأول ما ردت، فريده قالت بسرعه وبصوت متوتر

"سالي، أنا مش هقدر أساعدك بخصوص تيم، أو حتى لوحدي، انا وانتي مش هنقدر لوحدنا، هكلم صاحبتي اللي قولتلك عليها قبل كده وهيا هتقدر تساعدنا اكتر أو على الأقل تفهمنا حالته اكتر علشان انا مش فاهماه بصراحه، ومتحاوليش تقربيني منه تاني، لو سمحتي"

سالي اتفاجئت من نبرتها وقالت وهي بتحاول تهديها 

"طب في إيه؟ اهدي... مالك يا فريده؟"

فريدة مسحت دموعها بسرعه وقالت بحده ووجع

"اهدي إزاي يا سالي؟! كل ما أكلمه يهزقني ويستقل بيا! سالي، انا عمر حد ما عمل معايا كده، وهو محسسني إني بجري وراه وهو مش معبرني، مسح بكرامتي الأرض... ودي مش أول مره!"

سالي فضلت ساكته لحظه وقالت بهدوء

"طيب خلاص، اهدي... تيم دي شخصيته معلش، عموماً شوفي الدكتوره اللي قولتي عليها قبل كده، ماشي؟ ونتقابل ونشوف هنقدر نعمل إيه."

فريده أخدت نفس وقالت بصوت أهدى

"تمام، هكلمها وهشوف هنتقابل امتى."

سالي قالت 

"تمام... بس قوليلي، مالك؟ عمل ايه ضايقك اوي كده"

فريدة سكتت لحظه، عينيها لسه مليانة دموع وهي مش قادرة تنطق، وكل اللي طالع منها تنهيده طويله وهي ماسكه الموبايل بإيدين بيرتعشوا.

عند تيم

كان في عربيته بيسوق بشرود، عقله مشغول بكلامه معاها، بقا يعمل حاجات هو مش عايز يعملها، بس مضطر.

وصل البيت، طلع أوضته بسرعة وهو بيحاول يسيطر على اللي جواه، قفل الباب ووقف لحظة وهو بيشد نفسه وياخد نفس طويل.

وسط شروده الباب خبط ودخلت صابرين وقالت

"كنت فين؟!"

قال وهو بيحاول يثبت صوته

"كنت مع فريده، زي ما قولتلك فهمتها إني عمري ما شوفتها غير واحدة عاديه وبس."

صابرين قربت منه، كانت هتتكلم، لسه هتفتح بقها، بس قال بسرعه

"ماما، لو سمحتي... عايز أكون لوحدي شويه، لو سمحتي."

صابرين اتشدت ملامحها للحظة وقالت

"بس..."

رفع عينيه ليها، عيونه كانت تعبانة جدًا وهو بيقول بنبره هاديه بس حاسمه

"لو سمحتي، سيبيني دلوقتي."

صابرين وقفت ساكته لحظه، بصتله بحزن وهي بتحاول ترد، لكنها اضطرت تسيبه وتخرج وتقفل الباب وراها بهدوء، تيم لف وشه بعيد، ايه كمية الاحاسيس اللي أول مره يحسها دي، والشعور بالضيق ده مختلف ليه المره دي.

يوم جديد

فريده كانت في المستشفى، بتراجع تحاليل على التابلت قدامها، فونها رن، بصت عليه كان يونس.

ردت بسرعه وقالت بنبرة طبيعيه

"إيه يا يونس؟"

قال بصوت هادي

"فريده، أنا في المستشفى عندك، ممكن تيجي؟"

استغربت وقالت بسرعه

"إيه ده! ليه؟ في إيه؟!"

قال بسرعه 

"تعالي بس، مستنيكي بره."

قفلت بسرعه ونزلت على طول، دورت عليه بعينيها، شافته واقف جنب الحيطه، وشه شاحب، قربت منه بسرعه

قالت بقلق

"في إيه يا يونس؟!"

بصلها وهو بيحاول يرفع دراعه ومقدرش، قال بنبره هاديه

"دراعي... تقريبا مكسور، عايز أجبسه من غير ما حد يعرف، بالله يا فريده"

فريدة قالت وهي متفاجئه 

"إنت أكيد بتهزر يا يونس... تعالي بسرعه ورايا!"

مشي وراها وهي ماشيه قدامه بسرعه وبتلف وشها كل شويه تبصله

دخلته أوضه فاضيه وقفلت الباب، بصت على دراعه وقالت وهي بتنهد

"يونس... بجد مش كفاية تهور؟ إيه اللي عملته المرادي؟!"

قال وهو بيحاول يضحك

"معرفش... بس كنت بجرب حركه جديده بالموتوسيكل... اعمل ايه يعني"

قطعت كلامه بنظره حاده وقالت

"حركة جديدة! إنت هتجنني... مد دراعك هنا."

بدأت تبص على دراعه بحذر وهي بتشوف الورم وقالت

"هسبته بجبيره مؤقته، لحد ما تعمل اشعه وانادي الدكتور "

قال 

" طيب بسرعه مش عارف احركه"

فريده جابت أدوات الجبيره المؤقته بسرعه، ومسكت دراع يونس بحذر

"هتوجعك شويه، استحمل."

قال وهو بيحاول يضحك

"مش جديدة يعني...خدي راحتك"

بدأت تلف الرباط بحرص، ويونس بيشد نفسه، قالت 

"كنت فاكرك اتعلمت من الحوادث اللي قبل كده!"

رد وهو بيتنفس بسرعه 

"اتعلمت إن الحركة فعلاً مش بركة المرادي."

خلصت وقالت

"كده مؤقت، لازم أشعة فورًا يا يونس."

قال وهو بيهز راسه

"ماشي... بس محدش يعرف حاجه"

قالت بسخريه

" على اساس مش هيبان يعني، حضرتك هتجبس دراعك"

قالها بتوسل

" مش هروح البيت لحد ما افكر عادي يعني، المهم ماما مش عايزها تعرف علشان هتقولي خليك في البيت وانا مش هقدر اقعد تاني، مستحيل ابعد عن سميره تاني كل ده" 

رفعت حاجبها وقالتله

" وانت اصلا هتسوق ازاي بدراعك ده؟!" 

قالها 

" بعرف اسوق من غير ايدي الاتنين عادي يعني، المهم بس مقولهاش لحد ما افكه" 

ضحكت بخفه وهيا بتقول 

" تفكه مين يا حبيبي لسه قدامك اكتر من شهر، هخرج اشوف هتعمل الاشعه امتى يا يونس يا خارق"

خرجت فريده وبعد ثواني رجعت معاها يسر اللي سألتها بتوتر

 "في إيه يا فريدة؟!"

فريده قالت وهيا بتفتح الباب

" شوفيلي يونس دراعه بايظ ومحتاج يتصور قبل ما الدكتور ييجي، هروح اشوف الدكتور وانتي ساعديه يروح يعمل اشعه"

فريده مشيت ويسر دخلت، يونس كان مغمض عيونه وساند ضهره، يسر حمحمت بصوت خفيف علشان يصحصح، فتح عيونه وبصلها باستغراب وقال

"فين فريده؟! وانتي مين أصلًا؟!"

يسر ردت وهي ماسكه في إيد السرير

"أنا ممرضة هنا، فريده قالتلي آخدك على غرفة الأشعة وهيا ثواني وهتيجي، فلو سمحت ساعدني وبلاش أسئله دلوقتي."

يونس بصلها بشك وقال

"هيا فريده بتشقطني يعني؟!"

يسر زفرت وقالت بزهق

"لو سمحت، ممكن أقوم بشغلي؟"

يونس قال وهو بيرفع حواجبه

"طب ممكن تنادي فريده يا اسمك إيه إنتي؟"

يسر ردت بملل وهيت بتحاول تفضل هاديه

"اللهم طولك يا روح..."

في اللحظة دي الباب فتح وفريده دخلت بسرعه وهي بتقول

"سوري يا يونس، كنت بعرف الدكتور، مقومتش ليه مع يسر على ما أجي؟"

يونس قال بسخريه وهو بيبص ليسر

"يسر؟! دي يسر دي؟ دي عسر."

يسر بصتله بحده وقالت وهي بتخرج من الأوضه 

"هبعتلك ضحي أو مروه لو محتاجه... عندي حاله تانيه"

يونس بصلها وقال بسخريه

" لاء والنبي خليكي، خليكي والنبي"

تجاهلته تماما وخرجت وقفلت الباب وراها، فريده بصت ليونس وقالت

"طب وليه جرّ الشكل مش فاهمه؟"

يونس رفع إيده السليمه وقال ببرود

"أنا مالي، هي اللي قفل"

فريده قالت وهي بتجهز لنقله

"طالما متعرفش ظروف الناس يبقى تسكت."

يونس قال وهو بيعدل نفسه استعدادًا يقوم

"وإيه ظروفها يعني؟ باباها منع عنها المصروف؟"

فريده قالت بحدة وهي بتمد إيدها تساعده

"يلا يا يونس... اخلص"

خلص يونس الأشعة، وكانت النتيجة كسر محتاج جبس فورًا، رجعوا على الاوضه والدكتورة كانت موجودة بتجهز المعدات وهي بتتكلم مع فريده عن تفاصيل الكسر، وفريده واقفة جنب يونس، بتهديه علشان يقعد ثابت

يونس كان بيحاول يخبي توتره وهو بيقول بفزلكه

"مش كنتوا تحطولي بنج ولا حاجه؟!"

فريده قالت بابتسامة صغيرة

" في بنج اصلا يا يونس "

يونس قال باحراج

"اومال حاسس بوجع ليه برضو"

الدكتورة ضحكت وقالت

"خمس دقايق وهتكون تمام."

بعد دقايق، الباب خبط ودخلت يسر، كانت جاية تدي فريده حاجه طلبتها منها بسرعة، عينيها وقعت على يونس اللي كان قاعد مكشر، رفع عينه وبصلها وقال وهو بيحاول يرخم عليها

"ايه يا عسر، اخدنا من وقتك دقيقتين بقا معلش"

يسر بصتله بجمود وقالت لفريده

" لو احتاجتي حاجه ابقي قولي"

فريده قالت

"شكرًا يا يسر."

فريده بصتله وقالت

" بطل رخامه "

قالها باستظراف

" بكره العصر"

فريده نفخت بضيق وقالت

"يا يونس، والله العظيم لو مبطلتش رخامة هسيبك للدكتورة لوحدك."

قال وهو بيتعدل

"لا لا، استني هنا خلاص"

الدكتورة قالت وهي بتراجع الجبس

"كده تمام يا يونس، متحركش دراعك، وخلي بالك منه، والمتابعة بعد أسبوع إن شاء الله "

يونس رفع عينه بدهشة وقال

"ليه هو أنا مش هشيله بكره؟!"

الدكتورة بصتله وقالت بابتسامة

"لاء طبعًا، إزاي يعني؟"

قال بضيق

"ما أنا مش هفضل بيه كده كتير! أسبوع إيه ده؟!"

الدكتورة قالت بهدوء

"يا أستاذ يونس، المدة اللي هتفضل بالجبس فيها من ٦ لـ ٨ أسابيع على الأقل، حسب التئام الكسر."

يونس فتح عينه بصدمة

"مستحيل كل ده! اخر مره جبست دراعي فيها كان أقل من شهر وفكيته"

الدكتورة قالت بحزم

" وده في حد ذاته مينفعش، لأن غير كده الكسر مش هيلتئم صح."

فريده اتدخلت وقالت بهدوء

"لازم تلتزم يا يونس، أحسن من إنك تخلعه بدري ويرجع يتكسر تاني بسهوله"

يونس نفخ بضيق وقال

"يا سلام يعني، كده أنا اتحكم عليا بالحبس تاني"

فريده ضحكت بخفة وقالت

"حبس إيه بس، ده علشان صحتك يا يويو"

الدكتورة قالت بعد ما خلصت

"تمام كده، خدي يا فريده الأدويه والتعليمات، وانت يا أستاذ يونس متنساش تتابع ضروري"

يونس قال وهو بيقوم بصعوبه

"طب لو عايز أسوق موتوسيكل؟"

فريده بصتله وقالت بسرع

"يونس!!!"

الدكتوره قالت

"ممنوع طبعًا، سيبك من المغامرات دي لحد ما تخف."

يونس عمل نفسه متضايق وقال

" نقطة ضعفي اني مسمعش كلام الدكاتره بجد"

فريده مسكته من دراعه السليم وقالت 

" خد بالك من نفسك بجد وبلاش تهور، ربنا بيسترها كل مره معاك فبلاش تستهون"

قال وهو بيسحب دراعه 

" متكبريش الحوار خلاص، انا واخد على كده اصلا" 

قالت بابتسامه 

" طيب مش هبطل اقولك برضو خلي بالك من نفسك" 

قال 

" طيب حاضر يستي، يلا باي"

ردت 

" باي" 

بالليل فريده كانت قاعدة في أوضتها، فاتحه الموبايل بتسكرول من غير تركيز، وقاطعها فونها اللي رن وكان حسام

ردت بهدوء

"ألو؟"

صوته جه دافي كالمعتاد

"إزيك يا فريده؟ كنت حابب أتطمن عليكي."

ابتسمت ابتسامه بسيطه وقالت

"الحمد لله يا حسام، أنا كويسه"

فضل يسألها عن صحتها، وهي بترد بهدوء، وهو بعد شويه قال بنبره شبه متردده

"بصراحه، كنت عايز أعزمك بكره على الغدا، إيه رأيك؟"

فريدة سكتت لحظه، دي يمكن المره المليون اللي يطلب منها يخرج يعزمها، وفي كل مره كانت بترفض... بس المرادي لقت نفسها بتقوله

"ماشي، موافقه"

صوته اتغير شويه وقال بسرعه

"بجد؟! طيب خلاص، هعدي عليكي في المستشفى بعد الشغل بكره؟ ايه رأيك؟!"

ابتسمت وقالت 

"تمام، ماشي."

عند سالي 

قررت تتكلم مع تيم أخيرًا بعد ما اختفى من قدامها الأيام اللي فاتت، راحت على أوضته، خبطت على الباب بهدوء، ولما محدش رد، فتحت ودخلت

بصت حوالين الأوضه، مكانش موجود ندهت عليه بس مفيش رد، كانت هتخرج بس لقته خارج من غرفة الدريسينج ملامحه كانت مجهدة وعنيه فيها لمعة ضيق.

قال بنبرة بارده

"في إيه؟!"

سالي بصتله وقالت وهي بتحاول تخفف التوتر

"كنت بدور عليك."

مسح بإيده على وشه وقال وهو بيرفع حاجبه 

"عايزه إيه يا سالي؟!"

سالي اخدت نفس وقالت بعتاب هادي

"إنت بتختفي فين؟ مش بشوفك ليه؟! مالك؟"

تيم قال ببرود

"مش لازم تشوفيني يعني"

سالي اتنهدت وقالت

"تيم، بجد؟! يعني إيه مش لازم؟! انت بقالك كتير كده مش طبيعي، مش انت نفسه تيم، ايه اللي مغيرك كده؟!"

بصلها بصه جامده وقال

"سالي، انا كده وهفضل كده، لو جايه تتكلمي عني وتلمحي بإني شخص مريض فلو سمحتي وفري وقتك"

سالي قربت منه وقالت بحده

"تيم! أنا جايه أسأل عنك عشان انت أخويا ومش مرتاحه لوضعك، في حاجه؟!"

اتنهد وهو بيبعد عينيه عنها وقال 

"أنا تمام."

قالت بصوت عالي نسبيا 

" لاء مش تمام، انت بتضحك على مين يعني، تيم انا اختك ومش هسيبك تغرق في اللي انت فيه ده، انت ليه بتحط مسافات كبيره بينك وبين أي حد؟"

فضل ساكت، حاطط إيده في جيبه، باصص بعيد عنها.

سالي قالت بهدوء

"أنا عارفة... عارفة إن في حاجه مضايقاك، وعارفه انك عمرك ما هتقول ايه هيا، بس متنساش اني مش غريبه عنك، انا اختك وبتمنالك السعاده، مش عايزه اشوفك بالوضع ده باقي عمرك، اسمح لنفسك تعيش، علشان انت بجد دافن نفسك، ولو انت هتفضل ساكت انا مش هسكت، هحاول انقذ ما يمكن إنقاذه"

قربت منه لما مردش وقالت

"بس متبعدش كده... بلاش تبعد عننا كلنا يا تيم"

اتكلم أخيرًا، صوته كان واطي

" كل واحد يعمل اللي يريحه"

سالي عضت شفايفها وقالت

" ده لو كان فعلا مريحك يا تيم، صدقني هفضل معاك حتى لو انت مش عايز اي حد يقرب من حصونك اللي انت بنيتها لنفسك، وانت عارف ان انا موجوده وممكن اسمعك في أي وقت"

بصلها أخيرًا، نظرته كانت حزينه وقال

"مش كل حاجة تتقال يا سالي."

هزت راسها وقالت

"ماشي... براحتك...بس متنساش إنك مش لوحدك برضو"

سكت، وبعد لحظة قال بجفاف كعادته

"خلاص، لو خلصتي تقدري تخرجي دلوقتي"

بصتله لحظه وقالت بهدوء

"طيب... تصبح على خير."

خرجت من الأوضة، وهو فضل واقف مكانه، عينيه باصه على الباب اللي خرجت منه، صدره بيتحرك بسرعه وكأنه بيحارب جواه حاجه مش قادر يظهرها.

تاني يوم

فريده خرجت من المستشفى وهي بتتكلم مع سالي في التليفون وبتقول

"أنا خارجه اهو، هاجي علطول"

قفلت معاها وفتحت شنطتها تطلع مفتاح عربيتها، بس قبل ما تكمل سمعت صوت زمارة عربية وراها، لفت بسرعه، لقت حسام واقف بعربيته، بيبصلها وبيبتسم.

فريدة ضربت على دماغها بخفه وقالت لنفسها 

"يا نهار أبيض!"

قربت منه بسرعه، وهو نزل الإزاز، وقال بلطف 

"فريده!"

فريدة بصتله وقالت

"لو حلفتلك إني نسيت أقولك إني خارجه أقابل صحابي دلوقتي، هتصدقني... صح؟"

حسام ضحك وقال

"يعني إيه يا فريدة؟! أنا متفق معاكي من إمبارح، نسيتيني كده بسهولة؟"

قالت وهي بترفع كتفها باعتذار

"والله نسيت، بجد، صحابي مستنين... بجد غصب عني اكيد، وبعدين أنا نسيتهم هما مش انت، خليها مره تانيه"

حسام قال

"طيب خلاص... معنديش مشكله، لو تحبي أوصلك؟"

فريدة ابتسمت بخفه وهزت راسها وقالت

"لاء شكرا... معايا عربيتي."

بصلها لحظه وسكت، وبعدين قال وهو بيحاول يخفف الموقف

"ماشي... خلي بالك على نفسك"

ردت عليه بسرعه

"وأنت كمان."

لوح لها بإيده وهو بيتابعها بعينيه وهي بتمشي بعيد.

فريده ركبت عربيتها وهي بتاخد نفس عميق، قلبها كان متلغبط، بس كملت، وصلت الكافيه اللي متفقه تقابل سالي فيه، نزلت بخطوات هاديه، دخلت، عينيها بتدور بسرعه لحد ما شافت سالي قاعده في الركن، قدامها كوباية عصير نصها فاضي، وهيا قاعده فاتحه فونها ومركزه فيه

فريده قربت منها بابتسامه صغيره، سلمت عليها وقالت

"إزيك يا سالي."

سالي رفعت عينيها ليها بسرعة وابتسمت وقالت 

"عامله إيه؟"

فريدة قعدت وهي بتشيل الشنطه من على كتفها وبتحطها جنبها وقالت بنبرة مرهقه بس بهزار 

"بنحاول نكون كويسين والله."

سالي هزت راسها وقالت وهي بتعدل قعدتها

"عندنا مهمه."

فريده نفخت بخفه وقالت بابتسامه باهته

"مهمة شاقه... جداً"

سالي ضحكت بخفه وقالت 

"الدكتورة فين بقا؟ هيا هتفهم اكتر مننا اكيد"

فريدة بصت في ساعتها وقالت

"قالت قدامها ١٠ دقايق وتكون هنا، مش هتتأخر إن شاء الله"

بعد دقايق، دخلت الدكتوره الكافيه، لمحت فريده فابتسمت وهي جاية ناحيتها، قامت فريده بسرعه سلمت عليها وعرفتهم على بعض 

"دي دكتوره ايه يا سالي"

بصت لايه وقالت 

" ودي سالي"

ايه مدت ايديها بابتسامه هاديه وقالت

"اتشرفت بيكي."

قعدت وهي بتفتح نوته صغيره وقالت وهي بتبص لفريده

"أظن يا فريده حكيتيلي عنه قبل كده، وأنا وصفتلك بالضبط حالته."

فريده قالت بسرعه

"بصي، سالي هتقولك كل حاجة من الأول، هي أدرى بأخوها ومامتها."

بصت لسالي وقالت بنبره جاده

"ها، سامعاكي"

سالي أخدت نفس عميق وقالت

"ماما مانعه أي بنت تدخل البيت نهائي، وأنا معرفش السبب، ولازم أفهم ليه... وليه تيم مساندها في أي حاجة هي بتقولها، ليه لاغي شخصيته كده"

ايه كانت بتسجل الكلام اللي محتاجاه وقالت بهدوء

"هل ده من زمان ولا مؤخرا"

سالي قالت

"من زمان، بس سامحالنا عادي نتعامل مع بنات طول ما إحنا بره البيت، بس بالرغم من إنها سامحه لتيم، عمري ما شوفته بيكلم واحده أو مع واحده"

رفعت ايه عينيها وسألت

"هل هو مش حابب ده؟ ولا مجبر"

سالي قالت بحزن

"مش حابب، لأن كل مره أفتح معاه الموضوع، يقولي إنه حابب كده، ومش عايز وان كل واحد حر في حياته"

ايه سألت بنبره أعمق

"متأكده إن ده بمزاجه مش مجبر مثلًا؟"

سالي قالت وهي بتحاول تشرح

"كل ما أكلمه، وحتى لما أحاول أستفزه وأقوله إنه مريض يقولي إنه مش مريض، وإنه عايز كده"

ابه سألت

"انطوائي؟ عنده صحاب؟"

سالي ردت

"هو انطوائي جدًا، معندوش غير حسام، لأنه بيساعده في الشغل، بس حتى هو وحسام مش صحاب اوي، علاقة شغل بس."

ايه سألت وهي بترفع حواجبها

"عرضتي عليه يروح لدكتور نفسي قبل كده؟"

سالي قالت بتأكيد

"كنت بلمح، بس مقولتهاش دايركت، كنت بقوله إنه مريض وممكن يكون عنده جينوفوبيا."

ايه سألت بسرعه

"ومنظم؟"

سالي هزت راسها وقالت

"جدا، منظم في كل حاجه، ولما قولتله ده وسواس، قالي مش أي حد منظم يبقى عنده وسواس، بينكر كل حاجه، وأنا بجد مش فاهمة إزاي هو عايش كده"

ايه سألت وهي تكتب

"يعنى هو عارف سبب منع دخول البنات البيت؟"

سالي قالت

"اه طبعا عارف، ماما دايمًا بتحكيله أسرارها، وبتقوله كل حاجه، علشان كده عايزين نقرب منه ونفهم إيه السبب، ماما حذرتني متدخلش، بس أنا طرف في العيلة ولازم أتدخل، ومش ههدي غير لما افهم كل حاجه"

ايه قالت بنبره هاديه

"وعلشان كده دخلتي فريده؟!"

سالي قالت وهي بتبص لفريده

"اه، وقبلها كان في كتير جدا، بس محدش فضل، فريده وعدتني إنها هتكون معايا للآخر."

ايه بصت لفريده وسألتها

"تيم بيعاملك إزاي؟"

فريدة اتنهدت وقالت بضيق 

"بلاش أقولك بجد، ده بيحتقرني، وكل ما يشوفني يقولي أنا بكره وجودك، انا مش بحبك، إنتي بوظتي حياتي، محسسني إني بجري وراه وهموت عليه بالرغم من إن في قدامي ناس أحسن منه بكتير بالنسبالي، بس أنا بقرب علشان أستدرجه مش اكتر، بس هو حتى مش بينطق حرف"

ايه سألت بهدوء

"ولما بتتعاملي معاه بتحسي بإيه؟ شخصيته ايه مثلا؟"

فريدة قالت وهي بتبص بعيد

"بصراحه بحسه شخص طيب من جواه، بس بيبين شره، محتاج حد يساعده يخرج من المستنقع اللي هو فيه بس هو عازل نفسه، ورافض يخرج من المستنقع اللي هو فيه، ورافض بقوه ومش محتاج اي حد يتدخل في حياته"

ايه سألت

"قدرتي تقربي منه علشان مامته سمحت، والسبب إنك بنت خالته؟ صح؟"

فريدة قالت بسرعه

"بالظبط، متوقعتش إنها تكون خالتي بصراحه، ولا هو يكون ابن خالتي، ده وفر عليا كتير جدا، لاني كنت محضره كمية سيناريوهات لما تظهر بس ده وفر شوط كبير جدا"

ايه بصت لسالي وسألتها

"لما بيتضايق ممكن يعمل إيه كأقصى حاجه مثلا؟"

سالي قالت بجديه

"ممكن يقلب البيت كله من شدة عصبيته، ودي أكتر حاجة مستغرباها، إزاي شخص منظم بيبهدل الدنيا حواليه بسهوله كده بمجرد أنه يتعصب بالرغم من أنه هادي اصلا "

ايه سكتت لحظه، ورفعت عينيها ليهم وقالت

"تمام، كده فهمت الصورة كامله، وهنبدأ مع بعض خطوه خطوه بس هسأل سؤال اخير الاول "

ايه نقلت نظراتها بين سالي وفريده بتركيز قبل ما تسأل سالي بهدوء

"لو عرضتوا عليه ييجي يتابع معايا؟ هيوافق؟"

سالي هزت راسها بسرعه وقالت

"مستحيل."

ايه بصت لفريده وسألتها نفس السؤال بنظره ثابته 

"وإنتي يا فريده، رأيك؟"

فريده زفرت وقالت

"نفس إجابة سالي طبعا"

ايه اتنهدت ببطء، وبدأت تتكلم بنبرة واضحه وحازمه

"بصراحه، من الواضح إن عندنا حالة عزله اختياريه لكنها ناتجه عن ضغوط تربويه وسلوكيه ممتده من الأم، وفيه رفض داخلي لفكرة أي تواصل عاطفي أو اجتماعي من النوع ده، مع نوبات غضب بتخرج رغم السيطرة الظاهريه وطبعًا، طبعا مفيش أي إنسان يقدر يعيش كده، وأكيد بيفرغ الكبت ده في حاجه زي الكتابه مثلا، ولو سألتوني هل هنعرف منه أي سبب عن الأم أو تفاصيل علاقته بيها، إجابتي هتكون لاء، بل مستحيل... من رابع المستحيلات يتكلم حرف واحد حتى لو كان ده آخر يوم في عمره."

سكتت لحظة، وبصت لفريده بتركيز وقالت

"أما عنك يا فريده، وسبب تعامله معاكي... فده هروب، يمكن بدأ يحس بمشاعر تجاهك، والمشاعر دي مش مؤكده عنده طبعا، وده بيخليه يهرب، وسبب الهروب مجهول لحد دلوقتي، بس ممكن يكون عنده عقده، أو خايف، أو مش مسموح له أصلاً."

فريدة فتحت بوقها تتكلم، بس ايه رفعت ايديها وكملت كلامها بهدوء

"وممكن... ممكن إنتي تكوني السبب اللي يحرره، لما يحس إنك خلاص مبقتيش تكلميه ولا تقربي منه، ويحس إنك هتضيعي، ساعتها ممكن يعترف بمشاعره، لأن مشاعر الحب لما بتكون من طرف واحد، بتكون صعبه وقاسيه لأبعد حد... وساعتها، لو هو فعلاً بيحبك، هيتكلم عن مشاعره، وكلامي واضح هيتكلم عن مشاعره بس"

فريدة شدّت ضهرها وقالت بسرعه وهي بتنفي

"لا لا، أنا مش... مش بحبه أصلًا علشان أزعل إنه بيهرب! أنا كل اللي كان يهمني بس إني أساعده، علشان خاطرك يا سالي، وعلشان هو واضح إنه محتاج حد، لكن حب؟ لاء، ما تقوليش كده مستحيل"

بصّت بعيد بسرعه وهي بتحاول تخفي ارتباكها قبل ما ترجع تبصلهم بجمود.

سالي سألت بسرعه وهي بتبص بين فريدة وايه

" طيب وكده يا دكتوره... نقدر نعرف السبب إزاي؟"

ايه قالت وهي بتبص لسالي

"زي ما قولت، تيم بيفرغ كبته ومشاعره، مستحيل يكون مش بيعمل كده، ودي الطريقة الوحيده اللي هتخليكوا تفهموا أي حاجة إنتوا عايزينها، يمكن يكون بيكتب مثلاً، وكل ده في مكان هو بس اللي عارفه... مكان سري خاص بيه، أو ممكن يكون بيكتب وبيرمي أول بأول كل اللي بيكتبه كطريقة لتفريغ مشاعره مثلا "

بصّت لفريده وقالت بنبره هاديه واضحه

"افهمي مشاعرك صح، وقبلها افهمي كلامي، انا مكنتش بتكلم عنك انتي يا فريده، بس واضح انك فهمتي غلط، افهمي مشاعرك ووقتها هتفهمي كلامي، وخلي بالك إنتِ ممكن تكدبي على الكل، بس أنا... لاء."

قالت كلامها وهي بتقوم وبصّت في ساعتها بسرعه

"دلوقتي هسيبكوا ولينا قعدة تانيه،.. هنتكلم أكتر وتقولولي وصلتوا لإيه" 

بعد ما آية خرجت وسابتهم، فضلت فريده ساكته لحظه، بتبص في المكان اللي كانت قاعده فيه ايه، كلامها لسه بيرن في ودانها.

سالي قطعت الصمت وقالت وهي بتتنهد

"طب إيه؟"

فريده سكتت لحظه وهي بتفكر وبتحرك صوابعها على الترابيزه وقالت

"هيا قالت إنه أكيد بيفرغ كبته ومشاعره... هل تيم بيحتفظ بحاجته فعلا ولا لاء؟!"

سالي زفرت وقالت

"مش عارفه... تيم بجد كل حاجة وعكسها"

فريده فضلت ساكته شويه، وبعدين قالت

"تيم بيكره أي حد يدخل أوضته."

سالي هزت راسها وقالت

"فعلاً، دي أكتر حاجة بتعصبه، أو إن أي حد يقرب من حاجته."

فريده رفعت عينيها ليها وقالت ببطء

"يمكن أوضته هي الإجابه"

سالي عينيها لمعت وقالت بسرعه

"صح، بس... حاطط فيها كاميرات."

فريده قالت بهدوء وهي بتفكر

"أصلًا... علشان كده عرف إني دخلت أوضته قبل كده."

سالي بصتلها باستغراب وقالت

"وإنتي دخلتيها ليه؟!"

فريده رفعت حاجبها وقالت ببرود

"كان وقتها هو بالنسبالي نقطة تساؤل... كان بيخوفني علشان أخرج من البيت، وحبيت أضايقه."

سالي بصتلها وقالت وهي بتضحك بخفه

"والله إنتي مش قليله برضو."

فريده ضحكت وقالت

"عيب عليكي."

سالي رجعت للجديه وقالت

"طب نعمل إيه طيب؟"

فريده زفرت وقالت وهي بتتكلم بتركيز

"قولنا السر في أوضته، ده احتمال كبير، يبقى لازم ندخل أوضته وندور"

سالي بصتلها وقالت بقلق

"مستحيل، ولو دخلت وهو مش موجود بلاقي محمود فوق راسي ويقولي تيم قالي أخد بالي من أوضته"

فريده عقدت حواجبها وقالت وهي بتعد على صوابعها

"يبقى محمود... وكاميرات المراقبه، دول العائق علشان نقدر ندخل أوضة تيم."

سالي قالت وهي بتفكر

"طب محمود ممكن أتصرف معاه... بس الكاميرات؟ أفصلها إزاي الوقت ده من غير ما ياخد باله؟"

فريده قعدت تفكر وقالت

"أكيد في غرفة كنترول أو شاشه رئيسيه، مين اللي بيتابع الكاميرات؟"

سالي قالت

"تيم طبعا، محدش غيره يقدر يشوف الكاميرات دي"

فريده قالت بهدوء

"طيب لو قدرنا نشغله بحاجه، أو نخليه يسيب مكانه شوية، ممكن ندخل ونفصل الكاميرات أو تفصلي الكهربا عن البيت كله، أو حتى نغطي الكاميرات بحاجه، ونخلص قبل ما حد ياخد باله."

سالي قالت بتحذير

"أيوه بس لو تيم عرف، إحنا كده بنلعب بالنار."

فريده بصتلها وقالت

"إحنا أصلًا بنلعب بالنار يا سالي، ومفيش حل تاني، لو عايزين نساعده بجد يبقى لازم نلعب بالنار، غير كده هيفضل زي ما هو ويمكن أسوأ، القرار يرجعلك انا اصلا نفسي انسحب"

سالي سكتت لحظه وقالت

"طيب وإحنا بندور في أوضته، بندور على إيه بالظبط؟"

فريده قالت وهي بتزفر

"أي حاجة، أوراق، دفتر، نوتس، أي حاجة فيها كلام أو حتى صور، أي حاجه هتنفع اكيد"

سالي قالت بهدوء

"طيب وإفترضنا لقينا، هنعمل إيه؟"

فريده قالت بصدق

"لو لقينا، نبقى وقتها نفكر هنعمل إيه... المهم نلاقي الأول"

سالي اتنهدت وقالت

"طيب، يبقى سيبيها عليا وانا هتصرف، انا عارفه انا هتصرف ازاي"

فريده قالت بابتسامه صغيره

" تمام"

يوم جديد

كانت فريدة خارجة من شغلها بدري بعد ما سالي كلمتها وقالتلها تيجي البيت بسرعه، فريدة اتأكدت إن مفيش حد في البيت غير سالي واتحركت فورا

وصلت البيت ونزلت، دخلت وقبل ما تتكلم سالي قالت بقلق

"أخيرًا جيتي."

فريدة قالت وهي بتاخد نفس

"أنا خرجت بدري النهارده من المستشفى علشان أجي، بس الطريق طويل اعمل ايه"

سالي قالت بسرعه

"خايفة منلحقش، أصل تيم قدامه ساعة إلا ربع ويوصل"

فريدة بصتلها وقالت

"طب طمنيني، عملتي إيه؟"

سالي قالت

"مفيش حد خالص في البيت، بابا في أوضته وياسين نايم"

فريدة قالت

"حلو ده، والكاميرات؟"

سالي بصتلها وقالت بسرعه

"كلمت واحد متخصص تهكير، فهمته الوضع، قلتله عايزين ندخل الأوضه من غير ما نعطل الكاميرات أو تبان انها متعطله، قالي هيعمل Loop أول ما أبعتله علطول، بس هيكون قدامنا 20 دقيقة بس... تفتكري هيكفوا؟"

فريدة قالت بحزم

"إن شاء الله هيكفوا، الأوضه منظمه جدًا، ده هيساعد، المهم امشي قبل ما ييجي بالله."

سالي قالت

"طيب يلا، وانا هبعتله حالا"

طلعوا بسرعة أوضة تيم، دخلوا وهما بيحاولوا يكونوا هاديين، بدأوا يدوروا في الأوضه بسرعه، سالي قالت بتوتر

"رجعي كل حاجة مكانها بالضبط"

فريدة قالت وهي بتفتح الأدراج

"متقلقيش، بس خلي بالك من الوقت."

كانوا بيدوروا بسرعه في الأوضه، بس مفيش حاجه واضحه.

سالي قالت وهي بتتنهد

"شكل مفيش حاجة ولا إيه؟"

فريدة قالت

"خلينا للآخر، بلاش يأس"

سالي بصت في ساعتها بسرعه وقالت

"فاضل 7 دقايق."

فريدة كانت بتدور بعنايه، عقلها بيلف بسرعه، بتفكر إيه ممكن يكون الملجأ بتاع تيم.

فريده قالت 

" هدور في الدريسينج، احتمال كبير يكون فيها حاجه" 

سالي قالت

" ممكن، هكمل انا هنا وانتي شوفي جوه"

فريدة دخلت الدريسينج، فضلت تدور في الدولاب، بس لفت انتباهها حاجه، في لون ورا مختلف عن الجنب التاني بدرجه، فريدة شالت كذا بدله بسرعه علشان توسّع مكان، الباب كان جزء من الحيطه كأنه مش موجود، الدهان نفس اللون ونفس الملمس، مندمج بالكامل مع الجدار، واللي يمر قدامه عمره ما يشك إن فيه باب هنا أصلًا الا لو كان بيدور عليه مثلا، والفاصل اللي حواليه كان خيط رفيع جدًا، لا يُرى إلا لو الضوء وقع عليه بزوايا معينه، أو لو حد لمس الحيطة وايديه حسّت بفرق بسيط جدًا في ملمس الخط ده، قلبها دق بسرعه جدا، مكانتش مصدقه اللي شايفاه، ولازم تفتحه..... حالا

فريدة مدت إيديها على الخط الرفيع اللي باين بالكاد على الحيطة، كانت بتتحسسه ببطء، قلبها بيدق بسرعة، وأنفاسها متلاحقة، ضغطت بإيديها عليه كأنها بتدور على أي بروز أو مفتاح، بس الباب مكانش بيتحرك، كان ثابت وكأنه جزء من الحيطة فعلًا.

في اللحظة دي، سالي دخلت بسرعة وهي بتقول بصوت واطي

"فريده؟؟!! بتعملي ايه؟!!!"

فريدة قالت وهي بتبصلها بسرعة

"ده... تقريبًا باب، في باب هنا يا سالي"

سالي قربت ولمست الحيطة وقالت بذهول

"باب؟ بس ازاي؟ مش باين إنه باب أصلًا، ده كأنه حيطة عادية، باب ايه يا فريدة"

فريدة ردت بسرعة وهي بتبلع ريقها

"درجة اللون مختلفة بشعرة، لو ركزتي هتلاقي فرق بسيط، يمكن فرق درجة واحدة، بس واضح للي بيركز، وفي خط رفيع هنا كمان، حطي ايدك"

سالي بصتلها وقالت وهيا بتلمسه 

"إزاي عرفتي؟ الفرق يكاد يكون معدوم اصلا سواء باللمس أو اللون"

فريدة ردت بسرعة 

"شغلي بيعتمد على الملاحظة والدقة، لازم ألاحظ التفاصيل الصغيرة... غير كده انا عارفه الباب ده بس بيكون مختلف، ده احدث بكتير، بس مش وقته دلوقتي، ده بيتفتح إزاي؟"

سالي بصت في ساعتها وقالت بصوت متوتر

"فريدة... فاضل دقيقة! لازم نخرج فورًا."

فريدة بصت للبدل اللي شالتهم وقالت

" طب ساعديني نرجعهم مكانهم بسرعة."

اتحركت بسرعة وهي بترتب البدل في مكانها بدقة، وسالي بتساعدها، صوت أنفاسهم كان عالي، وقلبهم بيدق بسرعة جدًا.

أول ما رجعوا كل حاجة، خرجوا بسرعة من الأوضة، وسحبوا الباب وراهم بهدوء، وهم بيتنفسوا بصعوبة، ونزلوا تحت قعدوا.

سالي قالت وهيا لسه مزهوله

"لو ده باب فعلًا، إحنا قربنا جدًا."

فريدة بصتلها وهي بتحاول تخفي قلقها

"بس بيتفتح إزاي؟ أنا حاولت ومفيش فايده... صعب جدًا."

سالي قالت وهي بتفكر

"أكيد تيم مش هيسيبه يفتح بسهولة يعني، طبيعي يكون في شفرات أو نظام حماية مثلا"

فريدة قالت وهي بتتنهد

"والعمل؟"

سالي رفعت عينيها بسرعة وقالت بحزم

"هنراقبه ونشوفه بيفتحه إزاي."

فريدة هزت راسها وقالت

"ولو مش بيفتحه أصلًا؟ وبعدين هتراقبيه إزاي يا سالي؟"

سالي قالت بإصرار

"هركب كاميرات في الدريسينج وهراقبه، أنا فاضية ومعنديش حاجة، هفضل قاعدة أتابعه، يوم ورا يوم، لازم أعرف بيعمل إيه وهعرف إزاي بيفتحه، هموت من فضولي، مش قادره اصدق اني ممكن اعرف السبب اخيرا بعد كل ده"

فريدة قالت 

"أكيد هنلاقي حل... بس محتاج وقت اكيد وصبر"

سالي ابتسمت وقالت

"وليكن، المهم قدرنا نوصل لحاجة، بجد... عمري ما كنت هاخد بالي، إنتي عبقرية."

فريدة ابتسمت وقالت

"أنا أخدت بالي من فرق الدرجات، قبل ما أدخل الكلية عملولنا اختبار قدرات بيعتمد بنسبة كبيرة على الملاحظة، فكان لازم أركز دايما، الملاحظه في أبسط الحاجات أساس وظيفتنا"

سالي ضحكت وقالت

"بجد كويس، إحنا كده عدينا الجزء الأصعب."

فريدة قالت وهي بتسحب شنطتها

"فاضل المستحيل."

سالي ضربتها بخفة وقالت

"حرام عليكي يا شيخة... ليه تعقديني كده."

فريدة قالت وهي بتستعد تمشي

"والله ما أنا اللي بعقد... أخوكي اصلا أكبر معقد في الدنيا."

سالي قالت وهي بتضحك

"في دي معاكي حق."

فريدة قالت

"أنا همشي دلوقتي قبل ما حد ييجي، وخصوصًا أخوكي، مش عايزة أشوف خلقته تاني."

سالي ودعتها بابتسامة، وفريدة خرجت من البيت وهي بتتنفس بعمق، وقلبها لسه بيدق بسرعة... يمكن اخيرا هتعرف سبب عقدته وليه الشخصيه دي، والأهم ليه بيبعدها عنه.

كانت ماشيه ناحية عربيته بس قبل ما تكمل سمعت صوت باب عربية بيتقفل بهدوء، رفعت عينيها بسرعة وشافته، تيم... كان لسه نازل من عربيته، واقف بيقفل الباب وبيبصلها مباشرة، في اللحظة دي حسّت إن قلبها بيقف، وشه ثابت جدًا، ملامحه صعبة تتفهم، وعينيه السوده كانت مركزة عليها، فريدة بصت بعيد عنه، رفعت شنطتها على كتفها، وكملت بخطوات ثابتة كأنها مش شايفاه أصلًا.

راحت ناحية عربيتها بسرعة، فتحت الباب وركبت، قلبها لسه بيدق، وإيدها بتترعش على الدركسيون، دورت العربية ومشيت، وهو كان واقف مكانه بيبصلها، عينيه بتتابعها لحد ما العربية اختفت من قدامه.

بعد ما مشيت من قدامه دخل البيت، لقا سالي قاعده 

دخل وسأل ببرود وهو بيبص حواليه

"هيا فريدة كانت هنا بتعمل إيه؟"

سالي قالت وهي بتحاول تبان عاديه

"كانت جاية تقعد معايا شويه عادي."

تيم قال وهو بيهز راسه

"طيب."

سالي وقفته قبل ما يطلع أوضته وقالتله بحده بسيطه

"فيها مشكلة يعني؟!"

تيم لفلها بنظرة باردة وقال

"لاء، مجرد سؤال."

سالي قالت وهي مكتفة إيديها

"أوعى تكون ضايقتها بكلامك يا تيم، فريدة كانت جايه ليا أنا."

تيم بص بعيد وقال ببرود

"مليش دعوة بيها أصلاً، كل اللي عايزه إنها تبطل تظهر قدامي مش أكتر."

سالي بصتله وقالت وهي بتحاول تتمالك أعصابها "وهي أصلاً مش قاتلة نفسها عليك، دايمًا بتقولي إنها مش بتحب تتكلم معاك أو تشوفك، بس أوقات بتكون مضطرة، وبسبب شخصيتها الاجتماعية بتعاملك زي أي حد، مش بتتعمد تعاملك إنت بالتحديد"

سكتت لحظة وكملت

"حتى اسأل يونس على معاملتها معاه، وبسبب معاملتك معاها بقت مش حابه تشوفك أبدًا، حتى قبل ما تيجي اتأكدت إنك مش في البيت، ولما قولتلها إنك قربت توصل... مشيت على طول علشان متشوفكش."

تيم وقف مكانه لحظه، ملامحه ثابته ونظراته فضلت ثابتة عليها بدون كلمه.

لكن جواه...

كأن الكلام دخل غصب عنه، حس بضيق جواه، كلامها علق معاه رغم إنه كان دايمًا بيقول لنفسه إنه عايزها تختفي من حياته، بس فكرة إنها بتهرب منه فعلًا... كانت تقيلة على قلبه

شد نفس وهو بيحاول يطرد الأفكار دي من دماغه، عدل وقفته وقال بصوت هادي وبارد كالعاده

"تمام."

قال كلمته ومشي بخطوات ثابتة ناحية أوضته، بس جواه كانت فيه حاجه حاكماه، حاجة عمره ما حب يعترف بيها، حاجة اسمها "خوف من اختفائها فعلًا"

سأل نفسه، ليه بيعمل كده في نفسه، كل مره يحس إن وجودها بيسحبه ناحيتها غصب عنه بيحاول يهرب، يبعد، يخليها تكرهه، بس مش قادر يمنع نفسه من مراقبتها حتى لو من بعيد، مش قادر يمنع قلبه إنه يدق لمجرد إنه يشم ريحتها في المكان.

إيه اللي بيعمله في نفسه ده؟

وليه أصلاً؟

ليه مش عايش ودافن نفسه كده؟ 

كل ده بسبب وعد وعده زمان ومكانش عارف أنه هيتعذب اوي كده علشان يقدر ينفذه؟

شد نفس طويل وهو بيحاول يقنع نفسه إنه مش فارق معاه وجودها من عدمه وإنها لو اختفت مش هتفرق، وإنه عايزها تختفي، بس جواه كان في صوت تاني بيقوله العكس

عند فريده 

كانت في عربيتها لسه، طلعت موبايلها بسرعه ورنت على حسام وبعد ثواني رد بصوته العادي

"أيوه يا فريدة؟"

قالت وهي بتحاول تثبت صوتها

"ازيك يا حسام، أنا جاهزه دلوقتي... ابعتلي اللوكيشن "

سكت لحظة قبل ما يرد

"تمام، هبعتهولك دلوقتي، وهستناكي هناك."

قالت بسرعة قبل ما تقفل

"تمام، هشوفك هناك."

قفلت المكالمة، أخدت نفس طويل، فتحت المابس واتحركت مع اللوكيشن

وصلت فريدة، دخلت لوبي لفندق كبير، الديكور راقي والإضاءة دافية، ناس قليلة حواليها، كل حاجة هادية ومنظمة.

شافت حسام واقف بعيد، ماسك موبايله وهو بيبص عليها أول ما دخلت، ابتسم لها ابتسامة خفيفة وقال

" اخيرا شرفتي المكان، كنت فاكرك هتغيري رأيك في آخر لحظه"

فريدة رفعت حاجبها بخفة وقالت

"انت مكنتش بتزهق اصلا؟"

ضحك وهو بيقول

"لاء أنا مش من الناس اللي بتزهق بسهولة، خاصة لو معاكي"

قادها بهدوء ناحية ترابيزة في ركن هادي، فريدة قعدت وقالت

"المكان شيك أوي."

قال بسرعة وهو بيعدل قميصه 

"اهم حاجة تكوني مرتاحه."

قالتله بهدوء 

" الراحه مش بالأماكن الغاليه بالنسبالي" 

ابتسم وقال 

" مش مهم، ادينا بنعرف بعض"

فتح المنيو وقربه ليها وهو بيقول 

" تحبي تطلبي ايه ؟!" 

رجعتله المنيو بهدوء وهيا بتقول 

" على زوقك" 

ابتسم وقال وعينيه فيها لمعه خفيفه

" تمام، يبقى على زوقي"

اختار طلبه وعرضه عليها 

بصتله بخفة وقالت

"عادي، تمام."

سكتوا لحظة، وهي كانت بتبص حواليها، هو فضل ساكت، بس كانت عينيه عليها باستمرار، ملاحظ كل حركة منها.

قال بابتسامه واسعه

"عارفة... بقالي كتير بتخيل اللحظة دي"

رفعت عيونها وقالت بهدوء

"مفيش داعي تتخيل، إحنا هنا أهو."

ابتسم وقال

"آه... صح."

قعدوا يتكلموا كلام خفيف وحسام كان بيحاول يعرفها اكتر، وهي كانت بتجاوب عادي، وهو كان كل شوية يحاول يفتح كلام تاني، بس بيرجع يغيره بسرعة لو حس إنه هيكون تقيل عليها.

الأكل جه والجرسون حط الأطباق بعناية على الترابيزة.

حسام قال وهو بيشاور على الطبق

"جربتي ده قبل كده؟"

فريدة هزت راسها بالنفي وقالت وهي بتمد إيدها بالشوكة

"لاء، بس ريحته حلوة."

ابتسم وقال

"ده من الحاجات اللي بحبها هنا، لو معجبكيش قوليلي نطلب حاجة تانية."

قالت وهي بتضحك ضحكة خفيفة

"مش للدرجادي يا حسام، مفيش داعي"

ابتسم وهو بيحرك شوكته في طبقه وقال بسرعة وكأنه بيحاول يغير الكلام

"بس بجد، حابب إنك تكوني مرتاحة."

فريدة بدأت تاكل بهدوء، ومرة تبص للأكل ومرة تبص للي حواليها، وهو كان بيبصلها أوقات، وأوقات يبص في طبقه عشان ميحرجهاش، لكن عينيه كانت بتلمع كل مرة يشوف ضحكتها الخفيفة أو نظرتها السريعة له.

حسام قال بعد لحظة صمت

"على فكرة... وجودك هنا النهاردة فرق معايا."

فريدة بصتله، شافت نظرة صادقة في عينيه لكنها بسرعة ردت بابتسامة صغيرة وقالت

"المهم تكون مبسوط، بالرغم من إني نفسي أعرف سبب المقابلة."

اتوترت ملامحه للحظة، بس حاول يخفي توتره وقال بسرعه وهو بيعدل قميصه

"عادي... يعني احنا صحاب زي ما قلتلك قبل كده، وانتي بجد مهمه."

بصتله باستغراب فلحق نفسه بسرعة وقال وهو بيحاول يضحك بخفة

"قصدي، وجودك يعني بيكون مهم، بحس إنك بتدي إينيرجي لكل اللي حواليكي"

ابتسمت ابتسامة خفيفة جدًا، وقالت بصوت دافي

"شكرًا يا حسام بجد."

سكت لحظة، وبص بعيد وهو بيحاول يسيطر على ارتباكه، فضل ساكت بعدها وشوية بشوية رجع يفتح كلام عادي عن شغلها وعن حاجات بسيطة عنها، كان واضح إنه مبسوط، لأنه أخيرًا قابلها بعد كل المحاولات.

بعد شويه فريده بصت في ساعتها وقال

" اتأخرت، بجد شكرا على كل حاجه، كان يوم جميل"

حسام ابتسملها، ونظراته كان فيها حاجة دافية وهو بيقول

"أنا اللي بشكرك إنك وافقتي تيجي، ومبسوط إنه كان يوم حلو بالنسبالك"

خرجوا من المكان، اتمشوا شوية لحد العربية، حسام بصلها وقال

"خلي بالك من نفسك.. وابقى طمنيني لما توصلي."

قالت وهي بتفتح باب العربية

"حاضر... شكرًا يا حسام."

ابتسم وهو بيحاول يثبت ملامحه وقال

"يومك سعيد يا فريدة."

ركبت العربية وقبل ما تتحرك، بصت في المراية الجانبية، لقته واقف لسه في مكانه، بيبص للعربية، فحركت العربية بهدوء ومشيت.

تاني يوم 

فريدة كانت في شغلها، واقفة عند الكاونتر في المستشفى، سرحانة وهي بتقلب ملفات في إيدها من غير تركيز.

جت يسر جنبها وسألتها

"مالك؟ في إيه؟"

فريدة مردتش، لسه سرحانه لحد ما يسر خبطتها في كتفها وقالت بحزم

"فريدة؟"

فريدة رفعت عينيها ليها وقالت بصوت واطي

"إيه؟ بتقولي حاجة؟"

يسر زفرت

"إيه اللي واخد عقلك؟"

قالت وهي بتحاول تبتسم 

"مفيش... كنت بفكر في حاجة، ف إيه؟"

يسر قالت بنظرة قلقة

"شايفاكي من الصبح مش على بعضك."

ضحكت فريدة ضحكة قصيرة وقالت

" مفيش حاجه بجد، سيبك مني دلوقتي... قوليلي، عاملين إيه في البيت؟ وإنتي عاملة إيه؟"

سكتت يسر لحظة، وبصت في الأرض قبل ما تقول

"التفكير مش سايبني في حالي... مفيش أي أخبار عنها، وعدى أكتر من شهرين أهو... محدش قادر يجيب سيرتها في البيت عشاني، بس أنا أصلاً مش ببطل أفكر فيها، وبفكر ليه عملت كده؟ ليه بصتله هو؟ واشمعنا هو؟"

صوتها بدأ يتهز وهي بتكمل

"ولو هو عايزها هيا، ليه مجالهاش هيا من الأول؟ ليه يعملوا فيا كده؟ ويا ترى هي دلوقتي عايشة إزاي؟ هو أصلاً مش مسؤول بما فيه الكفاية، ومستحيل يقدروا يكملوا لوحدهم، وأمه وحشة أوي يا فريدة... مش عارفة إزاي قدرت تعمل كده، خصوصًا لو هي راحِتلها، هتهينها جامد لأنها خلاص معندهاش أهل ممكن يقفوا ليها."

فريدة بصتلها وقالت بهدوء

"طب وإنتِ هتعملي إيه يعني؟ هو إنتي اللي قولتلها تهرب معاه؟ هي مش هتستحمل وهترجع اكيد"

يسر رفعت عينيها بسرعة وقالت

"هترجع إزاي يا فريدة؟ إنتي متخيلة إنها هترجع عادي كده؟ أنا مش عارفة هي ممكن تعمل إيه أصلاً."

قبل ما ترد، سمعت فريدة صوت يونس وراهم بيقول بخفة

"هاااي."

لفت بسرعة وقالت بدهشة

"يونس!"

ابتسم يونس وقال

"فريدة، مش عايز أفضل بالبتاع دي، فكيهالي بقى عشان خاطري."

يسر بصت لفريده وقالتلها

"هسبقك أنا طيب."

يونس بصلها بسرعة وقال 

"إيه ده! عسر! إزيك؟ مخدتش بالي إنك واقفة."

يسر بصتله بقرف ومشيت، فريدة قالتله وهي بتحاول تخفي ضحكتها

"بطل بقى ترخم عليها."

يونس رفع حاجبه وقال

"هي معندهاش لسان ولا إيه؟ مفيش غير نظرات بس!"

فريدة قالت

"فكك منها، قول كنت عايز إيه؟"

قال بسرعة

"عايز أفك البتاع ده، لما ماما شافته عملتلي فيلم، بالرغم إني حاولت أداري والله"

فريدة رفعت حاجبها وقالت

"تشيل إيه يا حبيبي؟ إنت لسه عامله من يومين، بطل هبل."

قالها بتذمر

"مش طايقه يا ستي، أعمل إيه؟"

ردت عليه

"استحمله بقى، بعد شهر ولا حاجة أبقى أفكه."

قال بتنهيدة

"نفسي في جسم ضد الكسر بجد، علشان أقدر أعيش حياتي طبيعي."

ضحكت فريدة وقالت

"إنت مش بتستخدم البروتكتيف بادز اللي بتحطهم قبل ما تسوق يحموك؟"

قال بسرعة

"لاء طبعًا، الحرية غير."

قالت بابتسامة

"هي غير فعلاً، بس كده إنت مش حر بالدرّاع ده."

رد وهو بيغير الموضوع

"فكك مني، مالها صاحبتك دي زهدت الدنيا كده ليه؟"

سألته 

"مين؟ يسر؟"

رد

"آه هي عسر."

ضحكت وقالت

"فاكر صاحبتي اللي كنت رايحة أحضر كتب كتابها قبل كده؟"

يونس فكر شوية وقال

"آه فاكر."

فريدة قالت

"كانت هي."

قال وهو بيحاول يفتكر

"وقولتي إنه متمش؟"

هزت راسها وقالت

"آه متمش... علشان أختها هربت مع خطيبها."

يونس قال بصدمة

"ده بجد؟! قولتي الجمله خبط لزق صدمتني"

قالت وهي بتزفر

"أمم... شوفت بقى ظروف الناس صعبة إزاي؟ يعني لو أخوك مثلاً هرب مع خطيبتك، شوف ممكن تعمل إيه."

ضحك يونس وقال بثقة

"الحمد لله تيم عمره ما يعمل كده، أصلاً مش بيتعامل مع أي بنت، يقوم يوم ما يتعامل، يتعامل مع خطيبتي أنا مثلًا؟"

قالت وهي بتبص بعيد

"كل واحد وظروفه بقى."

عند ياسمين

كانت بتزعق، صوتها عالي وهي واقفة في نص الصالة الصغيرة

"يعني إيه يا محمد؟! أنا مش قادرة أشتغل وظيفتين طول اليوم، وانت رامي كل حاجة عليا!"

محمد كان قاعد على الكنبة، حاطة إيده على راسه، وقال بصوت مخنوق

"هتسيبي الشغل يعني؟ هتسيبي الشغل وإحنا يادوب مكملين الإيجار والأكل بالعافيه؟"

ياسمين قالت بصوت اعلى

"أنا مش هقدر، فاهم؟! مش هقدر، أنا بشتغل شيفتات طويلة وبروح مهدودة، وإنت... إنت مش قادر تكمل في وظيفه حتى، دي مبقتش عيشه "

قال بملل

" هتصرف في البيت يا ستي بس بلاش تسيبي الشغل"

كانت هترد، بس الباب خبط فجأة.

ياسمين بصت للباب بقلق وقالت

"مين ده دلوقتي؟"

قامت تفتح الباب وهي بتزفر، اتصدمت لما شافت أم محمد واقفة قدامها وبتبص لياسمين بنظرة كلها احتقار.

قبل ما ياسمين تلحق تستوعب، أم محمد زقتها ودخلت البيت وقالت ببرود

"وسعيلنا يختي."

ياسمين وقفت مصدومة مكانها، محمد أول ما شاف أمه ابتسم، جري عليها وهيا حضنته بشدة، قالت وهي بتبعد عنه وبتبصله

"إنت خاسس كده ليه يا ضنايا؟ هي مش بتأكلك؟ قول يبني، مش بتاكل كويس؟"

محمد قال بسرعة وهو بيحاول يهدي الموقف

"أنا كويس يا أمي."

أمه بصتلها بقرف وقالت بصوت عالي

"كله من البومة دي، هي السبب في كل اللي إنت فيه!"

ياسمين فتحت بقها علشان ترد، لكن محمد بسرعة قال

"ياسمين...مش هنقدر ندفع إيجار البيت أكتر من كده... هنروح نعيش مع ماما في البيت"

صدمتها كانت فعلا كبيره منه، أمه قالت بشماتة

"وأنت كمان بتعرفها يا ضنايا؟ دي حرمتك مني كل الفترة اللي فاتت، قال ايه؟ مش هتقدر تعيش مع حد، بتشرط عليك، ودلوقتي هتقدر تتكلم أصلًا ولا تعترض؟ مش ناقص غير الفلتانه"

ياسمين قالت بغضب وصوتها بيترعش

" هو في ايه؟ انتي مفكره نفسك مين علش..." 

محمد قاطعها بصوت عالي

" ياسمين؟!"

صرخت ياسمين

"ياسمين إيه وزفت إيه؟! إنت بتقول إيه؟!"

أم محمد قالت بسخرية وهيا بتحط إيدها في وسطها

"اللي سمعتيه يا ضنايا... ولو مش عاجبك، الباب يفوت حمار، ده لو عرفتي تروحي فين أصلًا، مش هتلاقي حد يلمك غير ابني"

فضلت ياسمين واقفة مكانها، ودموعها على وشك النزول، ومفيش غير صوت نفسها العالي اللي كان مالي المكان، ومحمد واقف مش قادر يبص في وشها.

عند فريده 

كانت راجعة البيت، وصلت، وهيا بتركن عربيتها لمحت عربية غريبة راكنة، عرفت أن في حد عندهم.

دخلت البيت بسرعه بس كان في هدوء، دخلت الصاله، بس شافت شخص مكانتش مستعده تشوفه ابدا وحست بالضيق...

دخلت فريده البيت، ولما دخلت الصاله لمحت علي اتشنجت أول ما شافته قاعد على الكنبه، ماسك فنجان قهوه، بيتكلم مع إيناس اللي كانت قاعده جنبه، وإسلام قاعد معاهم بيضحك على حاجه علي قالها، اتسمرت مكانها، ملامحها اتغيرت بسرعه، اتشدت، ضيقت عينيها وهي بتبصلع، ايناس أول ما شافتها قامت بسرعه وقالت بصوت متفاجئ

"فريدة؟ انتي جيتي إمتى؟"

فريدة كانت واقفه، عينها ثابتة على علي، ملامحها مشدوده ومستغربه وجوده

ايناس قالت بتوتر 

" فريده...ده...."

قاطعتها بصوت بارد

"عارفه... علي، اللي عايز ياخدك مننا، صح كده؟!"

علي وقف بسرعه، كان هيتكلم، بس هيا بصتله وقالت

"أكيد أي كلام هتقوله مش هكون مقتنعه بيه، أنا بكرهك من قبل ما أشوفك أصلا فمتحاولش"

إيناس اتلغبطت وقالت بحده

"فريدة؟!"

فريدة بصتلها وقالت بصوت واضح

"متحاوليش توقفيني، أنا مش مستعدة لحاجه زي دي أبدًا."

علي قال بصوت هادي وهو بيبص في عينيها

"أنا عارف إن عندك حق تكوني كرهاني ومش حباني، بس انتي لسه معرفتنيش يا فريده... أنا مش ناوي أبدًا أخد إيناس منك زي ما انتي متخيله، أنا فعلًا بحبها، واستنيتها كل ده علشان تتطلق ومصدقت أخيرًا، وصدقيني... أنا هكون سندها"

فريدة ردت بسرعه وعينيها فيها لمعة غضب

"انت دمرت البيت وبس، ده اللي انت عملته... فمتجيش تحاول تحسن من اللي بتعمله"

إيناس قالت بتوتر

"فريده... بس، بطلي هجوم."

فريده بصتلها وقالت

"حاضر... هبطل هجوم... اشبعوا ببعض"

لفت وسابتهم، طلعت أوضتها بخطوات سريعه، قفلت الباب وراها جامد، وإيناس واقفه مكانها ندمانه انها سمعت كلامه

قالت وهي بتبص لعلي

"قولتلك مش هتتقبل."

إسلام كان واقف وقال وهو بيبص لإيناس

"أنا هطلع أشوفها."

اسلام طلع وعلي قال وهو بيحاول يسيطر على قلقه "إيناس... ده لازم يحصل، هي مش هتتقبل بسهوله بس أكيد هتتقبل... حاولي تتكلمي معاها وتفهميها، أكيد هتقتنع بكلامك مع الوقت"

إيناس قالت بنبرة تعب

"حاولت كذا مرة، بس هي رافضه... قولتلك صعب."

علي قرب منها وقال بنبرة مصممه

"إيناس، انتي لازم تحاولي عشاني... أنا بحرك قضية طلاقك علشان تتم بسرعة، وبمجرد ما عدتك تخلص هنتجوز... صدقيني، مش هقدر أقبل غير كده، في وقت لسه قدامنا تقنعيها."

إيناس قالت بحزن وهي بتبص بعيد

"أتمنى تقتنع... علشان هي لو فضلت مصممه على رفضك، مش هقدر أتجوز... مش هقدر أعمل كده وهيا مش عايزه ده."

علي قال بحسم

"مفيش حاجة اسمها لو... إحنا تعبنا كتير وعايزين نرتاح بقى، مش هقبل أي رفض، في وقت كبير اهو تتقبل فيه، وانتي عارفه بنتك وعارفه هتقنعيها ازاي، واكيد هتتقبلني مع الوقت"

سكتوا هما الاتنين، وإيناس حست بتقل الموقف على قلبها، وبتفكر هتفضل كده لحد امتى؟ 

إسلام طلع بخطوات هاديه، كان متردد يدخلها ولا لاء، بس في الآخر خبط خبطه خفيفة جدًا، وفتح الباب وهو بيقول

"ينفع أدخل؟"

فريدة كانت قاعدة على طرف السرير، ضامه رجليها وباينه عليها إنها بتحاول تهدي أعصابها، رفعت عينيها ليه بسرعه وقالت ببرود

"لو جاي تدافع عنه، متتعبش نفسك."

إسلام دخل وقف قدامها وقال بنبرة هاديه

"مش جاي أدافع عن حد، أنا جيت علشانك إنتي"

اتنفست بسرعه وقالت بحده

"إسلام، مش عايزة أتكلم في حاجه بجد"

قال وهو بيحاول يسيطر على الموقف

"فريده، انتي عارفه إن علي مش شخص وحش... وأنا عارف إنك مش هتقدري تتقبليه بسرعه، بس بلاش تكوني قاسيه أوي على ماما، هيا استحملت كتير."

فريدة بصتله بحده وقالت

"مش شغلي، اللي بيني وبين ماما حاجه، واللي بيني وبين علي حاجة تانية خالص."

سكت إسلام شويه، وبعدين قال بنبرة حنونه

"انتي عارفة إن محدش بياخد ماما منك... حتى علي، مش هيعرف ياخدها، ولو حاول... أنا هبقى أول واحد يوقف ضده، بس ده مش هيحصل"

ابتسمت فريدة بسخرية وقالت

"يا أخي انت طيب أوي."

قال وهو بيحاول يخفف الجو

"وأنتي شريره أوي."

ابتسمت غصب عنها وقالت

"أنا مش شريره، بس مش قادره... مش قادرة أتقبل إن في حد تاني ياخد مكاننا في حياتها."

قعد إسلام جنبها وقال

"ومفيش حد هياخد مكاننا، بس يمكن يكون في مكان جديد بيتفتح ليكي وليها، وممكن... حتى لعلي كمان، فهو كده مخدهاش زي ما انتي فاكره"

رفعت عيونها ليه وقالت بحده

"بس هو أخدها فعليًا، أخد كل حاجه، وأنا مش عايزه أشوفه هنا."

إسلام قال بهدوء

"انتي حتى مش مدياله فرصه، علي مش وحش..."

قاطعته بحده

"مش عايزة أدي فرص لحد، مش عايزة أدي فرص لحد يا إسلام... فاهم؟"

سكت، خد نفس وقال

"طيب على الأقل متعامليهوش كده، بلاش تضايقي ماما كده، حاولي تنزلي وتقعدي معاهم شويه وهتفهمي قصدي"

هزت رأسها وقالت بنبرة قاطعه

"مش هنزل، ومش هغير رأيي."

قرب منها أكتر وقال بصوت واطي

"انتي بتجرحيها كده وانتي مش واخده بالك"

عينيها دمعت بس مسحت عينيها بسرعه وقالت

"أنا مش مسئولة عن اختياراتها، لو هيا عايزة تبقى معاه تتفضل، بس انا مش هقيل ده"

فضل إسلام ساكت ثواني، وبعدها قال بهدوء

"طيب، زي ما تحبي."

لف وخرج من الأوضه، قفل الباب وراه وهي فضلت قاعده مكانها، وبرغم محاولتهم انها تتقبله بس هيا مكانتش ناويه تتقبل وجوده أبدًا، مهما حصل.

عند ياسمين

كانت واقفه في الأوضه، إيدها متشابكه وهي بتبص لمحمد اللي كان بيلم هدومه بسرعه، الغضب باين في عينيها وهي بتقول بعصبيه

"إنت بجد إزاي كده؟ إنت بني آدم غير سوي نفسيًا."

محمد لفلها بسرعه، قال وهو بيحاول يمسك أعصابه "ياسمين، إنتي شايفة الوضع، مش هنقدر نستحمل، هنروح نقعد مع ماما وده هيوفر الإيجار، وإنت تقدري تنزلي وظيفه واحدة بدل اتنين."

اتعصبت جدا وقالت 

"إنت بتستهبل؟ إنت عايزنا نقعد مع امك ومع إخواتك في بيت واحد؟ ده إيه العيشه دي؟ ده أنا كده أنزل أشتغل تلات شيفتات أرحم! أنا مش عايزة أمشي من هنا! فاهم؟!"

محمد قال 

"مش بمزاجي ولا بمزاجك يا ياسمين، إنتي لما جيتي معايا، كنتي عارفة ظروفي إيه."

هزت راسها بمراره وقالت بصوت مكسور

"مكنتش أعرف إنك غير مسؤول كده... كنت معميه... ربنا نجدها يسر."

محمد اتعصب وقال بصوت عالي

"بقولك إيه، مكنتيش وافقتي تهربي معايا؟ كان زماني متجوز من غير مشاكل، بس إنت اللي كنتي بتغيري من أختك وعايزة تاخدي منها كل حاجه! ده مش ذنبي!"

بصتله بكره وقالت

"إنت اللي زنيت عليا، بالرغم من اني كنت تقبلت خلاص جوازك منها، إنت اللي قعدت تزن وتضغط، وكنت فاكرة إنك هتبقى راجل ومسؤول... بس دلوقتي فهمت غلطي لما هربت مع واحد مش مسؤول، بجد انت أحقر واحد شوفته في حياتي، فوق ما جيت تتقدم لأختي عشان تغيظني مسبتنيش في حالي وزنيت عليا، انا بجد بكرهك"

قبل ما يرد، سمعوا صوت مامته من بره وهي بتزعق 

"يلا يا محمد! يلا يا ابني!"

رد بسرعة وهو بيرفع صوته

"حاضر يا ماما!"

بص لياسمين وقال بنبرة حاسمه وهو بيقفل الشنطه 

"لمي هدومك ويلا."

اتأففت، دموع الغيظ في عنيها وهي بتقول بخنقة 

"يارب..."

وسابت مكانها وهي بتزق الباب وخرجت من الأوضه، سايباه واقف لحظه وهو بياخد نفس طويل قبل ما يخرج وراها.

عند فريده 

كانت قاعده لسه في أوضتها، ضامة رجليها ليها وهي بتبص للسقف بشرود بعد ما إسلام خرج، بتحاول تهرب من التفكير، بس دماغها كانت مليانه 

موبايلها رن وكانت سالي، غمضت عينيها لحظة قبل ما ترد

"أيوه يا سالي."

صوت سالي جه متحمس

"فريدة، إحنا جايين دلوقتي، انا وماما... عايزاكي ضروري، هقولك وصلت لايه"

فريدة زفرت وقالت بهدوء

"تمام... مفيش مشكله"

سالي سكتت لحظة قبل ما تسأل

"مالك؟ صوتك مش عاجبني"

فريدة ردت بسرعه وهي بتحاول تسيطر على نبرة صوتها

"مفيش... عادي."

سالي قالت بإصرار

"أنا كده كده جيالك، ومش هسيبك إلا لما أعرف إيه اللي مضايقك."

فريدة هزت راسها بخفة رغم إن سالي مش شايفاها وقالت

" مستنياكي"

قفلت الموبايل وحطته جنبها، وهي بتتنهد بعمق، بتحاول تلم شتات نفسها قبل ما سالي تيجي.

عند سالي

بعد ما قفلت مع فريده، قررت تروح لتيم، وقبل ما توصل لاوضته لقته طالع منها

قال ببرود وهو بيبصلها

"في إيه؟"

قالت بسرعه

"إحنا رايحين عند خالتو شويه"

رفع حاجبه وقال

"طيب؟!"

قالت

"هتيجي معانا؟"

رد 

"لاء، مش هقدر أجي."

سالي اتنهدت وقالت

"ليه يعني؟ إنت طول الوقت قافل على نفسك، تعالى معانا تغير جو."

قال بنبرة ثابت

"مش هقدر، ورايا شغل الصبح."

في اللحظة دي، صابرين خرجت من أوضتها وقالت

"سالي؟، يلا عشان نمشي."

سالي قالت بسرعه وهي بتبص لصابرين 

"قولي لتيم ييجي معانا."

صابرين بصت لتيم وقالت بحسم

"مفيش داعي، خليه هنا"

تيم قال بسرعه وهو بيدخل أوضته

"مش هقدر أروح أصلاً."

وسابهم ودخل الأوضة، وسالي خرجت مع صابرين وهي بتلف وشها بضيق.

عند ايناس 

طلعت على السلم بهدوء، قلبها بيدق وهي بتفكر إزاي تفتح الموضوع مع فريده، خبطت خبطتين خفاف على باب أوضتها، وقالت بصوت هادي

"فريده، ممكن أدخل؟"

ردت بضيق 

"ادخلي."

فتحت إيناس الباب ودخلت، وقفت شوية مش عارفه تفتح معاها الكلام ازاي، في الآخر قالت بهدوء 

"كنت عايزة أتطمن عليكي."

فريدة قالت ببرود وهي مش باصه ليها 

"أنا تمام."

قربت إيناس منها وقالت

"أنا عارفة إنك متضايقه، وعارفة إن وجود علي مش مريحك"

فريدة بصتلها أخيرًا وقالت بحده

"أنا مش بس متضايقه... أنا مش قادرة أتقبل إنك ممكن تروحيله وتسيبينا"

إيناس اخدت نفس وقالت

"بصي يا فريده، أنا مش هاخد خطوه واحده لو إنتي مش متقبله ده... لو إنتي رافضه انا مش هتجوز علي، وهخرجه من حياتنا، فمتقلقيش عمري ما هعمل حاجه غصب عنك"

سكتت فريده لحظه، بس عيونها كانت بتلمع بدموع غيظ وهي بتقول

"بس إنتي عايزاه... حتى لو بتقولي مش هتتجوزيه، إنتي بتحبيه."

إيناس اتصدمت من صراحتها، حاولت ترد بس سكتت لحظه وبعدين قالت بنبرة مكسوره

"أنا مش هكدب عليكي، اه أنا بحبه، بس إنتي أغلى عندي من أي حد في الدنيا، ولو رفضتي أنا مش هكمل، حتى لو كان ده بيوجعني."

دمعة نزلت من عين فريده، مسحتها بعصبيه وقالت

"أنا مش قادره... مش قادره أتقبل، كل حاجة باظت من وقت ما دخل حياتنا"

إيناس مدت إيدها على كتفها وقالت

"خدي وقتك، مش هضغط عليكي، بس عايزاكي تعرفي إني عمري ما هعمل حاجة تكسرك، حتى لو كان ده هيكسرني."

فريدة بعد لحظة قالت بصوت واطي

"سيبيني لوحدي شويه"

هزت إيناس راسها وقالت

"تمام يا قلبي، بس عايزاكي تتطمني، لأني عمري ما هسيبك"

خرجت من الأوضه، وسابت فريده قاعده، عقلها مشوش اكتر، ودلوقتي حيرتها زادت وحست قد ايه انها وحشه وانانيه بس غصب عنها، هيا عايزه عيلتها ليها لوحدها.

عند ياسمين ومحمد

فتح محمد باب البيت وهو شايل شنطتين صغيرين، وياسمين ماشية وراه بتبص حواليها ببرود.

أم محمد دخلت وقالت بصوت عالي

"اتفضل يا سيدي... نورت البيت يا حبيبي"

محمد قال وهو بيحاول يبتسم

"الله يكرمك يا أمي."

اخت محمد الكبيره ( ايه) رفعت عينيها لياسمين من فوق لتحت وقالت بتهكم

"ده النور؟"

ياسمين بصتلها بنظرة مفيهاش ولا كلمه ودخلت بسرعة ورا محمد.

اخته الصغيره ( هدير) خرجت من المطبخ، بصت لياسمين ومحمد وقالت بخفوت

"أهلا..."

ياسمين مردتش، وكانت بتبص بقرف وهيا مش طايقه نفسها

محمد بصلها وقال وهو بيشاور على اوضه

"تعالي... الأوضه دي بتاعتنا."

دخلت الأوضه وهو دخل وراها، حط الشنط على الأرض وهيا بصت حواليها باشمئزاز ومش عاجبها الأوضه

بصت لمحمد وقالت ببرود

"ده اللي عندكوا؟"

محمد قال وهو بيقلع جاكته

"احمدي ربنا... ع الأقل هنقدر نوفر الإيجار."

سمعت صوت أم محمد من بره وهيا بتقول بنبره كلها سم

"على فكرة يا محمد... الأكل مش بيجهز لوحده، الست اللي هتدخل البيت لازم تبقى عارفه إن الشغل هنا مش قليل."

ايه ضحكت وقالت

"ده لو عارفة أصلاً، شكلها كده متعوده على الراحه، بس وماله، تشيل شويه"

محمد بص لياسمين وقال بتوتر 

"ياسمين، معلش، متكبريش الموضوع، إحنا هنا عيله واحده"

ياسمين قالت في سرها 

" لو مفكريني يسر تبقوا غلطانين، والله لاوريكوا ايام سوده"

قعدت على طرف السرير، حطت وشها في إيديها وهي بتاخد نفس طويل، هيا عارفه ازاي هتتصرف مع الأشكال دي

عند فريده

سالي وصلت مع صابرين ورنت على فريدة علشان تنزل، فريدة ردت 

"اطلعيلي فوق يا سالي، مش هقدر أنزل"

سالي طلعت، ولما دخلت الأوضه قالت وهي بتحاول تخفف الجو

"مالك بقا يا ستي؟"

فريدة زفرت وقالت

"فكك مني... كنتي قولتي إنك عايزه تقوليلي حاجه."

سالي قربت منها وقالت بنظره جاده

"قوليلي بس مالك الأول، إيه اللي مضايقك؟"

فريدة بصت بعيد وقالت

"سالي بجد مش عايزة أتكلم في الموضوع ده."

سالي قالت بسرعه وهي شبه متأكده

"يبقى مضايقك موضوع إن مامتك عايزة تتجوز، صح؟"

فريدة بصتلها بحده وقالت

"ودي حاجة متضايقش يعني؟"

سالي ردت

"يمكن انتي مكبرة الموضوع أوي، من حقها تتجوز تاني يا فريده"

فريدة بصت للأرض وقالت بصوت واطي 

"محدش هيحس بيا، فقلة الكلام أحسن."

سالي قعدت جنبها وقالت بهدوء

"فريده، مامتك فضلت عايشه حياتها كلها لوحدها، لو جتلها فرصه إنها تعيش وتكون سعيده بلاش تمنعيها."

فريدة قالت بنبرة متماسكه

"غيري الموضوع يا سالي."

سالي سكتت لحظه وقالت

"طب تعرفي... لما عرفت إن باباكي متجوز على مامتك من زمان وهو مسافر لوحده بره، أنا خوفت."

فريدة بصتلها وقالت باستغراب

"ليه يعني؟"

سالي قالت وهي بتحاول تضحك

"خوفت يكون ياسر عمل معايا كده، وفكرت جدياً أسافرله أنا وياسين."

فريدة ابتسمت ابتسامه خفيفه وقالت

"مش كلهم كده، اللي بيحب بجد مش هيقدر يكسر مراته ويتجوز عليها، وانتي قولتيلي إنه بيحبك."

سالي قالت وهي بتبص قدامها

"وبرغم كده خوفت... مع إني بكلمه يومياً في أوقات فراغه كلها... أصلاً عايزة أسافر، بس أما نخلص حوار تيم الأول."

فريدة قالت

"كنتي هتقولي وصلتي لايه... قولي بقى."

سالي قالت بحماس

"آه، حجزت كاميرا صوت وصوره، حجمها صغير جداً، اصغر من عقلة الصوباع، بس هتيجي بعد شهر علشان طلباها من بره مصر."

فريدة قالت 

"كويس! لو حجمها زي ما بتقولي، مش هياخد باله منها أبداً."

سالي ابتسمت وقالت بفخر

"دي أصغر كاميرا في العالم، دورت كتير جداً لحد ما قدرت ألاقيها"

فريده هزت راسها وقالت 

" كويس"

سالي قالت بقلق

"أنا بس خايفة يا فريده، خايفة ألاقي حاجة أكبر من قدرتي على الاحتمال، بالرغم من اني مستنيه اعرف من سنين، بس مرعوبه "

فريده مسكت إيديها وقالت

"مهما كان اللي ورا الباب ده، هتعرفيه، لانك بتسعي من زمان تعرفي وتفهمي، ولو عايزه تتراجعي ده قرارك"

سالي قالت برفض

" لاء مش بعد ما وصلت لهنا، مهما كان اللي ورا الباب ده انا هكون مستعده"

سكتوا لحظه ،بعدها فريده قالت وهي بتقوم

"يلا ننزل نتمشي تحت شويه، بدل الخنقه دي"

سالي ابتسمت ابتسامه خفيفه وقالت

"أوعديني مهما حصل، متسيبينيش لوحدي."

فريده ضحكت وقالت

" متقلقيش، مش هيحصل"

بعد اسبوع

دخل يونس المستشفى، وقف عند الاستقبال وسأل عن فريده بس كانت في عمليه، زفر بملل وكان هيمشي من غير ما يتابع بس سأل عن يسر وكانت فاضيه، استنى لحظات لحد ما ظهرت وشافته، قربت منه وقالتله بهدوء 

" اتفضل معايا"

دخل معاها الأوضه، كان في دكتور واقف، يونس قعد على الكرسي، وطول ما الدكتور بيكشف، يونس عينيه على يسر، بيحاول يلمح ابتسامه أو أي نظره، بس يسر مكانتش بتبصله أصلاً، الدكتور خلص متابعه وخرج بعد ما اداله نصايح بس يونس مسمعهوش اصلا

قال وهو بيحاول يرخم عليها

"هو انتي دايمًا ساكتة كده؟"

يسر مردتش، مسكت ملفه، وكتبت فيه بهدوء.

اتضايق وقال

"أنا بكلمك."

رفعت عينيها ببطء وقالت ببرود

"في حاجة تخص حالتك؟ لو هتتكلم بخصوص حالتك اتفضل؟ غير كده تقدر تتفضل علشان اقدر اكمل شغلي"

اتصدم للحظه من حدتها، وقال وهو بيضحك بس ضحكه باينة إنها مصطنعه

"لا... بس انتي... مش عارفه يعني..."

ردت وهي بترجع الملف

"لو خلصنا، ممكن تتابع المره الجايه مع دكتور تاني لو الدكتور ده مش مريحك"

يونس سكت وقال 

" مش هتفرق كده كده هفكه اصلا"

يسر قالت ببرود

" حضرتك ادرى" 

وقف عند الباب وبصلها وسأل

"طب فريدة قدامها كتير جوه؟"

يسر رفعت عينيها ليه بسرعه وقالت ببرود

"آه، قدامها كتير... العمليات دي بتاخد وقت طويل."

يونس زفر وقال

"يعني مفيش فايد، كنت عايز أسلم عليها قبل ما أمشي."

يسر رجعت تبص للملف في ايديها وقالت من غير ما ترفع عينيها

" اعتبره وصل" 

سألها بخفه

" هو ايه اللي وصل؟!" 

بصتله وقالت 

" سلامك"

خرج وهو حاسس أنه متضايق، مفيش حد صده قبل كده، اي بنت بيتعامل معاها مش بتكون قفل كده، وهو بيعدي من الاستقبال، لمح حسام واقف على جنب.

يونس بصله وقال وهو بيقرب

"إيه يا عم حسام، إنت هنا بتعمل إيه؟"

حسام اتفاجئ وهو بيرفع عينه بسرعه وقال وهو بيسلم عليه "كنت قريب من هنا فقولت أعدي أتطمن على حد هنا يعني"

يونس رفع حاجبه وهو بيحط إيده السليمه في جيبه

"تتطمن على مين يعني؟"

حسام اتلغبط لحظه وقال

"واحد صاحبي هنا... كان عامل عمليه قبل كده، فقولت أشوفه يعني"

يونس بصله شويه وقال وهو بيبتسم ابتسامه خفيفه

"طيب ماشي... كله تمام معاك يعني؟"

حسام قال بسرعه

"آه تمام... كله كويس، شكلك انت اللي مش تمام"

يونس قال بخفه

" حاجه عاديه يعني، متشغلش بالك" 

حسام قاله 

" الف سلامه عموما"

يونس قال

"الله يسلمك... سلام بقا عشان أنا مستعجل."

حسام ابتسم وقال

"سلام يا يونس."

يونس مشي وحسام فضل واقف مكانه مستني.

عند ياسمين

ياسمين خرجت من الأوضه ودخلت المطبخ تشرب ولقت حماتها واقفه، اول ما شافتها قالت ببرود

"انتي... لمي الغسيل اللي على الحبل، يلا اعمليلك همه كده بدل ما انتي زي قِلتك"

ياسمين شربت المايه ببطء، وبصتلها من فوق لتحت، وقالت بهدوء مميت

" لميه انتي لو عايزه... أنا مش خدامه هنا علشان الم قرفكوا"

ايه دخلت وبصتلها بغيظ وقالت

"انتي بتكلمي أمي انا كده؟"

ياسمين ابتسمت ابتسامه خفيفه وقالت

"آه... بكلمها كده، عندك اعتراض؟"

ايه قالتلها بسخريه

"انتي فاكرة نفسك إيه يا بت؟ دا انتي جايه من الشارع، مفيش حد يلمك غيرنا "

ياسمين بصتلها من فوق لتحت باشمئزاز وقالت

" هقولك انا مين؟ انا اللي هتطردكوا من البيت ده قريب اوي علشان اخلص منكوا، حطيها حلقه في ودنك علشان أما اطردك تقولي ياسمين قالت، هعرفك قيمتك اللي بجد"

ام محمد قالت 

" تطردي مين يا بت، ده احنا اللي نطردك من هنا ومش هتلاقي حد يلمك من الشوارع"

ياسمين قالت 

" فكري تعمليها وهنسى انك واحده كبيره، بلاش انتي مش هتستحملي"

ايه قالت بغيظ

"زودتيها!"

ياسمين بصتلها وقالت ببرود

"لو عايزة تعرفي أنا ممكن أزودها إزاي... جربي تقربي."

في اللحظه دي محمد دخل وقال

"في إيه؟!"

أمه قالت

"مراتك دي انت تلمها بدل ما نلمها ونعلمها الأدب اللي محدش علمهولها"

ياسمين قالت لمحمد

"مراتك دي اللي شقيانه على البيت ده كله وانت قاعد ساكت، وهما فاكرني خدامه... فهمهم يا محمد قبل ما أفهمهم بطريقتي"

محمد وقف ساكت، وياسمين دخلت الأوضه ورزعت الباب جامد 

عند فريده 

خرجت من العمليات، وشها باين عليه علامات الإرهاق، وهي ماشية في الممر، لمحت حسام واقف بعيد، أول ما شافها وقف بسرعه، قرب منها بخطوات ثابته وقال بصوت هادي

"حمد لله على السلامه"

رفعت عينيها ليه وقالت

"انت بتعمل ايه هنا؟"

ابتسم وقال

"كنت مستنيكي... كنت قريب من هنا وقولتك اعدي عليكي"

فضلت ساكته لحظه وهيا بتتنهد، قال بسرعه وهو بيحاول يخفف التوتر

"متخافيش، مش هاخد من وقتك كتير، شكلك تعبان"

رفعت حاجبها وقالت

"طبيعي بعد 6 ساعات عمليات."

وهيا بتبص وراه لمحت شخص واقف بعيد، عرفته علطول، "علي"

الابتسامه اختفت من على وشها، قالت وهيا بتهمس

"هو إيه اللي جابه هنا...؟"

حسام بص وراه بسرعه وقال

"مين ده؟"

فريدة أخدت نفس عميق، وقالت بصوت واطي

" عن اذنك ثواني" 

ومشيت من قدامه وراحت لعلي تشوفه 

فريده قربت من علي، نظراتها كانت حاده، علي اتنهد بهدوء وقال

"ازيك يا فريده."

ردت ببرود

"كنت تمام"

ابتسم ابتسامه صغيره وقال

"جاي أتكلم معاكي."

ردت بسرعه نبرتها واضحه 

"لو هتحاول تقنعني، وفر كلامك."

وقف لحظة وكأنه بيختار كلماته، قال بنبرة هاديه فيها رجوله وثقه

"ولو، برضو عايزك تسمعيني."

اتنهد، عينه كانت ثابته عليها 

"فريده، أنا أرمل... ومش بخلف، مراتي ماتت بدري جدًا، وفضلت لوحدي من ساعتها، كان ممكن أدور على أي حياه سهله، بس معملتش كده، كنت بشتغل وببني نفسي ومش بفكر غير في الشغل وبس"

اتحرك خطوه لقدام وهو بيكمل

"لما شوفت ايناس، شوفت فيها راحه كانت ناقصاني، إنسانه قويه، قدرت تربيكوا لوحدها، فضلت واقفه رغم كل اللي عدى عليها، حبيتها بصدق، مش نزوه ولا لحظة فراغ."

فريده كانت ساكتة، بتبصله ووشها متقفل.

كمل، صوته فيه صدق وهدوء

"انا مش جاى هنا علشان أخدها منك يا فريده... أنا جاي علشان أكون سند ليها، وأكون سند ليكي كمان لو قبلتي، عمري ما هحاول أخد مكانك اكيد زي ما انتي متخيله."

سكت لحظه، اخد نفس طويل قبل ما يرجع يكمل

"لو اتجوزنا... ده مش هيأثر عليكي، لأنك هتيجي تعيشي في بيتي مع ايناس."

بصتله بصدمه بس كمل قبل ما تقاطعه

"وصدقيني، هيكون مرحب بيكي، وهتحبي بيتي كمان، بس بلاش تعاندي وتحرمينا من بعض."

اتنهد وكمل

"ايناس رافضة تتجوزني علشانك إنتي بس، بس احنا تعبنا يا فريده، حطي نفسك مكاننا، لو في يوم حبيتي شخص، ولقيتي نفسك مش قادره توصليله بسبب شخص معين، وقتها هتقدري تفهميني."

رفعت فريده حاجبها بشك واضح

كمل بهدوء

"أنا سمعت عنك كتير، وعارف إنك قويه، وعارف إنك كويسه، ومصدق إنك مش هتعملي حاجة تضر ايناس أو تكسرها."

سكت لحظة قبل ما يبصلها ويقول بصدق

"بصي يا فريده، احنا مش هنتجوز بكره، ولسه قدامنا وقت... وقت تقدري تتقبلي فيه علاقتنا، وتقدري تحسي إن احنا الاتنين مش بناخد منك حاجه... بالعكس، بنحاول نخلق حياه احسن، بس متقفليش الباب أوي... سيبيه موارب."

فريده بصتله بثبات، قالت بصوت واطي لكنه حاد

" انت متخيل أن سهل عليا اوي الموضوع ده، لاء متهيألك، انا مش هقبل أي حاجة تكون سبب في إنها تبعد ماما عني حتى لو كان انت."

اتنهدت وقالت

"انت طيب ومحترم؟ يمكن، مش هقدر أنكر، انت ممكن تكون عوض؟ احتمال... بس مش بالنسبالي."

سكتت لحظة قبل ما تكمل بصوت مهزوز لكنه واضح 

"أنا آسفه، مش هقدر أبصلك غير إنك الراجل اللي جاي ياخد مني أمي، حتى لو مش ده قصدك."

بصتله مره اخيره قبل ما تقول

"خلي أي محاولة تانية إنك تقنعني لنفسك... عشان مهما قلت، مش هقبل."

مشيت من قدامه ورجعت لحسام اللي كان واقف مستني، شاف ملامحها متغيره وعينيها فيها لمعه غريبه، قرب منها بسرعه وقال قلق

"مين ده؟ وفي ايه؟"

فريده بصتله وقالت ببرود

"حد مش مهم... بعد إذنك يا حسام."

عدت من جنبه بخطوات سريعه وهي بتحاول تمسك نفسها، وحسام فضل واقف مكانه، نظراته مش مفهومه.

فريده رجعت البيت، كان هادي بشكل يخنق، وكأن مفيش روح فيه، طلعت أوضتها بخطوات تقيله، قلبها مقبوض، وحاسه بخنقه

بعد شويه إسلام دخل أوضتها بعد ما خبط وهو بيبتسم، قرب منها وقال

"ديدا، عامله إيه يا حبيبتي؟"

فريدة رفعت عينيها وقالت ببرود

"هكون عامله إيه يعني؟ كويسه."

قرب منها أكتر وسألها

" لسه متضايقه؟"

ردت بسرعه وهي بتزفر

" عادي."

قال وهو بيحاول يخفف الجو

"طب هتيجي بدري بكره"

قالت من غير ما تبصله

"أنا مش عايزه أروح معاكو"

ملامحه اتغيرت، قعد جنبها وقال

"فريده، انتي عارفه قد ايه انتي مهمه... وجودك مهم ليا، ومش هقدر أروح من غيرك."

رفعت عينيها ليه وهي حابسه دموعها وقالت

" كلكوا خلاص بتبعدوا... هكون لوحدي لما تمشوا كلكوا"

قرب منها أكتر وقال وهو بيحاول يهديها

"نمشي فين يا فريده؟ صدقيني، انتي فاهمه غلط خالص."

قالت بصوت واطي بس مليان وجع

" انت أهو، هتتجوز... وماما عايزه تتجوز... وأنا هكون لوحدي."

إسلام حاول يضحك ويخفف الكلام وقال

"وإنتي يعني مش هتتجوزي؟ خلاص قررتي تترهبني؟ ده انتي احتمال تتجوزي قبلي يا بت انتي"

سكتت لحظه وبعدين قالت بحده

"مهو بجد... محدش حاسس أنا حاسه بإيه."

إسلام قرب منها أكتر وقال وهو بيحاول يخفف الجو

"بصي بقى يا ست فريده... لو الموضوع مدايقك اوي كده، أنا مستعد أتجوز هنا في البيت لو ده هيرضيكي."

بصتله بدهشه وقالت

"إيه؟!"

ابتسم وهو بيهزر معاها وقال

"اه والله، اللي انتي عايزاه، وبتكلم جد علفكره"

فريدة حاولت تخفي الابتسامه اللي طلعت غصب عنها، بس نظراتها رجعت حزينه وهي بتقول

"مش موضوع جوازك هنا أو برا... الموضوع إنكوا كلكوا خلاص بتمشوا، وكل واحد هيبقى له حياته، وأنا هبقى لوحدي..."

إسلام مسك إيديها بخفه وقال بنبره جاده

"فريده، إحنا مش هنسيبك لوحدك... إنتي فاهمه غلط، إحنا مهما عملنا ومهما اتجوزنا، إنتي مش هتبقي لوحدك، بلاش الفكره دي، أنا حاسس بيكي، بس عايزك تتطمني... انتي مش لوحدك ومش هتكوني لوحدك، ده وعد"

اتنهدت وهي بتبص بعيد، إسلام حس إنه لازم يسيبها تهدى شويه، فقام وهو بيقول بلطف

"هسيبك ترتاحي... بس فكري في كلامي يا ديدا، وأنا مش هروح من غيرك بكره... عشان فرحتي مش هتكمل غير بوجودك"

A FEW DAYS LATER

في وقت العصر.

فريده كانت واقفة عند الشباك في اوضتها، بتبص على الجنينه اللي بدأوا يجهزوها من امبارح، الكراسي البيضه اللي محطوطه بشكل دائري حوالين الترابيزات المستطيله، والورد الفريش اللي متوزع على الترابيزات بترتيب دقيق، الألوان هادية بين الأبيض والبينك الفاتح، والستاره المنسدله عند مدخل الجنينه بتتحرك مع الهوا، كل حاجه كان شكلها حلو والمنظر كان عاجبها لأن كل حاجه كانت من اختيارها، بس حاسه ان فرحتها مش كامله، دي اكتر لحظات كانت خايفه منها واهي بتتحقق قدامها.

إيناس كانت تحت في الجنينه ومعاها صابرين، بتشيك على كل تفصيله وبتشوف لو في حاجه ناقصه وبتتأكد من كل حاجه.

فريده بعد ما وقفت شويه عند الشباك، اتنهدت بهدوء، وبعدين لفت ودخلت تجهز نفسها، لبست فستان سيمي فورمال بسيط لونه سيلفر، مديها شكل أنيق وراقي من غير مبالغه، سابت شعرها بس عملته ويڤي خفيف، والميكاب كان بسيط جدًا بين جمالها بدون مبالغه

نزلت بخطوات هاديه، أول ما نزلت، إيناس رفعت عينيها وشافتها، عينيها وسعت وهي بتقول بدهشه ممزوجه بابتسامه

"يا روحي... طالعه قمر بجد النهارده يا فريده"

فريده ابتسمت بهدوء وقالت

"شكرا يا ماما."

إيناس قربت منها وحضنتها وقالت 

" كل حاجه هتكون كويسه يحبيبتي متقلقيش"

فريده اكتفت بهزه بسيطه وبصت حواليها، الناس بدأت تيجي، راحت بهدوء وقعدت على ترابيزه بعيده شويه علشان تبقى شايفة المكان كله.

الناس بدات تيجي واحده واحده، والمكان بيتملي بهدوء، الصوت كان هادي، موسيقى كلاسيك خفيفه في الخلفيه

لمحت من بعيد حسام وهو داخل، كان شكله مرتب وأنيق، كانت عينيه بتدور عليها وسط الناس، ولما شافها، ابتسم ابتسامه واسعه وهو بيقرب ناحيتها بخطوات ثابته.

وقف قدامها وقال بصوت هادي

"مساء الخير يا أميره"

فريده ابتسمت بخفه وقالت

"مساء النور، نورت."

قعد قدامها وهو بيبصلها وقال

"الدريس يجنن، وانتي... شكلك تحفه بجد، بهرتيني"

ابتسامتها وسعت شويه وقالت 

"شكرا"

قال 

"لو أي حد شافك هيحس إنه بيشوف ملاك نازل من السما بجد"

ضحكت بخفة وقالت

"بطل مجاملات يا حسام."

هز راسه وقال

"مجامله إيه، دي حقيقه."

سكت لحظه وهو بيبصلها، عيونه فيها لمعه خفيفه، لمحت ايناس واقفه مع ناس فقالتله

" تعالى اعرفك على ماما"

مشي معاها بابتسامه واسعه، فريده قالت 

"ماما... ده حسام، زميلي."

إيناس بصتله بابتسامه رقيقه ومدت إيديها

"أهلًا يا حسام، شرفتنا."

حسام رد بابتسامه مهذبه

"الشرف ليا، مبروك"

ردت بابتسامه 

" الله يبارك فيك يحبيبي عقبالك" 

رجع هو وفريده تاني للترابيزه، كانت كل شويه بتضطر تسيبه وبتروح تسلم على اللي بييجوا وترجع تاني تقعد لحظه لحد ما صحابها وصلوا فراحت قعدت معاهم وكانت بتروح لحسام برضو.

شافت سالي داخله ومعاها يونس وتيم، راحتلهم بابتسامه، سالي اول ما شافتها قالت بانبهار

"ايه الحلاوه دي!"

فريده حضنت سالي وقالت بخفه

" تسلمي، منورين"

بصت بعدها على يونس اللي كان واقف مبتسم وقال

" اقسم بالله ما حد منور غيرك، مخبيه الجمال ده كله فين"

قالت بابتسامه واسعه

" طيب يا سيدي شكرا على المجامله" 

قال 

" انتي مشوفتيش نفسك في المرايه ولا ايه؟" 

ضحكت وقالت

" خلاص صدقتك" 

بصت على دراعه وقالت بزهول

"إيه ده! فكيت الجبس؟"

سالي قالت بغيظ

" علشان هو عيل مهزق"

يونس ضحك وقال

" اومال هفضل بيه يعني، خنقني زي ما انتوا خانقني كده"

قالتله 

" طيب خلي بالك بقا، مش عايزه اشوفك تيجي تقولي فريده الحقيني" 

قال وهو بيهز أكتافه 

" مش ضامن"

ضحكت وبصت لتيم اللي كان واقف، بس سحبت نظراتها وكأنها مش شايفاه أصلا بس هو بين أنه مهتمش.

فريده قالت 

"علفكره حسام هنا من بدري."

سالي سألت 

" وجه ليه؟ انتي اللي عازماه" 

هزت راسها وقالت 

" بقا زميل بقا "

تيم كان واقف ساكت، وعينه اتحركت بسرعه ناحية فريده، وبعدين رجع بص قدامه وهو حاسس بالضيق

سالي بصت لتيم وقالت

"تعالى نروح نسلم عليه."

تيم هز راسه

"تمام"

مشيوا التلاته ورا فريده اللي كانت ماشيه بخطوات هاديه لحد ما وصلوا لحسام، أول ما شافهم ابتسم وقال

" اهلا، مستنيكوا من بدري"

يونس سلم عليه وقال

"إيه يا عم، جاي بدري ليه؟"

حسام ضحك وقال 

" علشان اعرف امشي قبل الزحمه" 

سالي سلمت عليه وتيم مد إيده يسلم عليه، إيده كانت تقيله شويه بشكل محسوس، حسام حس بده، وبصله بنظره قويه، الجو بينهم كان فيه توتر خفي، قبل ما حسام يرسم ابتسامه مهذبه، بعدها تيم سحب إيده بسرعه، ونقل نظره بعيد وكأن مفيش حاجة حصلت.

إسلام أخيرًا وصل مع فرح ( خطيبته)

فريده لما شافت إسلام في اللحظه دي، حست انها فرحاناله جدا من جواها، خطواتها كانت سريعه وهي ماشيه ناحيتهم، وصلت عندهم، وقفت لحظه، وبعدين حضنته، حضنته بسرعه، حضن دافي، حضن مليان أمان كانت مفتقداه، إيده لفت حواليها بحركه بسيطه، بعد لحظ سابته وهي بتاخد نفس كان محبوس جواها، عينها راحت على فرح، وقفت قدامها وحضنتها هيا كمان وفرح حضنتها.

فريده اخدت نفس عميق، رجعت خطوة صغيره لورا، وقالتله 

" مبروك يحبيبي " 

قالها بحب 

" عقبالك يا حبيبتي"

بعدت شويه ومسحت دموعها قبل ما تنزل ورجعت تاني مكانها على الترابيزة معاهم.

شويه ولمحت يسر داخله ومعاها يوسف.

ابتسامة ظهرت على وشها بسرعه، وقالت وهي بتتحرك ناحيتهم

"ثواني... صاحبتي جت."

سابت الترابيزة ومشيت ناحيتهم بخطوات سريعه.

يونس بص على "صاحبتها" اللي بتقول انها جت ولقاها يسر.

وشه اتغير لحظة وهو شايفها داخله، لكن عينه اتنقلت بسرعه على يوسف اللي كان ماشي جمبها.

فضل متابعهم، عينيه عليهم، مش عارف مين ده، بس منظرهم مع بعض، الضحكه اللي على وش يسر وهي ماشيه جنبه، خلت حاجه جواه تتشد.

تيم كان قاعد ساكت، عينه راحت على فريده للحظه وهي واقفه بعيد، ورجع بص قدامه تاني لما شاف نظرات سالي.

فريده وصلت ليهم، كانت الفرحة باينه في عينيها وهي بتحضن يسر بحب، بعدها بصت على يوسف، ابتسمتله وهيا بتسلم عليه وهو ابتسملها ابتسامه خفيفه، ومد إيده يسلم عليها، سلمت عليه بسرعه وقالت بصوت واطي

"نورت"

قال بابتسامه 

" بنورك "

يسر قالت 

" الدريس طلع واو عليكي بجد"

فريدة ضحكت وقالت وهيا ماسكه إيد يسر

"تعالي، تعالي، تعالي"

يسر مشيت معاها ويوسف كان ماشي جنبهم وهو ساكت، يونس لسه متابعهم، عينيه بتروح وتيجي بين يسر ويوسف، وسؤال واحد في دماغه 

" مين ده؟!" 

فريده كانت ماسكه إيد يسر وهيا بتشدها بخفه، وجنبهم يوسف، وقفت عند ترابيزه فاضيه قريبه وقالت بابتسامه

" خلينا هنا دلوقتي على ما البنات ييجوا" 

يسر قالت 

" طيب بس خليكي هنا "

فريدة ضحكت وقالت

" هخليني شويه اكيد" 

حسام كان واقف مكانه، بيشرب حاجه خفيفه وهو متابع فريده من بعيد، اول ما لاحظ أن فريده بصت ناحيته، رفع الكوبايه بإيده كأنه بيحييها من بعيد، وابتسم ابتسامه بسيطه قبل ما يلف وشه ناحية الناس اللي داخله علشان ميحرجهاش، فريده ابتسمت وهيا بتحاول ترجّع تركيزها وبصت جنبه لقت تيم، إيده في جيبه، عينيه عليها، وشه مفيهوش ملامح، بيبصلها بنظره طويله، واقف ثابت وعينيه غامقه، بلعت ريقها بهدوء، وبصت بسرعه بعيد، عدلت فستانها وبصت ناحية يسر عشان تكمل كلامها، بس لسه حاسه إن عينيه عليها...

بعد شويه، فريده لسه واقفه مكانها، شافت علي داخل، خطواته كانت هاديه وشكله مرتب، حست بضيق، قلبها وجعها للحظه، ودماغها لفّت، بصت بسرعه على إيناس اللي كانت واقفة بعيد، بتتكلم مع ناس ومش مركزه، مش شايفه أي حاجه، فريدة حست بدموعها اللي هتنزل، حاولت تمسحها بسرعه واخدت نفس عميق ودخلت البيت بسرعه من غير ما حد ياخد باله، بس تيم كان شايفها ومتابعها، عض شفايفه بخفه، وهو بيحول نظره للحظه، كان عايز يعرف مالها، إيه اللي حصل، بس محبش يتدخل.

سالي قربت منه، وقالت بصوت واطي

"هروح أشوف ماما"

هز راسه لها بسكوت وهو بيبص على مكان دخول فريده، فضل واقف في مكانه، عينه ثابته على الباب اللي دخلت منه، مستنيها تخرج، بس هيا طوّلت، بدأ يبص حواليه، وقرر إنه يدخل.

اتحرك خطوه، حسام لاحظ وسأله بسرعه 

"رايح فين؟"

تيم مردش، وكأنه مش مركز اصلا، عينيه تابعت تيم وهو بيبعد عن الترابيزه، شافه وهو بيعدي وسط الناس بخطوات هاديه، لحد ما دخل البيت، اتنفس بعمق وحس بضيق، عينيه على الباب اللي دخل منه تيم، ومش فاهم هو ليه دخل وراها.

تيم دخل البيت بخطوات هاديه، عينه بتدور عليها بس مش عارف هيا فين، كان ماشي بخطوات هاديه لحد ما سمع صوت خطوات نازله على السلم، رفع عينه بسرعه ولقاها نازله ببطء، شكلها مرهق، ووشها باين عليه إنها كانت بتعيط.

لما شافته، وقفت مكانها لحظه، استغربت هو بيعمل ايه هنا، بصلها وعينيه كانت مليانة قلق، قال بصوت واطي

"مالك؟ انتي كويسة؟"

قالت بحده وهي بتحاول تبان قويه

"دي حاجة متخصكش"

تيم وقف مكانه لحظه، خد نفس عميق وقال وهو بيبص في عينيها

"عارف... بس حبيت أتطمن عليكي"

فريده اخدت نفس طويل، حست إنها دايخه للحظه، جسمها مال لقدام، ووشها شحب شويه.

تيم مد إيده بسرعه، مسكها من دراعها قبل ما تقع، نظرته كانت مليانة خوف وهو بيقول

"فريده... في إيه؟ مالك؟"

بصتله بسرعه وسحبت دراعها وقالت بصوت واطي مكسور

"ملكش دعوه... اتفضل اخرج... وسيبني"

تيم بصلها بثبات وقال بهدوء

"لو تحبي... أنادي سالي طيب؟"

بصتله وقالت 

"مفيش داعي... ياريت تخليك في حالك... زي ما انت دايمًا."

مستنتش رده، لفت بسرعه، وخرجت من البيت بخطوات سريعه، قلبها بيدق بسرعة

تيم فضل واقف مكانه، عينيه متعلقه على الباب اللي خرجت منه، اتنهد قبل ما يخرج وراها 

فريده خرجت بسرعه وقبل ما تتحرك لقت حسام واقف قدامها.

بصلها بسرعه، سألها وعينيه كلها قلق

"فريدة، مالك؟"

رفعت عينيها ليه بسرعه، حاولت ترسم ابتسامه خفيفه على وشها، وقالت بصوت هادي

"أنا عادي... مفيش، كنت بظبط الميكاب بتاعي بس مش أكتر."

حسام ضيق عينه وهو بيبصلها وقال

"بس مش حاسس إنك كويسه."

اتنفست بسرعه وقالت وهي بتحاول تتهرب بنظراتها

"يمكن دايخه شويه لأني مأكلتش حاجه من الصبح."

حسام قال بسرعه

"إزاي يعني؟!"

فضل ساكت لحظه وبعدين قال بحزم

"تعالي معايا"

مشي قدامها بخطوات هاديه وثابته وهيا مشيت وراه من غير كلام، لحد ما وصلها لأقرب ترابيزه فاضيه وقعدها عليها،

قال بهدوء

"استني هنا"

ومشي بسرعه ناحية البوفيه، اخدت نفس عميق وهيا بتدور على علي بعينيها، بس قبل ما تشوفه حتى حسام رجع، كان شايل طبق فيه أكل بسيط، ومعاه كوباية عصير، حطهم قدامها على الترابيزه، قال وهو بيبصلها بجديه

"كلي."

بصتله وقالت بصوت هادي وهي بتحاول تبتسم

"حسام... مش لازم."

هز راسه وقال بحزم

"لاء، لازم، كلي يلا"

فضل واقف قدامها، وهيا بصت للطبق قدامها، مدت إيدها بتردد وبدأت تاكل وهو فضل واقف، بيطمن إنها بتاكل. 

يسر جت وقفت جنب فريده، بصتلها وقالت بصوت واطي

"انسحبتي على طول ليه؟"

فريدة ابتسمت بخفه وقالت بصوت واطي

"كنت بظبط الميكاب، لما شوفت علي اتضايقت"

في اللحظه دي، يونس جه ناحية الترابيزه وسأل وهو بيبص حواليه

"هو تيم فين؟ حد شافه؟"

حسام بص ناحية البيت، لمح تيم واقف، شاور بإيده وقال

"هناك أهو."

فريده بصت ليونس بسرعه وسألته

"في إيه إنت كمان؟ مالك؟"

يونس رفع حاجبه وقال

"مفيش... زهقت وعايز أمشي، فقولت أقوله ييجي معايا، مكانش عايز ييجي، وسالي جابته غصب اصلا"

سالي جت وقالت بابتسامه خفيفه

"سمعت حد بيجيب سيرتي."

يونس قال وهو بيحك رقبته

"عايزين نمشي."

سالي رفعت حاجبها وقالت بجديه

"مفيش الكلام ده، هنمشي كلنا مع بعض."

تيم قرب منهم بخطوات هاديه وقال بصوت هادي وهو بيبص ليونس

"أنا زهقت... مش هنمشي."

يونس رفع إيده وقال

"مجبتش حاجه من عندي."

سالي قالت وهي بتتنهد بخفه

"اهدوا يا شباب، في إيه؟ لسه شويه"

فريدة بصتلهم وقالت بضيق

"مش فاهمة يعني... إحنا لسه بنبدأ."

حسام قال بهدوء

"وأنا بصراحه عايز أمشي من بدري، بس الأول... في حاجه كنت عايز أقولها."

الكل ركز معاه، وهو بص على فريده، نظراته كانت ثابته، صوته بقا أخف

"بصراحه كنت عايز أسألك سؤال، بس مش عايز إجابته دلوقتي، كنت عايز أسألك وإحنا لوحدنا، بس معرفتش أفضل معاكي، زي ما إنتي شايفه انتي كنتي مشغوله إزاي."

سالي قالت بابتسامه مشاكسه

"قول يا حسام... إنت بتحمسنا أكتر ولا إيه!"

فريدة بصتله وقالت بهدوء

"اسأل يا حسام، مكانتش محتاجه يعني استنى كل ده"

حسام مد إيده في جيبه وطلع علبه صغيره، حطها قدامها على الترابيزه وفتحها، كان خاتم، شكله حلو جدًا، بيلمع تحت الإضاءه، بصلها وعينيه مليانه صدق، قال بصوت فيه توتر بس واضح وثابت

"تتجوزيني!!"

"تتجوزيني؟!"

صدمة نزلت عليهم كلهم، محدش كان متوقع، مكنوش متوقعين أن حسام هيسأل السؤال ده، ومش أي سؤال، سؤال مصيري

فريده كانت متشددة في مكانها، عينيها راحت على الخاتم اللي قدامها شويه، وبعدين بصت لحسام وشايفه ابتسامته وحست أنها عايزه تجري وتختفي، بس بلاش الموقف ده، عينيها راحت لتيم من غير ما تحس وكأنها عايزه تشوف تعابير وشه، بس كان واقف ثابت، كان باين عليه الهدوء من بره، إيده في جيبه بس كان شادد عليها جامد وكأنها متكتفه، شفايفه عاضضها بغيظ، وعينيه مركزه عليها جامد وكأنه مستنى ردها.

بس من جواه... من جواه كان في حاجه مولعه، إحساس أول مرة يحسه في حياته، مش قادر يحدد هو ايه، خنقه، غيره نار بتاكل في قلبه، نفسه دلوقتي يطلع قلبه من مكانه ويحطه تحت رجليه ويدوس عليه يمكن يخفف الألم اللي مسيطر عليه.

فريدة حاولت تلم نفسها وقالت بصوت متلخبط 

"حسام، أنا... أنا مش عارفة أقول إيه بس..."

قاطعها بهدوء وقال

"عارف إنك اتصدمتي ومكنتيش متوقعه كده، بس أنا مش طالب رأيك دلوقتي، فكري براحتك، مش هضغط عليكي ابدا، هسيبك براحتك حتى لو سنه"

فريدة بصتله، إيديها كانت بترتعش، صدرها بيطلع وبينزل بسرعه، قالت بتوتر

"شكرًا إنك قدرت موقفي... خصوصًا إن ده لا وقته ولا مكانه."

حسام قال وهو بيهز راسه بتفهم

"فاهم طبعًا، أكيد فاهم."

شال العلبه تاني وحطها في جيبه، والجو بقى ساكت للحظه.

تيم بص للأرض وهو بياخد نفس، وبعدين رفع عينه ليونس وسأله

"هتمشي؟"

يونس قال

"اه يلا بينا"

حسام قال بصوت هادي

"خدوني معاكم."

وخرجوا التلاته والجو بقى تقيل جدًا بعد ما مشيوا.

سالي ويسر كانوا واقفين جنب فريده، والصدمة باينه على وشهم، يسر كانت باصة على مكان حسام وبعدين بصت لفريده وقالت بصوت واطي

"هو... هو كان جدي بجد؟"

سالي قربت من فريده وقالت وهي بتحاول تخفف توتر فريده "إيه اللي حصل ده يا بنتي؟! عملتي في الواد ايه؟!"

فريدة مكانتش قادره ترد، خدت نفس عميق، بصت قدامها من غير تركيز، وشها كان متغير وملامحها فيها ارتباك، قالت بصوت واطي

"مش عارفه... والله مش عارفه"

يسر لمست إيد فريده وقالت

"إنتي كويسة؟ وشك شاحب."

فريده ابتسمت ابتسامه صغيره، وقالت

"أنا كويسة... بس الموضوع ده تقيل... تقيل جدًا."

يسر قربت أكتر، وشها فيه قلق حقيقي، وقالت بخفه

"طب إنتي... إنتي هتوافقي؟"

فريدة بصتلها بسرعه وقالت وهي بتاخد نفس

"معرفش... بجد... مش وقته دلوقتي" 

وبدون ما تبص في عيون سالي أو يسر، لفت بسرعه وبعدت، خطواتها كانت سريعه وهيا بتبعد عنهم، عن المكان، عن الأسئله، وعن الخنقة اللي بدأت تحس بيها

يسر رفعت إيدها كأنها هتوقفها

"فريدة..."

سالي بصت ليسر وقالت

"سيبيها... سيبيها دلوقتي."

عند تيم ويونس 

تيم كان سايق بسرعه، عينيه على الطريق وإيده ماسكه الدركسيون بقوه، ساكت وباصص قدامه.

يونس كسر الصمت وقال

"هو حسام يعرف فريدة منين أصلًا؟ يعني اتفاجئت."

تيم مردش، كان سرحان ومش معاه أصلًا.

يونس كمل

"مكنتش أعرف أصلًا إن حسام يعرف فريده، واتفاجئت بوجوده النهارده، وفوق كل ده فاجئني بعرضه! أنت اللي عرفتهم على بعض؟"

تيم لسه ساكت، فـيونس قال بصوت أعلى

"تيم؟!"

تيم رمش كأنه فاق من التفكير وقال

"ها؟"

يونس قال

"بقولك، أنت اللي عرفت فريده وحسام على بعض؟"

تيم هز راسه بالنفي وقال بجمود

"لاء."

يونس قال باستغراب

"أومال إزاي عرفها؟"

تيم قال وهو مركز في الطريق

"لما كانت بتجيلك شافها، وبالصدفه قابلها وهي خارجة من البيت، واتعرف عليها."

يونس قال بعد لحظه

"والله مش قليل وذكي لما بيحط حاجه في دماغه، تفتكر فريده هتوافق؟"

تيم قال بسرعه، بصوت هادي بس مليان جفاف

"ميهمنيش."

يونس ضحك بهدوء وقال

"أنا لسه في وضع الصدمه مود أون، متوقعتهاش بجد، حسام كويس بجد، لو وافقت هتكون محظوظه لانه مضحي في حبه وهو هيكون محظوظ لأن اكيد مفيش احسن من فريده"

تيم قال بحده وهو مركز قدامه

"بس بقى... كفايه كلام عنهم."

يونس بصله باستغراب وقال

"مالك؟ مش فاهم، الموضوع فاجئني..."

تيم مردش، سكت وزود سرعته فجأة، وكأنه بينهي الحوار تمامًا، ووشه كان متوتر.

عند فريده

لفت حوالين المكان شويه من غير هدف، كانت بتتحرك وسط الناس والأنوار والأصوات، بس دماغها مش هنا، دماغها متكتفة بالف سؤال، قلبها كان بيدق بسرعة، وإيديها كانت بتترعش، نفسها كان متلغبط، كل خطوة بتاخدها كانت بتحاول تهرب من الف سؤال بيرن في دماغها.

كانت بتحاول تلهي نفسها بأي حاجه المهم متفكرش، حست ان دماغها هتنفجر خلاص، بس كل شويه دماغها بتهرب، بتفتكر ضحكة حسام وهو بيعرض عليها تتجوزه، ووش تيم اللي كان باصص عليها بنظره غريبه هيا مش قادره تفهمها، ليه كان بيبصلها كده وليه عينيه كانت حاده كده، هزت دماغها بقوه عشان تبعد التفكير، وقالت لنفسها بصوت واطي

 "كفاية، كفاية بقا."

بتحاول تبعد عن التفكير بس من جواها كانت حاسه إن الهروب مش هيطول، وإن القرار مهما بعدت عنه، هيجي ويقف قدامها تاني، ومش هتعرف تهرب منه للأبد.

عند تيم ويونس

وصلوا البيت وتيم نزل من العربيه وهو ساكت، خطواته تقيله، دخل أوضته وقفل الباب وراه بهدوء، بس هدوء ما قبل العاصفه، قعد على السرير، حط كوعه على ركبته وإيده سندت راسه، عينيه ثابتة في الأرض بس دماغه كانت مليانه، صورة فريده اللي عمرها ما غابت من باله، صوت حسام وهو بيقول "تتجوزيني" وابتسامته المستفزه، نظرة فريده وقتها، كل حاجه بتلف في دماغه بسرعه، قلبه كان بيدق بسرعه جدا.

الأفكار كانت كتير، وصوت في دماغه بيزن

هتوافق؟ 

هتكون ليه؟ 

هتتجوزه فعلا؟

مد إيده فجأة وحدف كل اللي كان جنبه على الكمود على الأرض، الكوباية، الموبايل، المفاتيح، كل حاجة وقعت بصوت عالي وكسرت الصمت اللي مالي الأوضه ووقفت أفكاره.

وقف بسرعة، وشه كان أحمر وعيونه مليانة نظرة غريبة، لف عينيه حوالين الأوضة، وشال الأباجورة وحدفها بغيظ، وقع الكراسي، حدف الكتب، كسر كل حاجه، كان بيكسر كل حاجة حواليه مهما كانت، دمر الاوضه، نفسه كان عالي، كان بيحاول يطلع الغضب اللي جواه بس الألم فضل زي ما هو، حتى بعد ما كسر كل حاجه، وقف يتنفس بسرعه، ولما ملقاش حاجة تانية حواليه تتكسر، وقع على الأرض، قعد على ركبته، وحط رأسه بين إيديه، عينيه كانت حمره جدا وعروقه نفره.

خلصت حفلة الخطوبه اخيرا، الفرح والموسيقى اللي كانوا ماليين المكان بدأ يهدى، الوقت اتأخر وكل الناس مشيت.

فريده دخلت اوضتها وقفلت الباب وراها بهدوء، سندت ضهرها على الباب لحظه، خدت نفس عميق وغمضت عينيها وهي بتحاول تفرّغ دماغها من دوشة اليوم.

مشيت ناحية المراية، بصت لنفسها، كانت مبسوطة لاخوها وخطيبته بالرغم من احساسها في أول اليوم، قعدت على طرف السرير، شالت الحلق من ودنها ببطء، ورمته جنبها، لمت شعرها ومسحت الميكب، غيرت هدومها وحدفت نفسها على السرير بتعب، بس تعب نفسي اكتر من جسدي، مدت إيديها واخدت الموبايل، فتحته، فضلت تبص في الشاشة، بس مش عارفة تعمل إيه، لا عايزة تكلم حد ولا حتى عايزة ترد على أي رساله، رمت الموبايل جنبها تاني، لفت على جنبها، حضنت المخده بقوة وغمضت عينيها، كانت بتحاول تنام، بس دماغها مكنتش سايباها في حالها، حاجات كتير كانت بتخبط في بعضها جواها، وفي النص كانت بتسأل نفسها

"أنا عايزة إيه؟"

غمضت عينيها وسابت دماغها تغرق في الصمت اللي كان مالي الأوضه.

صابرين وسالي رجعوا البيت، كان الجو هادي جدًا، سالي دخلت وهي بتبص حواليها وقالت

"الدنيا ضلمة ليه؟"

صابرين حطت شنطتها على الكونسول، مدت إيديها وفتحت النور وقالت وهي بتبص حواليها

"يمكن ناموا... أكيد تيم نايم، ياريت يونس يكون في أوضته هو كمان."

سالي وقالت بخفه

"شوفيه إنتي، وأنا هشوف ياسين."

سالي مشيت وصابرين بصت للسلم، خدت نفس هادي وبدأت تطلع بخطوات بطيئه، وصلت قدام أوضة يونس، خبطت خبطتين خفاف وفتحت الباب

بصت جوا، الأوضه فاضيه كالعاده ومكركبه، اتنهدت وهي بتبص حواليها وقالت لنفسها

"كالعادة..."

قفلت الباب تاني بهدوء ولفت ناحية أوضة تيم، وقفت لحظة قدام الباب، مدت ايديها وفتحته براحه، اتصدمت وهي شايفة الكركبه والحاجات الكتير المكسوره، قلبها وجعها من المنظر، وقالت باستغراب 

"تيم، تيم في إيه المرادي كمان؟ ليه مكسر كل حاجة كده؟"

تيم رفع وشه، كانت عينيه حمرا من الدموع اللي كان بيحاربها، بصلها وقال بصوت مبحوح

"أنا مش عايز أشوف حد... اطلعي."

صابرين قربت خطوه وقالت بقلق وهي بتبص في عينيه

"في إيه حصل؟ قولي إيه اللي حصل يا تيم؟"

تيم صرخ فجأة بصوت عالي، صوته كان مكسور وهو بيقول

"اطلعي!! اطلعي وسيبيني!! اطلعي!!!"

صابرين حاولت تحط إيدها على كتفه بهدوء، لكنه بعد بسرعة عنها ولف وشه، وحط إيده على دماغه وهو بيحاول يسيطر على نفسه.

في اللحظة دي سالي دخلت الأوضة بسرعة وهي مصدومة، بصت حوالين الأوضة وقالت بزهول 

"إيه ده؟ في إيه؟"

تيم قام بسرعة، قال بصوت عالي

"اطلعوا! مش عايز أشوف حد! اطلعوا!"

صابرين بصت لتيم بخوف وبعدين بصت لسالي وقالت بحزم

"يلا يلا، سيبيه دلوقتي."

سالي اتلغبطت وقالت

"از..."

صابرين قاطعتها بسرعه

"مش وقته كلام يا سالي، يلا، اطلعي."

سالي خرجت وهي باصه لتيم بقلق، وصابرين طلعت وراها وقفلت الباب وراهم وسابوه لوحده.

سالي وقفت جنب صابرين في الممر، وكانت لسه مصدومة من اللي شافته، سألتها بصوت واطي وهي بتبص على باب أوضة تيم

"هو إيه اللي حصل يا ماما؟ مش كان كويس! في ايه ضايقه"

صابرين اتنهدت وقالت وهي بتحط إيدها على كتف سالي

"مش عارفة يا سالي... أكيد اتضايق من حاجة ومش عايز يقول"

سالي بصت على الأرض وقالت بهمس

"كان شكله مخضوض أوي... ووشه كان أحمر وعينيه..."

صابرين قطعت كلامها وقالت بنبرة هادية وهي بتحاول تسيطر على قلقها

"بصي، سيبيه دلوقتي... لما يهدا هبقي اشوف ماله، ابعتي حد ينضف الأوضة، عشان مينهارش أكتر."

سالي هزت راسها وقالت

"حاضر..."

بصت ناحية الباب للمرة الأخيرة قبل ما تتحرك، كانت حاسة بقلق جواها، بس اتحركت بهدوء علشان تنزل تبلغ حد ينضف الأوضة.

صابرين بصت لحظة لباب الأوضة وهيا حاسه ان الامور ممكن تخرج عن السيطره.

يوم جديد

كانت فريدة في شغلها، بتحاول تركز بس غصب عنها سرحانه، يسر قربت منها وهيا بتديها قهوه وقالت بخفه

"العروسة سرحانة؟"

فريدة رفعت عينيها بسرعه وقالت باستغراب وهيا بتاخد منها القهوه

"عروسة؟"

يسر ضحكت وقالت وهي بتشرب من قهوتها

"ما إنتِ أكيد بتفكري في الموضوع، ولا أنا خمنت غلط؟"

فريدة زفرت وقالت بصوت هادي

"عايزة أرفض، بس مش عارفة إزاي... يعني هو شخص محترم ومش عايزة أخسره كصديق، بس مش عارفة إزاي ممكن أرفض."

يسر سألتها وهي بتقعد قدامها

"هترفضيه علشان تيم؟"

فريده قالت بسرعه

"تؤ، تيم ملوش علاقة طبعًا"

يسر بصتلها وقالت بهدوء

"بس تيم..."

فريدة قاطعتها وقالت

"تيم أصلاً إنسان مش دوغري، وأنا مليش في اللي مش دوغري يا يسر."

يسر قالت وهي بتبصلها 

"بس حسام دوغري."

فريدة هزت راسها وقالت

"بس مش بحبه... مش هقدر أشوفه حبيب، يعني صعب."

يسر قالت بنبرة متفهمه

"فاهمه يا فريده، بس هو كان بيلمح كتير جدًا، وكان بيحاول يقرب وينبهك إنه موجود، يعني المفروض تكوني عارفه أنه هيعمل كده"

فريدة بصت بعيد وقالت

"عارفة، بس كنت بصده كتير في الأول ومازلت... مش هقدر أتجوز حد مش بحبه، ومش عايزاكي تقوليلي هتحبيه مع الوقت، طالما الشخص مش بحبه يبقى مش هقدر اكمل معاه"

يسر سألت بعد لحظة صمت

"طب... حبيتي تيم أصلًا؟"

فريدة سكتت شوية، أخدت نفس وقالت وهي بتبص على إيديها

"وهو إيه اللي يتحب في واحد سايكو... مريض نفسي ومش معترف حتى بده... معاملتي معاه مش حبًا فيه، بس يمكن كنت بحاول أخرجه من اللي هو فيه، بس انا بفكر بعقلي، فلاء"

يسر قالت بنبرة هاديه

"ولو هو بيحبك؟"

فريدة سكتت فترة أطول، عنيها ثابتة وقالت بهدوء "معتقدش... بس لو ده فعلًا حصل، هاخد بإيده لآخر مره... لو فضل رافض مش هقدر أعمل حاجة أكتر من كده، يمكن يكون في حاجه كبيره مخلياه كده"

يسر سألت

"طب... وحسام؟"

فريدة رفعت عنيها وقالت وهي بتتنهد

"أنا مش عارفه... أنا أول مرة أتحط في موقف زي ده، أنا مشوشه اوي"

في اللحظة دي دخلت عليهم داليا وهي شايله كرسي، قعدت قدامهم وهي بتقول بفضول

"الكلام على إيه؟"

فريدة بصتلها بسرعة وقالت بابتسامه صغيره 

"بنرغي... عادي يعني."

رجعت تبص قدامها، بس عقلها كان مشوش

عند ياسمين 

كانت في أوضتها قاعده على طرف السرير، متوترة ومستنية محمد، أول ما دخل رفعت عينيها بسرعه وقالت بنبرة جديه

"عايزة أتكلم معاك."

محمد قعد قدامها، حط إيده على ركبته وقال ببرود

"في إيه تاني؟"

قالت وهي بتاخد نفس

"أنا سيبت الشغل."

اتعصب، ملامحه اتغيرت وقال بسرعه

"ليه تسيبيه؟ ليه؟"

ردت بهدوء رغم توترها

"هرجع لو عايز... بس بشرط."

بصلها وهو بيشد على كلماته وقال

"إيه شرطك؟"

قالت وهي بتبص في عينيه

"الشقة اللي فوق."

رفع حواجبه وقال

"مالها؟ عايزانا نطلع نقعد فيها؟ مش قولتلك قبل كده ورفضتي."

قالت بنبرة ثابته

"ولسه عند موقفي... أكيد مش هقعد في الشقه اللي أختي كانت هتتجوز فيها يعني."

اتنفس بغيظ وقال 

"وجيبتي سيرتها ليه دلوقتي؟"

قالت بحده

"أمك وأخواتك هما اللي يطلعوا يقعدوا فيها."

محمد بصلها بذهول وقال بنبرة عاليه

"إنتي بتستعبطي؟ يعني إيه اللي بتقوليه ده؟"

قالت وهي بتشد على كلامها

"ده اللي عندي... أنا مش عايزه أبقى محصورة كده ومش واخدة راحتي... إنت أدرى."

محمد قال وهو بيحاول يمسك أعصابه

"بس مش هينفع، دي شقة أمي."

ردت بسرعه

"هو أنا بقولك ارميهم في الشارع؟ أنا بقولك خليهم يطلعوا فوق بس."

قال بغيظ

"وإنتي متخيلة إنهم هيوافقوا يعني؟ مستحيل."

قالت بنبرة حاده وهي بتبصله بدلع

"ده دورك... يا إما كده، يا إما تشوفلك مكان تاني تنام فيه غير الأوضه هنا... وأنا هفضل في أوضتي، مش هخرج منها... ومش هنزل أشتغل، واكون وقتها براحتي"

قامت وقفت، بصتله بنظرة قوية قبل ما تلف، وسابته قاعد في مكانه، عينيه مليانة غضب وحيرة، وهو مش عارف يرد عليها ولا يسيطر على الموقف.

عدى حوالي أسبوع

فريده في أوضتها، سرحانه، بتبص للسقف أحيانًا وللموبايل أحيانًا ، بتفكر ازاي تقول لحسام أنهم لو فضلوا صحاب هيكون احسن، لحد دلوقتي لسه مردتش على عرضه، وهو نفسه مرنش عليها ولا بعتلها رساله حتى وكأنه اختفى، استغربت، إزاي كل ده عدى وهو مكلمهاش؟ معقول رجع في كلامه؟ ولا اتضايق من ردها يومها؟

مسكت الموبايل، اسم حسام كان قدامها، متردده ترن ولا لاء، قبل ما تاخد قرار، شاشة الموبايل نورت، اسم سالي ظهر قدامها 

ردت بسرعه وقالت

"سالي؟"

سالي ردت بصوت متلغبط وسريع

"فريده! تيم فتح الباب أخيرًا... فتحه وفتح فعلًا... وطلع باب بجد!"

فريده قالت بهدوء

"طيب اهدي، ما إحنا عارفين، ده الطبيعي."

سالي صوتها كان بيرتعش

 "لاء... أنا بجد مش مستوعبة... ومش عارفة حاسه بإيه... بس خايفه"

فريدة قالت بهدوء

"ده طبيعي... المهم، فتحه إزاي؟"

سالي قالت بسرعه

"في خاتم... الخاتم اللي مش بيقلعه أبدًا، هو اللي فتح بيه الباب... الخاتم ده جواه شفره بتفتح الباب، وبعدها بتدخلي الباسورد وبيفتح عادي."

فريده سألت بتركيز

"ومعاكي الباسورد؟"

سالي ردت بسرعه

"آه... أكيد اخدته وسجلته عندي... بس ناقص الخاتم نفسه علشان نقدر نفتح الباب."

فريدة قالت بتفكير

"إنتي بتقولي إنه لابسه علطول؟"

سالي قالت

"آه... مش بيقلعه أصلًا."

فريدة زفرت وقالت

"طب والعمل؟"

سالي قالت وهي متوتره

"مش عارفة... حاسه دماغي وقفت."

فريده قالت

"كده لازم تاخدي الخاتم منه، وهو لازم يكون موجود وقتها في البيت، و... هيكون بالليل طبعًا، فكل حاجه هتكون عليكي إنتي."

سالي قالت بسرعه

"فريده.. لاء... مش هدخل من غيرك، مستحيل، هتيجي معايا."

فريدة قالت بصوت هادي

"إزاي يعني؟ الحوار بقى أصعب."

سالي قالت بإصرار

"عادي... هتيجي يا فريده."

فريده قالت

"طيب... نفترض إني هاجي... وتيم ومامتك والخاتم نفسه... وندخل أوضته وهو موجود؟ صدقيني الحوار صعب."

سالي سكتت لحظة وبعدين قالت

"تيم... ممكن أحطله أي منوم قوي، وآخد منه الخاتم وهو مش هيحس بأي حاجه"

فريدة قالت

"فكره... طب ومامتك؟"

سالي قالت بسرعه

"ماما مش مشكلة أصلًا يا فريده... المشكلة كان تيم... وبعدين إحنا محتاجين تلت ساعه، بالكتير نص ساعة مثلا، يعني مش حوار."

فريدة قالت

"تمام... هتخلصي الحوار ده إمتى؟"

سالي قالت

"بكره لو تحبي."

فريدة قالت بعد تفكير

"طيب... اتفقنا، ابقي رني عليا وأنا هاجي."

سالي قالت بنبرة امتنان

"هتعرفي تيجي يعني؟"

فريدة قالت

"آه... عادي، محدش هيقولي حاجة يعني أو يهتم"

وقفلت المكالمه، فريدة رجعت تبص للموبايل، واسم حسام كان لسه ظاهر قدامها بس قفلت الفون، عقلها كان رايح لحاجة أكبر من اللي كان شاغلها من شويه.

يونس كان قاعد مع أصحابه، الجو هزار وضحك كالعاده، صاحبه قال

"يا عم متضحكش علينا… ده حتى في واحده كرفِتلك يعني."

يونس بصله ببرود وقال

"كرفتلي؟ أنا؟"

صحبه قال وهو بيضحك 

"آه يا عم، مفيش حد كرفلك غيرها… شكلها بنت تقيلة عليك."

يونس اتحرك في مكانه وقال بنبرة متحديه

" قصدك على اي بنت؟"

صاحبه قال

"انت مقولتش اسمها، بس اللي شغاله في مستشفى دي"

يونس ضحك بس ضحكة نصها استفزاز وقال

"آه… يسر."

يونس مسك التليفون وفتحه وقال بثقة وهو بيبص في الفون

"بص… مفيش حد بيكرفلي، وأنا لو عايز أجيبها… هجيبها، فاهم؟"

صحبه قال بتحدي

"تجيبها يعني؟ إنت متأكد؟"

يونس مسح على دقنه وقال

"متأكد يا معلم، واعتبر ده تحدي… بس أنا اللي هسحب عليها بعد ما أجيبها، لأنها متستاهلش حد زيي أصلا."

صحبه بصله وهو مبسوط من التحدي وقال

"طب خلاص يا نجم… ورينا شطارتك."

يونس ضحك وهو بيقول

"هتشوف."

تاني يوم

خرجت فريده من المستشفى بعد يوم طويل، وقفت برا وهي بتاخد نفس عميق قبل ما تركب عربيتها، مسكت موبايلها ورنت على إسلام.

رد بسرعة وقال

"ايه يا ديدا؟"

قالت بنبره هاديه بس فيها حده بسيطه

"إسلام، سالي كلمتني وقالت إنها محتاجاني ضروري، وأنا هتأخر شويه"

رد عليها بسرعه وصوته فيه قلق

"إزاي يعني دلوقتي؟ وكمان المكان بعيد يا فريده!"

قالت بنفس النبره

"هيا كلمتني وقالت محتاجاني، وأنا مش هقدر مروحش."

اتنفس بعمق وقال بصوت حاد

"مش هينفع... لاء طبعًا."

اتنرفزت وقالت بسرعه

"بس هي محتاجاني يا إسلام، ساعه بالضبط وهكون مخلصه مش هطول، حاجه مهمه"

قال بهدوء وهو شايف اصرارها

"طيب... بس أنا هاجي أخدك"

قالت بملل

"بس يا إسلام، أنا معايا عربيتي..."

قال بتحذير

"مش شغلي يا فريده، متمشيش من هناك غير لما اجي أخدك بنفسي، مفهوم؟"

سكتت لحظه، وبعدين قالت بهدوء رغم ضيقها

"ماشي."

قفلت معاه وركبت عربيتها ومشيت، كانت سايقه وهي بتحاول تهدي تفكيرها قبل ما توصل لسالي.

في نفس الوقت، تيم كان قاعد في أوضة مكتبه، قدامه اللاب، مركز فيه جدًا وعينيه مش بتتحرك من عليه، مش حاسس بأي حاجة حواليه، سالي دخلت بكوباية عصير وقالت بابتسامه خفيفه 

" جبتلك عصير" 

قال من غير ما يبص

" مش عايز"

قالت وهيا بتقرب

" بس انا عملتهالك انت مخصوص"

قال وهو لسه باصص على اللاب

"قولت مش عايز، أنا مطلبتش حاجة."

قالت وهي بتحط الكوباية قدامه

"خد بس رطب على نفسك، عصير طبيعي ومن غير سكر، إيه بقا."

رفع عينه وبصلها وقال بهدوء

"طيب يا سالي شكرًا، عندي شغل لو خلصتي كلامك."

قالت وهي بتخرج من الأوضه

"العفو... بالهنا."

خرجت سالي، كانت صابرين قاعده في الصالون، لابسة نضارتها وفاتحة التاب وقاعدة بتقرأ، سالي قعدت جنبها وقالت بنبرة فيها هدوء وهيا بتفتح موضوع صابرين مش بتحب تتكلم فيه

"بابا مش هيعمل عملية تانية؟ يعني مش هتحاولي تاني؟"

صابرين بصتلها من فوق النضارة وقالت

"حاولت كذا مره... بس مفيش فايده"

سالي قالت بسرعه

"يعني بابا هيفضل كده؟ أكيد في علاج، الدكتور آخر مرة كان قايل إنه ممكن يتعالج، وإنه اتعرض لجلطه وشلل بسبب حاجة ضايقته... بس إنتي قفلتي على الموضوع."

قامت صابرين من مكانها وقالت بصوت هادي

"أبوكي مش صغير... دي حاجة طبيعيه وبتحصل لناس كتير"

سالي قالت بسرعه وهيا بصالها

"والطبيعي إنه ميكونش بياخد الدوا بتاعه بانتظام؟"

صابرين وقفت لحظة وقالت بهدوء قبل ما تنسحب

"طبعًا بياخده بانتظام... بس يمكن نسيه مره ولا حاجه، تصبحى على خير."

مشيت صابرين وراحت على أوضتها، وسالي فضلت قاعدة في مكانها شويه، سرحانه وعينيها بتتحرك يمين وشمال.

بعد شوية خرج تيم من الاوضه، كان باين عليه التعب، سالي بصتله وقالت

"رايح فين؟"

قال وهو بيضبط ساعة إيده

"هطلع أنام."

قالت وهي بتحاول تخفف الجو

"بدري كده؟!"

قال بهدوء وهو بيبصلها

"عايز أنام... تصبحى على خير."

ردت عليه بسرعه وهي مبتسمه ابتسامه خفيفه

"وأنت من أهله."

بعد شوية وصلت فريده، وقفت قدام الباب ورنت على سالي قبل ما تدخل، سالي ردت بسرعه وقالت

"ادخلي يا فريده مستنياكي"

فريدة دخلت، كان باين عليها التوتر، بصت لسالي اللي كانت واقفه مستنياها وقالت

"إيه الأخبار؟"

سالي ردت بصوت واطي

"الخطه ماشيه... بس بجد أنا خايفه"

فريدة قالت وهي بتتنفس بسرعه

"وأنا مرعوبه."

سالي قالت بتوتر ملحوظ

"طيب هنعمل إيه؟ بصي ايديا بترجف ازاي"

فريدة سألتها بسرعه

"الخاتم فين؟"

سالي قالت

"لسه مجبتوش."

فريده رفعت عينيها وقالت

"طيب... هو تيم فين دلوقتي؟"

سالي ردت

"نايم في أوضته."

فريدة أخدت نفس وقالت وهي بتشد إيد سالي

"يلا نطلع... انتي تجيبي الخاتم، نفتح وندخل... قدامنا تلت ساعه ننجز فيها"

سالي بسرعة بعتت رسالة للهاكر علشان يجمد الكاميرات، وبعد ما جالها التأكيد، اتحركوا هما الاتنين ناحية أوضة تيم بهدوء.

فريدة قالت بصوت واطي بعد ما دخلوا

"هدخل الدريسينج... وانتي جيبي الخاتم."

سالي هزت راسها بخوف، قربت من تيم اللي كان نايم، قلبها كان بيدق بسرعه، شالت الخاتم من إيده وهي بتتشاهد بهمس، إيدها كانت بتترعش بس نجحت تاخده بالعافيه

دخلت بسرعه لفريده اللي كانت واقفة قدام الباب، سالي قربت والخاتم في إيديها، بصوا الاتنين لبعض، وبعدين بصوا للباب اللي قدامهم، نظراتهم كانت مليانة توتر.

سالي مدت إيديها لفريده بالخاتم، فريده اخدته منها وهي بتاخد نفس عميق، فريدة وقفت قدام الباب مباشرة، مسكت الخاتم كويس، قلبها كان بيدق بسرعه، قربت الخاتم من الباب، ودورته في المكان المخصص، سمعت صوت تك خفيف وهي بتلفه، بعدها ظهر مكان صغير علشان تدخل الشفره، الخاتم فتح من الجنب وطلعت منه الشفره الممغنطه، دخلتها في المكان المخصص، وبعد لحظة الباب عمل صوت تكه تانيه، نور صغير أحمر ظهر ومطلوب الباسورد.

فريدة بصت لسالي وقالت بهمس

"الباسورد يا سالي…"

سالي كانت مسجلة الباسورد على موبايلها، فتحته بسرعه وإيدها بتترعش، قالت الرقم بصوت واطي 

فريده بدأت تدخله بسرعه، وكل رقم بتدخله كان قلبها بيدق أسرع، ولما دخلت آخر رقم، لمبة خضرا نورت على القفل، وسمعوا كليك صغيره، والباب فتح بالكامل قدامهم ببطء.

بصوا لبعض بتوتر وخوف، نفسهم محبوس وقلوبهم بيدق جامد، الباب اتفتح.... واخيرا....

الباب اتفتح ببطء قدامهم، بصوا لبعض ودخلوا بهدوء، بخطوات محسوبه، اول حاجه شموها كانت ريحة تيم المميزه، الدنيا كانت ضلمه جدا، دخلوا اكتر

سالي همست بفزع

"مش شايفه حاجه خالص..."

فريده فتحت فلاش الكاميرا بسرعه، ظهر لمحات من الأوضه، لفت الفون يمكن يكون في نور تشغله، كان في زرار على الجنب، فريده مدت إيدها وشغلته، كان نور أبيض واضح، مش مزعج ومريح للعين، كشف المكان بشكل أوضح 

أول حاجة ظهرت قدامهم كانت لوحة كبيرة متعلقة على الحيطة، فريده كانت مرسومة فيها، تفاصيل وشها واضحة بشكل يخض، الملامح، الشعر، حتى اللمعة في عنيها، كانت كأنها صورة متصورة بكاميرا احترافية مش رسمه ابدا 

الاتنين وقفوا مكانهم مصدوومين.

سالي قالت بصوت متلغبط

"دي... دي إنتي يا فريده..."

فريده كانت مزهوله وهيا بتبص للوحه، كانت مصدومه وهي بتقرب بخطوات بطيئة من اللوحة، قلبها كان بيدق بسرعة، مدّت إيدها ولمست اللوحة بخفة، الملمس كان ناعم بس تفاصيل الرسم كانت واقعية بشكل مرعب.

قالت لسالي وهي بتهمس بانبهار

"ده... إزاي؟ التفاصيل دي... كأنها مطبوعة مش مرسومة..."

سالي كانت بتبص حواليها وعينيها بتدور في الأوضة، لمحت مكتب صغير عليه أوراق، قربت وقالت بسرعه

"الحقي يا فريده... هنا كمان!"

فريده سابت اللوحه وجريت عليها، لقت ورق كتير عليه رسومات ليها، أول رسمة شافتها كانت وهي لابسه الفستان اللي لبسته في خطوبة إسلام، التفاصيل كانت دقيقة بشكل يخلّي أي حد يتلغبط إذا كانت صورة ولا رسمة.

قلبت الورق بسرعة، لقت 4 رسومات تانية بفساتين مختلفة، دي نفس الفساتين اللي كانت بتقيسهم وقت ما راحت معاه تختار فستان لكتب كتاب يسر، حتى الإضاءة اللي كانت في المحل وقتها، كانت مرسومة في الخلفية.

فريده وقفت بتبص عليهم بانبهار وخوف، وشها كان بين الدهشة والقلق، وكل رسمة كانت بتوقع قلبها أكتر من اللي قبلها.

قلبت ورقة كمان، لقت رسمة ليها هي وحسام، واقفين جنب بعض في لقطة كانت فريده فاكرة إنها لحظة عابرة، بلعت ريقها بغصة، لمست الصورة بخفة وقالت بصوت واطي

"ده... إمتى رسم دي..."

سالي كانت واقفة جنبها، ووشها مش مصدق، قالت وهي بتبص حواليها

"هو أنا ليه حاسة إني في حلم... أو مش مستوعبة..."

فريده ردت وهي بتاخد نفس عميق

"أكيد مش أكتر مني..."

كانت بتقلب في الورق، لقت رسومات تانية ليها في حالات مختلفه، وهي بتضحك، وهي بتبص بعيد، وهي سرحانة، وهي متضايقة... كل حاجة كانت مرسومة بتفاصيل دقيقة مرعبه

سالي بصت حواليها وقالت

"في كمية أدراج هنا... أكيد فيهم حاجات تانية كتير."

فريده سابت الورق مكانه، وقالت بعد ما لفت حوالين نفسها وهي بتاخد نفس

"طيب... تعالي نشوف..."

سالي وقفت قدام الأدراج، عينيها بتجري على اللزق الأسود اللي مكتوب عليه سنين متتاليه من 2004 لحد 2025، أرقام واضحة ومترتبة بنفس الخط، بنفس الحجم، بنفس الطريقة المنظمة اللي كانت متوقعة من تيم.

سالي قالت بصوت واطي، فيها توتر واستغراب

"إيه الأرقام دي؟"

فريدة ردت وهي بتحاول تخبي ارتباكها

"كل السنين اللي فاتت... غالبًا..."

سالي مدّت إيدها ببطء، فتحت أول درج قابلها، كان مكتوب عليه 2019، سكتت لحظه وبعدين بدأت تقلب في الورق والصور اللي جواه.

أول صورة كانت صورة واضحة لواحده ست اول مره تشوفها، هيا مش عارفاها اصلا، لكن اللي شدّ انتباهها إن على أول صورة كان مكتوب بخط مرتب

رقم (10) وتاريخ 2019.

سالي قلبت الصورة اللي قبلها، كانت صورة بنت مختلفة، ملامحها حزينة شوية، ومكتوب عليها رقم (9) وتاريخ 2017،

واللي قبلها صورة تانية، ورا التانية، كلها بتواريخ مختلفة، كل صورة كان فيها أشخاص بأعمار وأشكال مختلفة، وتواريخ مترتبة، وكانت الأرقام بتنزل كل ما رجعت ورا في الصور بنفس الترتيب

كان فيه صمت غريب، إلا صوت قلبهم اللي بيخبط جوة صدرهم بشده 

سالي قالت بسرعه 

"فريده... صوري الورق ده بسرعة يا فريده"

فريدة طلعت الموبايل بسرعه من جيبها وبدأت تصور، واحدة ورا التانية، إيديها بتترعش بس بتحاول تظبط الكاميرا.

سالي راحت على اول درج اللي مكتوب عليه 2004، فتحته بحذر، أول رسمه شافتها، كانت غريبه، التفاصيل مش واضحة أوي، لكن الشكل العام معروف، الصورة كانت لتيم، ماسك قلبه بإيده وبيديه لصابرين، سالي شافت الرسمه اللي قبلها، لقت تيم قاعد وصابرين قاعدة لمستواه، كأنها بتتكلم معاه أو بتوعده بحاجه، واللي قبلها كانت صابرين بتحاول تلحقه وهو داخل البيت، باين عليه كان صغير وقتها.

سالي وقفت، نفسها بدأ يتقل، قلبها بيخبط، وعايزه تفهم ايه ده، بس قبل ما تشوف الرسمه اللي قبلها الموبايل رن بيعلن عن انتهاء الوقت اللي محددينه واللي رجعهم للواقع بسرعه.

فريده وسالي اتنفضوا من مكانهم في نفس اللحظه، فريده بسرعة قفلت الصوت وهيا بتقول 

" الوقت خلص"

سالي قالت وهي بتاخد نفس سريع

"لازم نخرج دلوقتي... دلوقتي حالًا يا فريدة..."

فريدة قالت وهي بتلم نفسها بسرعه

"استني بس ثانية... ثانية واحدة بس... اخر صوره"

سالي كانت وقفة، مش قادرة تتحرك للحظة، عينيها كانت لسه على صورة تيم وهو ماسك قلبه لصابرين، وبعدين بسرعة شدت نفسها وقالت

"يلا...بسرعه"

فريده كانت لسه بتصور آخر ورقه، قلبها بيدق بسرعة، بصت لسالي وقالت بهمس

"ثانية... بس ثانية أخيرة."

سالي قالت بإصرار وهي بتسحب الموبايل من إيديها

"مفيش ثانيه، يلا نرجع كل حاجة مكانها بسرعة."

قفلوا الأدراج بسرعه وحسّوا إن كل ثانيه بتعدي أطول من اللي قبلها، فريدة قالت وهي بتبص حوالين الأوضة قبل ما تخرج

"اتأكدي من كل حاجه.. متخليش أي أثر لينا..."

سالي عملت مسح سريع بنظرها، وقالت وهي بتخرج من الباب

"تمام كده، يلا"

خرجوا من الأوضة بسرعه، فريده قفلت الباب وراهم بنفس الطريقة اللي فتحته بيها، ايديها بتترعش وقلبها بيدق بسرعه

سالي بصتلها وقالت

"كده تمام؟"

فريده أخدت نفس وقالت

"تمام... يلا"

خرجوا من الدريسينج، سالي قربت بهدوء من تيم اللي كان نايم، بصت عليه وهو نايم، وشه هادي جدًا، ملامحه في هدوء غريب، نفسه منتظم، اللحظة كانت تقيلة على قلب سالي، وفريده كانت واقفة من بعيد، بتبص على تيم، قلبها كان بيتشد ليه، حسّت للحظة إنها عايزة تجري عليه وتحضنه.

بمجرد ما سالي رجعت الخاتم مكانه بنجاح، بصت بسرعة لفريده وقالت بهمس مرتعش

"يلا... بسرعه."

فريده هزت راسها وهي بتاخد نفس طويل مليان خوف وراحة في نفس الوقت، بصت على تيم للمره الأخيرة قبل ما تخرج

خرجوا بسرعة من الأوضه، وبمجرد ما خرجوا اتنهدوا بعمق في نفس اللحظة، كأنهم بيطلعوا كل الخوف اللي كان محبوس جواهم.

نزلوا الصالون، سالي قعدت بسرعه على الكنبة وهي بتاخد نفسها بصعوبة، قالت لفريدة بصوت متوتر

"فريدة... انتي... انتي فهمتي حاجة من اللي شفناه فوق؟ أنا حاسة إني في حلم... أو في فيلم غريب، مش قادرة أستوعب، حاسه في حوار، وحوار كبير"

فريدة قعدت جنبها، بلعت ريقها وقالت

"مش... مش عارفة يا سالي، بس اللي شوفناه فوق حاجه عمري ما توقعتها بجد، واضح أنه مش بني ادم عادي، مش قادره افهم "

سالي رفعت وشها بسرعة وقالت

"إيه الرسومات دي؟ والسنين دي كلها؟ والناس اللي مرسومين... وتاريخهم... ايه كل ده؟ ملحقتش افهم"

فريدة اتنهدت وقالت

"الله أعلم... يمكن كانت طريقته الوحيدة إنه يحتفظ بالحاجات اللي بتحصله... أو يمكن بيحاول يفهم نفسه... أو يمكن..."

سكتت لحظة وقالت

"يمكن الموضوع أكبر من اللي احنا فاكرينه وفي حاجه كبيره شافها في الماضي أثرت عليه ورسم حياته تدريجيا "

سالي قالت بسرعه

"بس... انتي كنتي مرسومة كتير... كتير جدًا يا فريدة... ليه؟"

فريدة رفعت عينيها وبصتلها وقالت بصوت مخنوق

"مش عارفة يا سالي... مش عارفه"

سالي عضت شفايفها وقالت بعد لحظة صمت

"أنا ملحقتش أشوف كل حاجة... كنت لسه عايزة أعرف أكتر."

فريده ردت وهي بتقلب في الموبايل

"أنا صورت الناس اللي مرسومه... بس برضو مين دول؟ أو نقدر نعرف مين دول ازاي؟"

سالي قالت، صوتها مليان توتر

"وبرضو... تيم وهو بيدي قلبه لماما... يعني إيه؟ هيا قالتله إيه خلاه يعمل كده؟ أنا مش فاهمة... وملحقتش حتى أكمل"

فريده رفعت عينيها وقالت

"ده إيه ده؟ ده كمان كان مرسوم؟!"

سالي هزت راسها وقالت

"آه... كنت عايزة أكمل، بس ملحقتش ومكنش ينفع نفضل "

فريده قالت بهدوء

"إنتي عرفتي الطريقة خلاص..."

سالي زفرت وقالت

"بسهولة كده؟! ده أنا كنت بموت من التوتر... كنت حاسة إني بسرق بنك! مش هقدر أعمل كده تاني ولوحدي"

سكتت لحظة وقالت وهي بتبص للأرض

"هل لو قلت لتيم اللي عملناه... ممكن يحكي؟ يمكن لما يعرف إننا شوفنا كل ده..."

فريده قالت وهي بتقفل موبايلها

"هسأل ايه، بس دلوقتي الأول نحاول ندور على الناس دي، يمكن نفهم حاجة."

سالي قالت وهي بتفرك ايديها

"يمكن لو كنا فتحنا الدرج اللي قبله... كنا فهمنا أكتر."

فريده قالت

"بس خلينا في اللي معانا الأول... مين دول؟ وإيه اللي حصلهم؟"

سالي قالت بتردد

"نسأل آيه، هيا أدرى."

فريده قالت وهي بتبص في ساعتها

"طيب... هكلمها بكره ،أنا همشي دلوقتي عشان متأخرش أكتر."

سالي قالت بسرعه

"استني... هخلي السواق يوصلك."

فريده قالت

"معايا عربيتي."

سالي قالت بهدوء

"طيب... خلي بالك."

قبل ما فريده تتحرك، سالي نادتلها بسرعه

"فريده؟!"

فريده بصتلها، فسالي قالت بهدوء

"أظن... صدقتي دلوقتي... إن تيم بيحبك."

سكتت، وبعدين بصت بعيد قبل ما ترد

"تصبحي على خير."

خرجت فريدة من البيت، ركبت عربيتها، وقلبها لسه مشغول بكل اللي شافته، إزاي كان بيرسم ملامحها بالدقة دي؟ للدرجة دي حافظ تفاصيلها؟ للدرجة دي مركز معاها؟

كانت سايقة وسرحانة، في وسط شرودها رن فونها وكان اسلام

ردت بسرعة وقالت

"ألو؟"

إسلام قال بضيق 

"لسه كل ده؟"

قالت وهي بتحاول تكون هاديه

"أنا خلاص مشيت"

صوته علي شويه وقال

"ليه أنا مستني اتصالك؟"

قالت وهيا بتتنهد

"مفيش داعي تيجي، أنا معايا عربيتي خلاص"

إسلام اتنفس بحده وقال بعصبيه

"إنتي بتهزري؟ إزاي تيجي لوحدك من مكان بعيد بالليل؟"

قالت ببرود وهي بتنهي المكالمه

"خلاص يا إسلام"

وفصلت الخط، بس رن تاني، بصت للموبايل بغيظ، ردت ببرود

"نعم؟"

قال بصوت حاسم

"إنتي فين بالظبط؟"

سألت

"ليه؟"

قال بسرعه

"اخلصي إنتي فين؟"

قالت اسم المكان اللي هي فيه، فرد بسرعه

"طيب، هقابلك في الطريق بأوبر"

قالت بنبرة ضيق

"إسلام صدقني، مفيش داعي"

قال بنبره قاطعه

"فريدة، جاي هقابلك في الطريق"

وفصل الخط.

اتنهدت بملل، رمت الموبايل جنبها، ضغطت على دواسة البنزين، وسرّعت عربيتها أكتر، وبرغم هدوء الشارع بس دماغها كانت مليانة دوشة، كل شويه تتخيل الرسومات قدامها وبتسأل نفسها

"إزاي قدر يرسمها كده؟ إزاي حافظ تفاصيلها للدرجة دي؟"

سرّحت عن الطريق ثانية، بس فوقت بسرعه وضغطت فرامل.

في اللحظة دي، رن فونها تاني، بصت ع الاسم وكان اسلام، اتنهدت وردت

"أيوه؟"

إسلام كان صوته هادي بس فيه نبرة جديه

"فينك دلوقتي؟"

قالت وهي بتلف بعربيتها

"عديت على المحطة خلاص، فاضل عشر دقايق وأكون على الطريق الرئيسي"

قال

"تمام، أنا كمان قربت أوصل، خلي بالك"

" سلام"

دخلت على الطريق الرئيسي، وبعد دقايق، لمحت نور أوبر على جنب الطريق، وإسلام واقف مستني.

هدت السرعة، وقفت العربية، نزلت من العربية، اسلام قرب منها وقال بنبرة فيها عتاب خفيف

"هتفضلي تعاندي لحد إمتى، ها؟"

فريدة قالت ببرود 

"خلصنا؟"

إسلام قال وهو بيشاور على العربيه

" اركبي"

ركب مكانها وهيا ركبت جنبه بهدوء، اتحرك بالعربيه وهيا سندت راسها على الإزاز، وعينيها كانت شاخصة على الطريق قدامها.

إسلام بصلها وقال بهدوء

"مالك؟"

ردت بسرعه

"مفيش، عادي."

بص قدامه تاني وسأل

"سالي كانت عايزاكي في إيه؟"

ردت

"حاجة تخصها، مش هقدر أقولها."

إسلام رفع حاجبه وقال 

"بس شكل الحاجة دي مأثرة عليكي جامد اهو."

فريدة قالت بنبرة خافتة

"متهيألك."

إسلام قال بخفه

"يعني أنا مش حافظك مثلاً علشان تكذبي عليا؟"

سكتت، بعد لحظة قال بنبرة هاديه

"فريدة، متسيبيش نفسك للتفكير لوحدك... متنسيش إني موجود، ودايمًا كنتي بتقوليلي كل حاجة بتحصل معاكي... بس للأسف، بقيت كل ما بقرب منك، بتبعدي... عمرك ما كنتي كده."

فضلت ساكتة شوية، وبعدين ردت وهي بتبص من الشباك

"لأني مش فاهماني أصلاً يا إسلام... بس أوعدك، لما أفهم نفسي، هبقى أقولك."